Read Awing Matyo 28 Bible Online

Matyo 28 - Awing bible

Matyo 28

¹Ndzaŋə ándó páʼ Alěláʼə́sê á nə ńdaŋ nə mbî ə́ fógə mɛ́ məsânə a nə ḿbə́ nə́ Sɔnde lə́, Mɛɛlə Magdalɛn pó yitsə̌ Mɛɛlə wə́ ə́ ghɛnə̂ á mə́ náŋ nə́ nəse.

²Ndəsê kə pyádnə ńchiʼnə̂ ńté ńgə́ Ntseŋndɛ̂ Mmaʼmbîə a pěʼ ńdǒ nəpó ńtsóolə, ńkabkə̂ ngɔʼ zə̂ ḿbáŋkə á ntso nəse ńtíʼ ńnáanə yə́ ndu wə́.

³Əshî əyí ə́ nə̈ ŋwaŋkə̂ ándó nkyaʼ nəfaŋ, ətsəʼ əpí ə̈ ə́fógə ándó alə́mə.

⁴Ngaŋə́pyáabə əliʼ pó pɔ́g lɛ tə ḿbénkə, ńtíʼ ńchîə ándó əkwû pəənə.

⁵Ntseŋndɛ̂ yi wə́ a sóŋ nə́ pəngyě pə́ ńgə́, “Kɔ nə pɔ́gə, maŋ jî ńgə́ pɨ náŋə lə́ Yeso páʼ pə́ nə ńkwumtə̂ nə́.

⁶A kě aliʼə́ nə́ chî pô, a júmnə nəwû tsɔʼə ndzaŋə a nə sóŋ nə́ lə̂. Yǐ nə́ ńdzə́ənə aliʼ páʼ a nə ńnoŋnə̂ ə́wə́.

⁷Tíʼ nə́ ńgə́glə ńgɛn ə́sóŋə á mbô ngaŋə́zoŋə́ndzəm əjí ńgə́ á júmnə nəwûə, ńchîə á mbi pɨ ńtə́ ńgɛnə̂ Galiliə; nə́ yǐ zə́ənə yi ə́wə́! kwúmtə nə́ anu zɨ maŋ fiʼtə̂ nə́ áwɨ́ lə́.”

⁸Pəngyě pə́ pó tíʼ ńdǒo á ndəsê nə́ aghə́glə, ńtə́ ḿbɔ́gə ḿbə́ ńdwɛ́nkə nə́ akɔŋtə ńtíʼ ńkə ńgɛnə̂ á mə́ fiʼtə̂ nə́ ngaŋə́zoŋə́ndzəm əjíə.

⁹Yeso a ghabkə̂ ńtégə ághɔ́b ə́sóŋ ńgə́, “Mäŋ chaʼtə̂ áwə́ənə́.” Pó tíʼ ńgyǐ ńtégə yí ńgwam məko mí ńgóʼkə yə́.

¹⁰Yeso a tíʼ ə́sóŋə á mbô pó ńgə́, “Kɔ nə pɔ́gə, ghɛn nə́ sóŋ á mbô pɔ́pə́mɛ́ mə ńgə́ pó ghɛnə̂ Galili, pó yǐ zə́ənə mə ə́wə́.”

¹¹Ndzaŋə ándó pəngyě pə́ pó nə́ ńtə́ nə́ ńgɛnə̂ lə́, pətsə́ ngaŋə́pyáabə aliʼ pó nə ńtə́ nə́ ńnáŋə nəse lə́ pó ghɛnə̂ aláʼ ə́fiʼtə̂ anuə atsəm páʼ a laŋ nə́ á mbô pətə́kɔʼ pə́ ngaŋə́pêsê.

¹²Pətə́kɔʼ pə́ ngaŋə́pêsê pópə mətû mə́ aláʼ pó jwánə ńtíʼ ńkwaŋə̂ anu pó yǐ nə́ ghɛlə̂; əfɛ̂ chigə tə́kɔʼ nkéebə á mbô ngaŋə́pyáabə əliʼ zə̂

¹³ə́sóŋ nə́ pó ńgə́, “Nə yǐ nə́ sóŋ ńgə́ ngaŋə́zoŋə́ndzəm əjí ə́ nə ńgyǐəə á nətúʼ páʼ pəg nə ńtə́ nə́ ńdê ńdzəələ̂ akwûə ajíə.

¹⁴Mbɔʼ nkɨ ghɛn ə́ kwúnə nətôglə nətû nə́ aláʼ, ḿbə́ pəg jîə anu pəg yǐ nə́ ghɛd nə́ yí tə a kě anu yətsə́ nə pɨ ghɛd pô.”

¹⁵Ngaŋə́pyáabə əliʼ zə̂ pó tíʼ ńkwá nkáb yi wɨ́ ə́faʼ ndzaŋ pə sóŋ nə́ ńgə́ pó faʼə̂. Tə ńkoʼ ə́sɛ̂n, Pəjusə pə̈ sóŋə lə́ tsɔʼə ə́lə́ələ́.

¹⁶Ngaŋə́zoŋə́ndzəm əjí zə̂ ntsɔb mɔʼə́ ə́ tíʼ ńgɛnə̂ á Galiliə, á nkwəənə páʼ Yeso a pěʼ nə́ nəələ̂ ághɔ́b ńgə́ pó ghɛn ə́wɨ́ lə́.

¹⁷Ndzaŋ pó nə ńjɨ́ nə́ yí lə́ ńgóʼkə yə́, lə́ atûə pɨ pətsə́ á pə́ ḿbɛ́lə ńkoʼlə̂.

¹⁸Yeso tíʼ ńgyǐəə á mbô pó ə́sóŋ ńgə́, “Tǎ mə á fɛ̂ mətɨ mətsəmə á mbô maŋə á nəpó pó ndu mbîə.

¹⁹Tíʼ nə́ ńgɛnə̂ á mbô ŋwu ntsəmə, á mə́mə atúmə atsəm ńgɛd pó tíʼ ḿbə́ ngaŋə́zoŋə́ndzəmə mə̈, əfɛ̂ nkǐ nə́ pó nə́ əlɛ́n Tǎ, nə́ yǐ Móonə, ḿbɨ́ ḿbə́ nə́ yə Ajwiə̈.

²⁰Ńkə́ ndzéʼkə ághɔ́b ńgə́ pó zóʼnə anuə atsəm páʼ maŋ sóŋ nə́ á mbô pəənə́. Maŋ yï chîə lə́ tsɔʼə pɛn əghâ ətsəm tə koʼə̂ á ndwegtə mbîə.”