Read Awing Matyo 6 Bible Online

Matyo 6 - Awing bible

Matyo 6

¹“Lɔg nə́ ndɛd ńgə́ kɔ nə́ yǐ ńtə́ ńgɛlə̂ mənu mə́ tɨ́ nə́ ndə̌ŋdəŋə́ á mbi pəənə á pə́ ńgə́ pó zə́ənə, mbɔʼ pɨ ghɛd ə́lɨ́d, pɨ yǐ ńkě ntsɔ́ʼəfaʼə á mbô Tǎ əwəənə́ a nəpó kwá pô.”

²“Lə́ələ́ pə́ ńgə́, mbɔʼ nə́ fɛ̂ ajúmə á mbô mbóŋ, kɔ nə́ tɔ́ŋ ntaŋ ə́fiʼtə̂ ándó ngaŋmə́fɨg ə́ ghɛd nə́ a mə́m məláʼ mə́ Əsê mə́ Pəjusə pópə əlaŋə́ əsêndúmə. Pó ghɛlə̂ ə́lɨ́d lə́ ńjî ńgə́ pɨ pə́ ŋáŋkə ághóobə́, mäŋ fiʼtə̂ áwɨ́ ńgə́ pó pɛ́dtə ńkwá ntsɔ́ʼəfaʼ əzɔb tsɔʼə ntsəmə.

³Lə́ təmbɔʼ nə́ tə́ ńkwáalə mbóŋ, kɔ nə́ ghɛd apô azɨ́ yə kwaabə a jîə anu páʼ apô azɨ́ yə təənə á faʼ nə́.

⁴Ńjî ńgə́ akwáalə azə́ənə́ á chîə nəlyaŋnə́, Tǎ əwɨ páʼə ä jɨ́ nə́ anuə atsəm páʼ pə́ faʼ nə́ á nəlyaŋnə́ a tíʼ ńtsɔ́ʼə afaʼə azə́ənə́.”

⁵Mbɔʼ nə tə́ ńchaʼtə́sê kɔ nə chîə ándó ngaŋmə́fɨgə; ńté ńgə́ po kɔŋə̂ mə́ tɨ́ nə́ chaʼtə́sê á mə́m məláʼ mə́ Əsê mə́ pəjusə pópə nkaŋə́ əlaŋə́ ńjî ńgə́ pɨ pə́ zə́ənə ághóobə́. Mäŋ fiʼtə̂ áwɨ́ nə́ ndə̌ŋdəŋ ńgə́ pó pɛ́dtə ńkwá ntsɔ́ʼəfaʼ əzɔb tsɔʼə ntsəmə.

⁶Lə́ mbɔʼ nə tə́ ńchaʼtə́sê, nə kwú ńgɛnə̂ á mə́m ntaŋ ńgwuʼnə̂ ntsǒndɛ̂ ńtíʼ ńchaʼtə́sê á mbô Tǎ əwɨ páʼ pə́ kě nə́ yï zə́ənə pô. Tǎ əwɨ páʼə ä jɨ́ nə́ anuə atsəm páʼ pə́ ghɛd nə́ nəlyaŋnə́ a yǐ tíʼ tsɔ́ʼə afaʼə azə́ənə́.

⁷“Pɨ ghɛd ńtə́ ńchaʼtə́sê kɔ nə tíʼə ə́sóŋə mənu tsɔʼə mbǒʼḿbóʼ páʼ mə́ kě nə́ nkǐ wam pô ándó pətəjǐsê, ńté ńgə́ pó kwaŋ ńgə́ pə́ yǐ zóʼə ághɔ́b lə́ nə́ tə́sɛ achaʼtə́sê əghoobə́

⁸Kɔ nə́ chîə ándó pó ńté ńgə́ Tǎ əwəənə́ a pɛ́dtə ńjîə anu pɨ lɔ nə́ záʼ pɨ pɔŋə̂ tə́ pítə yə́.

⁹Lɛ̌ ndzaŋ mbɔʼ nə́ tíʼ ńchaʼtə́sê.” Tǎ əwəg páʼə a chî nə́ á nəpó, ghɛd pɨ pə́ tə́ ńgóʼkə əlɛ́n gho,

¹⁰Anuə nəfoonə azô á yǐəə, Pə̈g faʼə̂ pə́ anu páʼ gho lɔ nə́ á ndu ndəsê, tsɔʼə ndzaŋ pɨ páʼ pó chî nə́ á nəpó pó faʼ nə́.

¹¹Fɛ̂ məjî mə́ koʼ nə́ á mbô pəg ə́sɛ̂nə̌.

¹²Ləgnə̂ pəfankə pə́g, ndzaŋ pəg kə́ nə́ ńdəgnə̂ pi pə́ pɨ páʼ pó fankə̂ nə́ á mbô pəgə́.

¹³Kɔ gho ghɛd pəg kwúnə á mə́mə akwaʼlə, lə́ ghɛd pəg lə́ʼə Ŋwu Təpɔŋə.

¹⁴Ńté ńgə́ mbɔʼ pɨ ləgnə̂ pətəpɔŋ páʼ pɨ pə́ ghɛd nə́ á mbô pɨ, Tǎ əwəənə́ á nəpóolə a yǐ ńkə́ ńdəgnə̂ pəpə́ənə́.

¹⁵Lə́ təmbɔʼ nə́ chîə təpɔŋ pɨ pətsə́ ləgnə̂ pô, Tǎ əwəənə́ á nəpóolə a yǐ ńkě əwɨ kə́ ńdəgnə̂ pô.

¹⁶Mbɔʼ nə́ chîə á mə́mə achaʼtə́sênji, kɔ nə́ ghɛd əshî ə́wɨ́ ə́ túgə asɔbnə ándó ngaŋmə́fɨg ghɛd nə́ lə̂. Pó ghɛlə̂ məshî mɔ́b mə́ pə́gə ńjî ńgə́ ŋwu ntsəmə a jî ńgə́ pó tə́ ńgɛlə̂ achaʼtə́sênjiə. Mäŋ fiʼtə̂ áwɨ́ nə́ ndə̌ŋdəŋ ńgə́ pó pɛ́dtə ńkwá ntsɔ́ʼəfaʼ əzoobə́.

¹⁷Mbɔʼ nə́ tə́ ńgɛlə̂ achaʼtə́sênji, nə́ sog əshî əwɨ́, ńdzɔ́ʼ nə́ məghɔ́d ńtíʼ ə́shaabə̂ atûə ajɨ́,

¹⁸ńjî ńgə́ kɔ pɨ pə́ jî ńgə́ pɨ tə́ ńgɛlə̂ achaʼtə́sênji tə ńdéʼtə Tǎ əwɨ páʼ pə́ kě nə́ yí tə́ ńdzə́ənə pô lə̂. Tǎ əwɨ páʼə ä zɨ́ nə́ mənu páʼ mə́ chî nə́ á nəlyaŋnə́ a yǐ tsɔ́ʼə afaʼə azə́ənə́.

¹⁹Kɔ nə lɔʼkə̂ apeʼə azə́ənə́ á ndu ndəsê páʼ əsəʼ pópə ate yǐ nə́ tə́mə́sɛ́ ə́wə́, pəzə̌ pə́ kə́ ḿbə́ʼ ńkwú ńdzəələ̂.

²⁰Lə́, lɔʼkə̂ nə́ apeʼə azə́ənə́ pə́ á nəpóolə páʼ təmbɔʼ əsəʼ pópə ate kě sɛ́ ə́wɨ́ tə́m pô, pəzə̌ pə́ kě ə́wɨ́ kə́ ńkwú ńdzə pô.

²¹Ńté ńgə́ aliʼ páʼ afoʼə azə́ənə́ á chî nə́ ə́wɨ́, lə aliʼ páʼ ńtɨ́ əwɨ́ ə́ yǐ nə́ kə́ chî ə́wə́.

²²Nələ́g lə́ nkyaʼ mbɨ ŋwunə. Lə́ələ́ pə́ ńgə́ mbɔʼ nələ́g zô nə́ chî əshîʼnə mbɨ əzo ntsəm lwɛ́nkə nə́ nkyaʼə.

²³Lə́ mbɔʼ nələ́g zô nə́ chî əshîʼnə chî pô, mbɨ əzo ntsəm yǐ ńdwɛ́nkə nə ndzəmə́. Təmbɔʼ nkyaʼ wɨ́d chî nə á mə́m gho ə́ pə́ ndzəmə́, ndzəmə́ yi wɨ́ ə́ chígə́ ńgáʼə á pə́ ə́lɛ́?

²⁴Mbɔʼ ŋwunə a kě á mbô pətǎ pɛ́n pɛ̌ faʼ pô. A yǐ peenə̂ táʼ, kɔŋə̂ táʼə, kɨ zóʼnə táʼ wágə táʼə. Mbɔʼ gho kě á mbô Əsê pó nkáb nɔd ə́faʼ pô.

²⁵“Ńdaŋ ə́lɨ́d maŋ fiʼtə̂ áwɨ́ ńgə́, kɔ nə́ jwaʼ mbɨ əzɨ ńté nchîmbî əzəənə́, nə́ ajú páʼ nə yǐ nə́ jî kɨ nô kɨ ńté mbɨ əzəənə́, nə́ ajú páʼ nə yǐ nə́ wê. Nchîmbî əzɨ ə́ kě pɔŋ ńtsɛ məjî? Mbɨ əzɨ ə́ kě pɔŋ ńtsɛ ətsəʼ?

²⁶Náŋ nə pəsə́ŋ pə́ zagnə̂ nə́ atǐə, pó kě əpü pǐə pô, ńkě kə́ ə́foʼə̂ ńnéŋə á mə́m mənkye pô. Lə́ Tǎ əwɨ páʼə a chî nə́ á nəpóolə a pə́ ḿbɛ́lə ńdzə́gə ághóobə́. Nə kě chígə́ ə́səglə̂ ńtsɛɛlə̂ ághɔ́b?

²⁷Əwə a chîə á ndzɔʼ pɨ mbɔʼ a jwaʼ mbɨ əjǐ tə ḿbegə̂ mɔ́ ndɛlə́ á mə́m nchîmbî əjǐə.”

²⁸Lə ghɛlə̂ akə̂ nə́ jwaʼ mbɨ jɨ ńté ətsəʼə́? Náŋ nə́ ndzaŋ páʼ flǎwa ndu kɔŋə á kɔ́ʼ nə́, pó kě faʼə̂ kɨ ńtɛ̂ ətsəʼ əpɔ́b pô.

²⁹Lə́ maŋ pə́ fiʼtə̂ áwɨ́ ńgə́ a lǒo Solomun nə́ afoʼə ají tsɔʼə atsəm, a kě kə́ wê atsəʼə́ a pɔŋ nə́ ándó táʼ flǎwa ghɛn yitsə̌ pô.

³⁰Mbɔʼ lɛ̌ pə́ ndzaŋ páʼ Əsê a wê nə́ ətsəʼ nə́ nəyeŋ páʼ a chî nə́ kɔŋ ə́sɛ̂n, á lǒo ḿbə́ a ngwɛʼə́ pə́ maʼə̂ á mə́m móg, a yǐ kě əpô pyádnə chígə́ wê. Wə̌ə, mbimə́ əjɨ chígə́ ńkə́g lɛ ə́lɛ́?

³¹Lə́ələ́ pə́ ńgə́ kɔ nə tə́ ńjwaʼ mbɨ əjɨ ńgə́ pəg yǐ jî lə́ akə̂? Kɨ pəg yǐ nô lə́ akə̂ kɨ ńgə́ pəg yǐ wê lə́ akə̂?

³²Ńté ńgə́ pətəjǐsê pə́ néŋ nə́ ńtɨ́ əghɔ́b nə́ ndɛn əpú wɨ́d ghɛnə́. Lə́ Tǎ əwəənə́ á nəpóolə a pə́ ńjî ńgə́ nə́ chîə mə́ túg nə́ ndɛn əpú wɨ́d ghɛn tsɔʼə ətsəmə.

³³Lə́ peg nə́ ńchwaalə̂ pə́ anuə nəfoonə ají ḿbɨ ḿbə́ nə́ mə tɨ́ nə́ ndə̌ŋdəŋə́, a yǐ tíʼ ə́fɛ̂ əpú pɨ ətsəmə á mbô pəənə́.

³⁴Lə́ələ́ pə́ ńgə́, kɔ nə́ jwaʼ mbɨ əjɨ ńté mənu mə́ ngwɛʼə́, ńté ńgə́ ngwɛʼə́ ə́ yǒ túg məmí mənuə. Tíʼə alěmbîə atsəmə á túg əjǐ ngə́ʼ páʼ ə́ koʼnə̂ nə́ yə́.