Read Awing Matyo 24 Bible Online

Matyo 24 - Awing bible

Matyo 24

¹Yeso a fɛ́lə Tə́kɔʼndɛ̂sê ńtə́ ńgɛnə̂, ngaŋə́zoŋə́ndzəm əjí tíʼ ńdzoŋ ə́fóŋə yí á mə́ nɨd nə́ yí ndzaŋ pə́ pɔ́ nə́ ndɛ̂ yi wə́.

²Yeso a pítə ághɔ́b ńgə́, “Nə́ jɨ́ əpú pɨ tsɔʼə ətsəm? Mäŋ fiʼtə̂ áwɨ́ nə́ ndə̌ŋdəŋ ńgə́ tsɔʼə táʼ ngɔʼə aliʼə́ nə́ a yǒ kě a ndu yitsə̌ pɨ noŋnə̂ pô. Pə́ yǒ kwɛlə̂ ajúmə atsəmə á əsê.”

³Ndzaŋə ándó Yeso a nə ńnáanə nə́ á ndu Nkwəənə mətǐ mə́ Olif lə́, ngaŋə́zoŋə́ndzəm əjí yǐəə á mbô yə́ a ndzəmə ndzəm ə́sóŋ nə́ yí ńgə́, “Fiʼtə̂ áwə́g nə́ ndɛlə́ ándó ndɛn mənu ghɛn ətsəm ə́ ghɛd nə́ lɔgə̂ aliʼə́, ńkə́ ḿbə́ nə́ əkyeʼmə́nu ə́ ghɛd nə́ nɨd ńgə́ ndɛd əzo á mə́ yǐ nə́ ə́ koʼ pópə ndwigtə mbîə.”

⁴Yeso a kwěe ághɔ́b ńgə́, “Lɔg nə́ ndɛlə́, kɔ nə́ ghɛd ŋwu tsə̌ a fɨgə̂ áwə́ənə́.

⁵Ńté ńgə́ pɨ pə́ nɨ́ nə́ pə́ yǒ yǐ nə́ əlɛ́nə mə̈ ə́sóŋə ńgə́, ‘Maŋ lə́ Nchwádkə!’ ə́ tíʼ fɨg pɨ pə́ nɨ́ nə́.

⁶Nə́ yǒ zóʼ ndzaŋ pə̈ lə́ʼ nə́ məntsoolə ə́ kə́ zóʼ ndzaŋ pə́ sóŋ nə́ anu ńté məntsoolə. Lə́, nə́ ghɛd ńdzóʼ, kɔ nə́ pɔ́gə. Ndɛn mənu wɨ́d ghɛn ə́ chîə á mə́ lɔg nə́ aliʼə́, lə́ ndɛd ndwigtə mbî ə́ pə́ ḿbɛ́d pɔŋə́ yǐəə.

⁷Atúmə á yǒ lǒo á əsê sɔb məsɔŋə́ á ndzəm yətsə́, əláʼ páʼ pəfo pə́ sáʼ nə́ ə́ lǒo á əsê ə́sɔb məsɔŋə́ á ndzəm pətsə́. Nji ə́ yǒ gháʼə, ndəsê ə́ chiʼnə̂ aliʼə́ aliʼə́.

⁸Ndɛn mənu ghɛn ətsəm ə́ ghɛd chî lə́ tsɔʼə ándó məngyě nəpəmə a zóʼə móonə.”

⁹Pə́ yǒ tíʼ waamə̂ áwɨ́ ghɛd nə́ chigə ńjɨ́ ngə́ʼ pə kə́ ńjwítə áwə́ənə́. Mbî ntsəm ə́ peenə̂ áwɨ́ ńté atûə mə.

¹⁰Á ghɛd pə́ nə́ ndɛd yi wɨ́ lə́, pɨ pə́ nɨ́ nə́ pó myaʼ mbimə́ əzɔb ə́fi məmbɨ mɔ́b, ə́ kə́ pa məmbɨ móobə́.

¹¹Məntú mə́ Əsê mə́ məfɨg mimə nɨ́ nə́ mə́ yǒ ə́fɛ́d fɨg pɨ pipə nɨ́ nə́.

¹²Ndzaŋ təpɔŋə á yǒ nə́ nɨ́ tə́shú lə́, akɔŋnə pɨ pə́ nɨ́ nə́ á póolə.

¹³Lə́ ŋwu ntsəm páʼ a tɨ́ nə́ ńtyantə̂ tə ńkoʼə̂ a ndwigtə á yǒ chwáalə.

¹⁴Pə́ yǒ náŋkə nkɨ yi əshîʼnə ghɛn ńté Anuə Nəfoonə Nəpóolə á mbô mbî ntsəm, ńjî ńgə́ mbî ntsəm ə́ zóʼə, kɔ ŋwu tsə̌ á yǒ ə́sóŋ ńgə́ maŋ nə ńkě zóʼ pô, záʼ ndwigtə mbî ə́ tíʼ ḿbɔŋə́ yǐəə.

¹⁵“Nə́ yǐ zə́ənə́ Ajúmə Təpɔŋ páʼ Əsê a Pa nə́ páʼ ntûsê Danyal a nə sóŋ nə́ lə́, zə́ələ́ á tə́əmə aliʼ yə ŋwaʼ nə́.” (Pɨ pə̈ fóŋ nə́ pó lɔg ndɛlə á mə́ chígə́ nə́ zóʼə anu yəwə́)

¹⁶“Mbɔʼ nə́ jɨ́ lɛ, pɨ pə́ chî nə́ á Judya pó tíʼ ńkə ndə̌ ńkɔ́ʼə á məŋnkwəənə.

¹⁷Ŋwunə a chî nə́ atûndɛ̂ kɔ a tsóolə á ndɛ̂ yə́ á mə́ lɔg nə́ ajú yətsə́.

¹⁸Ŋwunə a chî nə́ afoonə kɔ a pɨ ḿbəənə̂ mə́ lɔg nə́ kód əyǐə.

¹⁹Əlě pə wɨ́ ə́ yǒ tyantə̂ á mbô pəngyě pə́ nəpəm pópə pəngyě pə́ tə́ nə́ ńnɔ́ŋkə á pə́ ə́lɛ́ lôo!

²⁰Tə́ nə̈ ńchaʼtə́sê ńgə́ mənu mɨ́d mɨ kɔ mə́ yǐ ńtégə áwɨ́ nə́ ndɛd páʼ əfə́g ə́ chî nə́ apeŋ kəənə Alěláʼə́sê.

²¹Ńté ńgə́ ngə́ʼə alě yə wɨ́ ə́ yǒ chaanə̂ tə tsɛ ngə́ʼ ntsəm ə́ nə ḿbɛ́d nə́ tə́ ńchîə á mbî ə́fɛ́lə nəchwaakənə́ mbî tə ńkoʼə̂ alě yí wə́. Yitsə̌ ə́ láʼ ə́ kě ándó yi wɨ́ kə́ ḿbɨ́ ńchî pô.

²²Mbɔʼ Əsê a nə ńchî əlě pi wɨ́ lə́g pô, tə ḿbə́ ŋwu tsə̌ a ghɛd ńkě chwád pô. A pɛn yǒ lə́g əlěmbî pə wɨ́ ńté pɨ pí páʼ a nə ńtsɔ́ʼ nə́.”

²³Á yǒ nə́ ḿbə́ nə́ ndɛd yi wɨ́ ŋwu tsə̌ a sóŋə á mbô pɨ ńgə́, “Náŋ nə́, yi páʼ Əsê a Tsəʼ nə́ a ghɛnə́, kɨ ńgə́ a yǐəə!” Kɔ nə́ pímə atséebə ajíə.

²⁴Ńté ńgə́ məsê mə́ məfɨg pópə məntúmə́sê mə́ məfɨg mə́ yǒ yǐ ghɛd pətə́kɔʼ pə́ əkyeʼmə́nu pópə əkɨʼnəmə́nuə á mə́ fɨg nə́ pəənə, tə pá pɨ páʼ Əsê a tsɔ́ʼ nə́ ághɔ́b lə́ ə́wə́, páʼ təmbɔʼ ndú ə́ chî ə́wə́.

²⁵Jɨ́ nə́! maŋ fiʼtə̂ áwɨ́ záʼ ndɛd pɔŋə̂ koʼə̂.

²⁶Lə́ələ́ pə́ ńgə́ mbɔʼ ŋwu tsə̌ a sóŋə á mbô pɨ ńgə́, jɨ́ nə́, a chîə á kɔŋ mənkwâʼlə̌! Kɔ nə́ ghɛn ə́wə́; Kɨ ə́sóŋ nə pɨ ńgə́ a pánə aliʼə́ nə́! Kɔ nə́ pímə.

²⁷Ndzaŋə ándó nəfaŋ nə́ ŋwaŋkə̂ nə́ ə́fɛ́lə á əsáʼmə́nu ńgɛnə̂ á mɛ́dmə́nu lə́, lə́ tsɔʼə ndzaŋə ándó Mɔ́ Ŋwunə a lǒo nə́ yǐəə.

²⁸Aliʼə́ atsəmə akwûə ajúmə á chî nə́ ə́wɨ́, lə́ aliʼ páʼ əntsônə́ngwúmnə́ ə́ kyeetə̂ nə́ ə́wə́.

²⁹“Tsɔʼə əghâ páʼ ngə́ʼ əlě pə wɨ́ ə́ yǒ nə́ laŋ lə̂, mə́numə á yǒ sɛ́nə, sáŋə á kě nkyaʼ pɨ fɛ̂ pô, pɔ́ pə́ sáŋ pə́ lǒo á nəpó ńgwǔəə á ndəsê, mətɨ mə́ nəpó mə́ chiʼnə̂.”

³⁰Əghâ yí wɨ́ lə́, akyeʼə́nuə Mɔ́ Ŋwunə á fɛ́lə nəpóolə, ngwud ŋwu məsɔŋ ntsəmə á ndu ndəsê ə́ kyéŋə, pó yǒ zə́ənə́ Mɔ́ Ŋwunə a yǐəə á mə́mə alə́mə á nəpóolə, nə́ mətɨ pópə tə́kɔʼ nəgháʼ əyǐə.

³¹A yǒ tíʼ tú pətseŋpə́ndɛ̂ pí nə́ ntaŋ páʼ jɨ́d ə́ pyádnə nə́ ńchûə, pó kyeetə̂ pɨ pí páʼ a tsɔʼ nə́ á mə́m məlá mə́ mbî mɛ́n nəkwa. Ə́fɛ́d nə́ táʼ əlá nəpó ńkoʼ nə́ yitsə̌.

³²“Əghâ nə́, zéʼ nə́ anu zəənə́ á mbô atǐə figə. Əghâ ándó məfag mí mimə pwɔ́d mə́ tô nə́ tə ńtíʼə ə́fógə məfǔ lə́, nə́ jî ńgə́ ndɛd mbəŋ ə́ páatə.

³³Lə́ələ́ pə́ ńgə́, mbɔʼ nə́ yǒ ńjɨ́ mənu mɨ mətsəm, nə́ jî ńgə́ a páatə, tə ńkoʼə̂ á ntsǒnkáʼə.

³⁴Mäŋ fiʼtə̂ áwɨ́ nə́ ndə̌ŋdəŋ ńgə́, pɨ pə́ ngoʼ pɨ pó yǒ kě pətsəm kwúkə tsɔʼə tə ghə́ mənu mɨ mətsəm mə́ lɔgə̂ aliʼ pô.

³⁵Nəpó pó ndəsê ə́ ghɛd laŋ kətaŋə, lə́ atséebə mə á pə́ ńdáʼ ńkě kətaŋ laŋ pô.”

³⁶“Ŋwu tsə̌ a kě anu jî ńté alěmbî yə wɨ́ kɨ ndɛd yi wɨ́ pô, á lǒo pətseŋpə́ndɛ̂ pí páʼ pə́ chî nə́ nəpó pə́ kě jî pô, kɨ Mɔ́ Ŋwunə tə ńdə́ʼtə Tǎ páʼ a jî nə́ anu ńté.

³⁷Ndzaŋə ándó á nə́ ńchî nə́ nə́ əlěmbî Nwâ lə́, lə́ ndzaŋə ándó á lǒo nə́ chîə əghâ Mɔ́ Ŋwunə a lǒo nə́ yǐəə.

³⁸Á nə ḿbə́ nə́ ndɛd záʼ ə́ nkǐ yǒ ḿbɔŋə̂ kɔ́ʼ lə́, pɨ pə́ nə̈ ńjîə ńkə́ ńnô, ńdzɔ́ʼə ńkə́ fɛ̂ pɔ́ póobə́ á ndɛ̂ ndzɔʼə́, tə ńkoʼ nə́ ndɛd Nwâ a nə́ ńkwú nə́ á mə́mə apáŋə.

³⁹Pó pə́ ńkě jîə anuə á yǐ nə́ laŋ pô tə nkǐ ə́ yǐ ńkɔ́ʼ ńdɔgə̂ ághɔ́b pətsəm ńgɛnə̂. Lə́ ndzaŋə á yǒ nə́ kə́ chî nə́ ndɛd páʼ Mɔ́ Ŋwunə a yǒ nə́ yǐəə.

⁴⁰Mbyâŋnə zɛ́n pɛ̌ ə́ yǒ chîə afoonə, pə́ lɔgə̂ táʼ ḿmɛdtə̂ táʼə.

⁴¹Pəngyě pɛ́n pɛ̌ pə́ tə́ ńgɔʼə̂ apéenə á nəghǒ, pə́ lɔgə̂ táʼ ḿmɛdtə̂ táʼə.”

⁴²Lə́ələ́ pə́ ńgə́, nə́ lɔg ndɛd ńté ńgə́ nə́ kě jîə alě páʼ Mmaʼmbî əwəənə́ a yǒ nə́ yǐ pô.

⁴³Lə́ jí nə́ anu zə́ənə́, təmbɔʼ ngaŋndɛ̂ a nə ńjî ndɛlə́ á nətúʼ páʼ ndzə̌lə a yǐ nə́ yǐ, tə ḿbə́ a nə́ ńtə́ ḿbyáabə, ńkě mɛdtə̂ ndɛ̂ əjǐ pə́ pə́ʼ pô.

⁴⁴Lə́ələ́ pə́ ńgə́, nə́ kə́ ńtə́ ḿbyáabə ńté ńgə́ Mɔ́ Ŋwunə a yǒ yǐ nə́ ndɛd páʼ nə́ pěʼ nə́ ńkě tə́ ḿbyáabə pô.

⁴⁵“Lə́ əwə ngaŋəfaʼ páʼ tǎ afaʼə a náakə nə́ yí ńgə́ a tə́ ńnáŋə yitsə́ ngaŋə́faʼ á mə́m ndɛ̂ yí, a néŋ nə́ ntɨ́ əyí nə́ afaʼ ńkə́ ńgyáŋ ə́fɛ̈ məjî nə́ pó nə́ ndɛd páʼ ə́ koʼnə̂ nə́?

⁴⁶Á yǐ pɔŋə̂ á mbô ngaŋəfaʼ yi wɨ́ páʼ təmbɔʼ tǎ afaʼ əyǐə a tə́ ńkwə̂ ńdzə́ənə yə́ a tə́ faʼ əshîʼnə.

⁴⁷Mäŋ fiʼtə̂ áwɨ́ nə́ ndə̌ŋdəŋ ńgə́, Tǎ afaʼ əyǐə a yǐ ghɛlə̂ a tə́ ńnáŋə apeʼə ají tsɔʼə atsəmə.

⁴⁸Lə́ mbɔʼ ngaŋə afaʼ wə́ á pə́ yi təpɔŋ á sóŋ nə́ mbɨ əjɨ ńgə́: Tǎ afaʼə mə a yǐ twiʼə̂ á mə́ kwə̂ nə́,

⁴⁹ńtíʼ ńchúʼə á mə́ shúm nə́ yitsə́ ngaŋə́faʼ ńtûə ńjîə ńkə́ ńnô pópə əpɛ̌mə́loʼə.

⁵⁰Tǎ afaʼ ngaŋəfaʼ wə́ a yǒ ńkwə̂ nə́ alě páʼ a pěʼ nə́ ńkě tə́ ḿbyáabə pô, kɨ nə́ ndɛd páʼ a pěʼ nə́ ńkě jî ńgə́ a tə́ ńgyǐəə pô.

⁵¹Tǎ afaʼ əyǐə á yǐ ə́ chígə́ ə́shúmə yí ə́ tíʼ ə́fɛ̂ aliʼə́ ajíə á mə́m ngaŋmə́fɨgə, aliʼ páʼ pə́ yǒ nə̈ ə́ kyéŋə kə́ kɔ́lə məsɔŋ ə́wə́.”