Read Awing Matyo 5 Bible Online

Matyo 5 - Awing bible

Matyo 5

¹Ndzaŋ Yeso a nə ńdzɨ́ nə́ apoŋə pɨ lə́ ńkɔ́ʼ ńgɛnə̂ á ndu nkwəənə ńnáanə á əsê, ngaŋə́zoŋə́ndzəm əjí ə́ yǐəə á mbô yə́ aliʼ yi wə́.

²A tíʼ ńchúʼə á mə́ zéʼkə nə́ ághɔ́b, ə́sóŋə ńgə́,

³“Mbɔŋə́ yə pɨ pó fə́m nə́ á mə́mə Ajwiə, anuə nəfoonə nəpó lə́ azóobə́.

⁴Mbɔŋə́ yə pɨ pö kyéŋ nə́, pə́ yǒ legtə̂ ághóobə́.

⁵Mbɔŋə́ yə pɨ pó tsóokə nə́ mbɨ əzoobə́, pó yǒ jî mbîə.

⁶Mbɔŋə́ yə pɨ páʼ nji mə́ ghɛd nə́ anu yə əshîʼnə ə̈ záŋ nə́ ághóobə́, pó yǒ zɛ́lə.

⁷Mbɔŋə́ yə pɨ pö kó nə́ mələ́ŋ mə́ ŋwu məsɔŋə́, pə́ yǒ kə́ kó mələ́ŋ móobə́.

⁸Mbɔŋə́ yə pɨ məntɨ́ mɔ́b mə́ ŋwaʼ nə́, pó yǒ zɨ́ Əsê.

⁹Mbɔŋə́ yə pɨ pö ghɛd nə́ ńgə́ pɨ pə́ chî nə́ mbwɔ́dnə, Əsê a yǒ fóŋə ághɔ́b nə́ pɔ́ píə.

¹⁰Mbɔŋə́ yə pɨ pə̈ tsaŋkə̂ nə́ ághɔ́b ńté ńgə́ pö faʼə̂ anuə á tɨ́ nə́ ndə̌ŋdəŋə́, anuə nəfoonə nəpó lə́ azóobə́.

¹¹Mbɔŋə́ lə́ azɨ́ páʼ təmbɔʼ pə́ zoomə̂ áwə́ənə́, ńtsaŋkə̂ áwə́ənə́ ḿbəənə̂ ńtsɨ́d ntê ntsɨd ntsəmə atû pɨ ńté ńgə́ pɨ lə́ ngaŋə́zoŋə́ndzəmə mə.

¹²Mbɨ əzɨ ə́ pɔŋə̂, nə́ kə́ ńkɔŋtə̂ ńté ńgə́ tə́kɔʼ ntsɔ́ʼəfaʼə á chîə á mbô pəənə́ á nəpóolə, lə́ tsɔʼə ndzaŋ pə́ nə ńkə́ nə́ ńtsaŋkə̂ məntúmə́sê mə́ mə́ nə ńkwá nə́ mbi əzɨ lə́.”

¹³“Pɨ lə́ ngwáŋ mə́ mbîə. Lə́ təmbɔʼ ngwáŋ mə́ chî pɛ́lə ləəmə̂ pô, pə́ ghɛd ə́lɛ́ ə́wɨ́ mə́ pɔŋə̂ pɨ́ ləəmə̂. Mə́ kě atûə anu yətsə́ pɛ́d pô tə ńdéʼtə ńgə́ pə́ kwɛd pɨ pə́ nəŋtə̂ nə́ məkoolə.”

¹⁴“Pɨ lə́ nkyaʼ mbîə, aláʼ pə́ kwúd nə́ á ndu nkwəənə təmbɔʼ pə́ kě zɨ́d lyáŋ pô.

¹⁵Pɨ pə́ kě kə́ ńchúʼə lám ńtə́gə á ntɛ́n əkwu pô, mbɔŋə́ ə́lɨ́d pə́ tə́gə pə́ á ndumə akɔʼə á fɛ̂ nkyaʼə á mbô ŋwu ntsəmə á mə́m ndɛ̂.

¹⁶Ghɛd nkyaʼ əzo ə́ ŋwaʼə̂ á mbi ŋwu məsɔŋə́, ńjî ńgə́ pó zɨ́ məfaʼ mô mimə əshîʼnə ńtíʼ ŋ́ŋáŋkə Tǎ gho á nəpóolə.”

¹⁷Kɔ nə́ kwaŋ ńgə́ maŋ yǐ lə́ á mə́ shaʼtə̂ nə́ pənoŋkə pə́ Mosisə pópə ndzeʼkə́ məntúmə́sê. Maŋ kě yǐ lə́ á mə́ tsəŋkə̂ nə́ pɨ́d pô, ḿbə́ ńgyǐ lə́ á mə́ lwɛ́nkə nə́ pə́ələ́.

¹⁸Mäŋ fiʼtə̂ áwɨ́ nə́ ndə̌ŋdəŋ ńgə́ tə ndəsê pó nəpó ə́ lǒo ḿměe měe nə́, mɔ́ aliʼ kɨ mɔ́ nələŋə́ á ghɛd kě á mə́m pənoŋkə péŋ pô, tə koʼə̂ əghâ anuə atsəmə yǐ nə́ lɔgə̂ aliʼə́ ajíə.

¹⁹Ŋwu ntsəm páʼə a wág nə́ chigə mɔ́ kə́nyaŋ noŋkə ghɛn yitsə̌ ńkə́ ńdzéʼkə pɨ ńgə́ pó kə́ ńgwágə azɔ́b, pə́ láʼ fóŋə yí lə́ nə́ chigə mɔ́ kə́nyaŋ ŋwunə á mə́mə anuə nəfoonə nəpóolə. Lə́ ŋwu ntsəm páʼə a zóʼnə nə́ pənoŋkə pɨ kɨ ńkə́ ńdzéʼkə pɨ ńgə́ pə zoŋə̂ pɨ́d, pə́ láʼ fóŋə yí chigə nə́ tə́kɔʼ ŋwunə á mə́mə anuə nəfoonə nəpóolə.

²⁰Mäŋ fiʼtə̂ áwɨ́ ńgə́ tə ńdéʼtə, mənu mɨ́ mə́ tɨ́ ndə̌ŋdəŋ ńtsɛ mimə́ ngaŋə́zéʼkə pənoŋkə pópə Pəfalasi nə́ yǐ ńkě á mə́m anuə nəfoonə nəpó kwú pô.

²¹Pɨ zóʼ ndzaŋ pə́ nə ə́sóŋ nə́ nə́ ngǎŋ ngoʼ pəchə́ ńgə́, “Kɔ gho jwítə ŋwunə, ŋwu ntsəm páʼ a nə́ ńjwítə ŋwu, pə́ yǐ sáʼ əsáʼ əyíə.

²²Lə́ maŋ pə́ ə́fiʼtə̂ áwɨ́ ńgə́ ŋwu ntsəmə ä záŋ nə́ ndě nə́ ndim əyǐə, pə́ yǐ kə́ sáʼ əyí əsáʼə, ŋwu ntsəm páʼə a pɨ nə́ ńkə́ ə́sóŋ nə́ ndim əyǐ ńgə́ gho pɔŋ lə́ kətaŋə, pə́ yǐ sɔ́mə́sə əyí əsáʼ pə́ sáʼə, ŋwu páʼə a pɨ nə́ ńkə́ ə́sóŋ nə́ ndim əyǐ ńgə́, akəkóg, a chî mbɔʼə a kwúnə á mə́m móg Satanə.

²³Lə́ələ́ pə́ ńgə́ təmbɔʼ gho yǐəə a mə́ fɛ̂ nə akáŋə Əsê azô, ńkwúmtə ńgə́ pɨ ndim gho túgə azɔŋ,

²⁴gho tə́gə akáŋə Əsê azô yə́ wɨ́ á nəpá nə Əsê, ḿbeg ńgɛn pɨ ndim gho məgtə̂ azɔŋ yə wɨ́ záʼ gho pɔŋə̂ yǐ ə́fɛ̂ akáŋə́sê azô.”

²⁵Təmbɔʼ ŋwunə a yǐ nə́ azɔŋ ńtégə gho, ńdɔgə̂ gho ńtə́ ńgɛnə̂ aliʼə́sáʼə́məsáʼ, pwɔ́dnə pɨ yə́, ḿməgtə̂ əsáʼ yi wə́ á ndɛ̂ ḿbɔŋə́ ghɛnə̂ aliʼə́sáʼə́məsáʼə. Ńté ńgə́ təmbɔʼ gho mɛdtə̂, ńgɛn tsɔʼə aliʼə́sáʼə́məsáʼə, təmbɔʼ ngaŋə́sáʼə́məsáʼ yǐ fɛ̂ gho á mbô ngaŋə́maʼə́ntso, pə́ ghɛn ńnéŋə gho á atsáŋə.

²⁶Mäŋ fiʼtə̂ áwɨ́ nə́ ndə̌ŋdəŋ ńgə́ gho yǐ tú ndzǒ tə kě ndɔ́la puʼkə̂ pô, ə́ pɔŋə́ ə́fɛ́lə.

²⁷“Pɨ zóʼ ndzaŋ pə́ nə ə́sóŋ nə́ ńgə́ ‘Kɔ nə́ tə́ ńjîə mə̂ghabə.’

²⁸Lə́ mäŋ pə́ ə́sóŋə áwɨ́ ńgə́ ŋwu ntsəm páʼ a náŋ nə məngyě ńděe tsɔʼə lěe nə́ a pɛ́d tə ńjî lə́ mə̂ghabə pó yə́ a ntɨ́ yə́.

²⁹Təmbɔʼ nələ́g zô yi nə́ apô yə tɨ nə́ ghɛd gho wǔəə á mə́m təpɔŋ, gho fwɔŋə̂ zɨ́d ḿmyaʼ ńté ńgə́ á pɔŋə̂ a mə́ péŋkə nə́ á táʼə alamə́ mbɨ əgho yitsə́ ńtsɛ ńgə́ pə́ lɔg mbɨ əzo ntsəm ḿmaʼə̂ á mə́m móg Satanə.

³⁰Təmbɔʼ apô zô yə́ tɨ á kə́ ńgɛd gho wǔəə á mə́m təpɔŋ, gho lə́gə á zɨ́d ḿmyaʼə̂. Ńté ńgə́ a pɔŋə̂ á mə́ péŋkə nə́ á táʼə alamə́ mbɨ gho yitsə̌ ńtsɛ ńgə́ pə́ lɔg mbɨ əzo ntsəm ḿmaʼə̂ á mə́m móg Satanə.”

³¹Pə́ nə ńkə́ sóŋ ńgə́ ŋwu ntsəm páʼ a tə nə́ ə́shamkə̂ ndzɔʼə́ əghɔ́b ngwě əyǐ á shib ə́fɛ̂ aŋwaʼlə ashamkə́ndzɔ́ʼə́ nə́ yə́.

³²Lə́ maŋ pə́ ə́sóŋə áwɨ́ ńgə́ ŋwu ntsəm páʼ a fóg nə́ ngwě yi tə ńdéʼtə ńgə́ a jîə pə́ mə̂ghabə, a túmə a yí lə́ ńgə́ a ghɛn ńtə́ ńjîə mə̂ghabə, lə́ ŋwu ntsəmə páʼ a pɨ nə́ ńkə́ ńdzɔ́ʼə məngyě a fɛ́d nə́ á ndɛ̂ ŋwu a jî lə́ mə̂ghabə pó yə́.

³³Pɨ kə́ zóʼ ńgə́ pə́ nə ńkə́ ə́sóŋ nə́ pɨ pə́ ngoʼ pəchə́ ńgə́, “Kɔ gho tsəŋkə̂ atyǎntə ndaʼnə páʼ gho ghɛd nə́, lə́ faʼə̂ pə́ anu páʼ gho pěʼ nə́ ńdaʼnə̂ á Mmaʼmbî ə́wə́.

³⁴Əghâ nə́, maŋ fiʼtə̂ áwɨ́ ńgə́ təmbɔʼ gho tə́ ńgɛd ndaʼnə kɔ gho ghɛlə̂ pə́ atyǎntə ndaʼnə, kɨ nə́ əlɛ́n nəpó ńté ńgə́ lə aləŋənə́foonə Əsê.

³⁵Kɔ gho kə́ ńgɛlə̂ atyǎntə ndaʼnə nə́ əlɛ́n ndəsê ńté ńgə́ lə́ aliʼə́ atə́gə məkoolə Əsê. Kɨ nə əlɛ́n Jɛlusalɛm ńté ńgə́ lə aláʼə tə́kɔʼ əfo.

³⁶Kɔ gho kwíʼnə ńgɛlə̂ atyǎntə ndaʼnə pə́ nə atûə azô, ńté ńgə́ mbɔʼ gho kě ghɛd táʼ nənoŋə a fóg kɨ ə́sɛ́n pô.

³⁷Tíʼ ô əgho á pə́ ô, Ngá á pə́ Ngá, anu yətsɨ́ tə ńdaŋə̂ jɨ́d jɨ á fɛ́d lə́ á mbô Satanə.”

³⁸“Pɨ zóʼ ńgə́ pə́ nə ə́sóŋ ńgə́ mbɔʼ ŋwunə a tɔŋ nələ́g zô gho tɔŋ nəjíə ńkə́ ńtsɔ́ʼ nəsɔŋ zô gho tsɔ́ʼ nəjíə.”

³⁹Lə nə́ əghâ nə́, mäŋ fiʼtə̂ áwɨ́ ńgə́, “Kɔ gho kwégə təpɔŋ nə́ təpɔŋə.” Mbɔʼ ŋwunə a ləb nəghág zô yi nə́ apô yə tɨ, gho sɛdkə̂ əlá yi kwab ńgə́ a pəŋə̂.

⁴⁰Mbɔʼ ŋwunə a kə́ ńdɔgə̂ gho ńgɛn nə́ aliʼə́sáʼə́məsáʼə á mə́ kwá nə́ atsəʼə́ azô yə́ mə́m, tsɔ́ʼə yə́ á ndu ḿbeg ə́wɨ́ ə́fɛ̂ nə́ yə́.

⁴¹Mbɔʼ ŋwunə a fyáalə gho ńgə́ gho twáamə apeʼə ají pɨ yí ghɛnə̂ táʼ ntagə ako gho ghɛn məntag mɛ́n mbɛ̌

⁴²Mbɔʼ ŋwunə a lóonə ajúmə a mbô gho, gho fɛ̂ nə́ yə́; ŋwunə a kə́ ńtsɔ́ʼə ajúmə a mbô gho, gho tsɔ́ʼkə nə́ yə́.

⁴³“Pɨ zóʼ ndzaŋ pə́ nə sóŋ nə́ ńgə́ ‘Kɔŋə̂ ngaŋ nəpad əgho, ḿbə́ ḿbéenə ngaŋkəpa əgho.’

⁴⁴Lə́ maŋ pə́ fiʼtə̂ áwɨ́ əghâ nə́ ńgə́ kɔŋ nə́ ngaŋkə́pa əzɨ́ ńkə́ ńchaʼtə́sê atû pɨ pə̈ tsaŋkə̂ nə́ wə́ənə́.

⁴⁵Ńjî ńgə́ nə́ yǐ ńtíʼ ḿbə́ pɔ́ pə́ Tǎ əwəənə́ á nəpóolə. Ńté ńgə́ a ghɛlə̂ mə́nu əyǐə a tɛ̂ a ndu pɨ pə́ təpɔŋ pópə pɨ pi əshîʼnə. Ńkə̈ ńtú mbəŋə á mbô pɨ páʼ mənu mɔ́b mə́ tɨ́ nə́ ndə̌ŋdəŋ pópə pɨ páʼ mənu mɔ́b mə́ kě nə́ ndə̌ŋdəŋ tɨ́ pô.

⁴⁶Mbɔʼ nə́ kɔŋ tsɔʼə pɨ pə́ kɔŋ nə́ áwɨ́, ape azə́ənə́ á pə́ akə̂? Tsɔʼə ngaŋə́kwáalə́ nchubə aláʼ ə́ kə́ ńgɛlə̂ ə́lə́ələ́.

⁴⁷Mbɔʼ gho chaʼtə̂ tsɔʼə pəlim pó, gho kwaŋ ńgə́ gho faʼə̂ lə́ ndzéʼnə anu yitsə̌? Tsɔʼə pɨ pə́ təjǐsê po kə̈ ńgɛlə̂ ə́lə́ələ́.

⁴⁸Á pə́ ńgə́ nə́ yǐ koʼnə̂ ghɛn fyag ndzaŋ Tǎ əwəənə́ á nəpóolə a kə́ nə́ ńkoʼnə̂ ńgɛn fyag lə́.”