Read Awing Matyo 16 Bible Online

Matyo 16 - Awing bible

Matyo 16

¹Pəfalasi pópə pə Sadusi pətsə́ pə́ yǐ ḿmoomə̂ Yeso ə́sóŋ ńgə́ a nəələ̂ ághɔ́b nə́ akyeʼə́nuə á lǒo nə́ á nəpóolə.

²Yeso a kwěe ághɔ́b ńgə́, “Ndɛd nkwanə́ koʼ lə́, nə́ sóŋ ńgə́, ‘apeŋə́ mbîə á yǐ pɔŋ ńté ńgə́ nəpó nə́ tə ḿbaŋə̂,’

³á yǒ ńtíʼ ḿbə́ məsânə nə́ sóŋ ńgə́, ‘ntɨ sə́mə á yǐ laŋ mbəŋ ə́ lô ə́sɛ̂n ńté ńgə́ nəpó nə́ tə́ ḿbaŋə̂, alə́m páʼ á yǐ nə́ nə́ mbəŋə á kɔ́ʼə atǐə.’ Nə́ jîə á mə́ zɨ́ nə́ kə́ sóŋ mənu páʼ nəpó nə̈ nɨd nə́ ḿbə́ ńkě chî təmbɔʼ nə́ sóŋ mənu páʼ əkyeʼmə́nu ndɛd mbî jɨ ə̈ nɨd nə́ pô.

⁴Ngaŋə́ghɛlə təpɔŋ pópə pɨ pə́ tə jî Əsê pó pítə akyeʼə́nuə á mbô maŋə. Lə́ pə́ kě akyeʼə́nu yətsə́ á mbô pó yǐ fɛ̂ pô tə ńdéʼtə akyeʼə́nuə Jona.” Yeso a tíʼ ḿmɛdtə̂ ághɔ́b ńgɛnə̂ yə́.

⁵Ndzaŋ pó nə ńtú nə́ əfooghɨ tə ńkoʼə̂ a ndzɛnə́ lə́, ngaŋə́zoŋə́ndzəm əjí pěʼ ńdəgnə̂ mə́ lɔg nə́ apéenə məkálə́.

⁶Yeso a sóŋə á mbô pó ńgə́, “Lɔg nə́ ndɛd ńkə́ ńtsě atûə ajɨ́ nə́ mbê apá Pəfalasi pópə Pəsadusi.”

⁷Pó tíʼə ńtséebə a tətɨ pó ńgə́, “A sóŋə lɛ̌ ńté ńgə́ pɛn pěʼ ńkě nə́ apá yǐ pô.”

⁸Yeso a jîə anu pó nə̈ sóŋ nə́, ńtíʼ ḿbítə ághɔ́b ńgə́, “Lə́ ghɛlə̂ akə̂ nə́ tséebə á tətɨ pɨ ńgə́ nə́ kě apá túg pô? Mbimə́ əjɨ chígə́ ńkə́g lɛ ə́lɛ́?

⁹Atûə azə́ənə́ á kě kə́ léenə tə koʼ əghâ nə́? Nə́ kě tə́ ńkwúmtə apá zə̂ ntáʼ tâ á mbô pɨ tɔsə tâ ḿbɨ ḿbə́ nə́ ndɛn mənka páʼ pɨ nə ńdag nə́?

¹⁰Kɨ apá zə́ ntáʼə asaambɛ̂ á mbô pɨ pə́ tɔsə nəkwa ḿbɨ ḿbə́ nə́ ndɛn mənka pɨ nə ńdag nə́?

¹¹Lə́ ghɛlə̂ akə̂ atûə azə́ənə́ a kě lá ńgə́ maŋ pěʼ ńkě sóŋə lə́ anu ńté apéenə məkálə́ á mbô pɨ pô? Lə́, lɔg nə́ ndɛd nə́ mbê apá Pəfalasi pópə Pəsadusiə.”

¹²Ngaŋə́zoŋə́ndzəm əjí pó tíʼ ńtsoŋkə̂ ńdzóʼ ńgə́ a pěʼ ńkě ághɔ́b kwantə̂ lə́ ńgə́ pó lɔg ndɛd lə́ nə́ mbê pə́ lɔg nə́ ńgɛlə̂ apá ə́wɨ́ lə̂ pô. Lə́ ḿbə́ ńkwantə̂ ághɔ́b lə́ nə́ ndzeʼkə́ Pəfalasi pópə Pəsadusiə.

¹³Əghâ ándó Yeso a nə ńgyǐ nə́ a əlá aláʼ Sisalya Filipi lə́, ḿbítə ngaŋə́zoŋə́ndzəm əjí ńgə́, “Pɨ pə̈ sóŋə ńgə́ Mɔ́ Ŋwu lə́ əwə?”

¹⁴Pó kwěe ńgə́, “Pətsə́ pə̈ sóŋə ńgə́ gho lə́ Jɔn Əfɛ̂nkǐə, pətsə́ pə̈ sóŋə ńgə́ gho lə́ Elayija, pətsə́ pə́ pəənə̂ ə́sóŋə ńgə́ gho lə́ Jelemaya kɨ ntûsê yitsə̌.”

¹⁵A pítə ághɔ́b ńgə́, “Lə́ nə́ pəənə̂ ə́sóŋə ajɨ́ ńgə́ maŋ lə́ əwə?”

¹⁶Saamun Pita a kwěe ńgə́, “Gho lə́ yi páʼ Əsê a Tsəʼ nə́; Mɔ́ Əsê páʼ ə́ chî nə́ á mbîə.”

¹⁷Yeso a kwěe ńgə́, “Mbwɔ́dnə ə́ chîə á mbô gho, Saamun mɔ́ Jona. Ńté ńgə́ a gho nə́ anu jɨ lə́ kě ŋwu kyaʼ pô, lə́ kyaʼ Tǎ mə páʼ a chî nə́ nəpóolə.

¹⁸Maŋ pɛn ə́fiʼtə̂ gho ńgə́ gho lə́ Pita,[2] á ndu ngwúb ghɛn maŋ yǐ pɔ́ nkyeetə póonə mə ə́wɨ́, tə nəwûə á kě túg mətɨ mbɔʼ á tsɛɛlə̂ ághɔ́b pô.

¹⁹Maŋ yǐ fɛ̂ pəkî pə́ anuə nəfoonə nəpóolə á mbô gho. Ajúmə atsəm páʼ pə́ kwúd nə́ á ndu mbî, pə́ yǒ kə́ kwúlə zə́ələ́ á nəpóolə, ajúmə atsəm páʼ pə́ kyag nə́ á ndu mbî, pə́ yǒ kə́ kyagə̂ zə́ələ́ á nəpóolə.”

²⁰A tíʼ ńkwantə̂ ngaŋə́zoŋə́ndzəm əjí ńgə́ kɔ pó fiʼtə̂ ŋwu tsə́ ńgə́ yí lə́ yi páʼ Əsê a Tsəʼ nə́.

²¹Ə́fɛ́d nə́ ndɛd jɨ́d zə̂ ńgɛn nə́ mbi, Yeso a chúʼə á mə́ fiʼtə̂ nə́ ngaŋə́zoŋə́ndzəm əjí ńgə́ a yǐ shib ghɛnə̂ á Jɛlusalɛm, ə́jɨ́ ngə́ʼ yi nɨ́ nə́ á mbô mətû mə́ aláʼ pópə pətə́kɔʼ pə́ ngaŋə́pêsê, ḿbá ngaŋə́zéʼkə pənoŋkə. Pə́ yǒ jwítə yə, lə́ əlěmbî teelə́ ə́ laŋ a pɨ ńjúmnə á nəwûə.

²²Pita a lɔgə̂ yí ə́fɛ́lə á mə́m pɨ ńchúʼə á mə́ sáʼ nə́ yí ə́sóŋə ńgə́, “Təmbɔʼ Əsê a kě pí pô ḿbə́ Mmaʼmbî! Mbɔʼə anu yətsə́ ándó zə̂ á láʼ ńkě nə́ gho laŋ pô!”

²³Yeso a sɛdnə̂ ə́sóŋ nə́ Pita ńgə́, “Lǒo gho á ndzəm maŋə satan! Gho lə́ kɨ́ʼə́ alaŋə́ əsêndú maŋə. Akwaŋə́nuə azô lə́ kě yə Əsê pô. Lə́ akwaŋə́nuə ŋwu mbîə.”

²⁴Yeso a tíʼ ə́sóŋə á mbô ngaŋə́zoŋə́ndzəm əjí ńgə́, “Mbɔʼ ŋwu ntsəmə a tə́ ńdoonə̂ á mə́ zoŋ nə́ mə, a shib ńkǐ mbɨ əjǐ ńtwáamə atǐəpagləpaglə ají ńdzoŋə̂ mə.

²⁵Ńté ńgə́ ŋwu ntsəm páʼ a lɔ nə́ mə́ chwádkə nə́ nchîmbî əjǐ, a yǐ péŋkə zə́ələ́. Lə́ ŋwu ntsəm páʼ a péŋkə nə́ nchîmbî əjǐ ńté mə, a yǐ zə́ənə́ zə́ələ́.

²⁶Ape ŋwunə a yǐ nə́ jî á yǐ pə́ lə́ akə̂ páʼ təmbɔʼ a kamtə̂ mbî jɨ ntsəm ḿbə́ ḿbéŋkə nchîmbî əjǐə? Kɨ təmbɔʼ ŋwunə a fɛ̂ lə́ akə̂ ńdɔg ńkwúblə nchîmbî əjǐ ə́wə́?

²⁷Ńté ńgə́ Mɔ́ Ŋwunə a yǒ yǐəə á mə́m nəgháʼ Tǎ əyǐ pópə pətseŋpə́ndɛ̂ pí, tíʼ tsɔ́ʼə afaʼə ŋwu ntsəm ə́zoŋ ndzaŋ páʼ ngaŋə a kə faʼ nə́.

²⁸Mäŋ fiʼtə̂ áwɨ́ nə́ ndə̌ŋdəŋ ńgə́ pɨ pətsə́ pə́ chî ə́wɨ́ pó tɨ́ nə́ aliʼə́ nə́ páʼ pó yǒ nə́ kě kwû záʼ pɔŋə̂ zə́ənə Mɔ́ Ŋwunə ä yǐ nə́ nə́ nəfɔ jí pô.”