Read Awing Matyo 21 Bible Online

Matyo 21 - Awing bible

Matyo 21

¹Ndzaŋ pó nə ńgyǐ nə́ tə ńtíʼ ḿbáatə Jɛlusalɛm lə́, ńkwúnə Bɛtfashə á atɛnə Nkwəənə mətǐ mə́ Olifə. Yeso a tú ngaŋə́zoŋə́ndzəm əjí zɛ́n pɛ̌,

²ə́sóŋ nə́ pó ńgə́ “Ghɛn nə́ aláʼ yə́ a mbi pəənə́, nə́ yǐ tɔ́g jɨ́ njakasə páʼ pə́ təŋnə̂ nə́ ə́wɨ́ pó mɔ́ əyǐə a nəpɛnə́ yə́. Kyag nə́ ághɔ́b ńgyǐ ə́fɛ̂ nə́ maŋə.

³Təmbɔʼ ŋwu tsə̌ a pítə áwɨ́ nə́ anu yətsə́, nə sóŋ nə́ yí ńgə́ Mmaʼmbîə a loonə̂ mə́ələ́; a yǐ tɔ́g mɛdtə̂ mɨ́d mə́ ghɛnə̂.”

⁴Zəənə́ anuə a nə ńdɔgə̂ aliʼ lə́ á mə́ chɨ́mkə nə́ anu pə́ nə ḿbɛ́d nə́ tə ə́sóŋ ńdaŋə̂ á mbô məntú mə́ Əsê ńgə́;

⁵“Sóŋə á mbô ngaŋə́láʼ Zayɔn ńgə́, Jɨ́ nə, əfo əwəənə́ a tə́ ńgyǐəə á mbô pəənə́! A tsóokə mbɨ əjǐə, a kɔ́ʼə a ndu njakasə páʼ ə́ pə́ nə́ chigə mɔ́ njakasə yi ńkoʼnə̂ nə́.”

⁶Ngaŋə́zoŋə́ndzəm Yeso ə́ ghɛn faʼ tsɔʼə ndzaŋ páʼ Yeso a pěʼ nə́ ə́sóŋ ńgə́ pó ghɛn faʼ lə̂.

⁷Ńgyǐ nə́ njakasə yi wɨ́ pó mɔ́ əyǐ, ńnoŋkə̂ ətsəʼ póobə́ a ndu mɨ́d Yeso a tíʼ ńnáanə a ndu ə́wə́.

⁸Tə́kɔʼə apoŋə pəənə á noŋkə̂ ətsəʼ əfə́g əpóobə́ á alaŋə́. Pətsɨ́ pɨ pó kə́ʼ məfag mə́ atǐ ə́shamkə̂ á alaŋə́.

⁹Mboŋ pɨ páʼ ə́ nə ńchî nə́ mbi yí pópə yi páʼ ə́ nə ńchî nə́ á ndzəm yí pó tíʼə ńdzoobə̂ ə́sóŋə ńgə́, “Ngóʼkə [7] á mbô Mɔ́ Debid! Mbwɔ́dnə ə́ chîə á mbô ŋwu páʼ a yǐ nə́ nə́ əlɛ́n Mmaʼmbî! Ngóʼkə á mbô Əsê páʼ a tsɛ nə́ ajúmə atsəmə!”

¹⁰Ndzaŋ ándó Yeso a nə ńkwú nə Jɛlusalɛm lə́, əliʼ ətsəm ə́ tíʼə ńchiʼnə̂ tsɔʼə chiʼnə̂ nə́. Pɨ pə́ tíʼə ḿbítə ńgə́, “Lɛ̌ əwə?”

¹¹Apoŋə pɨ zə́ á kwěe ńgə́, “Lə́ Yeso páʼ a pə́ nə́ Ntûsê, ə́fɛ́lə Nazalɛd á mə́m Galiliə.”

¹²Yeso a kwúnə Tə́kɔʼndɛ̂sê ńkəmə̂ ŋwu ntsəm páʼ a nə̈ fi nə́ ńkə́ ńjú əpú ə́wə́. Ə́sɛdkə̂ pətəpɛlə pə́ pɨ páʼ pó nə̈ ńkwúblə nə́ nkéebə, ńkə́ ə́sɛdkə̂ əkɔʼ pɨ páʼ pó nə̈ fi nə́ əlúʼə ḿmaʼə̂ á ndəsê,

¹³ńtíʼ ə́sóŋə á mbô pó ńgə́, “Pə́ ŋwaʼlə̂ á mə́mə aŋwaʼlə Əsê ńgə́, Pə́ yǒ fóŋ ndɛ̂ mə lə́ nə́ aliʼə́ achaʼtə́sê, lə́ pɨ pɛn ńdɔgə̂ ájɨ́d ə́ tíʼ nəlyaŋnə́ pəzə̌lə.”

¹⁴Pəfəg pópə kɔ́ŋə́sê ə́ kə yǐəə á mbô yə́ a Tə́kɔʼndɛ̂sê a tíʼ ńtsóʼə ághóobə́.

¹⁵Lə́, əghâ ándó Pətə́kɔʼ pə́ ngaŋə́pêsê pópə ngaŋə́zéʼkə pənoŋkə pó nə ńjɨ́ nə́ mənu mimə yɛ́d nə́ yɛ́d nə́ páʼ a nə̈ ńgɛd nə́ lə́, ḿbɨ ḿbá ndzaŋ kə́yé ŋwunə a nə̈ ńdzɔb nə́ á Tə́kɔʼndɛ̂sê ə́sóŋə ńgə́, “Ngóʼkə á mbô Mɔ́ Debid lə́!” məndě mɔ́b mə́ tíʼ ńdzáŋnə lɛ tətə.

¹⁶Pó pítə Yeso ńgə́, “Gho zóʼə anu páʼ pɔ́ pǐ pə́ sóŋ nə́? Yeso a kwěe ághɔ́b ńgə́, Maŋ zóʼə. Nə kě kə́ fóŋə á mə́mə aŋwaʼlə Əsê ńgə́, gho ghɛd ńgə́ pɔ̂nkə̂ pópə pi pə́ pɛ́d nə́ ńnɔ́ŋkə ńgə́ pó ŋáŋkə gho tə ńgɛn fyagə̂?”

¹⁷Yeso a mɛdtə̂ ághɔ́b ə́fɛ́lə aláʼ yi wɨ́ ńgɛnə̂ Bɛtani ńdê ə́wə́.

¹⁸Ndzaŋ Yeso a nə ḿbɨ nə ńtə́ ḿbəənə̂ aláʼə a mɛ́ məsânə lə́, nji ə́ záŋə yə́.

¹⁹A zə́ənə atǐə figə á nkaŋə́ alaŋə́ ńkɔ́ʼ ńgɛnə̂ nətɛ́n ə́wɨ́, lə́ ḿbə́ ńkě ajûtsə́ ə́wɨ́ jɨ́ pô tə ńdéʼtə məfǔə. Ńtíʼ ə́sóŋə á mbô atǐə fig zə̂ ńgə́, “Gho láʼ kě mənta pɨ zə́m pô.” Tsɔʼə əghâ yí wɨ́, atǐə fig zə̂ á júmə yə́.

²⁰Ndzaŋə ándó ngaŋə́zoŋə́ndzəm əjí ə́ nə ńjɨ́ nə́ anu yə wɨ́ lə́, a kɨʼnə̂ ághóobə́. Pó tíʼ ḿbítə ńgə́ atǐə fig zə̂ a zaŋkə̂ ńjúm lɛ ə́lɛ́?

²¹Yeso a kwěe ághɔ́b ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, təmbɔʼ nə́ túg mbimə́, atûə azə́ənə́ a chî tə́ koʼlə̂ pô, nə kě lə́ tsɔʼə anu pə́ ghɛd nə́ nə́ atǐə fig jɨ ghɛd pô.” Təmbɔʼ nə kə́ ə́sóŋ nə́ nkwəənə ghɛn ńgə́, “ghɛn ḿmaʼ mbɨ əzo á mə́m nkǐə, ə́ kə́ ə́faʼ ə́lə́ələ́.”

²²Təmbɔʼ nə́ túg mbimə́ tə ḿbə́ nə yǐ kwáalə ajúmə atsəm páʼ nə pítə nə́ á mə́mə achaʼtə́sê.

²³Yeso a kwúnə Tə́kɔʼndɛ̂sê, ndzaŋə a nə ńtə́ nə́ ńdzéʼkə ə́wɨ́ pətə́kɔʼ pə́ ngaŋə́pêsê pópə pətǎ pə́ aláʼ pó yǐəə á mbi yí ḿbítə yí ńgə́, “Gho faʼ ndɛn mənu ghɛn lə́ nə́ mətɨ mə́ ə́wə́? Lə́ kə fɛ̂ əwə ə́fɛ̂ mətɨ mɨ́d məənə́ á mbô gho?”

²⁴Yeso a kwěe ághɔ́b ńgə́, “Maŋ yǐ kə́ pítə áwɨ́ nə́ táʼə apítə. Təmbɔʼ nə́ kwěe mə, maŋ kə́ fiʼtə̂ áwɨ́ nə́ aliʼ maŋ lɔg nə́ mətɨ ə́wɨ́ ə́faʼ ndɛn mənu ghɛn ə́wə́.

²⁵Akwáalə́nkǐə Jɔnə a kə lǒo lə́ ə́fó? Á nəpó kəənə á mbô pəənə?” Pó tsəmnə̂ á mə́m pó ńtíʼ ə́sóŋ ńgə́, “Təmbɔʼ pɛn sóŋ ńgə́ a lǒo lə́ á nəpóolə, tə ḿbə́ a yǐ pítə áwɛ́n ńgə́, pɨ nə ḿbə́ ńkě yí pí ńgə́ akə̂.

²⁶Lə́ təmbɔʼ pɛn sóŋ ńgə́ á mbô pəənə, pɛn tə ḿbɔ́gə pɨ pí ńté ńgə́ pö sóŋə ńgə́ Jɔnə a nə ḿbə́ lə́ ntûsê.”

²⁷Pó tíʼ ńkwěe Yeso ńgə́, “Pəg kě jî pô.” A tíʼ sóŋə á mbô pó ńgə́, “Maŋ kě yǐ kə́ fiʼtə̂ áwɨ́ nə́ aliʼ mäŋ lɔg nə́ mətɨ əwɨ́ ə́faʼ ndɛn mənu ghɛn ə́wɨ́ pô.”

²⁸Yeso a pítə ághɔ́b ńgə́, “Nə kwaŋ ńgə́ akə̂? Ŋwu tsə̌ a kə chî ə́wɨ́ ńtúg pɔ́ pə́ mbyâŋnə pɛ́n pɛ̌.” Ńgɛnə̂ á mbô ntsɛɛmbi ə́sóŋ ńgə́, “Móonə mə, ghɛn faʼə̂ á mə́m nkáʼ mətǐ mə́ məloʼ ə́sɛ̂nə̌.”

²⁹A kwěe ńgə́, “Maŋ kě yǐ ghɛn pô” ńgyǐ mbɨ ńkwúblə ntɨ́ əyí ńgɛnə̂.

³⁰Tǎ əyǐ a kə́ ḿbɨ ńgɛnə̂ á mbô yitsə̌ mɔ́ əyǐ wə́ ńkə́ ə́sóŋ tsɔʼə anu páʼ a pěʼ nə́ ə́sóŋə á mbô yitsə́ wə́ lə̂. A kwěe ńgə́, “Tǎ, maŋ yǐ ghɛnə̂.” Lə́ ńgyǐ ḿbə́ ńkě ghɛn pô.

³¹A ndzɔʼ pó pɛ́n pɛ̌ əwə a nə ə́faʼ nə́ anu páʼ tǎ əghoobə́ a nə ńtə́ nə́ ńdoonə̂? Pó kwěe ńgə́, “ngaŋ ntsɛɛmbiə.” Yeso a tíʼ ə́sóŋə á mbô po ńgə́, “ngaŋə́kwáalə́nchubə aláʼ pópə əkwɛlə tə́ kwúnə á mə́mə anuə nəfoonə Əsê záʼ nə pɔŋə̂ kwúnə.

³²Ńté ńgə́ Jɔnə a nə ńgyǐəə á mbô pɨ ńnəələ̂ áwɨ́ nə́ ndu páʼ wɨ́d tɨ́ nə́ ndə̌ŋdəŋ lə́ nə pə́ ńkě yí pí pô; Lə́ ngaŋə́kwáalə́nchubə aláʼ pópə əkwɛlə pə́ ḿbímə yə́. Pɨ nə mbǎtə ńjɨ́ mənu mɨ́d mɨ lə́, ḿbə́ ńkě kwúblə ntɨ́ wɨ́ ḿbímə yí pô.

³³Jwə́ʼtə nə́ a yətsə́ atséebə́nə́múʼə́. Ŋwu tsə̌ a kə́ túgə aliʼə́ ndəsê ají ḿbǐ mətǐ mə́ məloʼ ə́wɨ́ ńkwúd nkáʼ ńdíblə zə́ələ́, ńtóŋə apɛ́lə á tsoŋkə̂ məloʼ ńtíʼ ńkwúlə tə́sɛ ndɛ̂ ə́ kɔ́ʼ ńgɛnə̂ atǐə, ńtíʼ néŋ pɨ ə́wɨ́ ńgə́ pə́ tə́ ńnáŋə pəzə̌lə. Ńtíʼ ńdzə́ʼkə nkáʼ yi wə́ á mbô pəənə apeŋ ńgɛnə̂ yə́ á nənyinə.

³⁴Ndɛlə́ akyɛ̂mənta ə́ nə ḿbɛn ńkoʼ, a tú ngaŋə́faʼ əjí ńgə́ pó ghɛn ńkwá məmí mənta mə́ atǐə á mbô pəənə ándó a nə ńdzə́ʼkə nə́ nkáʼə á mbô pó.

³⁵Ngaŋə́faʼ zə̂ ə́ wam ngaŋə́faʼ əjí zə̂, ə́shúmə táʼə, ńjwítə táʼə, ńtíʼ ńtə́mə táʼ nə́ məngɔʼə.

³⁶A pɨ ńkə́ ńtú yitsə̌ ngaŋə́faʼə á mbô pó páʼ ə́ nɨ́ nə́ ńtsɛ ngaŋ ntsɛɛmbiə. Lə́ ngaŋə́kyɛ̂mənta mə́ atǐ zə̂ ə́ kə́ ə́faʼ nə́ pó tsɔʼə ndzaŋ pó nə faʼ nə́ nə́ ngǎŋ ntsɛɛmbi lə̂,

³⁷A tíʼ ńdwegtə̂, ńtúmə mɔ́ əyǐ, yi mbyâŋnə á mbô pó ə́sóŋ ńgə́,” Pó yǐ ghóʼkə móonə mə.

³⁸Lə́, əghâ ándó ngaŋə́kyɛ̂mənta mə́ atǐ zə̂ ə́ nə ńjɨ́ nə́ mɔ́ əyǐ wə́ lə̂ ńtíʼ ə́sóŋə á tətɨ pó ńgə́, “Lɛ̌ njîndɛ̂ əyǐə; yǐ nə́ pɛn jwítə yi ńdɔgə̂ apeʼə ajíə.”

³⁹Pó tíʼ ńdɔgə̂ mɔ́ wə̂ ḿmaʼə̂ á ndzəm nkáʼ mətǐ mə́ məloʼ wə́ ńjwítə yə́.

⁴⁰Əghâ nə́, mbɔʼ ngaŋ nkáʼ wə́ a yǐ ńgyǐ a tíʼ ńgɛd ə́lɛ́ nə́ pɨ páʼ a nə ńdzə́ʼkə nə́ nkáʼ əyə́ á mbô pó lə̂?

⁴¹Pó kwěe ńgə́, “A yǐ ghɛd ngaŋə́fanə jɨ́d zə̂ ə́ kwúkə nəwû təpɔŋə,” a tíʼ ńdzə́ʼkə nkáʼ yə́ á mbô pɨ pə́ ndaʼ páʼ pó yǐ nə́ fɛ̂ məmí mənta mə́ atǐ əghâ mənta mə́ zə́m nə́.

⁴²Yeso a sóŋə á mbô pó ńgə́, “Nə kě á mə́mə aŋwaʼlə Əsê kə́ fóŋə ńgə́,” Ngɔʼ páʼ ngaŋə́póomə məláʼ ə́ kəŋkə̂ nə́ Ə́ pɨ ńtíʼ ngɔʼ nəlwî nə́ ndɛ̂? Mmaʼmbîə a ghɛd nə́; Zəənə́ anuə a pə́ nkɨʼnənuə á əmə́g pɛnə̂!

⁴³Lə́ələ́ pə́ ńgə́ mäŋ sóŋə áwɨ́ ńgə́ pə́ yǒ kwáalə anuə nəfoonə Əsê á mbô pɨ ə́fɛ̂ á mbô pɨ pə́ ətú pó yǒ nə́ zə́m chigə mənteemə́.

⁴⁴Ŋwu ntsəm páʼ a yǒ nə́ ńgwǔəə ndu ngɔʼ zəənə́ a yǒ lə́kə akəmə akəmə. Lə́ ŋwu páʼ ngɔʼ jɨ ə́ kə́ nə́ ńgwǔəə ndu yí ə́ yǒ nwadtə̂ yə́.

⁴⁵Ndzaŋə ándó pətə́kɔʼ pə́ ngaŋə́pêsê pópə Pəfalasi pə́ nə ńdzóʼ nə́ ətsábnə́múʼ Yeso lə́, ńtíʼ ńjî ńgə́ a nə̈ ńtséebə lə́ ńté ághóobə́.

⁴⁶Pó tíʼ ńnáŋ ndú ətsəmə á mə́ wam nə́ yí lə́ ḿbə́ ńtə́ ḿbɔ́g mboŋ pɨ zə́, ńté ńgə́ pó nə ńdɔg ńgə́ yí lə́ ntûsê.