Read Awing Matyo 8 Bible Online

Matyo 8 - Awing bible

Matyo 8

¹Əghâ ándó Yeso a nə ńdǒo nə́ á ndu nkwəənə ńtsó lə́, pɨ pə́ zoŋə̂ yí tə ńnə́ənə a mənoonə mənoonə.

²Ngaŋnkaʼ yitsə̌ a yǐ ńkwə́ʼtə məko yí ə́sóŋ ńgə́, Tǎ mbɔʼ gho kɔŋ, gho ghɛd maŋ ŋwaʼə̂.

³Yeso a tsɛɛkə̂ apô ají ńkwumə̂ yí ə́wɨ́ ə́sóŋ ńgə́ “maŋ kɔŋə̂, ŋwaʼə̂!” Tsɔʼə əghâ yi wɨ́, nkaʼ əjǐ zə̂ ə́ měe yə́.

⁴Yeso a tíʼ ə́sóŋ nə́ yí ńgə́, “lɔg ndɛd ńgə́ kɔ gho yǐ fiʼtə̂ ŋwu tsə̌. Lə́ ghɛn ńnɨd mbɨ əzo á mbô mbêsê ńtíʼ ḿmaʼə̂ akáŋə́sê páʼ Mosisə a nə sóŋ nə́ ńgə́ pə́ maʼə̂ lə́, a mə́ nɨd nə ŋwu ntsəm ńgə́ gho ŋwaʼə̂.”

⁵Ndzaŋ Yeso a kə kwú nə aláʼə Kapanawum lə́ nətû nə ngaŋə́maʼə́ntso nətsə́ nə yǐəə á mbô yí ḿbítə akwáalə.

⁶Ə́sóŋ nə yí ńgə́, “Mmaʼmbî, ngaŋəfaʼə mə a noŋnə̂ a ndɛ̂ ńkwû táʼ əléemə, ńchîə á mə́m chigə tə́kɔʼ ngə́ʼə.”

⁷Yeso a sóŋ nə yí ńgə́, “Maŋ yǐ ghɛn tsóʼə yə.”

⁸Nətû nə́ ngaŋə́maʼə́ntso zə̂ nə́ kwěe ńgə́, Mmaʼmbî, maŋ kě koʼnə̂ ŋwu mbɔʼ gho yǐ ńkwúnə á ndɛ̂ maŋ pô, lə́ kwíʼnə ə́sóŋə táʼə anuə, ngaŋəfaʼə mə a yǐ yáŋə.

⁹Ńté ńgə́ maŋ lə́ ŋwu pɨ pə́ chîə nətû maŋə, maŋ kə́ ńtúg ngaŋə́maʼə́ntso páʼ maŋ sáʼ nə́ ághóobə́. Mäŋ sóŋə á mbô táʼ ńgə́, ghɛnə̂! a kə́ ńgɛnə̂. Maŋ pɨ ńkə́ sóŋə á mbô yitsə̌ ńgə́ yǐəə! a kə́ ńgyǐəə. Mäŋ sóŋə á mbô ngaŋəfaʼə mə ńgə́, faʼ ńgə́! a kə́ faʼə̂.

¹⁰Á nə ńkɨʼnə̂ Yeso əghâ páʼə a nə ńdzóʼ nə́ anu zəənə́. Ńtíʼ ə́sóŋ nə́ pɨ pə́ nə̈ ńdzoŋ nə́ yí lə́ ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́ maŋ kě ŋwu tsə̌ á mə́m Islɛl kə́ zə́ənə, nə́ zəənə́ apə́ŋə mbimə́ pô.

¹¹Mäŋ kyaʼə̂ áwɨ́ ńgə́ pɨ pipə nɨ́ nə́ pə́ yǒ fɛ́lə á əsáʼmə́nu pópə mɛ́dmə́nu ə́lɔg əliʼ póobə́ aliʼə́ akɔŋtə pópə Ablaamə, nə́ Azigə ḿbɨ ḿbə́ nə́ Jekɔbə á mə́mə anuə nəfoonə nəpóolə.

¹²Pɨ pə́ pěʼ nə́ ńchîə á mə́ chî nə́ á mə́mə anuə nəfɔ yə wɨ́, pə́ myaʼə̂ ághóobə́ á mə́m ndzəmə́ apeŋə́, aliʼ pó yǐ nə́ kyéŋ tə kɔ́d məsɔŋ móobə́.”

¹³Yeso a tíʼ ə́sóŋə á mbô nətû nə́ ngaŋə́maʼə́ntso zə̂ ńgə́, ghɛnə̂, anuə atsəmə a yǐ lɔgə̂ aliʼ tsɔʼə ndzaŋ páʼ mbimə́ əzo ə́ nɨd nə́ lə̂. “Tsɔʼə əghâ yi wɨ́ ngaŋəfaʼ əyǐ wə̂ a kə́ ńgyáŋə yə́.”

¹⁴Yeso a nə ńgɛnə̂ á ndɛ̂ Pita ńdzə́ənə ngəm Pita a noŋnə̂ á əkwu ńtə́ ńgoonə̂ nə́ əfə́gə.

¹⁵A kwumə̂ apô ají, əfə́g wə̂ ə́ měe yə́, a lǒo á ndəsê ńchúʼə á mə́ ghɛd nə́ məjî ə́fɛ̂ nə́ yə́.

¹⁶Əghâ nkwanə́ ə́ nə ḿbɛn ńkoʼ, pə́ chúʼə á mə́ yǐ nə́ nə́ pɨ páʼ pɛ̌sê ə́ chî nə́ á mbɨ pó á mbô yə́, a kəm əjwi təpɔŋ pi wɨ́ tsɔʼə nə́ táʼə atséebə ńkə́ ńtsóʼ pəghoonə́.

¹⁷A nə ńgɛd ndɛn mənuə nə́ lə́ á mə́ lwɛ́nkə nə́ anu pə́ nə sóŋ nə́ ńdaŋə̂ á mbô ntûsê Izaya; ńgə́, “A nə ńkwá əlɔʼ əpɛ́n ńkə́ ńtsóʼ məghɔ mɛ́nə.”

¹⁸Ndzaŋ Yeso a nə ńdzɨ́ nə́ ənɔ pəənə á nəpɛnə́ yí lə́, ə́sóŋ nə́ ngaŋə́zoŋə́ndzəm əjí ńgə́ pó po tú nkǐ ńgɛn nə́ yitsə̌ ndzɛnə́.

¹⁹Táʼ ngaŋə́zéʼkə pənoŋkə yitsə̌ a tíʼ ńgyǐəə á mbô yí ə́sóŋ ńgə́, “Ndzéʼkə, maŋ yǐ zoŋə̂ gho aliʼə́ atsəm páʼ gho ghɛn nə́ ə́wə́.”

²⁰Yeso a kwěe yí ńgə́, “Əntsɔb túg məngɔ́d móobə́, pəsə́ŋ pə̈ zag nə́ atǐ pə́ túg mənka móobə́. Lə́ Mɔ́ Ŋwunə a pə́ ńkě túgə aliʼ mbɔʼ a noŋkə̂ atûə ají əwɨ́ pô.”

²¹Yitsə̌ ŋwu páʼ a nə ḿbə́ nə táʼ ndzoŋdzəm əyǐə, a sóŋə á mbô yí ńgə́, “Mmaʼmbî, tíʼ maŋ peg ńgɛn ńtwə́ŋə tǎ mə záʼə.”

²²Lə́ Yeso a pə́ ə́sóŋə á mbô yí ńgə́, “Zoŋə̂ mə ḿmɛdtə̂ pəkwû pə́ twə́ŋ pəkwû póobə́.”

²³Yeso a tíʼ ńkwúnə á mə́mə aŋkənúʼə́, ngaŋə́zoŋə́ndzəm əjí zoŋə̂ yə́.

²⁴Pó kə́ ńgə́ ghɛnə̂, ntɨ sə́mə a ghabkə̂ ńchiʼ nkǐ tə wɨ́d tíʼə ńdoonə̂ á mə́ kə́bkə nə́ aŋkənúʼə́ azóobə́. Lə́ Yeso a pə́ ńnoŋnə̂ ńtə́ ńdê yə́.

²⁵Ngaŋə́zoŋə́ndzəm əjí pó ghɛn ńjimkə̂ yí ə́sóŋ ńgə́, “Mmaʼmbî, chwádkə áwə́gə́, pəg chîə á ntso nəwûə!”

²⁶Yeso a kwěe ńgə́, “Nə́ pɔ́gə lə́ akə̂? Mbimə́ əjɨ ə́ chígə́ ńkə́g lɛ ə́lɛ́?” Ńtíʼ ńdǒo á əsê ə́sáʼə kəfɨd wə̂ pópə nkǐ wə̂ páʼ wɨ́d ə́ nə ńkɔ́ʼ nə́ lə̂. Əliʼ ə́ kə́ ńkwéʼnə mbwɔ́dnə.

²⁷Anu yəwə́ á nə ńkɨʼnə̂ ŋwu ntsəm pó tíʼə ḿbítə ńgə́, “Lɛ̌ zə́ənə́ ndzaŋ ŋwunə, tə kəfɨd pópə nkǐ yi kɔ́ʼ nə ə́ zóʼnə yə́?”

²⁸Ndzaŋə ándó Yeso a nə ńtú nə́ ńkoʼə̂ a ndzɛnə́ aláʼə Gadelenesə lə́, ńjwánə mbyâŋnə yitsə̌ zɛ́n pɛ̌ páʼ pɛ̌sê ə́ chî nə́ a mbɨ pó, pó fɛ́lə á mə́m məse. Pó nə ńtsə́g lɛ tətətə, ŋwu tsə̌ a kě pɨ ńchî təmbɔʼ a laŋə̂ alaŋə́ yi wɨ́ pô.

²⁹Ndzaŋ pó nə ńjɨ́ nə́ Yeso lə́, ńkyéŋ nə́ pətə́kɔʼ pə́ ngye ə́sóŋ ńgə́, “Mɔ́ Əsê, Gho kwáalə lə́ akə̂ á mbô pəgə́? Gho yǐ lə́ á mə́ fɛ̂ nə́ ngə́ʼ nə́ pəg tsɔʼə tə ghə́ ndɛd koʼ?”

³⁰Akwɛlə pəkwúna yətsə́ a nə ńchî ḿbáatə ághɔ́b ńtə́ ńjîə.

³¹Pɛ̌sê pə̂ pə́ póʼ mbô nə́ Yeso ə́sóŋ ńgə́, “Mbɔʼ gho fɨ́dkə áwə́g, gho mɛdtə̂ áwə́g pəg ghɛn ńkwúnə á mə́mə akwɛlə pəkwúna jǐə.

³²A sóŋə á mbô pó ńgə́, ghɛn nə́” pó tíʼ ə́fɛ́d ńgɛn ńkwúnə á mə́mə akwɛlə pəkwúna zə̂. Akwɛlə pəkwúna yə wɨ́ tsɔʼə atsəmə á shwəənə̂ á mbɨ nkəŋə́ ńtsóolə á mə́m nkǐ ə́fə́mnə ńkwúkə.

³³Pɨ pə́ nə̈ ńdzə́g nə́ pəkwúna pə wɨ́, pə́ kə ńgɛnə̂ á mə́mə aláʼ ńtíʼ ə́fiʼtə̂ anuə atsəm páʼə a laŋ nə́, ḿbéenə anu páʼə á laŋ nə́ á mbɨ pɨ pɛ̌sê pə́ pěʼ nə́ ńchîə á mbɨ pó lə̂.

³⁴Aláʼə atsəmə á tíʼ ə́fɛ́d ńgɛnə̂ á mə́ tég nə́ Yeso. Ndzaŋ pó nə ńjɨ́ nə́ yí lə́, ḿbóʼmbô nə́ yí ńgə́ a fɛ́lə aláʼ pó.