Read Awing Matyo 3 Bible Online

Matyo 3 - Awing bible

Matyo 3

¹Á nə ḿbə́ nə́ əlě pə́ wɨ́ lə́, Jɔn Əfɛ̂nkǐə a yǐ ńtə́ ə́sóŋə anǔəsê á kɔŋ məŋkwâʼlə̌ á Judya,

²ńtíʼə ə́sóŋə ńgə́ “Mɛdtə̂ nə́ mənu mə́ təpɔŋ pɨ ghɛd nə́, ńté ńgə́ anuə nəfoonə á nəpóolə á páatə.”

³Lɛ̌ ŋwu páʼ ntûsê Izaya a nə̈ ńtsáb nə́ ńté yí, ə́sóŋ ńgə́, “Ngye ŋwu tsə̌ ə́ tə́ ə́fóŋə á kɔŋ yi njǔbtə, Tyáŋtə nə́ əsêndúmə á mbô Mmaʼmbîə, Ghɛd nə́ alaŋə́ ajíə á tɨ́ ndə̌ŋdəŋə́.”

⁴Jɔnə a nə ńgwê ətsəʼ páʼ pə́ nə ńtsoŋkə̂ nə́ lə́ nə́ mənoŋ mə́ kəmbôʼnkɔnə́, ḿbɨ ńkə́ ńgwê atwéŋ páʼ pə́ nə ńtsoŋkə̂ nə́ nə́ ngwubə á ntə̂ yə́, məjî mí mə́ nə ḿbə́ lə́ ngwumnə́ pó nûə akoobə́.

⁵Pɨ pə́ nə ə́fɛ́lə á Jɛlusalɛm pópə mboʼ Judya ḿbɨ ḿbə́ nə́ əláʼ páʼ ə́ páatə nə́ Nkǐ Jodan ńgyǐəə á mbô yə́.

⁶Ńkyéŋə ńgə́ pə́ ləgnə̂ pətəpɔŋ póobə́, Jɔnə a tíʼə ə́fɛ̂ nkǐə á mbô pó á mə́m Nkǐ Jodanə.

⁷Lə́ əghâ ándó a nə ńdzɨ́ nə́ Pəfalasi pópə Pəsadusi pə́ tə́ ńgyǐəə á mbi yí tə ńnə́ənə á mə́ kwá nə́ əghɔ́b nkǐ lə́, a sóŋə á mbô pó ńgə́, “Ngwud mənó mə́ təpɔŋ, əwə a kwantə̂ nə́ áwɨ́ ńgə́ təmbɔʼ nə́ kəələ̂ azáŋə́ndé Əsê páʼə á tə́ nə́ ńgyǐəə?

⁸Zə́m nə́ mənteemə́ á mə́ nɨd nə́ ńgə́ nə́ kwúblə a mə́m təpɔŋ əwəənə́.

⁹Kɔ nə́ kwaŋ ńgə́ nə́ láʼ sóŋ nə́ mbɨ zɨ ńgə́ pəg túgə Ablaamə ándó Tǎ əwəgə́, mäŋ fiʼtə̂ áwɨ́ ńgə́ á mə́m məngɔʼ mɨ təmbɔʼ Əsê a tsoŋkə̂ pɔ́ ə́wɨ́ ə́fɛ̂ nə́ Ablaamə.

¹⁰Ndza ə́ pɛ́d tə ńtə́əmə nətɛ́n nə́ atǐə, lə́ atǐə atsəm páʼə á kě nə́ mənta mimə əshîʼnə zə́m pə́ yǐ kə́ʼ maʼə̂ á mógə́.

¹¹Mäŋ fɛ̂ nkǐ nə́ pɨ lə́ á mə́ nɨd nə́ ńgə́ nə́ kwúblə məntɨ́ mə́ənə́, lə́ ŋwu tsə̌ a yǐ pɨ yǐəə á ndzəm maŋ páʼə a tsɛ nə́ mə tə maŋ kě koʼə̂ á mə́ túg nə́ ngwub əjí pô. A yǐ fɛ̂ nkǐə Ajwǐəsê nə́ pɨ pó yi mógə́.

¹²A túg əpú əpí á mbô yí páʼə a yǐ nə́ lɔg póʼ məkwú ə́wɨ́ ə́tsɛntə̂ məkwú mí mimə wɨ́ ghɛn néŋə á mə́m nkye məjî əjǐə, lə́ pə́ tɔ əkaglə́ əpíə á mə́m móg páʼ ə́ láʼ nə́ kě pə́gnə pô.”

¹³Əghâ yi wɨ́ Yeso a lǒo Galili ńgyǐəə á Nkǐ Jodan á mə́ kwá nə́ nkǐə á mbô Jɔnə.

¹⁴Lə́ Jɔnə a pə́ ńdoonə̂ á mə́ ghɛd nə́ a kwúblə ntɨ́ əyíə, ńtíʼ ə́sóŋ ńgə́, “Lə́ pěʼ ńchî gho á mə́ fɛ̂ nə́ nkǐ nə́ maŋə, gho pɛn ḿbɨ ńtíʼ ńgyǐəə pə́ á mbô maŋ lə́ ə́lɛ́?”

¹⁵Yeso a kwěe ńgə́, “Mɛdtə̂ á chî ə́lɨ́d əghâ nə́; ńté ńgə́ á koʼnə̂ á mbô pɔ̌ á mə́ faʼ nə́ anuə atsəm páʼ Əsê ä lɔ nə́.” Jɔnə a tíʼ ḿbímə.

¹⁶Əghâ ándó Yeso a nə məgtə̂ nə́ mə́ kwá nə́ nkǐ lə́, tsɔʼə əghâ yi wɨ́, a fɛ́lə á mə́m nkǐ, nəpó nə́ ŋáʼnə, a zə́ənə Ajwiə a pə́ nə́ yə Əsê, á tsóolə á nəpó ńtíʼ ńtə́əmə á ndu yə́ ándó alúʼə.

¹⁷Ngye yitsə̌ ə́ fɛ́lə á nəpó ə́sóŋ ńgə́, “Lɛ̌ móonə mə páʼ maŋ kɔŋ nə́, maŋ pyádnə̈ ńkɔŋtə̂ ńté yə́.”