Read Awing Magə 1 Bible Online

Magə 1 - Awing bible

Magə 1

¹Lɛ̌ nkɨ yi Əshîʼnə ńté Yeso Klisto Mɔ́ Əsê.[1]

²Á nə ńchwáakə lə́ ndzaŋ páʼ ntú Əsê Izaya a nə ŋwaʼlə̂ nə́ ńgə́: “Əsê a sóŋ ńgə́, Maŋ yǐ tú ntúmə mə á mbi gho, páʼ a yǐ nə́ tsoŋkə̂ ndú əghô.[2]

³Ngye ŋwu tsə̌ ə́ tə́ fóŋnə á kɔŋ məŋkwâʼlə̌ ńgə́, Tsoŋkə̂ nə́ ndúmə á mbô Mmaʼmbîə; ghɛd nə́ məshwáŋ mə́ ndú mí mə́ tɨ́ ndə̌ŋdəŋə́!”[3]

⁴Jɔn Əfɛ̂nkǐə a tíʼ ńgyǐəə á kɔŋ məŋkwâʼlə̌, ə́fɛ̂ nkǐ nə́ pɨ ńkə́ sóŋə anǔəsê. Ə́sóŋə á mbô ŋwu ntsəm ńgə́, “Mɛdtə̂ nə́ mənu mə́ təpɔŋ pɨ̈ ghɛd nə́ ńkwá nkǐ ńjî ńgə́ Əsê a ləgnə̂ pətəpɔŋ pə́ənə́.”

⁵Ŋwu ntsəmə á mə́mə aláʼə Judya pó Jɛlusalɛm á fɛ́d ńgɛnə̂ á mə́ zóʼ nə́ atséebə Jɔnə. Ə́fiʼtə̂ pətəpɔŋ póobə́ á mbô Jɔnə, a tíʼə əfɛ̂ nkǐ nə́ pó á mə́m nkǐ Jodanə.

⁶Jɔnə a nə ńgwê ətsəʼ páʼ pə́ nə ńtsoŋkə̂ nə́ lə́ nə́ mənoŋ mə́ na páʼ pə̈ fóŋ nə́ nə́ kəmbôʼnkɔn lə́, atwéŋ páʼ a nə̈ ńgwê nə́ a ntə̂ yí, pə́ nə́ ńtsoŋkə̂ lə́ nə́ ngwubə. Məjî mí mə́ nə ḿbə́ lə́ ngwumnə́ pó nûə akoobə́.

⁷A nə̈ sóŋə á mbô pɨ ńgə́, “Ŋwu páʼ a yǐ nə́ yǐəə á ndzəm maŋ, a yǐ gháʼ tsɛɛlə̂ mə, maŋ pěʼ ńkě koʼnə̂ ŋwu mbɔʼ maŋ kwúʼnə á əsê ńkyag məŋkɛd mə́ ngwub mí pô.

⁸Mäŋ fɛ̂ lə́ tsɔʼə nkǐ kətaŋə, a yǐ pə́ fɛ̂ nkǐə Ajwǐəsê á mbô pəənə́.”

⁹Nə́ ndɛd zɨ́d zə̂, Yeso a fɛ́lə Nazalɛd á mə́m Galili ńgyǐ ńkwá nkǐə á mbô Jɔnə, á mə́m nkǐ Jodanə.

¹⁰Ndzaŋə ándó Yeso a nə ńtə́ nə́ ə́fɛ́lə á mə́m nkǐ lə́, ńjɨ́ nəpó nə́ ŋáʼnə, Ajwǐəsê a tíʼ ńtsóolə á ndu yə́ ándó alúʼə.

¹¹Ngye yitsə̌ ə́ tíʼ ə́fɛ́lə á nəpó ə́sóŋ ńgə́, “Gho lə́ móonə mə páʼ maŋ chígə́ nə́ ńkɔŋə̂, mäŋ kɔŋtə̂ ńté gho.”

¹²Tsɔʼə əghâ yi wɨ́ Ajwǐəsê a tíʼ ńgɛd a ghɛnə̂ kɔŋ məŋkwâʼlə̌.

¹³A nə ńchîə kɔŋ məŋkwâʼlə̌ əlě mbî məghə́m mɛ́n nəkwa Satanə ä tíʼə ńkwaʼlə̂ yə́. A nə ńchî ə́wɨ́ lə́ pópə məna mə́ nəyeŋə́, lə́ pətseŋpə́ndɛ́pə́sê pə́ pə̈ ńgyǐəə ńkwáalə yə́.

¹⁴Əghâ ándó pə́ nə ńgwam nə́ Jɔn ńnéŋə á nkáʼə atsáŋ lə́, Yeso a ghɛnə̂ á Galili ńnáŋkə nkɨ Əsê yi əshîʼnə ə́wə́.

¹⁵Ə́sóŋə ńgə́, “Ndɛd ə́ koʼə̂. Anuə Nəfoonə Əsê á kə́ ḿbáatə! Kwúblə nə́ məntɨ́ mɨ́ ḿbí Nkɨ Əsê yi əshîʼnə!”

¹⁶Ndzaŋə ándó Yeso a nə ńtə́ nə́ ńnyinə̂ á nkǎŋkǐ Galili lə́, ńdzə́ənə Saamun pó mɔ́mɛ́ əyǐ Andəlu pó tə́ ńkó əshû nə́ məŋkɛlə́.

¹⁷Yeso a sóŋə á mbô pó ńgə́, “Yǐ nə́ ńdzoŋə̂ mə, maŋ yǐ zéʼkə áwɨ́ nə́ tíʼə ńkóolə pə́ pəənə.”

¹⁸Pó kə́ ńtɔ́g ḿmɛdtə̂ məŋkɛd mɔ́b ńdzoŋə̂ yə́.

¹⁹Ndzaŋə a nə mbɨ nə́ ńnyáʼ ńkwádtə ńgɛn nə́ mbi lə́, ńdzə́ənə Jɛmsə pó Jɔnə pɔ́ pə́ Zebedi pó chîə á mə́mə aŋkənúʼə́ azɔ́b ńtə́ ńtsoŋkə̂ məŋkɛlə́.

²⁰Ndzaŋə ándó Yeso a nə́ ńjɨ́ nə́ ághɔ́b lə́, ńkə́ ńtɔ́g ə́fóŋə ághóobə́; Pó mɛdtə̂ tǎ əghɔb Zebedi pópə ngaŋə́faʼ əzóobə́ á mə́mə aŋkənúʼə́ ńdzoŋə̂ Yeso.

²¹Pó yǐ ńkwúnə Kapanawum, á lǒo ḿbə́ Alěláʼə́sê Yeso a ghɛnə̂ á Ndɛ̂sê Pəjus á mə́ zéʼkə nə́ ə́wə́.

²²Ndzeʼkə́ əjǐ ə́ nə ńkɨʼnə̂ a ŋwu ntsəmə, ńté ńgə́ á nə ńdzéʼkə ághóobə́ ándó ŋwunə a túg nə́ mətəənə, ńkě zéʼkə pə́ ándó ngaŋə́zéʼkə pənoŋkə pô.

²³Tsɔʼə əghâ yi wɨ́ ŋwu tsə̌ páʼ a nə ńtúg nə́ ajwiə təpɔŋə a yǐ ńkwúnə á mə́m Ndɛ̂sê Pəjus ńtíʼ ńkyéŋ nə́ tə́kɔʼ ngye ə́sóŋ ńgə́,

²⁴“Ghö kwáalə lə́ akə̂ á mbô pəgə́? Yeso Mɔ́ Nazalɛd. Gho yǐ lə́ á mə́ tseŋkə̂ nə́ áwə́g? Maŋ jîə ŋwu páʼ gho pə́ nə́ wə́ələ́, gho lə́ yi ŋwaʼ nə́ páʼ a lǒo nə́ á mbô Əsê.”

²⁵Yeso a sáʼə ajwiə təpɔŋ zə̂ ə́sóŋ ńgə́, “Naʼə̂, fɛ́lə á mə́m yə́!”

²⁶Ajwiə təpɔŋ zə̂ á chiʼə̂ ŋwu wə́ nə́ mətɨ, ńkyéŋ nə́ tə́kɔʼ ngye ńtíʼ ə́fɛ́lə á mə́m yə́.

²⁷Anu yə́ wə́ á nə́ ńkɨʼnə̂ ŋwu ntsəm pó tíʼə ḿbítə a tətɨ pó ńgə́, “Lɛ̌ akə̂? Ńtê ndzeʼkə́ yi fî yitsə̌? A sáʼ əjwi təpɔŋ nə́ mətɨ pó kə́ ńdzóʼnə yə́.”

²⁸Anu ńté Yeso á shamnə̂ á mə́m mboʼ Galili tsɔʼə ntsəmə.

²⁹Ndzaŋə ándó pó nə fɛ́d nə́ á mə́m ndɛ̂sê Pəjus lə́, pópə Jɛmsə nə́ Jɔn ghɛnə̂ á ndɛ̂ pə́ Saamun pó Andəlu.

³⁰Ngəm Saamun a noŋnə̂ nə́ əfə́gə, Yeso a yǐ ńkwú ə́wɨ́ pə́ tɔ́g ə́fiʼtə̂ yə́.

³¹Yeso a tíʼ ńgɛnə̂ á nəpɛnə́ yí, ńgwaamə̂ apô ají ńtíʼ ńkwáalə yí ḿbɨgə̂ yə́, əfə́g wə́ ə́ měe yə́, a lǒo ńdɔg məjî ə́fɛ̂ á mbô pó.

³²Á nə́ ḿbə́ ndɛd nkwanə́ ándó mə́numə á nə ḿmɛ́d nə́, pɨ pə́ lɔg pəghɔ pópə pɨ pɛ̌sê á nə́ ńchî nə́ á mbɨ pó ńtíʼ ńgyǐ nə́ pó á mbô Yeso.

³³Ŋwu ntsəmə á mə́mə aláʼ yəwə́ á nə ńkyeetə̂ á ntsǒndɛ̂ wɨ́d wə̂.

³⁴Yeso a tíʼ ńtsóʼ pɨ pə́ nɨ́ nə́ páʼ pó nə́ ńtúg nə́ ntê məghɔ ntsəmə. A nə ńkə́ ńkəmə̂ pɛ̌sê yi nɨ́ nə́ ḿbə́ ńkě pí ńgə́ pɛ̌sê pə̂ pó sóŋə anu yitsə̌ pô ńté ńgə́ pó nə́ ńjîə ŋwu páʼ Yeso a pə́ nə́ wə́ələ́.

³⁵Á mɛ́ məsânə á ndúumbî, Yeso a lǒo á əsê ə́fɛ́lə ndɛ̂ ńgɛnə̂ aliʼ páʼ pɨ pə́ nə ńkě nə́ ə́wɨ́ chî pô ńchaʼtə́sê ə́wə́.

³⁶Lə́ Saamun pópə ngaŋmə́ko əjí ə́ fɛ́d ńtə́ ńchwaalə̂ yə́.

³⁷Əghâ ándó pó nə́ ńjɨ́ nə́ yí lə́, ńtíʼ ə́sóŋ nə́ yí ńgə́, “Ŋwu ntsəmə a tə́ ńnáŋə gho.”

³⁸Yeso a kwěe ághɔ́b ńgə́, “Pɛn ghɛn nə́ pətsə́ əláʼ páʼ ə́ páatə nə́ ńjî ńgə́ mbɔʼ maŋ kə́ ə́sóŋə Anǔəsê ə́wə́, lə́ anu páʼ maŋ nə ńgyǐ nə́ á mə́ faʼ nə́.”

³⁹A nə ńnyinə̂ á mə́m mboʼ Galili tsɔʼ ntsəmə, ə́sóŋə anǔəsê á mə́m məndɛ̂ mə́ Əsê mə́ Pəjusə móobə́, ńkə́ ńkəmə̂ pɛ̌sê.

⁴⁰Ŋwu tsə́ páʼ a nə́ ńtúg nə́ nkaʼ a yǐ ńkwə́ʼtə á mbi Yeso ḿbóʼmbô ə́sóŋ ńgə́, “Mbɔʼ gho kɔŋ, gho ghɛd maŋ ŋwaʼə̂.”

⁴¹Yeso a nə́ ńtúgə akóolə́mə́lə́ŋ ńté yí ńtíʼ ńnɛdkə̂ apô ají ńkwumə̂ yí ə́wɨ́ ə́sóŋ ńgə́, “Maŋ kɔŋə̂, ŋwaʼə̂!”

⁴²Tsɔʼə əghâ yi wɨ́ nkaʼ zə̂ ə́ měe yí, mbɨ əjǐ ə́ ŋwaʼə̂.

⁴³Yeso a tíʼ ḿbyádnə ńkwantə̂ yí, ńgɛlə̂ a ghɛnə̂ yí tsɔʼə əghâ yi wə́.

⁴⁴Ə́sóŋ nə́ yí ńgə́, “Jwə́ʼtə, kɔ gho sóŋə ŋwu tsə́ nə́ anu zəənə́. Lə́ ghɛn ńnɨd mbɨ əzo á mbô mbêsê, ńkə́ fɛ̂ əpúmə afyaʼə́sê əpô ndzaŋ Mosisə a nə sóŋ nə́, á mə́ nɨd nə́ á mbô ŋwu ntsəm ńgə́ gho ŋwaʼə̂.”

⁴⁵Lə́ ŋwu wə́ a pə́ ńgɛn ńtíʼ ńgeebə̂ atsáb ńté anu yə́ wə́ aliʼə́ atsəmə. Ńdaŋ ə́lɨ́d, Yeso a kě pɨ ńchîə á mə́ kwú nə́ á mə́mə aláʼə á əshîsaŋ pô, lə́ ńtíʼə ńchîə tsɔʼə nə́ əliʼ ŋwunə a kě nə́ ə́wɨ́ chî pô. Lə́ pɨ pə́ pə̂ ḿbɛ́lə ńdǒo atúmə atú ńgyǐəə á mbô yə́.