Read Awing Matyo 9 Bible Online

Matyo 9 - Awing bible

Matyo 9

¹Yeso a kwúnə á mə́mə aŋkənúʼə́, ńtú ńgyǐəə á ndzɛnə́ aláʼ pó.

²Pɨ pətsə́ pə́ peʼə̂ nkweglə á ndu mə́ta ńgyǐ nə yə́ á mbô yə́. Yeso a nə ńjɨ́ mbimə́ əzɔb ńtíʼ ə́sóŋ nə́ nkweglə wə́ ńgə́, “Wam ntɨ́ əghô móonə mə! Pə́ ləgnə̂ pətəpɔŋ pô.”

³Ngaŋə́zéʼkə pənoŋkə pətsə́ po tíʼ ə́sóŋə a tətɨ pó ńgə́, “ŋwu nə́ a tə́ ńdzɔmtə̂ Əsê.”

⁴Yeso a nə ńjîə akwaŋə azɔ́b ńtíʼ sóŋ nə́ pó ńgə́, “Lə́ ghɛlə̂ akə̂ nə́ túgə akwaŋə təpɔŋə á ntɨ́ pɨ lɛ?”

⁵A pwɔ́dnə lə́ mə́ sóŋ nə́ ńgə́, “pə́ ləgnə̂ pətəpɔŋ pô” kəənə á mə́ sóŋ nə́ ńgə́ “lǒo á əsê ńnyinə̂?

⁶Maŋ yǐ nəələ̂ á mbô pɨ ńgə́ Mɔ́ Ŋwunə a túg mətəənə a ndu mbîə mə́ ləgnə̂ nə́ pətəpɔŋə” ńtíʼ ə́sóŋə á mbô ŋwu wə̂ páʼ a kwû nə́ táʼ əlá lə̂ ńgə́, “Lǒo á əsê ḿbyáanə mə́ta əgho ńkwə̂ gho á nchîndɛ̂!”

⁷Ŋwu wə̂ a lǒo á əsê ńkwə̂ yə a ndɛ̂ yə́.

⁸Ndzaŋ ənɔ pɨ wə́ nə ńjɨ́ nə́ anu yə wɨ́ lə, ḿbɔ́g lɛ tətə ńtíʼə ńgóʼkə Əsê ndzaŋ páʼə a fɛ̂ nə́ jɨ ndzaŋ mətəənə á mbô pəənə.

⁹Ndzaŋ Yeso a nə fɛ́d nə́ alíʼ yə wɨ́ lə́, ńdzə́ənə nkwânchubə aláʼ yitsə̌ pə̈ fóŋə yí nə́ Matyo, a náanə á aliʼə́ akwáalə́nchubə aláʼ yə́. Yeso a sóŋə á mbô yí ńgə́, “Zoŋə̂ mə.” A lǒo á ndəsê ńdzoŋə̂ yə́.

¹⁰Ndzaŋ Yeso a nə ńtə́ nə́ ńjîə məjîə á ndɛ̂ Matyo lə́, ngaŋə́kwáalə́ nchubə aláʼ yitsə̌ tə ńnɨ́ pópə ngaŋə́ghɛlə təpɔŋ ə́ yǐ ńtégə Yeso pópə ngaŋə́zoŋə́ndzəm əjí pó po tə́ ńjîə məjîə.

¹¹Ndzaŋ pəfalasi pətsə́ pə́ nə ńjɨ́ nə́ anu jɨ lə́, ńtíʼ ḿbítə ngaŋə́zoŋə́ndzəm əjí ńgə́, “Lə́ ghɛlə̂ akə̂ ndzéʼkə əwəənə́ ä jîə məjî pópə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”

¹²Yeso a zóʼə anu pó sóŋ nə́ ńtíʼ ńkwěe ńgə́, “Ŋwunə a chî nə́ əshîʼnə a kě ntsóʼ náŋə pô. Lə́ náŋə ŋwunə a tə́ nə́ ńgoonə̂.”

¹³Ghɛn nə́ ńdzéʼə anu páʼ atséebə Əsê á sóŋ nə́ ńgə́, “Maŋ kɔŋ lə́ akóolə́mə́lə́ŋə, maŋ kě lə́ afyaʼə́nu kɔŋ pô.” Maŋ kě yǐ lə́ mə́ fóŋ nə́ pɨ pə́ tɨ́ nə́ ndə̌ŋdəŋ pô. Maŋ yǐ lə́ á mə́ fóŋ nə́ ngaŋə́ghɛlə təpɔŋə.

¹⁴Ngaŋə́zoŋə́ndzəm Jɔn tíʼ ńgyǐəə á mbô Yeso ḿbítə yí ńgə́, “Lə́ ghɛlə̂ akə̂ pə̂gpə pəfalasi zá ńgɛlə̂ achaʼtə́sênjiə, lə́ əzô ngaŋə́zoŋə́ndzəm pə́ ńkě kwíʼnə ńgɛlə̂ pô?”

¹⁵Yeso a kwěe ńgə́, “Mbɔʼ ngaŋə́ko tǎdndzɔʼə́ ə́ fɨnə̂ páʼ tǎdndzɔʼə́ a chî nə́ pó po? Ngá! Lə́ ndɛd yǐ koʼ páʼ pə́ yǐ nə́ kwáalə tǎdndzɔʼə́ á mbô pó, pó tíʼ ńgɛlə̂ achaʼtə́sênjiə.”

¹⁶“Təmbɔʼ atsəʼ yə lɛnə̂ a sɛɛnə̂, pə́ kě apagə atsəʼ yə fî lɔg ńtɛ̂ ə́wɨ́ pô. Ńté ńgə́ apagə atsəʼ yə fî zə̂ á yǐ tsɔ́ʼnə pɨ peg ngɔ́d nə́ atsəʼ zə̂.

¹⁷Kɨ pə́ kě kə́ ńnéŋə məloʼ mə́ pwɔ́dnə nə́ kâʼlə̌ ngwub na yi ndɛn pô. Mbɔʼ pə́ néŋ ə́lɨ́d, ngwub na yi wɨ́ ə́ yǐ sánə ḿbə́gə zə́ələ́, məloʼ məwɨ́ mə́ kwɛdnə̂ mə́ələ́. Pə̈ néŋə məloʼ mimə pwɔ́dnə nə́ lə á mə́m kâʼlə̌ ngwub na yi féŋ ńjî ńgə́ kɔ táʼə ajúmə á mə́m pó á pə́gə.”

¹⁸Ndzaŋ Yeso a kə tə́ nə́ ḿbɛ́lə ńtséebə lə́, nətû nə́ pəjusə nətsə́ nə́ yǐ ńkwə́ʼtə məko yí ə́sóŋ ńgə́, “Móonə mə yi məngyě a kwû tsɔʼə əghâ nə́, lə́ yǐ ńnoŋkə̂ apô azô a ndu yə́ a pɨ ńjúmnə.”

¹⁹Yeso a lǒo á ndəsê pó yí ghɛn, ḿbá ngaŋə́zoŋə́ndzəm əjíə.

²⁰Tsɔʼə əghâ yi wɨ, məngyě yitsə̌ páʼ a kə tə́ nə́ ńgoonə̂ nə́ mə́sɔ́ tə ńkoʼ ngoʼ ntsɔb pɛ̌ a zoŋə̂ ndzəm yí ńkwum nəlwî nə́ atsəʼ jíə.

²¹Ə́sóŋə á mə́m ntɨ́ yí ńgə́, “Mbɔʼ maŋ kwum tsɔʼə atsəʼə́ ají maŋ yáŋə.”

²²Yeso a sɛdnə̂ ńdzə́ənə yí ə́sóŋ ńgə́, “Wam ntɨ́ əgho móonə mə. Mbimə́ əzô ə́ ghɛd gho yáŋə.” Məngyě wə̂ a kə́ ńgyáŋə yí tsɔʼə əghâ yi wə́.

²³Ndzaŋ Yeso a nə ńgyǐ nə́ ńkwúnə á ndɛ̂ nətû nə́ pəjusə zə̂ lə̂, ńdzɨ́ ngaŋə́zoobə mənkǐ mə́ nəwû pópə ənɔ pɨ páʼ ə́ jwáglə nə́,

²⁴ə́sóŋə á mbô pó ńgə́, “Fɛ́dkə nə apeŋə́, mɔ̂ məngyě nə́ a kě lə́ kwû nə́ kwû pô; a lê yí lə́ lê nə́.” Pó pə́ ńgweŋə̂ yə́.

²⁵Əghâ ándó pó nə fɛ́dkə nə́ apeŋ lə́, Yeso a kwúnə ntaŋ ńgwaamə̂ apô mɔ̂ məngyě wə̂ a lǒo á əsê.

²⁶Atsáb ńté anu zəənə́ á nə nyinə̂ á əlá aláʼ wɨ́d wə̂.

²⁷Ndzaŋə ándó Yeso a nə ńdǒo nə́ yí wɨ́ ńtə́ ńgɛnə̂ lə́, pəfəg pɛ́n pɛ̌ pə́ tə́ ńdzoŋə̂ yə́, ə́fóŋnə yí nə́ pətə́kɔʼ pə́ ngye ə́sóŋə ńgə́, “Mɔ́ Debid, kó mələ́ŋ mə́gə́.”

²⁸Əghâ ándó a nə ńgɛn nə́ ńkwúnə á ndɛ̂ lə́, pəfəg pə wɨ́ pó yǐəə á mbô yə́, a pítə ághɔ́b ńgə́, “Nə́ pí ńgə́ maŋ chî təmbɔʼ maŋ faʼə̂ zɨ?” Pó kwěe ńgə́, “pəg pímə ḿbə́ Mmaʼmbî.”

²⁹A tíʼ ńkwum əmə́g mɔ́b ə́sóŋ ńgə́, “Ńdzoŋ nə́ mbimə́ əzɨ tíʼə á pə́ lə́ələ́ á mbô pəənə́.”

³⁰Pó pɨ ńtíʼ ńchúʼə á mə́ zɨ́ nə́ əliʼə́. Yeso a chígə́ ńkwantə̂ ághɔ́b ńgə́, “Kɔ nə fiʼtə̂ á ŋwu tsə̌ nə́ anu zəənə́.”

³¹Lə́ pó pə́ ńgɛn ńgeebə̂ atsáb ńté yí nə́ əlá aláʼ wɨ́d wə̂ tsɔʼ ətsəmə.

³²Ndzaŋ pó nə ńtə́ nə́ ńgɛnə̂ lə́, pə́ lɔgə̂ ŋwu tsə̌ páʼ pɛ̌sê pə́ nə ńchî nə́ á mbɨ yə́ tə́ a kě pɛ́lə ńtséebə pô, ńgyǐ nə́ yə́ á mbô Yeso.

³³Əghâ ándó pə́ nə ńkəm nə́ pɛ̌sê pə̂ lə́, chípóʼ wə́ a chúʼə á mə́ tsáb nə́. Anu yəwə́ á nə ńkɨʼnə̂ ənɔ pɨ pó nə ńchî nə́ aliʼ yi wə́, pó tíʼ ə́sóŋ ńgə́, “Pə́ kě kə́ láʼə zə́ənə anu yətsə́ ándó zɨ á mə́mə aláʼə Islɛlə pô.”

³⁴Lə́ Pəfalasi pó pə́ sóŋ ńgə́, “Lə́ mətɨ mə́ əfo pɛ̌sê páʼə ä lɔg nə́ ńkəmə̂ pɛ̌sê ə́wə́.”

³⁵Yeso a tíʼ ńgɛnə̂ á mə́m əláʼ pópə ətú ətsəm ńdzéʼkə á mə́m məndɛ̂ mə́ Əsê móobə́, ə́fiʼtə̂ nkɨ yi əshîʼnə ńté Anuə Nəfoonə Əsê, ńkə́ ńtsóʼ ntê məghɔ mətsəm pó əlɔʼ ətsəm páʼ ə́ nə ńchî nə á mbɨ pəənə.

³⁶Ndzaŋə a nə ńdzɨ́ nə́ ənɔ pɨ lə́, ńkó mələ́ŋ móobə́, ńté ńgə́ pə́ nə̈ ńjwaʼə̂ ághɔ́b, ŋwunə a kě ə́wɨ́ kə́ ńchî təmbɔʼ a kwáalə ághɔ́b pô, pó tíʼ ńchîə ándó məmbéŋ mə́ ndzɛd mə́ tə ntseŋnə.

³⁷A tíʼ ə́sóŋə á mbô ngaŋə́zoŋə́ndzəm əjí ńgə́, “Məjî mə̂ mə́ nə́ənə, pɨ pə̈ foʼ nə́ pó pə́ ńkə́gə.

³⁸Chaʼtə̂ nə́ Əsê á mbô Mmaʼmbîə afoonə, ńgə́ a fɛ̂ ngaŋə́faʼ pó ghɛn əfoʼ məjîə afɔ yə́.”