Read Awing Matyo 2 Bible Online

Matyo 2 - Awing bible

Matyo 2

¹Pə́ nə ḿbîə Yeso lə́ á Bɛtəlɛɛmə á mə́m aláʼə Judya əghâ páʼ Ɛlɔdə a nə ḿbə́ nə́ əfo. Əghâ wɨ́d wə̂, ngaŋə́zéʼə pɔ́ pə́ sáŋ ə́ fɛ́lə á ndú əsáʼmə́nu ńgyǐəə á Jɛlusalɛm,

²ḿbítə ńgə́, “Mɔ́ wə̂ páʼ pə́ pí nə́ a pə́ əfo Pəjusə lə́ a əfo? Pəg pěʼ ńdzə́ənə á mɔ́ sáŋ əyǐə á fɛ́lə á əsáʼmə́numə, pəg pɛn ńgyǐəə lə́ á mə́ ghóʼkə nə́ yə́.”

³Ndzaŋ əfo Ɛlɔdə a nə ńdzóʼ nə́ anu jɨ́d zɨ lə́, á jwaʼə̂ yə́ ḿbá nə́ ngaŋ Jɛlusalɛm tsɔʼə ətsəmə.

⁴A tíʼ ə́fóŋ pətə́kɔʼ pə́ ngaŋə́pêsê pópə ngaŋə́zéʼkə pənoŋkə tsɔʼə ətsəm ḿbítə ághɔ́b ńgə́, “Pə́ chîə á mə́ pî nə́ Nchwádkə lə́ ə́fó?”

⁵Pó kwěe ńgə́, “Á Bɛtəlɛɛmə á mə́m Judya ńdzoŋ ndzaŋ ntûsê a nə ŋ́ŋwaʼlə̂ nə́,” ńgə́;

⁶“Gho Bɛtəlɛɛmə á mə́mə aláʼə Juda, gho kě lə́ chigə mɔ́ kə́nyaŋə́ á mə́m pəfo pə́ Juda pô ńté ńgə́ nətû nə́ yǐ fɛ́lə á mə́m pəənə́, páʼə a yǐ nə ə́sáʼ pəənə mə pɔ́ pə́ Islɛlə.”

⁷Ɛlɔdə a tíʼ ə́fóŋ ngaŋə́zéʼə pɔ́ pə́ sáŋ zə̂ tsɔʼə á ndzəmə ndzəmə ḿbítə ághɔ́b nə́ chigə ndɛd páʼ mɔ́ sáŋ wə̂ á kə fɛ́d nə́.

⁸Ndzaŋ pó fiʼtə̂ nə́ lə́, a tíʼ ńtúmə ághóobə́ á Bɛtəlɛɛm ńgə́ pó ghɛn ńdɔg ndɛd ńnáŋə mɔ́ yi wə́, ńdzə́ənə yí pó tú nkəənə á mbô yí ńjî ńgə́ a kə́ ńgɛnə̂ ají ńgóʼkə yə́.

⁹Ndzaŋ pó nə ńdzóʼ nə́ atséebə əfo lə́, ńtíʼ ńgɛn nə́ mbi nə́ nənyi əghoobə́. Mɔ́ sáŋ pó nə ńjɨ́ nə́ á fɛ́lə əsáʼmə́nu lə́, á chîə á mbi pó tə ńgyǐ ńgɛn ńtə́əmə aliʼ mɔ́ yi wə̂ a chî nə́ ə́wə́.

¹⁰Ndzaŋ pó nə ńjɨ́ nə́ mɔ́ sáŋ wə̂ lə́, ńkɔŋtə̂ lɛ tətətə.

¹¹Pó tə́ ńkwúnə á ndɛ̂ ńdzə́ənə mɔ́ yi wɨ́ pó mǎ əyǐ Mɛɛlə, ńtíʼ ńkwə́ʼtə a ndəsê ńgóʼkə yə́, ŋ́ŋáʼ əpa əpɔ́b ə́fógə gôlə nə́ flaŋkisɛnə ḿbɨ ḿbə́ nə́ mɛ̂lə ə́fɛ̂ nə́ yə́.

¹²Pó yǐ ńtə́ ńdê Əsê a yǐəə á mbi pó á njɨ ńkwantə̂ ághɔ́b ńgə́ kɔ pó pɨ ḿbəənə̂ á mbô Ɛlɔdə. Pó tíʼ ńdaŋ ndú yi ndaʼ ńkwə̂ aláʼ pó.

¹³Ndzaŋ pó nə ńgɛn nə́ lə́ ntseŋndɛ̂ Mmaʼmbîə a yǐəə á mbi Jɔsɛfə á ndzəəmə ə́sóŋ nə́ yí ńgə́, “Lɔgə̂ mɔ́ wə̂ pó mǎ əyǐ ńkə ńgɛn nə́ pó á Ijibə ńchî ə́wɨ́ tə maŋ láʼ ə́fiʼtə̂ gho ńgə́ gho fɛ́lə, ńté ńgə́ Ɛlɔdə a tə́ ńchwaalə̂ mɔ́ wə̂ á mə́ jwítə nə́.”

¹⁴Jɔsɛfə a tíʼ ńdǒ á əsê ńdɔgə̂ mɔ́ wə̂ pó mǎ əyǐ ńgɛnə̂ á Ijibə á nətúʼə,

¹⁵ńkə́ ńtíʼə ńchîə ə́wɨ́ tə Ɛlɔdə a láʼ ńkwûə. Pə́ nə ńgɛlə̂ zɨ́d zɨ lə́ á mə́ chɨ́mkə nə́ anu páʼ Əsê a nə ńgɛd nə́ ńgə́ ntú əjǐ ə́ sóŋ ńgə́, “Maŋ fóŋə móonə mə ńgə́ a fɛ́lə á Ijibə.”

¹⁶Əghâ Ɛlɔdə a nə ńjî nə́ ńgə́ ngaŋə́zéʼə pɔ́ pə́ sáŋ pə́ fɨgə̂ yí lə́ fɨg nə́, ndě əyí ə́ záŋ lɛ tətətə, a tíʼ ə́sóŋ ńgə́ pə jwítə kə́yé pɔ́ pə́ mbyâŋnə tsɔʼə pətsəmə páʼ pə́ chî nə́ á Bɛtəlɛɛm pópə məpad mí tsɔʼə mətsəm ńchúʼ nə́ ngoʼ pɛ̌ ńtsóokə, ńdzoŋ ndɛd ngaŋə́zéʼə anu ńté pɔ́ pə́ sáŋ pə́ kə fiʼtə̂ nə́ yí ńgə́ mɔ́ sáŋ wə̂ á nə ə́fɛ́d lə̂.

¹⁷Ńdaŋ ə́lɨ́d anu pə́ nə ə́sóŋ nə́ ńdaŋə̂ á mbô ntûsê Jelemaya á nə ńdɔgə̂ aliʼə́.

¹⁸Pə́ tə́ ńdzóʼ ngye yitsə̌ á Lama, Pə́ kyéŋə ńdzoŋə̂ ə́fɨnə̂, Lachɛɛlə a kyéŋə ńté pɔ́ pîə ńkǐ ńgə́ kɔ pə́ legtə̂ yə́, ńté ńgə́ pó kě pɛ́d pô.

¹⁹Əghâ ándó Ɛlɔdə a nə ńkwû nə́, ntseŋndɛ̂ Mmaʼmbîə a yǐəə á mbi Jɔsɛfə á Ijibə á ndzəəmə

²⁰ə́sóŋ ńgə́, “Lǒo á əsê ńdɔgə̂ mɔ́ wə̂ pó mǎ əyǐ ḿbɨ ḿbəənə̂ á Islɛlə ńté ńgə́ pɨ páʼ pə́ nə̈ ńdɔ nə́ á mə́ jwítə nə́ mɔ́ wɨ́d wə̂ pó kwúkə.”

²¹Jɔsɛfə a tíʼ ńdǒo á əsê ńdɔgə̂ mɔ́ wə̂ pó mǎ əyǐ ḿbəənə̂ á Islɛlə.

²²Ndzaŋ a nə ńdzóʼ nə́ ńgə́ Alchelusə a jî ndɛ̂ tǎ əyǐ Ɛlɔd páʼə a nə ḿbə́ nə́ əfo Judya lə́, Jɔsɛfə a pɔ́gə á mə́ ghɛn nə́ ə́wɨ́ ńté ńgə́ pə́ nə ńkwantə̂ yí lə́ á ndzəəmə, a tíʼ ńgɛn nə́ əlá láʼ Galili yitsə̌.

²³Əghâ a nə ńgɛn nə́ ə́wɨ́ lə́, ńchîə aláʼ yitsə̌ pə́ fóŋ nə́ nə́ Nazalɛlə. Zɨ́d zəənə́ á nə nɨd lə́ anu páʼ məntúmə́sê mə́ nə ə́sóŋ nə́ ńgə́, “Pə́ yö fóŋə yí lə́ ńgə́ mɔ́ Nazalɛlə.”