Read Awing Matyo 27 Bible Online

Matyo 27 - Awing bible

Matyo 27

¹Mbî ə́ fógə á mɛ́ məsânə, pətə́kɔʼ pə́ ngaŋə́pêsê tsɔʼə pətsəm pópə mətû mə́ Pəjus pó kyeetə̂ ńtíʼ ńkwaŋ ndu mbɔʼ pó jwítə Yeso.

²Pó kwúd mbô mí ńtíʼ ńdɔgə̂ yí ńgɛn fɛ̂ á mbô Payilɛd páʼ a nə ḿbə́ nə nətû páʼ aláʼə Lomə á náakə nə́.

³Əghâ ándó Juda, ŋwu páʼ a nə fi nə́ Yeso lə́, a nə ńjɨ́ nə́ ńgə́ pə́ pímnə ńgə́ pə́ yǐ jwítə Yeso lə́, ńkwúblə fɛ́lə á mə́m təpɔŋ əyǐə, ńtíʼ ńdɔg nkéebə atəənə́ yi ŋwaŋkə̂ nə́ zə̂ ntáʼ məghə́m mɛ́n teelə́ ńgɛn ńkwígə á mbô pətə́kɔʼ pə́ ngaŋə́pêsê pópə mətû mə́ aláʼə.

⁴Ə́sóŋ ńgə́, “Maŋ ghɛlə̂ təpɔŋə á mə́ fi nə́ ŋwu páʼ a kě nə́ anuə təpɔŋ yitsə̌ ghɛd pô.” Po kwěe yí ńgə́, “Zə̂ a náŋə áwə́g nə́ akə̂? A náŋə lə́ gho!”

⁵Juda a tíʼ ḿmaʼ nkáb yi wə́ a tə́kɔʼndɛ̂sê ńgɛnə̂ yə́; ə́fɛ́lə aliʼ yi wɨ́ ńgɛn ńdə́ŋə yə́.

⁶Pətə́kɔʼ pə́ ngaŋə́pêsê pə́ pyá nkáb yi wɨ́ ńtíʼ ə́sóŋ ńgə́, “Lɛ̌ nkéebə achǐə, noŋkə əwɛnə̂ a pə́ ńkě pí ńgə́ mbɔʼ pə́ néŋə zə́ələ́ á mə́m nkáb tə́kɔʼndɛ̂sê pô.”

⁷Pó tíʼ ḿbímnə ńgə́ pə lɔg nkáb yi wɨ́ ńjúnə aliʼə́ ndəsê á mbɔ̂məkəŋ mə́ atsaʼ ə́wɨ́, ńtíʼ ńdɔgə̂ aliʼ yə wɨ̈ ńtwə́ŋə pə yǐyinə́ á mə́mə aláʼ ə́wə́.

⁸Lə́ ghɛd ə́lɨ́d tə ńkoʼ nə́ pə ə́sɛ̂n pə́ fóŋə aliʼə́ ndəsê yə wɨ́ ńgə́ “Aliʼə́ Ndəsê Achǐə.”

⁹Ńdaŋ ə́lɨ́d, anu páʼ ntûsê Jelemaya a nə sóŋ nə́ lə́, á fɛ́d ńkoʼnə̂ ńgə́, “Pó nə ńkwá nkéebə atəənə́ zə̂ ńtáʼ məghə́m mɛ́n teelə́, a pə́ ndɛn nkáb páʼ pɔ́ pə́ Islɛl pə́ nə ḿbí nə́ ńgə́ pə́ yǒ tûə atû yə́.

¹⁰Pó tíʼ ńdɔg nkáb yi wɨ́ ńjú ndəsê mbɔ̂məkəŋ mə́ atsaʼ wə́, ndzaŋ Mmaʼmbîə a nə sóŋ nə́ nə́ maŋ.[12]”

¹¹Əghâ ándó pə́ kə lɔg nə́ Yeso ńgyǐəə á mbi Payilɛd lə́, Payilɛlə a tíʼ ḿbítə yí ńgə́, “Gho lə́ əfo Pəjus?” Yeso a kwěe yí ńgə́, Gho sóŋ ə́lə́ələ́.

¹²Pətə́kɔʼ pə́ ngaŋə́pêsê pópə mətû mə́ aláʼ pó nə́ ńnéŋ mənuə atû yə́, a pə́ ńkě ághɔ́b kwěe pô.

¹³Payilɛlə a tíʼ ə́sóŋ nə́ yí ńgə́, “Gho kě tə́ ńdzóʼ ndɛn mənu ghɛn pə́ néŋ nə́ atû gho lɛ?”

¹⁴Lə́ Yeso a pə́ ńkǐə yə́ á mə́ kwěe nə́ anu yətsə́, a kɨʼnə̂ nətû nə́ aláʼ lɛ tətə.

¹⁵Lə́ nə ḿbə́ mbɔ́ nətû nə́ aláʼ ńgə́ mbɔʼ á pə́ alě Akɔŋtə Ndzáʼkə atsəm a shib ə́fógə táʼ ngaŋətsáŋ páʼ pɨ pə́ kɔŋ nə́ ə́fɛ̂ nə́ pó.

¹⁶A nə ḿbə́ əghâ yi wɨ́ lə́, ngaŋətsáŋ yitsə̌ a kə chî ə́wɨ́ pə́ nə ḿbyádnə ńjîə yí pə́ fóŋə nə́ Balabasə.

¹⁷Əghâ ándó mboŋ pɨ nə ńtíʼ nə́ ńkyeetə̂ lə́, Payilɛlə a pítə ághɔ́b ńgə́, “Nə kɔŋ ńgə́ maŋ fɛ̂ lə́ á əwə á mbô pəənə́? A Balabasə kəənə Yeso pə̈ fóŋ nə́ nə́ Yi Ńtsəʼ Nə́ lə̂?”

¹⁸Ńté ńgə́ a kə pyádnə ńjî ńgə́ lə́ kə ghɛd ŋwéetə́ pə́ yǐ nə́ Yeso á mbô yə́.

¹⁹Əghâ ándó Payilɛlə a kə zámnə nə́ a ndumə aləŋə́sáʼə́məsáʼ ají lə́, ngwě əyǐə a tú nkɨ ghɛn ńgə́, “Kɔ gho ghɛlə̂ anu yətsə́ nə́ mbóʼngaŋ wə̂ ńté ńgə́ maŋ lê ndzəəmə a nətúʼ ə́sɛ̂n ńjɨ́ ngə́ʼ tə́shú ńté yə́.”

²⁰Lə́ pətə́kɔʼ pə́ ngaŋə́pêsê pópə mətû mə́ aláʼə pó legtə̂ apoŋə pɨ zə̂ ńgə́ pó sóŋ ńgə́ pə́ mɛdtə̂ Balabasə ə́fɛ̂ Yeso pə́ jwítə.

²¹Lə́ Payilɛlə a pə́ ḿbítə ághɔ́b ńgə́, “Á mə́m pɨ pɨ pɛ́n pɛ̌ nə́ kɔŋ ńgə́ maŋ mɛdtə̂ wə́ənə́ á mbô pəənə́?” Pó kwěe ńgə́ “Balabasə.”

²²Payilɛlə a pítə ághɔ́b ńgə́, “Maŋ yǐ tíʼ ghɛd ə́lɛ́ nə́ Yeso páʼ pə́ fóŋ nə́ nə́ Yi Ńtsəʼ Nə́ lə̂?” Pó pətsəm kwěe ńgə́ “Pə́ kwumtə̂ yə́!”

²³Payilɛlə a pítə ághɔ́b ńgə́, “Pə́ kwumtə̂ yí ńté akə̂? A wǔ lə́ akə̂ anuə?” Pó megnə̂ ńtsáb ngye əzɔb kɔ́ʼə atǐ ńgə́ “Pə́ kwumtə̂ yə́!”

²⁴Əghâ ándó Payilɛlə a kə jɨ́ nə́ ńgə́ yə̈ táŋnə lə́ kətaŋ, tə anu yətsə́ a kě ə́wɨ́ chî təmbɔʼ a pɨ ńgɛd ńté ńgə́ pɨ pə́ tíʼə ńgyɛ́ɛlə yɛ́ɛlə nə́ lə́, ńtíʼ ńkwá nkǐ, ńtə́ sog mbô míə á mbiə apoŋə pɨ zə́ ńtíʼə̈ ə́sóŋə ńgə́, “Apô mə á kě nə́ nəwû ŋwu nə chî pô! Anuə atsəmə á chîə á mbô pəənə́!”

²⁵Mboŋ pɨ zə̂ kwěe ńgə́, “Tíʼə achǐə yə́ á chîə atû pəg ńdzoŋ ḿbá pɔ́ pə́gə́!”

²⁶Payilɛlə a tíʼ ḿmɛdtə̂ Balabasə á mbô pó; ḿbə́ ə́shúmə Yeso ə́fɛ̂ yə́ á mbô pó ńgə́ pó ghɛn ńkwumtə̂ yə́.

²⁷Ngaŋə́maʼə́ntso Payilɛd pó tíʼ ńdɔgə̂ Yeso ńgɛn nə́ yə́ á ntɔ́ʼə, Ngaŋə́maʼə́ntso ətsəm tíʼ ńtə́əmə á mbi yə́.

²⁸Pó nə ńtsɔ́ʼtə ətsəʼ pí ńtíʼ ńgwê paŋpaŋə atsəʼ yitsə̌ á mbɨ yə́.

²⁹Ńtíʼ ńtsoŋkə̂ lɛ nəfɔ nə́ məsɔbsɔb ńgwê atû yə́, ńnéŋə akəmə akəkaʼə apô yí yə təənə ńtíʼə ńkwə́ʼtə mbi yí ńnyegnə̂ yi, ə́sóŋə ńgə́, “Sə̂ə əfo Pəjus!”

³⁰Pó twǐ mətwê nə́ yí ńtíʼ ńkwáalə akəmə akəkaʼ zə́ ńtíʼə ə́shúmə atûə ají ə́wə́.

³¹Əghâ ándó pó nə ḿməgtə̂ nə́ á mə́ nyegnə̂ nə́ yí lə́, ńtíʼ ńtsɔ́ʼə atsəʼ zə̂ a mbɨ yí mbɨ ńgwê əpíə a mbɨ yí ngǎ yitsə̌ ńtíʼ ńdɔgə̂ yí ńgɛnə̂ á mə́ kwumtə̂ nə́.

³²Ndzaŋ pó nə ńtə́ nə́ ə́fɛ́lə apeŋ lə́, ńtégə ŋwu tsə̌ páʼ a lǒo nə́ aláʼə Sayileen pə́ fóŋə yi nə́ Saamunə, ńtíʼ ə́fyáalə yí ńgə́ a twáamə atǐə apagləpaglə Yeso.

³³Pó yǐ tə ńkoʼə̂ aliʼ yitsə̌ pə́ fóŋ nə́ ńgə́ Gɔlgɔta páʼ əlɛ́n yi wɨ́ ə̈ sóŋ nə́ lə́ ńgə́, “Aliʼə́ akəghə́ʼlə́ atûə.”

³⁴Ńtíʼ ńgwɛd məloʼ nə́ ajûtsə́ páʼ a pyádnə nə́ ńdwǐ ə́fɛ̂ nə́ Yeso; A pə́ ńjwə́ʼ ńkǐəə yə́.

³⁵Pó kwumtə̂ yí ńtíʼ ńtə́m pid ńjɨ́ pɨ páʼ pó yǐ nə́ lɔg ətsəʼ əpíə.

³⁶Ńtíʼ ńnáanə ndəsê ńtíʼə ḿbyáabə yí ḿbɔ́gə ńgə́ a yǐ kəələ̂.

³⁷Pó nə ŋ́ŋwaʼlə̂ aŋwaʼlə ńkwumtə̂ atǐə apagləpaglə wə́ á ndumə atû yə́, páʼ zə́ələ́ a fiʼtə̂ nə́ anu páʼ pə́ kwumtə̂ nə́ yí ńté, a ə́sóŋə ńgə́, “Lɛ̌ Yeso Əfo Pəjusə.”

³⁸Pó nə ńkwumtə̂ yí lə́ pópə pəzə̌ pə́ pɛ̌, táʼə apô yə tɨ, táʼə apô yə kwaabə.

³⁹Pɨ pó nə̈ ńdaŋ nə́ aliʼ yə wɨ́ pó tíʼə ńchiʼ ətû əpɔ́b ḿmaʼə̂ məndzɔmnə nə́ Yeso:

⁴⁰Ə́sóŋə ńgə́ “Lɛ̌ gho páʼ gho kə sóŋ nə́ ńgə́ gho yǐ shaʼtə̂ tə́kɔʼndɛ̂sê ə́ pɨ póomə ájɨ́d nə́ əlě teelə́! Chwádkə mbɨ əzo ńkə́ ńtsóolə atǐə apagləpaglə wə́ páʼ təmbɔʼ gho pə́ Mɔ́ Əsê!”

⁴¹Pətə́kɔʼ pə́ ngaŋə́pêsê pópə ngaŋə́zéʼkə pənoŋkə ḿbá mətû mə́ aláʼ pó kə́ ńnyegnə̂ yə.

⁴²Ə́sóŋə ńgə́ “A kə̈ chwádkə pɨ pə́ ndaʼə, lə́ mbɔʼ a pə́ ńkě əjǐ mbɨ chwádkə pô! A lə́ ńkě lə́ əfo pə Islɛl pô? A laŋ ńtsóolə atǐə apagləpaglə wə̂ əghâ nə pɛn pímə anu ä sóŋ nə́.

⁴³A nə ńnéŋ ntɨ́ əyí nə́ Əsê, Əsê a yǐ əghâ nə ńkwáalə yí páʼ təmbɔʼ a kɔŋə̂ yə́. Ńté ńgə́ a nə sóŋ ńgə́, Maŋ lə́ Mɔ́ Əsê!”

⁴⁴Tsɔʼə pəzə̌ pə́ nə ńkwumtə̂ nə́ ághɔ́b po lə́, pó nə ńkə́ ńdzɔmtə̂ yí tsɔʼə ə́lə́ələ́.

⁴⁵Ndzəmə́ ə́ nə ńgwǔəə á mə́mə aláʼə atsəm á ntɨ̌mə́numə. Ə́ kə chî ńkoʼ pəmə́nu pɛ́n pə́ teelə́.

⁴⁶A nə ḿbə́ ándó pəmə́nu pə́ teelə́ pə́ nə ńkoʼ nə́ lə́, Yeso a kyéŋ nə tə́kɔʼ ngye ə́sóŋ ńgə́ “Eli, Eli lama sabachtani?” Páʼ ä sóŋ nə́ lə́ ńgə́ “Əsê, Əsê mə, Gho myaʼə̂ mə lə́ ńté akə̂?”

⁴⁷Pɨ pətsə́ pə́ nə ńtɨ́ nə́ aliʼ yi wɨ́ pó nə ńdzóʼə atsáb yə wɨ́ lə́ ńtíʼ ə́sóŋ ńgə́, “A tə fóŋə Elayija.”

⁴⁸Táʼ ŋwu əghɔb yitsə̌ a tɔ́g ńkə́ ńgɛn ḿbyáanə kwunchá ńchibə̂ á mə́m məloʼ mimə tsə́g nə́ ńtóŋ nə́ akəmə akəkaʼ ńkɔ́ʼkə ə́fɛ̂ nə́ Yeso ńgə́ a nô.

⁴⁹Lə́ pətsə́ pɨ pə́ sóŋ ńgə́, “Mɛdtə̂ yí ńtíʼ pɛn jɨ́ ńgə́ Elayija a yǐ yǐ kwáalə yə́!”

⁵⁰Yeso a kə́ ḿbɨ ńkyéŋ nə́ tə́kɔʼ ngye ngǎ yitsə̌, ńtíʼ ńkwûə yə́.

⁵¹Əghâ wɨ́, apagə atsəʼə́ a kə panə̂ nə́ Tə́kɔʼndɛ̂sê a nə ńtíʼ ə́sɛɛnə̂ əpag pɛ̌ ə́fɛ́lə nətû ńtsó ńkwúnə nətɛ́nə. Ndəsê ə́ chiʼnə̂, məngwúb mə́ sánkə.

⁵²Məse mə́ kə́ʼkə ŋ́ŋáʼkə pɨ pə́ Əsê pi ŋwaʼ nə́ páʼ pə́ nə ńkwúkə nə́ pó júmnə nəwûə.

⁵³Pó fɛ́dkə á məse, a yǒ ńtíʼ ḿbə́ əghâ ándó Yeso a nə́ ńjúmnə nə́ nəwû lə́, pó ghɛnə̂ aláʼə Jɛlusalɛm pɨ pipə nɨ́ nə́ pə́ zə́ənə ághóobə́.

⁵⁴Əghâ ándó nətû nə́ ngaŋə́maʼə́ntso pópə ngaŋə́maʼə́ntso páʼ pó nə̈ ḿbyáb nə́ Yeso pó nə ńjɨ́ nə́ ndzaŋ páʼ ndəsê ə́ nə ńchiʼnə̂ nə́ pópə anuə atsəmə á nə ńdaŋ nə́ lə́, ńtíʼ ḿbɔ́g ə́sóŋ ńgə́, “Lə́ ndə̌ŋdəŋə́, lə́ nə ḿbə́ Mɔ́ Əsê!”

⁵⁵Pəngyě pə nɨ́ nə́ pə́ nə ńchî ə́wɨ́ ńtə́əmə a ndi yi sɛ ńtíʼə ńnáŋə, pó nə ńchîə ndzəm Yeso ə́fɛ́lə Galili ńdzoŋə̂ ńkwáalə yə́.

⁵⁶Mɛɛlə Magdalɛn a kə chîə á mə́m pó, Mɛɛlə mǎpə Jɛmsə po Jɔsɛfə mbɨ ḿbə́ nə́ mǎpə pɔ́ pə́ Zebediə a kə kə́ ńchî wə́.

⁵⁷Ndɛd nkwanə́ ə́ nə ńtə́ ńkoʼə̂, əfoʼ yitsə̌ a lǒo Alimatya ńgyǐ pə́ fóŋ əlɛ́n əyí nə́ Jɔsɛfə, lə́ nə ńkə́ ḿbə́ táʼ ndzoŋ ndzəm Yeso yitsə̌.

⁵⁸Ńtíʼ ńgɛnə̂ á mbô Payilɛd ḿbítə akwûə Yeso. Payilɛlə a sóŋ ńgə́ pə fɛ̂ zə́ələ́ á mbô yə́.

⁵⁹Jɔsɛfə a lɔgə̂ akwû yə wɨ́, ńdə́mə ájɨ́d nə́ fúfú apagə atsəʼ yə fîə,

⁶⁰ńtíʼ ńnéŋə zə́ələ́ á mə́m nəse jí yi nə́ fî páʼ a nə ńtóŋ nə́ á mə́m ngwúbə. Ńtíʼ ńkabkə̂ mɛ́ ngɔʼ yitsə̌ ńkə́bkə ntso nəse ə́wɨ́ ńgɛnə̂ yə́.

⁶¹Mɛɛlə Magdalɛn pó yitsə̌ Mɛɛlə ə́ kə náanə ńtə́ náŋə nəse.

⁶²Mbî ə́ nə fóg páʼ a nə ḿbə́ nə́ alěláʼə́sê lə̂, pətə́kɔʼ pə́ ngaŋə́pêsê pópə Pəfalasi kyeetə̂ á mbi Payilɛlə,

⁶³ə́sóŋ nə́ yí ńgə́, “Tǎ, pəg tə́ ńkwúmtə ńgə́ a nə ḿbə́ əghâ páʼ ngaŋntsɨd wə̂ a nə ḿbɛ́d nə́ mbî lə́ ə́sóŋ ńgə́, Əlě teelə́ ə́ yǒ laŋ maŋ pɨ ńjúmnə.

⁶⁴Lə́ələ́ pə́ ńgə́, sóŋ pə ghɛn ḿbyáb nəse jí tə ńkoʼ əlě teelə́ ńjî ńgə́ kɔ ngaŋə́zoŋə́ndzəm əjí ə́ ghɛn ńdzəələ̂ yí ńtíʼ ə́sóŋ nə́ pɨ ńgə́ ‘a júmnə nəwûə.’ Jɨ lɛ̌ ntsɨd ə́ yǐ pə́g tə tsɛɛlə̂ yi ntsɛɛmbiə.”

⁶⁵Payilɛlə a sóŋə á mbô pó ńgə́, “Lɔg nə́ ngaŋə́pyáabə əliʼ ńgɛn ḿbyáb nəse nə wɨ́ ndzaŋ ntsəm nə́ jî nə́.”

⁶⁶Pó tíʼ ńgɛn ńnéŋə aleŋkə nə́ ngɔʼ zə̂ a ntso nəse ńjî ńgə́ mbɔʼ ŋwunə a kwum pə́ jîə, ḿbɨ ńkə́ ńtə́gtə ngaŋə́pyáabə aliʼ ńgə́ pó tə́ ḿbyáabə.