Read Awing Matyo 17 Bible Online

Matyo 17 - Awing bible

Matyo 17

¹Əlě pɛ́n ntogə́ ə́ laŋ, Yeso a lɔgə̂ Pita pó Jɛmsə nə́ Jɔn mɔ́mɛ́ Jɛmsə pó po kɔ́ʼ ńgɛnə̂ á ndu tə́sɛ nkwəənə ńchî ə́wə́ á ngǎ pó.

²Pó ghə́ zə́ənə, Yeso a kwúblə, əshî əyí ə́ tíʼə ńtɛ̂ ándó mə́numə, ətsəʼ pí ə́ tíʼə ə́fógə ńgə́ púu.

³Tsɔʼə əghâ yi wɨ́ Mosisə pó Elayija jáʼ pópə Yeso tíʼə ńtséebə.

⁴Pita a sóŋə á mbô Yeso ńgə́, “Mmaʼmbî, á pɔŋ ńgə́ pɛn chîə aliʼə́ nə́. Mbɔʼ gho kɔŋ maŋ kwúd məntaŋ mɛ́n teelə́ aliʼə́ nə́. Táʼə á mbô gho, táʼə á mbô Mosisə, táʼə á mbô Elayija.”

⁵Ndzaŋə a nə ńtə́ nə́ ḿbɛ́lə ńtséebə lə́, alə́m yə ŋwaŋkə̂ nə́ á kə́bkə ághóobə́. Ngye yitsə̌ ə́ tíʼ ə́fɛ́lə á mə́mə alə́m zə̂ ə́sóŋ ńgə́, “Lɛ̌ móonə mə yi mbyâŋnə páʼ maŋ kɔŋ nə́, maŋ pyádnə̈ ńkɔŋtə̂ ńté yə́. Jwə́ʼtə nə́ á mbô yə́!”

⁶Əghâ ándó ngaŋə́zoŋə́ndzəm əjí ə́ nə ńdzóʼ nə́ ngye yi wɨ́ lə́, ḿbɔ́g lɛ tətətə ńgwǔ ńkə́bkə məshî móobə́ á ndəsê.

⁷Lə́ Yeso a pə́ ńgyǐ ńkwumə̂ ághɔ́b ə́sóŋ ńgə́, “Lǒo nə́ á əsê! kɔ nə́ tə́ ḿbɔ́gə.”

⁸Pó pɨg ətû pɔ́b ńnáŋ əliʼ ńkě ŋwu tsə́ jɨ́ pô tə ńdéʼtə Yeso.

⁹Əghâ ándó pó nə ńdǒo nə́ á ndu nkwəənə ńtə́ ńtsóolə lə́, Yeso a kwantə̂ ághɔ́b ə́sóŋ ńgə́, “Kɔ nə́ fiʼtə̂ ŋwu tsə́ nə́ anu páʼ nə́ jɨ́ nə́. Mɛdtə̂ nə́ tə Mɔ́ Ŋwunə a lǒo ńjúmnə á nəwûə.”

¹⁰Ngaŋə́zoŋə́ndzəm əjí ə́ tíʼ ḿbítə yí ńgə́, “Lə́ pə̂ ńgɛlə̂ akə̂ ngaŋə́zéʼkə pənoŋkə pə́ ə́sóŋə ńgə́ lə́ yǒ shib peg yǐ Elayija?”

¹¹Yeso a kwěe ághɔ́b ńgə́, “Lə́ ndə̌ŋdəŋ ńgə́ Elayija a yǐ peg yǐ tyáŋtə ajúmə atsəmə á pɨ ńchî ndzaŋ á pěʼ nə́ ńchî mə́ chî nə́.

¹²Lə́ mäŋ fiʼtə̂ áwɨ́ ńgə́ Elayija a pɛ́dtə ńgyǐ lə́ pɨ pó pə́ ńkě yí leŋ pô, ńtíʼ faʼə̂ anuə atsəmə á mbɨ yí ndzaŋ pó kɔŋ nə́. Mɔ́ Ŋwunə yǒ kə́ jɨ́ ngə́ʼə á mbô pó lə́ tsɔʼə ə́lə́ələ́.”

¹³Ngaŋə́zoŋə́ndzəm əjí tíʼ ńjî ńgə́ a nə̈ ńtséebə á mbô pó ńté lə́ Jɔn Əfɛ̂nkǐə.

¹⁴Əghâ ándó pó nə ḿbɨ nə́ ńgyǐ ńtég mboŋ pɨ zə́ lə̂, ŋwu tsə̌ a yǐ ńkwə́ʼtə a mbi Yeso,

¹⁵ńtíʼ sóŋ ńgə́, “Mmaʼmbî kó mələ́ŋ mə́ móonə mə. Lə́ ngwuəkəpuʼə, ḿbyádnə ńchígə́ ńjɨ́ ngə́ʼə. A zá ńgwǔəə nəkyɛlə́ kəənə á mə́m nkǐə.

¹⁶Maŋ nə ńdɔgə̂ yí ńgyǐəə á mbô ngaŋə́zoŋə́ndzəm əzô pó pə̂ ńkě chî təmbɔʼ pó tsóʼə yí pô.”

¹⁷Yeso a kwěe ńgə́, “O! awaʼə pɨ pɨ, nə kě mbimə́ túg pô, ńkě mənu páʼ mə́ tɨ́ nə́ ndə̌ŋdəŋ kə̈ faʼə̂ pô. Pɛn yǒ chî tə koʼ lə́ ə́lɛ́? Maŋ chî mə́ wam nə́ ntɨ́ nə́ pɨ tə koʼ lə́ ə́fó? Yǐ nə́ nə́ mɔ́ wə́ á mbô maŋə aliʼə́ nə́.”

¹⁸Yeso a tíʼ sáʼə pɛ̌sê yi wə́ a fɛ́lə á mbɨ mɔ́ mbyâŋnə wə́. Tsɔʼə əghâ yi wɨ́ mɔ́ yi wə́ a yáŋə yə́.

¹⁹Ngaŋə́zoŋə́ndzəm Yeso tíʼ ńgyǐəə á mbô yə́ a ndzəmə ndzəm ḿbítə yí ńgə́ “Lə́ pěʼ ńgɛlə̂ akə̂ pəg kě chî təmbɔʼ pəg kəm pô?”

²⁰Yeso a kwěe ághɔ́b ńgə́, “Ńté ńgə́ mbimə́ əjɨ ə́ kə́gə. Maŋ fiʼtə̂ áwɨ́ nə́ ndə̌ŋdəŋ ńgə́ mbɔʼ nə́ túg mbimə́ ə́ kə́g tə ńchîə pə́ ándó mbaŋ fɔ́lə́sə, nə chî təmbɔʼ nə sóŋə á mbô nkwəənə ghɛn ńgə́, Lǒo aliʼə́ nə́ ńgɛnə̂ á əlá yǐə, ə́ ghɛnə̂. Anu yətsə́ təmbɔʼ a tsɛɛlə̂ áwə́ənə́ a yǐ kě ə́wɨ́ chî pô.”

²¹Lə́ mbô jɨ mbɔʼ ə́ kě fɛ́d pô, tə ńdéʼtə pɨ laŋ nə́ achaʼtə́sê pó achaʼtə́sê ńjîə.

²²Əghâ ándó ngaŋə́zoŋə́ndzəm Yeso nə ńgyǐ nə́ Galili tsɔʼə ətsəm lə́, Yeso a sóŋə á mbô pó ńgə́, “Pə́ yǐ finə̂ Mɔ́ Ŋwunə á mbô pəənə,

²³pó jwítə yə́, lə́ əlě teelə́ ə́ laŋ a pɨ ńjúmnə nəwûə.” Ngaŋə́zoŋə́ndzəm əjí fɨnə̂ lɛ tətətə.

²⁴Əghâ ándó Yeso pópə ngaŋə́zoŋə́ndzəm əjí kə yǐ nə́ ńkoʼə̂ Kapanawum lə́, pɨ pó nə̈ ńkwá nə́ nchub Tə́kɔʼndɛ̂sê pó yǐəə á mbô Pita ḿbítə yí ńgə́, “Ndzéʼkə əwəənə́ a kě nchub Tə́kɔʼndɛ̂sê tûə?”

²⁵Pita a kwěe ńgə́, “Ńkě tûə ə́lɛ́, a tûə.” Əghâ ándó Pita a nə ńgyǐ nə́ ńkwúnə ndɛ̂ lə́, Yeso a pə́ ntsɛɛmbi ŋwunə á mə́ tsáb nə́, ḿbítə ńgə́, “Saamun, azô akwaŋə á nɨd ńgə́ akə̂? Nchub nkwúnə aláʼ lə́ tû mbə̂kə̂ á mbô pəfo pə́ mbîə? Lə́ tû ngaŋə́láʼ yi wɨ́ kɨ pəyǐyinə́?”

²⁶Pita a kwěe ńgə́, “Lə́ tûə pəyǐyinə́.” Yeso a tíʼ ńkwěe ńgə́ “Mbɔʼ a pə́ ə́lɨ́d ḿbə́ ngaŋə́láʼ kě chîə mə́ tû nə́ pô.

²⁷Lə́ pɛn kě kɔŋə̂ mə́ ghɛd nə́ ndě pɨ pɨ záŋ pô. Ghɛnə̂ á əfooghɨ ḿmaʼ nkɛd əghô a nkǐə, ntsɛɛmbi əshû ntsəm páʼ ə́ kwú nə́ á mə́m ə́wɨ́, gho soŋ ə́fóg ŋ́ŋáʼ ntso yí, gho yǐ jɨ́ nkéebə atəənə́ páʼ zɨ́d koʼnə̂ nə́ mə́ tû nə́ nchub əzɔ̌ á Tə́kɔʼndɛ̂sê. Lɔgə̂ ájɨ́d ńgɛn ńtûə á mbô pó, a pə́ nchub əzɔ̌.”