Read Awing Matyo 23 Bible Online

Matyo 23 - Awing bible

Matyo 23

¹Yeso a tíʼ ə́sóŋ nə́ apoŋə pɨ zə̂ pópə ngaŋə́zoŋə́ndzəm əjí ńgə́,

²“Ngaŋə́zéʼkə pənoŋkə pópə Pəfalasi náanə akɔʼ Mosisə.

³Lə́ a pə́ ńgə́ nə́ shib ńdzóʼnə ághɔ́b ńkə́ ə́faʼə̂ anuə atsəm páʼ pó sóŋ nə́ ńgə́ nə́ faʼə̂, lə́, kɔ nə́ faʼə̂ anu pö faʼ nə́ ńté ńgə́ pó kě faʼə̂ lə́ anu pó zéʼkə nə́ pô.

⁴Pö kwúd əpeʼ pi lɛd nə́ ńtə́gə á mbeʼtə pəənə, ḿbə́ ńkě chî təmbɔʼ pó lɔg tsɔʼə fîəpô ńtɔ́mtə ághɔ́b ə́wɨ́ pô.

⁵Anuə atsəm pó faʼ nə́, pö faʼə̂ lə́ ńgə́ pɨ pə́ zə́ənə ághóobə́. Pö ghɛlə̂ pəpɔ́b pɔ́ pə́ nkwum páʼə atséebə Əsê á chî nə́ ə́wɨ́ pə́ wê nə́ á nəzeŋnə́ pópə apô lə́ pə́ fáŋkə̈, ńkə́ ńgɛlə̂ məmɔ́b məndzíglə́ mə́ atsəʼ mə́ sakə̂!

⁶Pó kɔŋə̂ á mə́ náanə nə́ əkɔʼ pi weŋə́ aliʼə́ akɔŋtə ńkə́ ńkɔŋə̂ á mə́ náanə nə́ nə́ əkɔʼ chigə pəənə á ndɛ̂sê pəjusə.

⁷Pó kɔŋ ńgə́ pə chaʼtə̂ ághóobə́ á ndu məteenə́ ńkə́ ńkɔŋ ńgə́ pə fóŋə ághɔ́b ńgə́ ‘Ndzéʼkə.’

⁸Lə́, kɔ nə pí pə́ fóŋə áwɨ́ ńgə́ ‘Ndzéʼkə’ ńté ńgə́ nə́ túg lə́ tsɔʼə táʼ Mə́sa pɨ pətsəm nə tíʼ ḿbə́ lə́ pɔ́pə́mɛ́.

⁹Kɔ nə́ láʼ ńkə́ fóŋə ŋwu tsə̌ á ndu ndəsê ńgə́, ‘Tǎ’ ńté ńgə́ nə́ túg lə́ tsɔʼə táʼ Tǎ páʼ a chî nə́ á nəpóolə.

¹⁰Kɨ kɔ nə́ kə́ ḿbí pə́ fóŋə áwɨ́ ńgə́ ‘Mə́sa’ ńté ńgə́ nə́ túg lə́ tsɔʼə ndaʼ táʼ ‘Mə́sa’ páʼ a pə́ nə́ Nchwádkə.

¹¹Ŋwu yi ngweŋə́ á mə́m pəənə́ a yǐ pə́ lə́ ngaŋəfaʼ əwəənə́.

¹²Ńté ńgə́ ŋwu ntsəm páʼ a kɔ́ʼkə nə́ mbɨ əjǐ pə́ yǐ tsóokə yə́. Ŋwu ntsəm páʼ a kə́ nə́ ńtsóokə mbɨ əjǐ pə́ yǐ kɔ́ʼkə yə́.”

¹³Ndɔ ə́ chîə atû pəənə́, ngaŋə́zéʼkə pənoŋkə pó Pəfalasi, pɨ lə́ ngaŋmə́fɨgə! Nə̈ kɨ́ʼ ndúmə anuə nəfoonə nəpóolə á əshî pəənə ḿbə́ ńkě ajɨ́ ə́wɨ́ kə́ ńchîə á mə́ kwú nə́ pô ńkě kə́ ńchîə á mə́ mɛdtə̂ nə́ pɨ pó lɔ nə́ mə́ kwú nə́ ə́wɨ́ pó kwú ə́wɨ́ pô.[8]

¹⁵“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ jáʼə pəkɔŋ pópə pəmɛ́ pə́ mənkǐə á mə́ kwúblə nə táʼ ŋwunə a pímə azə́ənə́ anǔəsê. Əghâ ándó a yǐ nə́ ḿbí ndzoŋ ndzəm əjɨ, nə ghɛd a koʼnə̂ á mə́ ghɛn nə́ á mə́m móg Satan ńtsɛɛlə̂ wɨ́ ngǎ pɛ̌.”

¹⁶“Ndɔ ə́ chîə atû pəənə́, pɨ lə́ pəfəg ḿbə́ ńtə́ ńkwá mbi pəənə! Pɨ̈ sóŋə ńgə́, ‘mbɔʼ ŋwunə a ghɛlə̂ atyǎntə ndaʼnə nə́ əlɛ́n Tə́kɔʼndɛ̂sê, á kě ajûtsə́ pô. Lə́ təmbɔʼ ŋwunə a pə́ ńgɛlə̂ atyǎntə ndaʼnə nə́ əlɛ́n ngɔʼ yi ŋwaŋkə̂ nə́ páʼ ə́ chî nə́ Tə́kɔʼndɛ̂sê, a shib ə́faʼə̂ anu yəwə́.’

¹⁷Əkəkóg pəfəg pətsə́! Zə́ənə́ á səglə̂ nə́? Lə́ ngɔʼ yi ŋwaŋkə̂ nə́ zə̂, kɨ Tə́kɔʼndɛ̂sê páʼ a fɛ̂ nə́ nəsəg nə́ ngɔʼ yi ŋwaŋkə̂ nə́?

¹⁸Nə́ kə̈ ə́sóŋə ńgə́, ‘mbɔʼ ŋwunə a ghɛlə̂ atyǎntə ndaʼnə nə́ nəpá nə́ Əsê, a kě anu yətsə́ pô. Lə́ ḿbə́ ńgɛlə̂ atyǎntə ndaʼnə nə́ akáŋə́sê páʼ á tɨ́ nə́ á nəpá Əsê, a shib faʼə̂ anu yəwə́.’

¹⁹Pəfəg pətsə́! Zə́ənə́ á səglə̂ nə́, akáŋə́sê kɨ nəpá nə́ Əsê páʼ nə́ ghɛd nə́ akáŋə́sê á səglə̂?

²⁰Lə́ələ́ pə́ ńgə́ ŋwu ntsəm páʼ a ghɛd nə́ atyǎntə ndaʼnə á nəpá Əsê a ghɛlə̂ ázɨ́d lə́ pópə ajúmə atsəmə á ndu wə́.

²¹Ŋwu ntsəm páʼ a kə́ nə́ ghɛd nə́ atyǎntə ndaʼnə nə́ əlɛ́n Tə́kɔʼndɛ̂sê, a ghɛd lə nə́ zɨ́d pópə Əsê páʼ ə́ chî nə́ á mə́m ə́wə́.

²²Ŋwu páʼ a kə́ nə́ ńgɛd nə́ nəpó, a ghɛd lə́ nə́ aləŋə́ Əsê ńkə́ ńgɛd lə́ nə́ ŋwunə ä náanə nə́ ə́wə́.”

²³“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ fɛ̂ táʼə ajúmə náʼə á mə́m əpú náʼ nəghə́m pɨ foʼ nə́ atû ngoʼə́ á mbô Əsê, ḿbə́ ḿmɛdtə̂ á tə́kɔʼ ndzeʼkə́ á mə́m noŋkə, ándó anu á tɨ́ nə́ ndə̌ŋdəŋə́, akóolə́mə́lə́ŋ pópə mbimə́. Nə́ chîə á mə́ zéʼ nə́ mənu mɨ tsɔʼə mətsəm tsɔʼə tə myaʼə̂ yətsə́

²⁴Pɨ mətû, pɨ lə́ pəfəgə́! nə̈ fógə nənjwînə á mə́m məloʼ mə́ənə́, ḿbə́ ńnô anjwa!”

²⁵“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ sogə̂ məmbɨ mə́ ndɔ́ŋ pópə əkáŋə, lə́ mə́m əjǐ pə́ ńdwɛ́nkə nə́ əpú páʼ nə́ kwá nə́ nə́ mətɨ, nə́ əkeelə́ pópə təpɔŋə.

²⁶Pɨ Pəfalasi lə́ pəfəgə́! Peg ə́sog mə́m ndɔ́ŋ pópə mə́mə akáŋ ńjî ńgə́ ndzəmə apeŋ ə́ ŋwaʼə̂.”

²⁷“Ndɔ ə́ chîə atû pəənə́, pɨ ngaŋə́zéʼkə pənoŋkə pópə Pəfalasi! Pɨ lə́ ngaŋmə́fɨgə! Pɨ chî lə́ ándó məse pə́ zɔ́ʼ nə́ nə́ mbəəmə́, páʼ mə́ pɔŋ nə́ apeŋə́, lə́ ndzəm mə́m ə́ pə́ ńdwɛ́nkə nə́ əkwəŋə́ əkwû pəənə pópə əpú páʼ ə́ kě nə ŋwaʼ pô.

²⁸Tsɔʼə nə́ ndú wɨ́d wə́, á əshîsaŋ, pɨ chîə ándó nə pɔŋ lə́ ḿbə́ ńtə́ ńkwúnə á mə́m məntɨ́ pɨ nə lwɛ́nkə nə́ məfɨgə pópə təpɔŋə.”

²⁹“Ndɔ ə́ chî atû pəənə́, ngaŋə́zéʼkə pənoŋkə pópə Pəfalasi! Pɨ lə́ ngaŋmə́fɨgə! Pɨ pɔ́ məse á mbô məntúmə́sê ḿbɨ́ ńtsoŋkə̂ məse mə́ pɨ pó ŋwaʼ nə́ á mbi Əsê.

³⁰Lə́ ḿbə́ sóŋ ńgə́ təmbɔʼ pəg nə ńchî ə́wɨ́ nə́ ndɛd pətǎ pə́ pətǎ pə́g, tə ḿbə́ lə́ nə́ ńkě pə̌gpo nɔd ńjwítə məntúmə́sê pô.

³¹Lə́ələ́ pə́ ńgə́ nə pyádnə ḿbí ńgə́ pɨ lə́ əla pɨ pó nə ńjwítə nə́ məntúmə́sê lə̂.

³²Ghɛn nə́ nə́ mbiə á mə́ məgtə̂ nə́ afaʼ pətǎ pə́ pətǎ pɨ́ pó nə́ ńchwáakə nə́.”

³³Pɨ lə́ mənóolə! ngwud mənó mə́ təpɔŋ! Təmbɔʼ nə lə́ʼ lə́ ə́lɛ́ ńgə́ kɔ pə́ tsəŋkə̂ áwə́ənə́ á mə́m móg satanə?

³⁴Lə́ələ́ pə́ ńgə́, maŋ yǐ tú məntúmə́sê pópə pɨ pó túg nə́ ajîə, ḿbɨ ḿbə́ nə́ ngaŋə́zéʼkə məntəgə́ mə́ Əsê; Pɨ yǐ jwítə pətsə́, ə́ kwumtə̂ pətsə́ nə́ atǐə apagləpaglə, ə́shúm pətsə́ a mə́m məláʼmə́sê mə́ Pəjusə, ə́ pɨ tsɔ́ʼ mbɔb pətsə́ á atúmə atúmə.

³⁵Achǐə ŋwu ntsəm páʼ a kə tɨ́ nə́ ndə̌ŋdəŋ á yǐ tə́əmə á atû pəənə́, ńchúʼ nə́ yə mbóʼngaŋ Abɛl tə koʼ nə́ yə Zakalya mɔ́ Belekya páʼ pɨ nə ńjwítə nə́ yə́ á tətɨ Tə́kɔʼndɛ̂sê pó nəpá nə́ Əsê.

³⁶Maŋ fiʼtə̂ áwɨ́ nə́ ndə̌ŋdəŋ ńgə́ təpɔŋ wɨ́d ghɛn ntsəmə á yǐ tə́əmə atû pɨ pə́ ngoʼ pəənə́!

³⁷“O Jɛlusalɛm, Jɛlusalɛm, nə̈ jwítə məntúmə́sê ḿbəənə̂ ńtə́mə pɨ páʼ Əsê a tú nə́ á mbô pɨ nə́ məngɔʼə, maŋ nə ńdê ńchúʼ lə́ ngoʼə́ akə̂ ńdoonə̂ á mə́ tsɛntə̂ nə́ pɔ́ pɨ́ táʼə aliʼə́ ándó mɛ́ ngə́bə á kə́bkə nə́ pɔ́ pí nə́ mbab míə, lə́ nə́ pə́ ńkě kɔŋ pô.

³⁸Jɨ́ nə́, Əsê a yǐ mɛdtə̂ məláʼ mɨ́ mə́ kɔ́ʼə afəmə́.”

³⁹Lə́, mäŋ fiʼtə̂ áwɨ́ ńgə́ ə́fɛ́d nə́ pə əghâ nə́, nə láʼ kě mə pɨ jɨ́ pô, tə ńdéʼtə nə́ sóŋ ńgə́, “Mbwɔ́dnə ə́ chîə á mbô yí páʼ a yǐ nə́ nə́ əlɛ́n Mmaʼmbîə.”