Read Awing Matyo 14 Bible Online

Matyo 14 - Awing bible

Matyo 14

¹Əghâ yi wɨ́, Ɛlɔd páʼ a nə ḿbə́ nə́ əfo Mboʼ Galili a zóʼə atsáb ńté Yeso.

²Ńtíʼ ə́sóŋə á mbô ngaŋə́faʼ əjí ńgə́, “Lɛ̌ pyádnə ḿbə́ Jɔn Əfɛ̂nkǐə; a pɨ nə́ ńjúmnə á nəwûə! Lə́ ghɛd ə́lə́ələ́ a túg mətəənə á mə́ ghɛd nə́ əkɨʼnəmə́nuə.”

³Ńté ńgə́ Ɛlɔdə a nə ḿbɛ́d tə ńgɛd pə́ waamə̂ Jɔn ńkwúd ńnéŋə á nkáʼə atsáŋ ńté Ɛlɔdyas páʼ a nə ḿbə́ nə́ ngwě ndim yi Filibə.

⁴Ńté ńgə́ Jɔnə a nə ə́sóŋə Ɛlɔd ńgə́, á kě koʼnə̂ á mbô yə́ mə́ zɔ́ʼ nə́ Ɛlɔdyas pô.

⁵Ɛlɔdə a nə ḿbǎtə ńtə́ ńdoonə̂ mə́ jwítə nə́ yí lə́ ḿbə́ ńtə́ ḿbɔ́gə Pəjusə.

⁶A nə ḿbɛn ḿbə́ alě Ɛlɔdə a nə ńtə́ nə́ ńgɛlə̂ dína ńté alě pə́ nə ḿbî nə́ yí lə́, mɔ́ Ɛlɔdyas yi məngyě a yǐ ḿbɛ́nə apɛ́nə a mbi ŋwu ntsəm anu yəwə́ á kwíʼnə ḿbɔŋə̂ Ɛlɔd lɛ tətə

⁷a tíʼ ńdaʼnə̂ yí tə pó yí wad əka ńgə́ Ɛlɔdə a yǐ fɛ̂ ajúmə atsəm nə́ yí páʼ a pítə nə́.

⁸Mǎ əyǐə a toʼkə̂ yí ńgə́ a ghɛn sóŋə á mbô Ɛlɔd ńgə́, “Fɛ̂ atûə Jɔn Əfɛ̂nkǐə á mbô maŋ əghâ nə́ á mə́mə apagə akáŋə!”

⁹Əfo yi wə́ a nə fɨnə̂, lə́ əka páʼ a nə ḿbɛ́d nə́ tə ńgwaalə̂ áwɨ́d pó mɔ̂ məngyě wə̂ a mbi ngaŋnə́ghá əjí ə́ ghɛlə̂ a sóŋ ńgə́ pə fɛ̂ zə́ələ́ á mbô yə́.

¹⁰A tíʼ ńgɛd pə́ lə́gə atûə Jɔnə a nkáʼə atsáŋə.

¹¹Pə́ nə ńgyǐ nə́ atûə Jɔnə á mə́mə apagə akáŋ ə́fɛ̂ nə́ mɔ̂ məngyě wə̂ a tíʼ ńdɔg ńgɛn fɛ̂ á mbô mǎ əyǐə.

¹²Ngaŋə́zoŋə́ndzəm Jɔn yǐ ńdɔgə̂ akwûə ají ńgɛn ńtwə́ŋ ńtíʼ ńgɛn fiʼtə̂ Yeso.

¹³Əghâ ándó Yeso a nə ńdzóʼ nə́ anu páʼ a laŋ nə́ nə́ Jɔn lə́, ə́fɛ́lə aliʼ yi wɨ́ yí təjiʼ ńkwúnə aŋkənúʼə́ ńgɛnə̂ aliʼ páʼ ŋwunə a kě nə́ ə́wɨ́ chî pô. Ndzaŋə ándó apoŋə pɨ zə́ á kə zóʼ nə́ ńgə́ a kwúnə aŋkənúʼə́ ńgɛnə̂ yí lə, ə́fɛ́d ḿmɛdtə̂ əláʼ pɔ́b ńdzoŋə̂ yə́ a məkoolə.

¹⁴Yeso a fɛ́lə á mə́mə aŋkənúʼə́, ndzaŋə a kə jɨ́ nə́ apoŋə pɨ lə́ ńtúgə akóolə́mə́lə́ŋə á mbô pó ńtíʼ ńtsóʼ məghɔ móobə́.

¹⁵Ndzaŋə ándó nkwanə́ kə koʼ nə́ lə́, ngaŋə́zoŋə́ndzəm əjí yǐəə á mbô yí sóŋ ńgə́, “Ndɛd pɛ́d tə ńgɛnə̂, lɛ̌ kə́ ḿbə́ aliʼə́ tə ŋwunə. Ghɛlə̂ apoŋə pɨ zəənə́ á ghɛnə̂ á mə́m əláʼ ə́ páatə nə́ ńjî ńgə́ pó jú məjî móobə́.”

¹⁶Yeso a kwěe ághɔ́b ńgə́, “Pó kě chîə mə́ ghɛn nə́ pô. Fɛ̂ nə́ ajú pó jîə!”

¹⁷Pó kwěe ńgə́, “ndaʼə ajú ə́ chî nə́ á mbô pəgə́ aliʼə́ nə lə́ tsɔʼə apéenə məkálə́ ntáʼ tâ nə́ əshû ntáʼ pɛ̌.”

¹⁸Yeso a sóŋ ńgə́, “yǐ nə́ fɛ̂ nə́ maŋə.”

¹⁹A tíʼ sóŋ ŋwu ntsəmə a náanə a ndəsê a ndu ngɔ́n, a tíʼ ńdɔgə̂ apá zə̂ ntáʼ tâ nə́ əshû zə̂ ntáʼ pɛ̌ ńnáŋ nəpó ə́fɛ̂ ndǎ á mbô Əsê, ḿbagtə̂ apá zə̂ ə́fɛ̂ á mbô ngaŋə́zoŋə́ndzəm əjíə. Ngaŋə́zoŋə́ndzəm əjí tíʼ fɛ̂ á mbô apoŋə pɨ zə̂.

²⁰Ŋwu ntsəmə a jî ńdzɛ́d tə ngaŋə́zoŋə́ndzəm əjí lagtə̂ əpuʼ nə ḿbɛ́d nə́ ə́ pə́ mənka ntsɔb pɛ̌.

²¹Mbyâŋnə nə ńjî nə́ məjî mimə wɨ́ lə́ nə ḿbə́ ándó pó tɔsə tênə ḿbɔŋə̂ pá pəngyě pópə pɔ̂nkə̂.

²²Yeso a tíʼ ńgɛd ngaŋə́zoŋə́ndzəm əjí kwúnə aŋkənúʼə́ ńkwá mbi ńtə́ ńtú nkǐ ńgɛnə̂ á ndzɛnə́, a tíʼ ńgɛlə̂ apoŋə pɨ zə́ á kwə́əkə.

²³Ndzaŋ a nə ńgɛd nə́ apoŋə pɨ zə́ kwə́əkə lə́, a tíʼ ńkɔ́ʼ ńgɛnə̂ a ndu nkwəənə a ngǎ yə́ á mə́ chaʼtə̂ nə́ əsê. A yǐ ḿbə́ ndɛd nkwanə́ Yeso a chîə alíʼ yi wə́ a ngǎ yə́.

²⁴Əghâ yi wɨ́ lə́, aŋkənúʼə́ a chîə á mə́m nkǐ tə ndi sagə̂, nkǐ tíʼə ńtóʼnə ńtwáamə aŋkənúʼə́ ńté ńgə́ kəfəələ a nə ńtə́ ńkɔ́ʼə á ndú páʼ aŋkənúʼə́ á chî nə́ ə́wə́.

²⁵A nə ḿbɛn ḿbə́ ándó pəmə́nu pɛ́n nəkwa a ndú mbî, Yeso a fɛ́d ńnyinə̂ a ndu nkǐ ńgɛn ńtég ngaŋə́zoŋə́ndzəm əjíə.

²⁶Ndzaŋ ngaŋə́zoŋə́ndzəm əjí nə ńjɨ́ nə́ yə a tə ńnyinə̂ a ndu nkǐ lə́, pó pɔ́g lɛ tətə ńtíʼ sóŋ ńgə́, “Lə́ nkwûsê,” apɔ́gə a ghɛd pó tíʼə ńkyéŋə nə́ tə́kɔʼ ngye.

²⁷Lə́ Yeso a tɔ́g sóŋə á mbô po ńgə́, “Wam nə́ ńtɨ́ əwə́ənə́! lə́ maŋə. Kɔ nə pɔ́gə!”

²⁸Pita a sóŋ ńgə́, “Mmaʼmbî, mbɔʼ lə́ lánə ḿbə́ gho, gho ghɛd maŋ nyinə̂ a ndu nkǐ ńgyǐ ńtégə gho.”

²⁹Yeso a sóŋ ńgə́, “yǐəə” Pita a tíʼ fɛ́lə á mə́mə aŋkənúʼə́ ńchúʼə á mə́ nyi nə á ndu nkǐ ghɛn tégə Yeso.

³⁰Ndzaŋə ándó Pita a nə ńjɨ́ nə́ kəfɨd lə́, ḿbɔ́gə, ńtíʼ ńchúʼə á mə́ mɛ́d nə́ á mə́m nkǐə. Ńkyéŋ sóŋ ńgə́, “Mmaʼmbî chwádkə mə!”

³¹Yeso a kə́ ńtɔ́g ńnɛdkə̂ apô ají ńgwaamə̂ yí ə́wɨ́ ə́sóŋ ńgə́, “Mbimə́ əzo chígə́ ńkə́g lɛ̌ ə́lɛ́? Lə́ pěʼ ńgɛlə̂ akə̂ atûə azô a koʼlə̂?”

³²Əghâ ándó pó yí nə ńkwú nə́ á mə́mə aŋkənúʼə́ lə́, kəfɨd wə̂ a měe yə́.

³³Ngaŋə́zoŋə́ndzəm Yeso páʼ ə́ pěʼ nə́ ńchîə á mə́mə aŋkənúʼə́ tíʼ ńgóʼkə yí ə́sóŋ ńgə́, “Lə́ ndə̌ŋdəŋə́, gho lə́ Mɔ́ Əsê.”

³⁴Ndzaŋə ándó pó nə ńtú nə́ nkǐ lə́, ńkoʼə̂ a Jɛnɛsɛlɛlə.

³⁵Ndzaŋə ándó ngaŋə́láʼ yi wɨ́ nə ńdeŋ nə́ Yeso lə́, ńtíʼ ńtú nkɨ nə́ əláʼ ətsəm ə́ páatə nə́ ághóobə́. Pɨ pə́ yǐ nə́ pəghɔ póobə́ a mbô yí

³⁶ńtíʼə ḿbóʼmbô nə́ yí ńgə́ a tíʼ pəghɔ pi wɨ́ pə́ kwum tsɔʼə nəlwî nə́ atsəʼə́ ajíə. Ŋwu ntsəm páʼ a nə ńkwum nə́ zə́ələ́, a nə ńgyáŋə.