Read Awing Matyo 20 Bible Online

Matyo 20 - Awing bible

Matyo 20

¹Anuə nəfoonə nəpóolə a chî lə́ ándó ŋwu yitsə̌ a lê fɛ́lə mɛ́ məsânə ńgɛnə̂ á mə́ náŋ nə́ pɨ pó yǐ ə́faʼə̂ á mə́m nkáʼ mətǐ mə́ məloʼ əyə́.

²Pó po nə ḿbímnə ńgə́ a yǐ ńtûə ághɔ́b nə́ nkáb páʼ ə́ koʼ nə́ alěmbîə afaʼə. A tíʼ ńtúmə ághóobə́ á mə́mə akoobə́ mətǐ mə́ məloʼ yə́.

³Əghâ ándó mə́numə á nə sáʼ nə́ tə ńnyáʼ ńkɔ́ʼtə, a pɨ ńkə́ fɛ́d ńgɛnə̂ məta ńjɨ́ pɨ pətsə́ pə́ tɨ́mtə ə́wɨ́ ńkě ajûtsə́ tə́ faʼə̂ pô.

⁴A tíʼ sóŋə á mbô pó ńgə́, Kə́ nə́ ńgɛn ə́faʼə̂ atɔʼ maŋə, maŋ yǐ tûə áwɨ́ nə́ ndɛn nkáb ətsəm páʼ ə́ koʼ nə́.

⁵Pó tíʼ ńgɛnə̂. A yǐ ḿbə́ á ntɨ̌numnə pó ndzəŋ mə́nu a kə́ ḿbɨ ə́fɛ́d ńgɛn ńgɛd tsɔʼə ə́lə́ələ́.

⁶A yǐ ḿbə́ á ńtsó mə́nu a fɛ́d ńgɛnə̂ məta ńjɨ́ pɨ pə́ kə́ ḿbɛ́d ńtɨ́mtə ə́wə́. A pítə ághɔ́b ńgə́, nə chígə́ ńtə́əmə aliʼə́ nə́ fɛ́lə məsânə ə́faʼə̂ lə́ akə̂?

⁷Pó kwěe yí ńgə́, ‘lə́ ńté ńgə́ ŋwu tsə̌ a kě áwə́gə́ á afaʼ lɔg pô,’ A sóŋə á mbô pó ńgə́, ‘Kə́ nə́ ńgɛn ə́faʼə̂ á nkáʼ mətǐ mə́ məloʼ maŋə.’

⁸Əghâ nkwanə́ nə ḿbɛn ńkoʼ ŋwu wə̂ a sóŋ nə́ nətû nə́ ngaŋə́faʼ əjí ńgə́, ‘fóŋ ngaŋə́faʼ zə̂ ńtû mənkáb móobə́, ńchúʼ nə pi páʼ pó pěʼ nə́ ńdwegtə̂ ndzəmə á mə́ yǐ nə́ lə́, tə́ ńkɔ́ʼ ńkoʼ nə pɨ pə́ pěʼ nə́ ńkwá mbiə.’

⁹Ngaŋə́faʼ páʼ pó pěʼ nə́ ńchúʼə afaʼə á mɛ́dmə́nu lə́, pó pətsəm kə kwá lə́ nkéebə alěmbîə afaʼə.

¹⁰Lə́ pɨ pə́ pěʼ nə́ ńdɔgə̂ ághóobə́ mɛ́ məsânə lə́ pó yǐ, ńkwaŋ ńgə́ pó yǐ kwá nkáb ə́ nə́ənə; lə́ ŋwu ntsəmə á mə́m pó a pə́ ńkə́ ńkwá tsɔʼə nkéebə alěmbîə afaʼə.

¹¹Ndzaŋ pó kwá nə́ nkáb zə̂ lə́, ńchúʼə á mə́ ŋwuntə̂ nə́ ńté ŋwu wə̂.

¹²Ə́sóŋə ńgə́, ‘Ngaŋə́faʼ jɨ pə́ lɔg nə́ ághóobə́ a ndzəm lə́ pó faʼ lə́ tsɔʼə táʼ mə́numə, pəg pə̂ ḿbeʼə̂ afaʼə atsəm ə́fɛ́lə məsânə á mə́m mɛ́ mə́numə. Lə́ gho pə̂ ḿbɛ́d ńtûə ághɔ́b tsɔʼə ndzaŋ páʼ gho tû nə́ áwə́gə́!’

¹³A pə́ ńkwěe táʼ ŋwu əghɔb yitsə̌ ńgə́,” Jwə́ʼtə ngəənə mə, maŋ kě anuə təkoʼ yətsə́ á mbô gho ghɛd pô. Pɔ pěʼ ńkě pímnə ńgə́ maŋ yǐ tûə gho lə́ nə́ nkéebə alěmbîə afaʼ?

¹⁴Kwá nkáb əzo ńgɛnə̂. Maŋ kɔŋə̂ á mə́ tû nə́ ŋwu pə́ pěʼ nə́ ńdɔgə̂ yə́ a ndzəm lə́ tsɔʼə ndɛn páʼ maŋ tû nə gho ə́wə́.

¹⁵Maŋ kě chîə á mə́ faʼ nə́ anuə atsəm nə́ nkéebə mə ndzaŋ maŋ kɔŋ nə́? Kɨ ndě əghô ə́ záŋə lə́ ńté ńgə́ maŋ gheebə̂ apô?

¹⁶Yeso a tíʼ ńdwegtə̂ ńgə́ “Pɨ pə́ lwigtə̂ nə́ ndzəm pó láʼ tíʼ mbiə, pɨ pə́ kwá nə mbi pə́ tíʼ ndzəmə.”

¹⁷Əghâ ándó Yeso a nə ńtə́ nə́ ńkɔ́ʼə ńgɛnə̂ Jɛlusalɛm lə̂, ə́fóŋ ngaŋə́zoŋə́ndzəm əjí zə̂ ntsɔb pɛ̌ pó po tə́ ńnyinə̂, a sóŋə á mbô pó ńgə́,

¹⁸“Jwə́ʼtə nə́,” pɛn kɔ́ʼə ńgɛnə̂ lɛ̌ Jɛlusalɛm páʼ pə́ yǐ nə́ fɛ̂ Mɔ́ Ŋwunə á mbô pətə́kɔʼ pə́ ngaŋə́pêsê pópə ngaŋə́zéʼkə pənoŋkə, pó sáʼ əsáʼ əyí ḿbímnə ńgə́ pə́ jwítə yə́,

¹⁹ə́ pɨ fɛ̂ yə́ á mbô Pətəjǐsê pô nyegnə̂ yí, ḿbɨ ə́shúmə yí ńtíʼ ńkwumtə̂ yə́. Lə́ əlě teelə́ ə́ laŋ a pɨ ńjúmnə nəwûə.

²⁰Mǎpə pɔ́ pə́ Zebedi a tíʼ ńgyǐəə á mbô Yeso nə pɔ́ pí pi pə́ mbyâŋnə pɛ́n pɛ̌ ńkwə́ʼtə mbi yí ḿbítə yí nə́ anu yətsə̌.

²¹Yeso a pítə yí ńgə́ “Gho loonə̂ lə́ akə̂?” Məngyě wə̂ a kwěe ńgə́ “Pí ńgə́ táʼ móonə mə ghɛn yitsə̌ a yǐ ńnáanə a əlá apô gho yi tɨ, yitsə̌ a náanə á əlá apô gho yə kwaabə á mə́mə anuə nəfoonə azô.”

²²Yeso a kwěe yí ńgə́, “Gho kě jîə ajú gho pítə nə́ pô. Mbɔʼ pɨ nô ndɔ́ŋ páʼ maŋ yǐ nə́ nô ájɨ́d?” Pó kwěe ńgə́, “Mbɔʼ pəg nô.”

²³Yeso a tíʼ ə́sóŋə á mbô pó ńgə́, “Pɨ yǐ nô ndɔ́ŋə mə, lə́ mə náanə nə́ á əlá apô maŋ yə tɨ kɨ yə kwab, mbɔʼ lə́ kě maŋ sóŋ pô. Əliʼ pɨ́d pɨ chî lə́ á mbô pəənə ándó Tǎ mə a nə ḿbɛ́d nə́ tə ńtsoŋkə̂ pə́ələ́ á mbô pó.”

²⁴Ndzaŋə ándó apuʼə ngaŋə́zoŋə́ndzəm Yeso zə̂ zɛ́n nəghə́mə nə ńdzóʼ nə́ anu yə wɨ́ lə́, ndě əghɔ́b ə́ záŋ nə́ pətsə́ pə́ pɛ́n pɛ̌.

²⁵Yeso a tíʼ ə́fóŋə ághɔ́b pətsəmə aliʼə́ mɔʼə́ ə́sóŋ nə́ pó ńgə́, “Nə jî ńgə́ pɨ pə́ sáʼ nə́ pɨ pə́ təjǐsê pó kɔ́ʼə ńnáanə lə́ á ndu pó ə́sáʼə ághóobə́. Mətû mɔ́b mə́ kə́ ńtúg mətɨ mətsəmə á ndu pó.

²⁶Lɛ pə́ ńkě ndzaŋə a chî nə́ á mə́ chî nə́ a tətɨ pɨ pô. Ŋwu ntsəm páʼ ä lɔ nə́ á mə́ pə́ nə́ tə́kɔʼ ŋwunə á mə́m pəənə́ a shib ḿbə́ ngaŋəfaʼ əwəənə́

²⁷Mbɔʼ ŋwu wɨ yitsə̌ a tə́ ńdoonə̂ á mə́ pə́ nə́ nkwâmbi, a shib ḿbə́ apoʼə azə́ənə́

²⁸tsɔʼə ándó Mɔ́ Ŋwunə a nə ńkě nə́ yǐ lə́ ńgə́ pə́ faʼə̂ á mbô yi pô, a nə ḿbə́ ńgyǐ lə́ á mə́ faʼ nə́ á mbô pəənə, ə́ tû fɛ̂ nchîmbî əjǐə á mə́ jú nə́ ətû pɨ pipə nɨ́ nə́ ə́wə́.”

²⁹Ndzaŋə ándó Yeso pópə ngaŋə́zoŋə́ndzəm əjí nə ńtə́ nə́ ə́fɛ́lə Jɛliko lə́, mboŋ ŋwu məsɔŋ zoŋə̂ yə́

³⁰Pəfəg pɛ́n pɛ̌ pə́ nə ńnáanə nkaŋə́ alaŋə́. Ndzaŋ pó nə ńdzóʼ nə́ ńgə́ Yeso a tə́ ńdaŋə̂ lə́, ńtíʼ fóŋnə nə́ tə́kɔʼ ngye ńgə́, “Mɔ́ Debid, kó mələ́ŋ mə́gə́ Mmaʼmbî!”

³¹Mboŋ pɨ zə̂ sáʼə ághɔ́b ńgə́ pó pɔ́ʼnə ńnaʼə̂. Pó pɨ ḿmegnə̂ ńtɔ́ŋnə ngye əzɔb kɔ́ʼə pə́ atǐ ə́sóŋ ńgə́ “Mɔ́ Debid, kó mələ́ŋ mə́gə́ Mmaʼmbî.”

³²Yeso a tɨ́ ə́fóŋə ághɔ́b ḿbítə ńgə́, “Nə loonə̂ lə́ ńgə́ maŋ ghɛd ə́lɛ́ nə́ pəənə́?”

³³Pó kwěe ńgə́, “Mmaʼmbî, pəg loonə̂ lə́ ńgə́ gho ŋáʼ əmə́g mə́gə́!”

³⁴Yeso a kó mələ́ŋ mɔ́b ńkwum əmə́g móobə́; tsɔʼə əghâ yi wɨ́, pó chúʼə á mə́ jɨ́ nə́ əliʼ ńtíʼ ńdzoŋə̂ yə́.