Read Awing Matyo 19 Bible Online

Matyo 19 - Awing bible

Matyo 19

¹Əghâ ándó Yeso a nə ḿməgtə̂ nə́ á mə́ sóŋ nə́ ndɛn mənu ghɛn lə́, ə́fɛ́lə Galili ńgɛnə̂ mboʼ Judya páʼ ə́ chî nə́ ndzɛnə́ nkǐ Jodanə.

²Tə́kɔʼə apoŋə pəənə nə ńdzoŋə̂ yə́, a tsóʼə ághɔ́b ə́wə́.

³Pəfalasi pətsə́ pə́ nə ńgyǐəə á mbô yí ḿmoomə̂ yí ḿbítə ńgə́, “noŋkə á pí ńgə́ mbɔʼ ŋwunə a fógə ngwě əyǐ ńté anu yətsə́ páʼ a ghɛd nə́?”

⁴Yeso a kwěe ńgə́, “Nə kě kə́ fóŋə ńgə́ ŋwu páʼ a kə tsoŋkə̂ nə́ ághɔ́b ə́fɛ́lə nəfɛdnə́ a nə ńtsoŋkə̂ ŋwu mbyâŋnə pó məngyě?

⁵Ə́sóŋ ńgə́, Ndzaŋə á chî nə́ lɛ lə́ ŋwu mbyâŋnə a yǒ mɛdtə̂ tǎ əyǐ pó mǎ əyǐ, ə́ tsɛntə̂ pó ngwě əyǐ pó pɛ́n pɛ̌ ə́ tíʼ táʼ na mbəəmə.

⁶Lə́ələ́ pə́ ńgə́ pó kě pɛ́d ḿbə́ lə́ pɨ pɛ́n pɛ̌ pô, pó tíʼ ḿbə́ lə́ táʼ mbəəmə. Ńdaŋ ə́lɨ́d, ajúmə atsəm páʼ Əsê a kyeetə̂ nə́ aliʼə́ mɔʼə́, kɔ ŋwunə a shamkə̂.”

⁷Pó pítə ńgə́, “lə́ nə ḿbə́ ńgɛlə̂ akə̂ Mosisə a sóŋ ńgə́, mbɔʼ ŋwunə a fɛ̂ aŋwaʼlə ashamkə̂ ndzɔʼə́ á mbô ngwě əyǐ ńkəmə̂ yə́?”

⁸Yeso a kwěe ńgə́, “Mosisə a nə ḿbí ńgə́ mbɔʼ nə kəm pəngyě pɨ́ lə́ ńté ńgə́ məntɨ́ mɨ́ mə́ nə ńtyantə̂. Lə́, á nə ḿbə́ ńkě lə́ ə́lɨ́d chî ə́fɛ́lə nəfɛd nə́ pô.

⁹Mäŋ fiʼtə̂ áwɨ́ ńgə́ ŋwu ntsəm páʼ a fóg nə́ ngwě əyǐ ńgə́ a ghɛlə̂ anu yətsə́ tə ńdéʼtə pə́ ńgə́ a tə́ ńkéelə ńjínə, ḿbɨ ńdzɔ́ʼə məngyě yi ndaʼ a jî lə́ mə̂ghabə.”

¹⁰Ngaŋə́zoŋə́ndzəm əjí sóŋ nə́ yí ńgə́, “Mbɔʼ lɛ pə́ ndzaŋ páʼ a chî nə́ tətɨ ŋwu pó ngwě əyǐ, tə ḿbə́ a pɔŋ ńgə́ kɔ ŋwunə a pěʼ ńdzɔ́ʼə.”

¹¹Yeso a kwěe ńgə́, “Lə́ kě ŋwu ntsəm mbɔʼ a pí ndzeʼkə́ jɨ pô, tə ńdéʼtə pɨ pə́ tsɔ́ʼ nə́ ághɔ́b ə́fɛ̂ á zə́ələ́ á mbô pô.

¹²Ńté ńgə́ pɨ pətsə́ pə́ kě chî təmbɔʼ pó ghɛd ndzɔʼə́ tə ə́fɛ́lə pə́ əsê. Pə́ sə́ pətsɨ́ pɨ lə́ sə́ nə́ ńjî ńgə́ kɔ pó pɨ ńchî təmbɔʼ pó ghɛd ndzɔʼə́. Pətsə́ pɨ pə́ kǐəə ághóobə́ anuə ndzɔʼə́ lə kǐ nə́ ńté anuə nəfoonə nəpóolə. Ŋwu ntsəm páʼ a chî nə́ á mə́ pí nə́ ndzeʼkə́ zəənə́, a pímə.”

¹³Pɨ pətsə́ pə́ tíʼ ńgyǐ nə́ kə́yé ŋwunə á mbô Yeso ńgə́ a noŋkə̂ mbô míə atû pó ńchaʼtə́sê nə́ pó. Lə́ ngaŋə́zoŋə́ndzəm Yeso pə́ sáʼə ághóobə́.

¹⁴Yeso a sóŋə á mbô pó ńgə́, “Mɛdtə̂ nə́ pɔ̂nkə̂ pó yǐəə á mbô maŋə, kɔ nə́ tə́ ńkɨ́ʼə ághɔ́b ńté ńgə́ anuə nəfoonə nəpóolə a chî lə́ á mbô pəənə ándó pɔ́ pəənə́.”

¹⁵Ńtíʼ ńnoŋkə̂ mbô míə atû pó, ńtíʼ ńgɛnə̂ yə́.

¹⁶Ŋwu tsə̌ a nə ńdáʼ ńgyǐəə á mbô Yeso ḿbítə yí ńgə́, “Ndzéʼkə, lə́ akə̂ anu yə əshîʼnə mbɔʼ maŋ shib ńgɛlə̂ ájɨ́d ḿbɔŋə́ láʼ jî nchîntɨ páʼ jɨ́d mɛdnə̂ nə́ ngǎ mɔʼə́?”

¹⁷Yeso a kwěe ńgə́, “Lə́ ghɛlə̂ akə̂ gho pítə mə nə́ anu páʼ á pɔŋ nə́, lə́ tsɔʼə ndaʼ táʼ ŋwunə a pɔŋ nə́. Mbɔʼ gho tə́ ńdoonə̂ á mə́ jî nə́ nchîntɨ, gho lɔʼkə̂ məntəgə́ mə́ Əsê.”

¹⁸Ŋwu yi wə́ a pítə ńgə́, “A mə́ənə́ məntəgə́?” Yeso a kwěe ńgə́, “Kɔ gho jwítə, kɔ gho jîə mə̂ghabə, kɔ gho zəələ̂, kɔ gho jîə mənaŋə́ atû ŋwunə,

¹⁹ghóʼkə tǎ əgho pó mǎ əgho, ńkə́ ńkɔŋə̂ ngaŋnəpad əgho ándó mbɨ əzo.”

²⁰Mɔ́ ngwəshu wə̂ a kwěe yí ńgə́, “maŋ zoŋnə̂ ndɛn mənu ghɛn tsɔʼə ətsəmə, maŋ pɛ́d ḿbóŋə akə̂?”

²¹Yeso a sóŋ nə yí ńgə́, “Mbɔʼ gho tə́ ńdoonə̂ á mə́ koʼnə̂ nə́ ghɛn fyag, gho ghɛn finə̂ apeʼə azô tsɔʼə atsəm, ə́fɛ̂ nə́ pəpóŋə, afoʼə azô á tíʼ ńchîə nəpóolə; gho tíʼ ńgyǐ ńdzoŋə̂ mə.”

²²Əghâ ándó mɔ́ ngwəshu ghɛnə́ a nə ńdzóʼ nə anu jɨ lə́ ńtíʼ ńgɛn nə́ afɨnə ńté ńgə́ a nə ḿbə́ lə́ chigə əfoʼə.

²³Yeso a tíʼ sóŋə á mbô ngaŋə́zoŋə́ndzəm əjí ńgə́, “Maŋ fiʼtə̂ áwɨ́ nə ndə̌ŋdəŋ ńgə́, á tyantə̂ á mbô ngaŋnkéebə á mə́ kwú nə́ á mə́mə anuə nəfoonə nəpóolə.

²⁴Maŋ pɨ̈ ńkə́ fiʼtə̂ áwɨ́ ngǎ yitsə̌ ńgə́ á pwɔ́dnə á mbô anjwa á mə́ kwú nə́ á mə́m ngɔ́d əsáʼ ńtsɛɛlə̂ á mbô ngaŋnkéebə mə́ kwú nə́ á mə́mə anuə nəfoonə Əsê.”

²⁵Əghâ ándó ngaŋə́zoŋə́ndzəm əjí nə ńdzóʼ nə́ anu jɨ lə́, a kwíʼnə ńkɨʼnə̂ ághɔ́b lɛ tətə, pó tíʼ ḿbítə ńgə́, “Mbɔʼ mbə̂kə̂ ə́ pə́ ńtíʼ ńchwáalə?”

²⁶Yeso a tə́g əmə́g nə́ pó ńnáŋə ághɔ́b ńtíʼ ńkwěe ńgə́, “Anu zəənə́ á tsɛɛlə̂ lə́ ŋwunə, lə́ á mbô Əsê, anuə yətsə́ á kě yí tsɛɛlə̂ pô.”

²⁷Pita a tíʼ ńkwěe ńgə́, “Zə́ənə, pəg mɛdtə̂ ajúmə atsəm ńdzoŋə̂ gho. Azə́gə́ ape á yǒ tíʼ pə́ akə̂?”

²⁸Yeso a sóŋə á mbô pó ńgə́, “Mäŋ sóŋə á mbô pɨ ndə̌ŋdəŋ ńgə́ á yǒ pə́ əghâ ándó Mɔ́ Ŋwunə a náanə nə́ á ndumə aləŋə nəfoonə ají yə nəgháʼə á mə́m mbî yi fî lə́, pɨ páʼ nə́ zoŋ nə́ ndzəm mə lə́, pɨ yǒ kə́ náanə nə́ ələŋəmə́fɔ ntsɔb pɛ̌ ə́ tə́ sáʼ ngwud pɔ́ pə́ Islɛl ntsɔb pɛ̌.

²⁹Ŋwu ntsəm páʼ a kə́ nə́ mɛdtə̂ məláʼ mí, kɨ pɔ́pə́mɛ́ pí pipə́ mbyâŋnə, kɨ pipə́ pəngyě, kəənə tǎ əyǐ, kəənə mǎ əyǐ, kɨ pɔ́ pí, kəənə afoonə ají ńté mə, Əsê a yǐ pɨ fɛ̂ əpúmə á mbô yí ngǎ nkɛd tsɛ ndɛn páʼ a nə ḿmyaʼ nə́, a kə́ ḿbɨ ńjî nchîntɨ páʼ ə́ mɛdnə̂ nə́ ngǎ mɔʼə́.

³⁰Lə́, pɨ pi nɨ́ nə́ páʼ pó chî nə́ á mbi pó yǒ tíʼ ndzəmə. Pɨ pi nɨ́ nə́ páʼ pó chî nə́ á ndzəm pó tíʼ mbiə.