Read Awing Matyo 18 Bible Online

Matyo 18 - Awing bible

Matyo 18

¹Əghâ yi wɨ́, ngaŋə́zoŋə́ndzəm Yeso yǐəə á mbô yí ḿbítə ńgə́, “Ŋwunə á gháʼ nə́ ńtsɛɛlə̂ ŋwu ntsəmə á mə́mə anuə nəfoonə nəpó lə́ əwə?”

²Yeso a fóŋə mɔ́ kə́nyaŋ móonə, ńgɛlə̂ a yǐ ńtə́əmə a mbi pó.

³A tíʼ sóŋ ńgə́, “Maŋ fiʼtə̂ áwɨ́ nə́ ndə̌ŋdəŋ ńgə́, tə ńdéʼtə nə kwúblə ńchîə ándó pɔ̂nkə̂, tə ḿbə́ nə́ yǒ kě á mə́mə anuə nəfoonə nəpó kwú pô.

⁴Ŋwu ntsəm páʼ a tsóokə nə́ mbɨ əjǐə ándó mɔ́ nə́, lə́ ŋwunə á gháʼ nə́ ńtsɛɛlə̂ ŋwu ntsəmə á mə́mə anuə nəfoonə nəpóolə.

⁵Ŋwu ntsəm páʼ a kə́ nə́ ḿbímə mɔ́ nə́ yitsə̌ á ndɛ̂ yə́ á pí lə́ mə.”

⁶Mbɔʼ ŋwu tsə̌ a ghɛd ńgə́ táʼ mɔ́ nə́ yitsə̌ páʼ a pí nə́ nə́ maŋ a ghɛlə̂ təpɔŋ, tə ḿbə́ a pěʼ ḿbɔŋ ńgə́ pə kwúlə tə́kɔʼ ngɔʼə yə aghɔʼə́péenə á ndě yí ḿmaʼə̂ yə́ á mə́m nə́ənə, a fə́mnə ə́wə́.

⁷Ndɔ ə́ chîə atû mbî ńté mənu páʼ mə̈ ghɛd nə́ ńgə́ pɨ pə̈ ghɛlə̂ təpɔŋə! Ndɛn mənu ghɛn ə́ chîə á mə́ yǐ nə́, lə́ ndɔ pə́ ńchîə atû ŋwu páʼ mə̈ laŋ nə́ á mbô yí ńgyǐəə.

⁸Mbɔʼ apô azô kəənə akoolə azô a ghɛd ńgə́ gho ghɛlə̂ təpɔŋ, lə́gə ájɨ́d ḿmyaʼə̂. Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎ mɔʼə́ nə́ táʼə apô kɨ nə́ táʼə ako ńtsɛɛlə̂ á mə́ túg nə́ mbô mɛ́n mbɛ̌ kɨ məko mɛ́n mbɛ̌ pə pə́ ḿmaʼə̂ gho á mə́m móg tə měe.

⁹Mbɔʼ nələ́g zô nə́ kə́ ńgɛd ńgə́ gho ghɛlə̂ təpɔŋ, gho fwɔŋə̂ ájɨ́d ḿmyaʼə̂. A pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎ mɔʼə́ nə́ táʼ nələ́g ńtsɛɛlə̂ mə́ túg nə́ əmə́g mɛ́n mbɛ̌ pə́ pə́ ḿmaʼə̂ á gho á mə́m móg Satanə.

¹⁰Lɔg nə́ ndɛd ńgə́ nə́ kě mɔ́ kə́nyaŋ mɔ́ ghɛn yitsə̌ wág pô, ńté ńgə́ mäŋ sóŋə áwɨ́ nə́ ndə̌ŋdəŋ ńgə́ pətseŋpə́ndɛ́pə́sê póobə́ á nəpó pə́ zá ńtə́əmə á mbi Tǎ mə á nəpóolə əghâ ətsəmə.[3]

¹²Nə́ kwaŋ ńgə́ akə̂? Mbɔʼ ŋwunə a túg məmbéŋ mə́ ndzɛd táʼ nkɛd, táʼə á mə́m ə́wə́ á péŋ, a kě apuʼ zə̂ məghə́m mɛ́n nəpuʼə́ nə́ mɛ́n nəpuʼə́ á ndu kɔŋ mɛdtə̂ ńgɛn ńchwaalə̂ táʼ wə̂ páʼ á pěʼ nə́ ḿbéŋ lə̂?

¹³Maŋ fiʼtə̂ áwɨ́ nə́ ndə̌ŋdəŋ ńgə́ mbɔʼ a zə́ənə ájɨ́d mbɨ əjǐ pyádnə ḿbɔŋ á ndu táʼ mɔ́ mbéŋ wə̂ ńtsɛ ndzaŋ mbɨ əjǐ ə́ pɔŋ nə́ á ndúmə apuʼ zə̂ məghə́m mɛ́n nəpuʼə́ nə́ mɛ́n nəpuʼə́ páʼ á pěʼ nə́ ńkě péŋ pô lə̂.

¹⁴Lə́ələ́ pə́ ńgə́ lə́ kě akwaŋə anuə Tǎ əwɨ páʼ a chî nə́ nəpó ńgə́ táʼ mɔ́ nə́ yitsə̌ a péŋ pô.

¹⁵Mbɔʼ mɔ́mɛ́ əgho á wǔəə anuə á mbô gho, ghɛnə̂ á mbô yí ńnəələ̂ afankə́nuə ajíə á mbô yí tsɔʼə a tətɨ pɨ yí pɛ́n pɛ̌. Mbɔʼə a jwə́ʼtə á mbô gho, gho pɨ ńdɔgə̂ yə́ ándó mɔ́mɛ́ əgho.

¹⁶Lə́ təmbɔʼ a chî jwə́ʼtə pô, lɔgə̂ táʼ ŋwu kɨ pɨ pɛ́n pɛ̌ pɨ pó ghɛn ə́wɨ́ ńjî ńgə́ anuə atsəm páʼ pə́ sóŋ nə́, pɨ pɛ́n pɛ̌ kɨ pə́ teelə́ pə́ zóʼ, ńjɨ́ ńkə́ ńtɔ́mtə.

¹⁷Lə́ mbɔʼ a kə́ ńkǐəə yə́ á mə́ jwə́ʼtə nə́ á mbô pó, fiʼtə̂ zə́ələ́ á mbô nkyeetə pɔ́ pə́ Əsê. Mbɔʼə a kə́ ḿbɛ́d ńkǐəə yə́ mə́ jwə́ʼtə nə́ á mbô nkyeetə pɔ́ pə́ Əsê, gho lɔgə̂ yə́ ándó Təjǐsê kɨ nkwânchubə aláʼə.

¹⁸Ndə̌ŋdəŋə́, mäŋ sóŋə áwɨ́ ńgə́ anuə atsəm páʼ pɨ kǐ nə́ á ndu ndəsê, pə́ yǒ kə́ kǐə zə́ələ́ á nəpóolə. Anuə atsəm nə́ kə́ nə́ ḿbímə á zə́ələ́ á ndu ndəsê, pə́ yǒ kə́ pímə ázə́ələ́ á nəpóolə.

¹⁹“Maŋ pɨ ńkə́ fiʼtə̂ áwɨ́ ńgə́ mbɔʼ pɨ pɛ́n pɛ̌ pə́ pímnə á mə́ pítə nə́ anuə atsəmə á ndu ndəsê, ḿbə́ Tǎ mə á nəpóolə a yǐ faʼə̂ zə́ələ́ á mbô pó.

²⁰Ńté ńgə́ aliʼə́ atsəm páʼ pɨ pɛ́n pɛ̌ kɨ pə́ teelə́ pə́ kyeetə̂ nə́ ə́wɨ́ nə́ əlɛ́nə mə, maŋ chîə á tətɨ pó.”

²¹Pita a tíʼ ńgyǐəə á mbô Yeso ḿbítə ńgə́, “Mmaʼmbî, mbɔʼ mɔ́mɛ́ mə a wǔəə anuə á mbô maŋ lə́ ngǎ ə́shíʼə́ maŋ ləgnə̂? Tə ńkoʼ ngǎ asaambɛ̂?”

²²Yeso a kwěe ńgə́, “Maŋ kě á mbô gho sóŋ ńgə́ lə́ ngǎ asaambɛ̂ pô. Lə́ ngǎ məghə́mə asaambɛ̂, ngǎ asaambɛ̂.”[5]

²³Lə́ələ́ pə́ ńgə́ anuə nəfoonə nəpóolə a chî lə́ ándó əfo yitsə̌ a nə ńtə́ nə́ ńdoonə̂ mə́ shitə̂ nə́ mənu mə́ nkáb pópə ngaŋə́faʼ əjíə.

²⁴Ndzaŋə a kə́ chúʼ nə́ mə́ náŋ nə́ lə́, pə́ yǐ nə́ táʼ yitsə̌ páʼ a nə ńtə́ nə́ ńgwaamə̂ yí nə́ nkáb əpa məghə́m míə.

²⁵Ngaŋəfaʼ əyǐ wə́ a nə ńkě túg nkáb ə́ koʼ mbɔʼ a tû nəkyɛ́ jí nə́ wɨ́ pô, Tǎ afaʼ əyǐə a sóŋ ńgə́ pə finə̂ ághɔ́b pə ngwě əyǐ nə́ pɔ́ pí ándó əpoʼ ḿbéenə ajúmə atsəm páʼ a nə ńtúg nə́ ńdɔg ńtû nəkyɛ́ jí ə́wə́.

²⁶Ngaŋəfaʼ əyǐ wə́ a kwə́ʼtə mbi yí ḿbóʼmbô nə yi ńgə́, Wam ntɨ́ əghô ńté mə, maŋ yǐ tûə ajúmə atsəmə á mbô gho.

²⁷Tǎ afaʼ əyǐə a kó mələ́ŋ mí ńdəgnə̂ yí nəkyɛ́ jí yi nə́ wɨ́, ńtíʼ ḿmɛdtə̂ yə́ a ghɛnə̂.

²⁸Ngaŋəfaʼ wə́ a fɛ́lə apeŋ ńdzə́ənə ngaŋəko əyǐ yitsə̌ aliʼə́ afaʼ páʼ a tə nə́ ńgwaamə̂ yí nə́ nkáb tɔsə nəghə́mə, ə́faŋə̂ yə́ a ndě əyí ə́sóŋ ńgə́, “Tû nkéebə mə zə̂ páʼ gho tə́ nə́ ńgwaamə̂ mə ə́wɨ́ lə̂!”

²⁹Ngaŋəko əyǐ wə̂ a kwə́ʼtə ndəsê ḿbóʼmbô nə́ yí ńgə́ wam ntɨ́ gho ńté mə, maŋ yǐ tû nkáb əzo.

³⁰A kǐəə yí ńdɔgə̂ yí ńgɛn ńnéŋə a nkáʼə atsáŋ ńgə́ a yǐ tû nəkyɛ́ jí záʼə.

³¹Ndzaŋə ándó yitsə̌ ngaŋə́faʼ nə ńjɨ́ nə́ anu páʼ a laŋ nə́ lə́, anu yəwə́ a jwaʼə̂ ághɔ́b lɛ tətətə pó tíʼ ńgɛn fiʼtə̂ tǎ afaʼ əghɔb nə́ anuə atsəm páʼ a laŋ nə́.

³²Tǎ afaʼ əghɔb wə́ a tíʼ fóŋə yí ńgə́ a kwúnə á ndɛ̂. A tíʼ ə́sóŋ nə́ yí ńgə́, ngaŋə afanə apoʼ ghɛn, maŋ kə ləgnə̂ nəkyɛ́ zə̂ tsɔʼə nətsəm gho nə ńtə́ nə́ ńgwaamə̂ mə ə́wɨ́ lə́ ńté ńgə́ gho nə ḿbóʼmbô ńgə́ maŋ ləgnə̂.

³³Mbɔʼ gho nə ńkě kə́ ńkó mələ́ŋ mə́ ngaŋəko əgho tsɔʼə ndzaŋ maŋ nə ńkə́ nə́ ńkó məmô lə̂?

³⁴Tǎ afaʼ əyǐ a lɔgə̂ azáŋə́ndé ə́fɛ̂ yə́ á mbô ngaŋə́pyáabə nkáʼə́tsáŋ[6] ńgə́ pó ghɛn ńtsaŋkə̂ yí tə a láʼ ńtû nəkyɛ́ jí tsɔʼə nətsəmə.

³⁵Lɛ̌ ndzaŋ ándó Tǎ mə á nəpóolə a lǒo nə́ ghɛd nə́ pɨ pətsəm páʼ təmbɔʼ nə́ chîə təpɔŋ pɔ́pə́mɛ́ pə́ənə́ á mə́m ntɨ́ pɨ ləgnə̂ pô.