Read Awing Matyo 22 Bible Online

Matyo 22 - Awing bible

Matyo 22

¹Yeso a kə́ ḿbɨ ńtséebə á mbô pó nə ətsábnə́múʼ ə́sóŋ ńgə́,

²“Anuə nəfoonə nəpóolə a chî lə́ ándó əfo yitsə̌ a tə́g nə́ alě nkaŋə mɔ́ əyǐ yi mbyâŋnə.

³Ńtíʼ ńtú ngaŋə́faʼ əjí ńgə́ pó ghɛn ə́sóŋə á mbô pɨ páʼ a nə ńgwú nə́ ághɔ́b lə́ ńgə́ pó yǐəə aliʼə́ ndzɔʼə́ wə̂, pó pə́ ńkǐəə ághóobə́ á mə́ yǐ nə́.

⁴A kə́ ḿbɨ ńtú yitsə̌ ngaŋə́faʼ əjí nə́ nkɨ ghɛn ńgə́, fiʼtə̂ ŋwu ntsəm maŋ nə ńgwú nə́ ńgə́ maŋ pɛ́dtə ńtsoŋkə̂ əpú ndzɔʼə́ tsɔʼə ətsəmə. Mɔ́ ndú na wə́ pó tə́kɔʼ na maŋ nə̈ ńdzə́g nə́ lə́, pə́ pɛ́dtə ńgwaalə̂, ajúmə atsəmə á koʼnə̂. Yǐ nə́ aliʼə́ nkaŋ wə́!

⁵Lə́ pó pə́ ńkě ndɛlə́ anuə ndzɔʼə́ yə wɨ́ túg pô, ńgɛn ńtə́ ə́faʼə̂ məmɔ́b mənu mimə́ ndaʼə. Táʼə a ghɛnə̂ yə́ afɔ yə́, yitsə̌ a ghɛnə̂ yə aliʼə́ məta yə́.

⁶Apuʼə a tíʼ ńgwam ngaŋə́faʼ əjí, ńtsaŋkə̂ ághɔ́b ńtíʼ ńjwítə ághóobə́.

⁷Əfo a nə ńdzáŋ ndě lɛ tətə, ńtíʼ ńtú pəsoye pí pó ghɛn ńjwítə pəjwítə pəwɨ́ ńtíʼ ńtoonə̂ aláʼə azóobə́.

⁸A tíʼ ə́sóŋə á mbô ngaŋə́faʼ əjí ńgə́, Ndɛd nkaŋ zə̂ ə́ koʼə̂, lə́ pɨ maŋ nə ńgwú nə́ ághɔ́b pó kě koʼnə̂ á mə́ yǐ nə́ pô.

⁹Ghɛn nə́ nə́ əlaŋə́ ətsəm ńgwúnə ŋwu ntsəm pɨ jɨ́ nə́ yí nə́ anuə ndzɔʼə́ zəənə́.

¹⁰Ngaŋə́faʼ əjí ə́ tíʼ ə́fɛ́d ńgɛn nə́ əlaŋə́ ətsəm ńkyeetə̂ ŋwu ntsəm pó jɨ́ nə́, pɨ pə́ əshîʼnə pópə pipə́ təpɔŋ tə ndɛ̂ ndzɔʼə́ ə́ tíʼ ńdwɛ́nkə nə́ pɨ pə́ wú nə́.”

¹¹Ndzaŋə ándó əfo a nə ńkwú nə́ á mə́ jɨ́ nə́ ngǎŋndzɔ́ʼə́ zə̂ lə́ ńdzə́ənə ŋwu tsə̌ páʼ a nə ńkě nə́ atsəʼə́ ndzɔʼə́ wê pô.

¹²Ḿbítə yí ńgə́, “Əshunə́ mə, gho nyi lə́ ə́lɛ́ ńkwúnə aliʼə́ nə́ tə azô ətsəʼə́ ndzɔʼə́?” Ŋwu wə̂ a kě akwe yətsə́ túg pô.

¹³Əfo wə̂ a tíʼ ə́sóŋə á mbô ngaŋə́téelə ndzɔʼə́ ńgə́, Kwúd nə́ mbô mí pópə məko mí ńtíʼ ḿmaʼə̂ yə́ apeŋə́ á mə́m ndzəmə́ aliʼ páʼ pə́ yǐ nə̈ kyéŋə tə kɔ́lə məsɔŋə́.

¹⁴Yeso a tíʼ ńdwegtə̂ ńgə́, “Pə́ wú pɨ pi nɨ́ nə́, ḿbə́ ńgɛnə̂ á mə́m wɨ́ ńtsɔ́ʼ pɔ́ pə́ ntaʼlə.”

¹⁵Pəfalasi pó fɛ́d ńgɛn ńtíʼə ńnáŋ ndu ətsəmə á mə́ tá nə́ ətəənə́ waamə̂ yí nə́ ətsáb əpíə.

¹⁶Ńtú ngaŋə́zoŋə́ndzəm əzɔ́b pópə pɨ páʼ pə́ tɔ́mtə nə́ Ɛlɔdə á mbô Yeso. Pó pítə Yeso ńgə́, “Ndzéʼkə,” pə jî ńgə́, “Gho tséebə ndə̌ŋdəŋə́. Gho zéʼkə a ndə̌ŋdəŋ ńté akwaŋə́nuə Əsê á mbô ŋwu ntsəmə. Ńkě gho ndɛd túg ńté akwaŋə́nuə pɨ pô, ńté ńgə́ gho lɔgə̂ ŋwu ntsəm tsɔʼə ndə̌ŋdəŋə́.

¹⁷Tíʼ fiʼtə̂ áwə́g nə́ azô akwaŋ ńgə́ a koʼnə̂ á mə́ tú nə́ nchubə aláʼə á mbô Kasa kɨ a kě koʼnə̂?”

¹⁸Lə́ Yeso a pə́ ńjîə akwaŋə azɔ́b yə təpɔŋ ńtíʼ sóŋ nə́ pó ńgə́, “Pɨ ngaŋmə́fɨg! Nə́ loonə̂ lə́ á mə́ tá nə́ atəənə́ waamə̂ mə ə́wɨ́ lə́ ńté akə̂?

¹⁹Nɨd nə́ mə nə́ nkéebə atəənə́ pə́ tû nə́ nchubə aláʼ ə́wə́!” Pó yǐ nə́ nkéebə atəənə́ ə́fɛ̂ á mbô yə́,

²⁰a pítə ághɔ́b ńgə́, “Lɛ̌ atûə ə́wə́? Lɛ̌ kə́ ḿbə́ əlɛ́n ə́wə́ a ndu nkáb zəənə́?”

²¹Pó kwěe yi ńgə́, “Lə́ atûə Kasa.” Yeso a tíʼ ə́sóŋə á mbô pó ńgə́, “Fɛ̂ nə́ ajúmə Kasa á mbô Kasa ńkə́ fɛ̂ yə Əsê.”

²²Ndzaŋ pó nə́ ńdzóʼ nə́ atsáb jɨ lə́, á kɨʼnə̂ ághɔ́b pó tíʼ ḿmɛdtə̂ yí ńgɛnə̂ ághóobə́.

²³Tsɔʼə alě yi wɨ́, Pəsadusi páʼ pó sóŋ nə́ ńgə́ mə́ júmnə nə́ nəwû mə́ kě ə́wɨ́ chî pô lə́ pó yǐ ḿbítə Yeso ńgə́,

²⁴“Ndzéʼkə, Mosisə a nə sóŋə á mbô pəg ńgə́ mbɔʼ ŋwunə a kwû tə túg pɔ́ pó ngwě əyǐ, ndim əyǐə a shib ńdzɔ́ʼə nkog əyǐ ḿbî pɔ́ ə́wə́ á mbô yə́

²⁵Pɔ́pə́mɛ́ pətsə́ pɛn asaambɛ̂ pə́ nə mbɛn ńchîə á ndzɔʼ pəg, ntsɛɛmbiə a zɔ́ʼ ńkwûə yí tə atûə. Ndzaŋə ándó a nə ńkě nə́ pɔ́ túg lə́, ńtíʼ ḿmɛdtə̂ ngwě əyǐə á mbô mɔ́mɛ́ əyǐə.

²⁶Anuə á nə ńgɛd nə́ ntsɛɛmbi lə́, á nə ńkə́ ńgɛlə̂ azoŋə, ńkə́ ḿbɨ ńgɛlə̂ azoŋə́zoŋə tsɔʼə ə́lɨ́d tə ḿməgə̂ ághɔ́b pətsəm pɛ́n asaambɛ̂.

²⁷Məngyě yi wə́ a yǐ ńkə́ ńdwegtə̂ ńkwûə yə́.

²⁸Əghâ nə́ a yǒ pə́ alě á mə́ júmnə nə́ lə́, məngyě yi wɨ́ a yǒ tíʼ ḿbə́ lə́ ngwě əwə á mə́m pó pə́ pɛn asaambɛ̂ ndzaŋ pó pətsəm nə ńdzɔ́ʼ nə yí lə̂?”

²⁹Yeso a kwěe ághɔ́b ńgə́, “Nə́ fankə̂ ńté ńgə́ nə́ kě jîə anuə a chî nə́ a mə́mə aŋwaʼlə Əsê pô. Ńkě mətɨ mə́ Əsê kə́ ńjî pô.

³⁰Á yǒ pə́ alě á mə́ júmnə lə́, pɨ pó kě zɔ́ʼ pô, ńkě pəənə a ndzɔʼə́ kə́ fɛ̂ pô. Pɨ pə́ yǒ chî lə́ ándó pətseŋpə́ndɛ́pə́sê á nəpóolə.

³¹Lə́, ńté mə́ júmnə nə́ nəwû, nə́ kě fóŋə anu páʼ Əsê a nə sóŋ nə́ á mbô pɨ,”

³²ńgə́ “Maŋ lə́ Əsê Ablaamə, Əsê Azig ḿbɨ ńkə́ ḿbə́ Əsê Jekɔbə, Lə́ kě Əsê pəkwû pô. Lə́ Əsê pɨ pə́ chî nə́ mbîə.”

³³Ndzaŋə ándó mboŋ pɨ zə́ kə zóʼ nə́ anu jɨ lə́, ndzeʼkə́ əjǐ ə́ kɨʼnə̂ ághóobə́.

³⁴Ndzaŋ Pəfalasi pə́ nə ńdzóʼ nə́ ńgə́ Yeso a pěʼ ńnaʼkə̂ ntso Pəsadusi lə́, ńtíʼ ńkyeetə̂ táʼə aliʼə́.

³⁵Táʼ ŋwu əghɔ́b yitsə̌ páʼ a pə́ nə́ ndzéʼkə pənoŋkə a kwaʼlə̂ Yeso nə́ apítə jɨ ńgə́,

³⁶“Ndzéʼkə, lə zə́ənə́ ntəgə́ páʼ ə́ pə́ nə́ yi ngweŋə́ á mə́m pənoŋkə?”

³⁷Yeso a kwěe ńgə́, “Kɔŋə̂ Tǎ əgho páʼ a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ akwaŋə́nuə azô atsəmə.

³⁸Lɛ̌ ntsɛɛmbi ntəgə́ ńkə́ ḿbə́ yi ngweŋə́.

³⁹Yi páʼ ə́ zoŋ nə́ ə́ kə́ ńchî lə́ tsɔʼə ándó jɨ́d jɨ ńgə́, Kɔŋə̂ ngaŋ nəpad əgho ándó mbɨ əzo.

⁴⁰Məntəgə́ mətsəm páʼ Mosisə a nə ŋ́ŋwaʼlə̂ nə́ ḿbá ndzeʼkə́ məntúmə́sê wɨ́, mə́ tɨ́ lə́ á ndu məntəgə́ mɨ mə́ mbɛ̌.”

⁴¹Əghâ ándó Pəfalasi pó nə ńkyeetə̂ nə́ táʼə aliʼ lə́, Yeso a pítə ághɔ́b ńgə́,

⁴²“Nə kwaŋ ńgə́ Nchwádkə lə́ mɔ́ əwə ŋwunə?” Pó kwěe ńgə́, “Lə́ Mɔ́ Debilə.”

⁴³A sóŋə á mbô pó ńgə́, “Lə́ nə ḿbə́ ńgɛlə̂ akə̂ Debilə a tə́ ńtséebə á mə́mə Ajwi ə́fóŋə yí nə́ Mmaʼmbîə? Ńté ńgə́ a nə sóŋ ńgə́,

⁴⁴Mmaʼmbîə á pə́ nə́ Əsê a sóŋə á mbô Mmaʼmbîə mə ńgə́, Náanə əlá apô maŋ yi təənə Tə ńkoʼ nə ndɛd maŋ yǒ nə́ néŋ ngaŋkə́pa əzô a nətɛ́n nə́ məko gho.

⁴⁵Təmbɔʼ Debilə a tíʼ fóŋə yí ńgə́, Mmaʼmbîə, a pɨ ńtíʼ ḿbə́ Mɔ́ əyǐ lə́ ə́lɛ́?”

⁴⁶Ŋwu tsə̌ a kě atsáb yətsə́ pɨ ńtúgə á mə́ kwěe nə́ pô. Ńtíʼ ə́fɛ́lə alě yi wɨ́ ńgɛn nə́ mbi, ŋwu tsə̌ a láʼ ńkě pɨ fiʼə̂ á mə́ pítə nə́ yí nə apítə atsáb yətsə́ pô.