Read Awing Magə 10 Bible Online

Magə 10 - Awing bible

Magə 10

¹Yeso a tíʼ ə́fɛ́lə á aliʼ wɨ́d wə̂ ńgɛnə̂ á mboʼ Judya á ndzɛnə́ nkǐ Jodanə. Mboŋ pɨ ə́ kə́ ḿbɨ ńgyǐəə á mbi yə́, a zéʼkə ághɔ́b ndzaŋə a nə̈ ńdzá nə́ ńgɛlə̂.

²Pəfalasi pətsə́ pə́ yǐəə á mbô yí ńtíʼə ḿmoomə̂ yí ḿbítə ńgə́, “Noŋkə á nɨd ńgə́ mbɔʼ ŋwunə a shamkə̂ ndzɔʼə́ əghɔ́b ngwě əyǐ?”

³Yeso a kwěe ághɔ́b ńgə́, “Ntəgə́ páʼ Mosisə a nə fɛ̂ nə́ á mbô pɨ ə́ nə sóŋ lə́ ńgə́ akə̂?”

⁴Pó kwěe ńgə́, “Mosisə a nə ḿbí ńgə́ mbɔʼ ŋwunə a ŋwaʼlə̂ aŋwaʼlə ashamkə́ndzɔ́ʼə́ ə́fɛ̂ nə́ ngwě əyǐ ńkəmə̂ yə́.”

⁵Yeso a sóŋə á mbô pó ńgə́, “Mosisə a nə ŋwaʼlə̂ ntəgə́ jɨ́d jɨ ə́fɛ̂ á mbô pɨ lə́ ńté ńgə́ məntɨ́ mɨ́ mə́ nə ńtyantə̂.

⁶Lə́, á nə ḿbə́ á nəfɛdnə́, nə́ ndɛd páʼ Əsê a kə tsoŋkə̂ nə́ mbî, ‘Əsê a tsoŋkə̂ ághóobə́, ŋwu mbyâŋnə pó məngyě.’

⁷Ńdaŋ ə́lɨ́d ŋwu mbyâŋnə a yǒ mɛdtə̂ tǎ əyǐ pó mǎ əyǐ ə́ tíʼ tsɛntə̂ pó ngwě əyǐ,

⁸pó pə́ pɛ̌ ə́ tíʼ táʼ na mbəəmə. Lə́ələ́ pə́ ńgə́ pó kě pɛ́d ḿbə́ lə́ pɨ pə́ pɛ̌ pô. Pó tíʼ ḿbə́ lə́ táʼə.

⁹Lə́ələ́ pə́ ńgə́ ajú páʼ Əsê a tsɛntə̂ nə́ aliʼə́ mɔʼə́, kɔ ŋwunə a ghabnə̂.”

¹⁰Əghâ ándó pó nə ḿbɨ nə́ ḿbəənə̂ á ndɛ̂ lə́, ngaŋə́zoŋə́ndzəm Yeso ə́ pítə yí nə́ anu ńté anu jɨ́d zəənə́.

¹¹Yeso a kwěe ághɔ́b ńgə́, “Ŋwu ntsəm páʼə a fóg nə́ ngwě əyǐə á ndɛ̂ yí ḿbɨ ńdzɔ́ʼə yi ndaʼ, a jî lə́ mə̂ghabə pó yí páʼ a pɨ nə́ ńdzɔ́ʼ lə́, ńtíʼ fankə̂ anuə á mbô ngwě əyǐə.

¹²Mbɔʼ məngyě a kə́ ə́fɛ́lə á ndɛ̂ ndú əyǐ ńdzɔ́ʼə ŋwu mbyâŋnə yi ndaʼ, a jî lə́ mə̂ghabə.”

¹³Pɨ pətsə́ pə́ nə ńgyǐ nə́ pɔ̂nkə̂ á mbô Yeso ńgə́ a kwumə̂ ághóobə́, lə́ ngaŋə́zoŋə́ndzəm əjí ə́ pə́ ə́sáʼə ághóobə́.

¹⁴Ndzaŋə ándó Yeso a nə ńjɨ́ nə́ anu yə wɨ́ lə́, ndě əyí ə́ záŋə, a tíʼ ə́sóŋ nə́ ngaŋə́zoŋə́ndzəm əjí ńgə́, “Mɛdtə̂ nə́ kə́yé pɔ̂nkə̂ a yǐəə á mbô maŋə, kɔ nə́ zɔŋ nə́ pó ńté ńgə́ Anuə Nəfoonə Əsê a chî lə́ á mbô pəənə ándó ndzaŋ zəənə́.

¹⁵Mäŋ fiʼtə̂ áwɨ́ nə́ ndə̌ŋdəŋ ńgə́ ŋwu ntsəm páʼə a kě nə́ Anuə Nəfoonə Əsê ándó mɔ́ lɔg pô a yǒ kě ə́wɨ́ kwú pô.”

¹⁶A sóŋ ə́lɨ́d lə́ ńtíʼ ńtwá pɔ́ pə́ ńtúg, ńnoŋkə̂ mbô míə atû pó, ńnéŋ mbwɔ́dnə nə́ pó.

¹⁷Ndzaŋə ándó Yeso a nə ńkə́ nə́ ḿbɨ ńtə́əmə alaŋə́ ńtə́ ńgɛnə̂ lə́, ŋwu tsə̌ a kə ndə̌ ńgyǐ ńkwə́ʼtə á məko yí ḿbítə yí ńgə́, “Ndzéʼkə yi əshîʼnə, mbɔʼ maŋ shib ńgɛd ə́lɛ́ ḿbɔŋə̂ jî nchîntɨ páʼ ə́ mɛdnə̂ nə́ ngǎ mɔʼə́?”

¹⁸Yeso a kwěe yí ńgə́, “Lə́ ghɛlə̂ akə̂ gho fóŋə mə ńgə́ ŋwu yi əshîʼnə?” Ŋwu tsə̌ a kě pɔŋ pô, tə ńdéʼtə Əsê yí təjiʼə.

¹⁹“Gho jî məntəgə́ mə́ Əsê: ‘Kɔ gho jwítə; kɔ gho jîə mə̂ghabə; kɔ gho zəələ̂; kɔ gho tsɨd ntsəələ; kɔ gho fɨgə̂ ŋwunə; ghóʼkə tǎ əgho pó mǎ əgho.’ ”

²⁰Ŋwu wə̂ a kwěe ńgə́, “Ndzéʼkə, maŋ lɔʼkə̂ məntəgə́ mɨ tsɔʼə mətsəm ə́fɛ́d páʼ maŋ nə ḿbə́ nə́ Mɔ̂nkə̂ nkaŋŋwunə.”

²¹Yeso a náŋə yí ńkɔŋə̂ yí ńtíʼ sóŋ nə́ yí ńgə́, “Gho pɛ́d ḿbóŋə táʼə anuə. Ghɛn ə́finə̂ ajúmə atsəm páʼ gho túg nə́ ə́fɛ̂ nkáb yi wɨ́ nə́ pəpóŋ ńjî ńgə́ afoʼə azô á chîə á nəpóolə, ńtíʼ ńgyǐ ńdzoŋə̂ mə.”

²²Ŋwu wə̂ a nə ńdzóʼə atsáb jɨ lə́, mbɨ əjǐ ə́ póolə, a tíʼ ńgɛn nə́ afɨnə, ńté ńgə́ apeʼə ajíə á nə ńnə́ənə.

²³Yeso a tíʼ ńnáŋ əliʼ ə́sóŋə á mbô ngaŋə́zoŋə́ndzəm əjí ńgə́, “Á chígə́ ńtyantə̂ á mbô ngǎŋnkéebə á mə́ kwú nə́ á mə́mə Anuə Nəfoonə Əsê!”

²⁴Aliʼə́ atsáb zəənə́ á nə ńkɨʼnə̂ ngaŋə́zoŋə́ndzəm əjíə. Yeso a pə́ ńgɛn nə́ mbiə á mə́ sóŋ nə́ ńgə́, “Póonə mə! Á lánə ńtyantə̂ á mə́ kwú nə́ á mə́mə Anuə Nəfoonə Əsê!

²⁵A pwɔ́dnə á mbô anjwa á mə́ kwú nə́ á mə́m ngɔ́d əsáʼ ńtsɛɛlə̂ á mbô ngaŋnkéebə á mə́ kwú nə́ á mə́mə Anuə Nəfoonə Əsê.”

²⁶Anu yəwə́ á pɨ ḿbyádnə ńkɨʼnə̂ ngaŋə́zoŋə́ndzəm əjí pó tíʼ ə́sóŋə á tətɨ pó ńgə́, “Mbɔʼ əwə a pə́ ńtíʼ ńchwáalə?”

²⁷Yeso a tə́g əmə́g nə́ pó ńtíʼ ə́sóŋ ńgə́, “Á tyantə̂ á mbô ŋwunə, ḿbə́ ńkě á mbô Əsê tyantə̂ pô. Mbɔʼ Əsê a faʼ mənu mətsəmə.”

²⁸Pita a sóŋə á mbô yí ńgə́, “Pəg mɛdtə̂ ajúmə atsəm ńdzoŋə̂ gho!”

²⁹Yeso a kwěe yí ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, ŋwu ntsəm páʼə a mɛdtə̂ nə́ nchîndɛ̂ əjǐ kɨ pɔ́pə́mɛ́ pí pi pə́ mbyâŋnə kɨ pi pə́ pəngyě, kəənə mǎ əyǐ, kəənə tǎ əyǐ, kɨ pɔ́ pí, kəənə afoonə ají ńté mə pópə Anǔəsê,

³⁰a yǐ ə́ kwá chigə ntsɔ́ʼəfaʼ əghâ nə́. A yǐ kwá ntsɔ́ʼəfaʼ əjǐ ngǎ nkɛd nə́ məláʼ, pópə pɔ́pə́mɛ́ pí pi pə́ mbyâŋnə, nə́ pi pə́ pəngyě, nə́ pəmǎ, nə́ pɔ́, nə́ əliʼ ndəsê, ḿbá nə́ mə tsaŋkə̂ nə́. Nə́ ndɛd yitsə̌ á mə́ yǐ nə́ a kə́ ńjî nchîntɨ páʼ ə́ mɛdnə̂ nə́ ngǎ mɔʼə́.

³¹Lə́ pɨ pi nɨ́ nə́ páʼ pó pə́ nə́ mbi əghâ nə́ pó yǒ tíʼ pə́ ndzəmə, pɨ pi nɨ́ nə́ páʼ pó pə́ nə́ ndzəm əghâ nə́ pó yǒ tíʼ pə́ mbiə.”

³²Yeso a nə ńkwá mbi əzɔb pó po tə́ ńkɔ́ʼə ńgɛnə̂ Jɛlusalɛmə. Á kɨʼnə̂ ngaŋə́zoŋə́ndzəm Yeso; pɨ pə́ nə ńtə́ nə́ ńdzoŋə̂ a ndzəm pə́ kə́ ḿbɔ́gə. Yeso a kə́ ḿbɨ ńdɔg ngaŋə́zoŋə́ndzəm əjí zə̂ ntsɔb pɛ̌ a ndzəmə ndzəm ə́fiʼtə̂ ághɔ́b nə́ mənu mə́ yǐ nə́ laŋə̂ á mbɨ yə́.

³³Ə́sóŋ nə́ pó ńgə́, “Jɨ́ nə́. Pɛn kɔ́ʼə ńgɛnə̂ lɛ Jɛlusalɛm páʼ pə́ yǐ nə́ fɛ̂ Mɔ́ Ŋwunə á mbô pətə́kɔʼ pə́ ngaŋə́pêsê pópə ngaŋə́zéʼkə Pənoŋkə. Pə́ yǐ sáʼ əsáʼ əyí ə́lə́g ńgə́ pə́ jwítə yí ə́ tíʼ fɛ̂ yə́ á mbô Pətəjǐsê.

³⁴Pó yǒ tíʼ ńnyegnə̂ yí, ə́ twǐ mətwê nə́ yí, ə́shúmə yí ə́ tíʼ ńjwítə yə́. Lə́, əlě teelə́ ə́ laŋ a pɨ ńjúmnə nəwûə.”

³⁵Jɛmsə pó Jɔn, pɔ́ pə́ Zebedi pó tíʼ ńgyǐəə á mbô Yeso ə́sóŋ ńgə́, “Ndzéʼkə, anu yətsə́ á chî ə́wɨ́ páʼ pəg lɔ nə́ ńgə́ gho faʼə̂ á mbô pəgə́.”

³⁶Yeso a pítə ághɔ́b ńgə́, “Nə́ loonə̂ lə́ ńgə́ maŋ ghɛd ə́lɛ́ á mbô pəənə́?”

³⁷Pó kwěe ńgə́, “Ghɛd táʼ ŋwu əwəg yitsə̌ a náanə apô gho yə təənə, táʼ yitsə̌ a náanə apô yə kwaabə á əghâ ándó gho yǐ nə́ ńkwúnə á mə́mə anuə nəfoonə azô.”

³⁸Yeso a sóŋə á mbô pó ńgə́, “Nə́ kě jîə anu nə́ pítə nə́ lə́ pô. Təmbɔʼ nə́ nô ndɔ́ŋ páʼ mäŋ nô nə́? Kɨ mbɔʼ nə́ kwá nkǐ páʼ mäŋ kwá nə́?”

³⁹Pó kwěe ńgə́, “Mbɔʼ pəg ghɛlə̂.” Yeso a tíʼ ə́sóŋ nə́ pó ńgə́, “Nə́ yǐ nô ndɔ́ŋ mäŋ nô nə́, ə́ kwá nkǐ maŋ kwá nə́.

⁴⁰Lə́, mə náanə nə́ á əlá apô maŋ yi tɨ kɨ yə kwab lə́ kě maŋ yǐ tsɔ́ʼ pô. Əliʼ pɨ́d pɨ ə́ chî lə́ á mbô pɨ pə́ nə ḿbɛ́d nə́ tə ńtsoŋkə̂ pɨ́d ńté ághóobə́.”

⁴¹Ndzaŋ pətsə́ ngaŋə́zoŋə́ndzəm Yeso zə̂ nəghə́m ə́ nə ńdzóʼ nə́ anu jɨ lə́, ndě əghɔ́b ə́ záŋ ńté Jɛmsə pó Jɔnə.

⁴²Yeso a tíʼ ə́fóŋə ághɔ́b pətsəmə aliʼə́ mɔʼə́ ə́sóŋ nə́ pó ńgə́, “Nə́ jî ńgə́ pɨ pə́ lɔg nə́ ńgə́ pó sáʼə məsáʼ mə́ Pətəjǐsê pó kɔ́ʼə ńnáanə lə́ á ndu pó ə́sáʼə ághóobə́. Mətû mɔ́b mə́ kə́ ńtúg mətɨ mətsəmə á ndu pó.

⁴³Lɛ̌ pə́ ńkě ndzaŋə á chî nə́ á mə́ chî nə́ á tətɨ pɨ pô. Ŋwu ntsəm páʼə ä lɔ nə́ á mə́ pə́ nə́ tə́kɔʼ ŋwunə á mə́m pəənə́ a shib ḿbə́ ngaŋəfaʼə əwəənə́,

⁴⁴mbɔʼ ŋwu əwɨ yitsə̌ a tə́ ńdoonə̂ á mə́ pə́ nə́ nkwâmbi, a shib ḿbə́ apoʼə ŋwu ntsəmə.

⁴⁵A lǒo Mɔ́ Ŋwu, a nə ńkě yǐ lə́ ńgə́ pə faʼə̂ á mbô yí pô, ə́ ḿbə́ ńgyǐ lə́ á mə́ faʼ nə́ á mbô pəənə́, ə́ tû ə́fɛ̂ nchîmbî əjǐ á mə́ tsóʼ nə́ atûə pɨ pi nɨ́ nə́ ə́wə́.”

⁴⁶Pó yǐ ńkwúnə Jɛliko. Ndzaŋ páʼ Yeso pópə ngaŋə́zoŋə́ndzəm əjí, nə́ mboŋ pɨ ə́ nə ńtə́ nə́ ə́fɛ́lə lə́, əfə̌gmə́g yitsə̌ pə́ nə̈ fóŋ nə́ nə́ Batimusə páʼə a nə ḿbə́ nə́ mɔ́ Timusə a náanə á nkaŋə́ alaŋə́ ńtə́ ńdɔ́nə.

⁴⁷Ndzaŋə a nə ńdzóʼ nə́ ńgə́ lə́ Yeso Mɔ́ Nazalɛd lə́, ńchúʼə á mə́ tɔ́ŋnə nə́ ə́sóŋə ńgə́, “Yeso! Mɔ́ Debid, kó mələ́ŋə mə.”

⁴⁸Pɨ pi nɨ́ nə́ pə́ sáʼə yí ə́sóŋ nə́ yí ńgə́ a pɔ́ʼnə ńnaʼə̂. Lə́, a pə́ ḿbɨ ńgyɛ́ɛlə yɛ́ɛlə nə́ ə́sóŋə ńgə́, “Mɔ́ Debid kó mələ́ŋə mə!”

⁴⁹Yeso a tɨ́ ńtíʼ ə́sóŋ ńgə́, “Fóŋ nə́ yə́.” Pó tíʼ ə́fóŋə əfəg wə̂ ə́sóŋ nə́ yí ńgə́, “Wam mbɨ əzo! Lǒo á əsê, a tə́ ə́fóŋə gho.”

⁵⁰A myaʼə̂ atsəʼə́ ají yə wáatə nə́, ə́sad ńdǒo á əsê ńgyǐəə á mbô Yeso.

⁵¹Yeso a pítə yí ńgə́, “Gho loonə̂ lə́ ńgə́ maŋ ghɛd ə́lɛ́ nə́ gho?” Əfəg wə̂ a kwěe ńgə́, “Ndzéʼkə, maŋ loonə̂ lə́ á mə́ jɨ́ nə́ əliʼə́.”

⁵²Yeso a sóŋ nə́ yí ńgə́, “Ghɛnə̂, mbimə́ əzo ə́ ghɛd gho yáŋə.” Tsɔʼə əghâ yi wɨ́ ŋwu wə̂ a jɨ́ əliʼ, ńtíʼ ńdzoŋə̂ Yeso á alaŋə́ ndúmə.