Read Awing Matyo 15 Bible Online

Matyo 15 - Awing bible

Matyo 15

¹Pəfalasi pətsə́ pópə ngaŋə́zéʼkə pənoŋkə tíʼ ńdǒ Jɛlusalɛm ńgyǐ ḿbítə Yeso ńgə́,

²“Lə́ ghɛlə̂ akə̂ ngaŋə́zoŋə́ndzəm əzô kě pənoŋkə páʼ pətǎ pə́ pətǎ pə́g pə́ nə fɛ̂ nə́ á mbô pəg zoŋə̂ pô? Pó kě mbô mɔ́b sogə̂ ḿbɔŋə̂ jîə məjî pô!”

³Yeso a kwěe ághɔ́b ńgə́, “Lə́ kə́ ńgɛlə̂ akə̂ nə́ kě məntəgə́ mə́ Əsê zoŋə̂, ńdzoŋə̂ pə́ mbóomə aláʼ əwəənə́?

⁴Ńté ńgə́ Əsê a nə sóŋ ńgə́, ‘Ghóʼkə tǎ əgho pó mǎ əgho,’ ńkə́ ḿbɨ́ ńkə́ sóŋ ńgə́, Ŋwu ntsəm páʼ a tsáb nə́ təpɔŋ ńté tǎ əyǐ kəənə mǎ əyǐ pə shib ńjwítə yə́.

⁵Lə́, nə́ pə́ ńdzéʼkə ńgə́ mbɔʼ ŋwunə túgə ajú mbɔʼ a fɛ̂ nə́ tǎ əyǐ kɨ mǎ əyǐ ḿbə́ ḿbɨ fiʼtə̂ ághɔ́b ńgə́ a pɛ́dtə ńdaʼnə̂ mə́ fɛ̂ nə́ á mbô Əsê,

⁶lə́ələ́ pə́ ńgə́ a pěʼ ńkě chîə mə́ ghóʼkə nə́ tǎ əyǐ nə́ ajú yə wɨ́ pô. Lɛ̌ ndzaŋ nə myaʼ nə́ məntəgə́ mə́ əsê ńdzoŋə̂ a mbóomə aláʼ əwɨ lə̂.

⁷Pɨ ngaŋmə́fɨg! Izaya a nə ńkoʼnə̂ páʼ a nə fɛ̂ nə́ nkɨ Əsê ńté áwɨ́ ńgə́!

⁸Pɨ pɨ pə̈ ghóʼkə mə lə́ nə́ əkwub ntsoolə, lə́ məntɨ́ mɔ́b mə́ pə́ ńchî ndi sag nə́ maŋə.

⁹Pó ghóʼkə mə lə́ tsɔʼə kətaŋə, pö zéʼkə lə́ pənoŋkə páʼ ŋwunə a noŋkə̂ nə́ ándó pə́, pə́ pə́ pənoŋkə pə́ Əsê lə̂.”

¹⁰Yeso a tíʼ fóŋə apoŋə pɨ zə̂ á yǐ ḿbáatə yə́ a sóŋə á mbô pó ńgə́, “Jwə́ʼtə nə́ ńtsoŋkə̂ ńdzóʼə, atûə azə́ənə́ a léenə!

¹¹Ajú páʼ ŋwunə a jî nə́ a ntso yí, lə́ kě zə́ələ́ ä ghɛd nə́ ńgə́ kɔ a ŋwaʼə̂ a mbi Əsê pô. Ajú páʼ ä ghɛd nə́ ńgə́ kɔ ŋwunə a ŋwaʼə̂ a mbi Əsê lə̂ mənu páʼ mə̈ fɛ́d nə́ a ntso yə́.”

¹²Ngaŋə́zoŋə́ndzəm əjí tíʼ ńgyǐəə á mbô yí ḿbítə ńgə́, “gho jî ńgə́ pə Falasi pə́ pěʼ ńté ndzaŋ ndě nə anu gho pěʼ nə́ ə́sóŋ lə́?”

¹³Yeso a kwěe ághɔ́b ńgə́, “Atǐə atsəm páʼ lə́ nə ńkě nə́ Tǎ mə nəpó pǐ pô, pə́ yǐ tsɔ́ʼə ázə́ələ́.”

¹⁴Mɛdtə̂ nə́ ághóobə́! Lə́ pəfəg páʼ pə́ kwá nə́ mbi pəfəgə́. Təmbɔʼ əfəgə́ a kwá mbi əfəg pó yí pətsəm wǔəə á apɛ́lə.

¹⁵Pita a sóŋ ńgə́, “Fiʼtə̂ áwə́g nə́ anu páʼ atséebə́nə́múʼ zəənə́ ä sóŋ nə́.”

¹⁶Yeso a pítə ághɔ́b ńgə́ “Əpɨ́ ətû kě kə́ ńdá?

¹⁷Nə jî ńgə́ ajúmə atsəmə a kwú nə́ a ntso ŋwu a ghɛnə̂ nəpəm yí ńtíʼ fɛ́lə a mbɨ yí?

¹⁸Lə́ mənu mətsəm mə̈ fɛ́d nə́ a ntso ŋwu mə̈ fɛ́lə lə́ a ntɨ́ yə́. Ḿbə́ lə́ mənu mə̈ ghɛd nə́ ŋwunə a kě a mbi Əsê ŋwaʼə̂ pô.

¹⁹Ńté ńgə́ əkwaŋ mənu təpɔŋ ətsəm ə́ fɛ́lə lə́ a ntɨ́ ŋwunə ńtíʼə ńgɛlə̂ ńgə́ a jwítə, ńjîə mə̂ghabə, nyinə̂, ńdzəələ̂, ńtsɨ́d ntsəələ atû ŋwunə, ńtsəŋ əlɛ́n ŋwunə.

²⁰Lɛ̌ mənu mə̈ ghɛd nə́ ŋwunə a kě mbi Əsê ŋwaʼə̂ pô. Lə́, mə́ jî nə́ məjî tə sog mbô mə́ kě ghɛlə̂ ńgə́ kɔ ŋwunə a ŋwaʼə̂ a mbi Əsê pô.”

²¹Yeso a fɛ́lə aliʼ yi wɨ́ ńgɛnə̂ mboʼ Tayile po Sidɔnə

²²Məngyě kanan yitsə̌ a nə ńchî nə́ mboʼ wɨ́d wə̂ a yǐəə á mbô yí ńkyéŋ sóŋ ńgə́, “Kó mələ́ŋə mə Mmaʼmbî! Mɔ́ Debid! Pɛ̌sê a chîə á mbɨ móonə mə yi məngyě ḿbyádnə̈ ńjwaʼə̂ yə́.”

²³Lə́, Yeso a pə́ ńkě yí kwíʼnə ńkwěe pô. Ngaŋə́zoŋə́ndzəm əjí ə́ pə́ ńgyǐ ḿbóʼmbô nə́ yi ńgə́, “Kəmə̂ yə́ a ghɛnə̂! a tə ńdzoŋə̂ ńkyéŋə ńjwaʼ əliʼə́ á ndzəm pɛnə̂!”

²⁴Yeso a kwěe ághɔ́b ńgə́, “Pə́ nə ńtúmə mə lə́ tsɔʼə á mbô məmbéŋ mə́ ndzɛd mə́ Islɛl mə́ péŋ nə́.”

²⁵Məngyě yi wə́ a yǐ ńkwə́ʼtə á mbi Yeso ə́sóŋ ńgə́, “Mmaʼmbî, kwáalə mə!”

²⁶Yeso a kwěe yí ńgə́, “Á kě koʼnə̂ á mə́ kwá nə́ məjî mə́ pɔ̂nkə̂ ḿmaʼ nə́ məngwû pô.”

²⁷Məngyě yi wə́ a sóŋ ńgə́, “Lə́ anuə ḿbə́ Mmaʼmbî, lə́ á lǒo məngwû, mə́ jî əpag məjî ə́ lǒo nə́ á ndu təpɛlə tǎ əghɔb ńgwukə̂.”

²⁸Yeso a tíʼ ńkwěe yí ńgə́, “Məngyě nə́ gho túgə tə́kɔʼ mbimə́! anu gho lɔ nə́ lə́, pə́ yǐ faʼə̂ ázə́ələ́ á mbô gho.” Tsɔʼə əghâ yi wɨ́, mɔ́ əyǐ wə̂ a yáŋə.

²⁹Yeso a fɛ́lə aliʼ yi wɨ́ ńdaŋə̂ á mbɛnə́ mə́ nkǐ Galili ńtíʼ ńkɔ́ʼə á ndu nkwəənə ńnáanə á ndəsê.

³⁰Apoŋə pəənə a yǐəə á mbi yí nə́ pəkə́neʼə́ntá pópə pəfəg, nə́ pəkɔ́ŋə́sê, nə́ pəchípóʼ, ḿbɨ ḿbə́ nə́ ntê pəghɔ pətsəm ńnoŋkə̂ məko yə́ a tsóʼə ághóobə́.

³¹Á nə ńkɨʼnə̂ ŋwu ntsəm ndzaŋ pó nə ńjɨ́ nə́ pəchípóʼ pə́ tə́ ńtséebə, pəkɔ́ŋə́sê pə́ yáŋə, pəkə́neʼə́ntá pə́ tə ńnyinə̂, pəfəg pə́ tə́ ńjɨ́ əliʼə́. Po tíʼ ńgóʼkə Əsê pɔ́ pə́ Izlɛlə.

³²Yeso a fóŋ ngaŋə́zoŋə́ndzəm əjí ə́sóŋ nə́ pó ńgə́, “Maŋ kó mələ́ŋ mə́ pɨ pəənə́. Pə̌gpo pɛ́d tə ńchî lɛ̌ əlě teelə́ ajúmə á pə ńkě ə́wɨ́ chî təmbɔʼ pó jî pô. Maŋ kě kɔŋə̂ mə́ ghɛd nə́ pó ghɛn nə́ nji pô, tə ḿbə́ mbɔʼ pó yǒ ńgwǔ njiə alaŋə́.”

³³Ngaŋə́zoŋə́ndzəm əjí ə́ pítə yí ńgə́, “Pɛn yǐ lɔg məjî lə́ ə́fó á kɔŋ məŋkwâʼlə̌ ghɛn mbɔʼ pə́ zə́gə apoŋə pɨ zɨ ə́wə́?”

³⁴Yeso a pítə ághɔ́b ńgə́, “Nə túgə apéenə məkálə́ ntáʼ zɛ́n ə́shíʼə́?” Pó kwěe yí ńgə́, “Ntáʼ zɛ́nə asaambɛ̂ pópə pɔ́ pə́ ntáʼ pə́ əshûə.”

³⁵Yeso a tíʼ ńgɛd apoŋə pɨ zə̂ a náanə á ndəsê.

³⁶A tíʼ ńkwáalə apá zə̂ ntáʼə asaambɛ̂ pópə əshû zə̂ ə́fɛ̂ ndǎ á mbô Əsê ḿbagtə̂ ájɨ́d ə́fɛ̂ á mbô ngaŋə́zoŋə́ndzəm əjí pó tíʼ ə́fɛ̂ á mbô pɨ pipə wə́.

³⁷Pó pətsəm jî tə ńdzɛ́d, ngaŋə́zoŋə́ndzəm əjí ə́ tíʼ ńdagtə̂ əpag ə́ nə ḿbɛ́d nə́ ə́ lwɛ́nkə mənka mɛ́n asaambɛ̂.

³⁸Mbyâŋnə ə́ nə ńjî nə́ məjî mimə wɨ́ lə́ nə ḿbə́ pó tɔsə nəkwa, lə́ pə́ pə́ ńkě pəngyě pópə pɔ̂nkə̂ sháŋ pô.

³⁹Yeso a tíʼ ńgɛd apoŋə pɨ zə̂ a ghɛnə̂, a kwúnə á mə́mə aŋkənúʼə́ ńgɛnə̂ mboʼ Magadanə.