Read Awing Matyo 4 Bible Online

Matyo 4 - Awing bible

Matyo 4

¹Ajwǐəsê a tíʼ ńdɔgə̂ Yeso ńgɛn nə́ yə́ á kɔŋ yi njǔbtə ńgə́ Dɛbəələ a kwaʼlə̂ yə́.

²Ndzaŋə ándó Yeso a nə ńchî nə́ əlěmbî məghə́m mɛ́n nəkwa pópə pənətúʼ məghə́m nəkwa ńchaʼtə́sê tə jî məjî lə́, nji ə́ záŋə yə́.

³Dɛbəələ a yǐəə á mbi yí ə́sóŋ ńgə́, “Mbɔʼ gho pə́ mɔ́ Əsê, gho sóŋ nə́ məngɔʼ mɨ ńgə́ mə́ sɛlə̂ apéenə məkálə́.”

⁴Yeso a kwěe yí ńgə́, “Pə́ ŋwaʼlə̂ á mə́m Aŋwaʼlə Əsê ńgə́, ‘ŋwunə a kě á mbî chîə ńté lə́ tsɔʼə apá pô, ḿbə́ ńchîə ńté lə́ atséebə atsəm páʼə ä fɛ́d nə́ á ntso Əsê.’ ”

⁵Dɛbəələ a tíʼ ńdɔgə̂ yí ńgɛn nə́ á Jɛlusalɛmə, Aláʼ yə Ŋwaʼ nə́, ńgɛlə̂ a tə́əmə á ndu nəloŋ nə́ Tə́kɔʼndɛ̂sê.

⁶Ńtíʼ ə́sóŋ nə́ yí ńgə́, “Mbɔʼ gho pə́ mɔ́ Əsê gho lǒo á nəloŋ nə́ ndɛ̂ nə ngwǔəə əsê ńté ńgə́ aŋwaʼlə Əsê a sóŋ ńgə́, ‘Əsê a yǐ sóŋ nə́ pətseŋpə́ndɛ̂ pí pó pyáabə gho, pó yǐ waamə̂ gho tsɔʼə atǐə atǐ nə́ mbô mɔ́b ńjî ńgə́ kɔ gho tô akoolə azô nə́ ngɔʼə.’ ”

⁷Yeso a kwěe yí ńgə́, “Aŋwaʼlə Əsê á kə́ ə́sóŋ ńgə́, kɔ gho kwaʼlə̂ Mmaʼmbî páʼ a pə́ nə́ Əsê Əzo.”

⁸Ngǎ yitsə̌, Dɛbəəl wə̂ á pɨ ńkə́ ńdɔgə̂ yí ńgɛnə̂ á ndu nkwəənə páʼ ə́ pyádnə nə́ ŋ́ŋáŋnə, ńnəələ̂ yí nə əláʼə á mə́m mbî tsɔʼə ətsəm pópə nəgháʼ əghoobə́, əláʼ páʼ pəfo pə́ sáʼ nə́.

⁹Ə́sóŋ ńgə́, “Maŋ yǐ fɛ̂ əpú pɨ tsɔʼə ətsəm nə́ gho páʼ mbɔʼ gho kwə́ʼtə á məko maŋ ńgóʼkə mə.”

¹⁰Yeso a sóŋ nə́ yí ńgə́, “Lǒo gho á nəpɛnə́ maŋə, Satan! Aŋwaʼlə Əsê á sóŋ ńgə́, gho yǐ shib ghóʼkə tsɔʼə Mmaʼmbî a pə́ nə́ Əsê əzo; ə́ kə́ ə́faʼ tsɔʼə á mbô yí təjiʼə.”

¹¹Əghâ yí wɨ́, Dɛbəələ a tíʼ ḿmɛdtə̂ yə́, pətseŋpə́ndɛ́pə́sê pə́ tíʼ ńgyǐ ńkwáalə yə́.

¹²Ndzaŋ Yeso a nə ńdzóʼ nə́ ńgə́ pə́ néŋə Jɔnə á atsáŋ lə́ ə́fɛ́d ńgɛnə̂ á Galiliə.

¹³A fɛ́lə Nazalɛd ńgɛn ńtíʼ ńchîə á Kapanawum páʼ lə́ nə ḿbə́ nə́ aláʼ yətsə́ ńchîə á nkaŋ Əfooghɨ Galiliə, ḿbáatə mboʼ Zɛbulɔn pó Naftaliə.

¹⁴Pə́ nə ńgɛlə̂ á jɨ lə́ ńjî ńgə́ anu páʼ ntûsê Izaya a nə sóŋ nə́, á lɔgə̂ aliʼə́.

¹⁵Aláʼə Zɛbulɔn pó aláʼə Naftaliə, páʼ ə́ chî nə́ á ndú nə́ənə á chî nə́ ə́wə́ á ndzɛnə́ nkǐ Jodanə, Galiliə, aláʼə pətəjǐsê!

¹⁶Pɨ pə́ nə ńchî nə́ á mə́m ndzəmə́ pə́ zə́ənə tə́kɔʼ nkyaʼə, Nkyaʼ ə́ kɛ́d nə́ á mbɨ pɨ páʼ pó nə ńchî nə́ á mə́mə aláʼə ndzəmə́, nəwûə a chî nə́ ə́wə́.

¹⁷Ə́fɛ́d nə́ ndɛd jɨ́d zə̂, Yeso a chúʼə á mə́ sóŋ nə́ anǔəsê ńgə́, “Mɛdtə̂ nə́ mənu mə́ təpɔŋ pɨ ghɛd nə́ ńté ńgə́ anuə nəfoonə nəpóolə á páatə.”

¹⁸Ndzaŋ Yeso a nə́ ńtə́ nə ńnyinə̂ á nkaŋ əfooghɨ Galili lə́, ńdzə́ənə ŋwu pó ndim yə, Saamun páʼ pə́ fóŋ nə́ nə́ Pita lə́ pó Andəlu. Pó nə ńtə́ ńtéemə məŋkɛd mɔ́b á mə́ kó nə́ əshûə á mə́m əfooghɨ ńté ńgə́ pó nə ḿbə́ lə́ ngaŋə́kóolə́shûə.

¹⁹“Yeso a sóŋ nə́ pó ńgə́ yǐ nə́ ńdzoŋə̂ a mə, maŋ yǐ lɔgə̂ áwɨ́ ghɛd ngaŋə́kóolə pɨ ə́wə́.”

²⁰Pó tɔ́g ḿmɛdtə̂ məŋkɛd mɔ́b ńdzoŋə̂ yə́.

²¹Pó fɛ́lə aliʼ yi wɨ́ ńtə́ ńgɛnə̂, Yeso a zə́ənə Zebedi pópə pɔ́ pí pɛ́n pɛ̌ pó chîə á mə́m aŋkənúʼə́ ńtə́ ńtsoŋkə̂ məmɔ́b məŋkɛlə́. Lə́ nə́ ḿbə́ Jɛmsə pó Jɔnə a fóŋə ághóobə́.

²²Pó kə́ ńtɔ́g ḿmɛdtə̂ tǎ əghɔb pópə aŋkənúʼə́ zə́ ńdzoŋə̂ Yeso.

²³Yeso a nyinə̂ á mə́mə aláʼə Galili tsɔʼə atsəm ńdzéʼkə á mə́m məndɛ̂ məsê mə́ Pəjusə ḿbəənə̂ ə́sóŋə anu ńté Anuə Nəfoonə Əsê, ńkə́ ńtsóʼə pɨ nə́ ntê məghɔ ntsəm mə́ nə ńchî nə́ á mbɨ pó.

²⁴Atséebə a tíʼ ńnyinə̂ a mə́mə aláʼə Silya tsɔʼə atsəm ńté yə́. Pɨ pə́ tíʼə ńgyǐəə nə́ pəghoonə́ á mbô yí páʼ pó ghɔ nə́ nə́ ntê məghɔ ntsəm, pópə mbɨ yi ńdzáŋnə nə́, pɨ pɛ̌sê ə́ nə́ ńchî nə́ á mbɨ pó, nə́ pɨ pó nə̈ ńgwǔ nə́ akəpuʼ, nə́ pəkɔ́ŋə́sê, a tíʼə ńtsóʼə ághóobə́.

²⁵Apoŋə pəənə a nə ńtíʼ ə́fɛ́lə á Galiliə, á Jɛlusalɛm, á Judya ḿbɨ́ ḿbə́ nə́ pə tə́kɔʼ pə́ əláʼ pɔ́b pətsə́ pɛ́n nəghə́m ńdzoŋ ḿbə́ nə́ ngǎŋ ndzɛnə́ Jodan ńdzoŋə̂ yə́.