Read Awing Magə 11 Bible Online

Magə 11 - Awing bible

Magə 11

¹Ndzaŋ pó nə ńtə́ nə́ ḿbáatə Jɛlusalɛm lə́, ńkoʼə̂ Bɛlfasə pó Bɛtani á ndú Nkwəənə Olifə, Yeso a tú ngaŋə́zoŋə́ndzəm əjí zɛ́n pɛ̌

²ə́sóŋ nə́ pó ńgə́, “Ghɛn nə́ á mə́mə aláʼ wə̂ á mbi pəənə́. Ndzaŋ nə́ yǐ nə tə́ kwúnə ə́wɨ́ lə́, nə́ yǐ zə́ənə mɔ́ njakasə pə́ təŋnə̂ ə́wɨ́ páʼ ŋwu tsə̌ a kě nə́ á ndu ə́wɨ́ kə́ kɔ́ʼə pô. Kyag nə́ áwɨ́d ńgyǐ nə́ wə́ələ́ aliʼə́ nə́.

³Mbɔʼ ŋwu tsə̌ a pítə áwɨ́ ńgə́, ‘lɛ̌ akə̂ anu nə̈ ghɛd nə́?’ Nə́ fiʼtə̂ á mbô yí ńgə́, ‘Mmaʼmbîə a loonə̂ áwɨ́d tsɔʼə ngǎ pɛ̌ a pɨ ḿbɨnkə̂ áwə́ələ́.’ ”

⁴Pó tíʼ ńgɛn ńdzə́ənə mɔ́ njakasə pə́ təŋnə̂ nə́ á ntsǒndɛ̂ á nkaŋə́ alaŋə́. Ndzaŋ pó nə ńtə́ nə́ ńkyagə̂ áwɨ́d lə́,

⁵pɨ pətsə́ pə́ nə ńtɨ́ nə́ aliʼ yi wɨ́ pó pítə ághɔ́b ńgə́, “Nə́ ghɛlə̂ lə́ ə́lɛ́ ńkyagə̂ mɔ́ njakasə wə̂?”

⁶Pó kwěe ndzaŋ Yeso a pěʼ nə́ ə́sóŋ nə́ pó lə̂, pɨ pi wɨ́ pə́ tíʼ ḿmɛdtə̂ ághɔ́b pó ghɛnə̂.

⁷Pó yǐ nə́ mɔ́ njakasə wə̂ á mbô Yeso, ńtsɔ́ʼ ətsəʼ əpɔ́b ńnoŋkə̂ á ndu əwɨ́ Yeso a tíʼ ńkɔ́ʼə á ndu ə́wə́.

⁸Pɨ pi nɨ́ nə́ pə́ maʼ ətsəʼ əpóobə́ á alaŋə́, pɨ pətsə́ pə́ maʼə̂ kə́yé məfag mə́ atǐ mimə féŋtə nə́ pó pěʼ nə́ ə́fagtə̂ á mə́m məŋnkáʼə.

⁹Pɨ pə́ nə ńchî nə́ á mbi, pópə pi pə́ nə̈ ńdzoŋ nə́ á ndzəm pó tíʼə ə́sóŋə ńgə́, “Osana! Mbwɔ́dnə ə́ chîə á mbô yí páʼə a yǐ nə́ nə́ əlɛ́n Mmaʼmbîə!

¹⁰Mbwɔ́dnə ə́ chîə á mə́mə Anuə Nəfoonə tǎ əwəg Debid páʼə á yǐ nə́ yǐəə. Osana á mbô Əsê páʼə a ŋáŋnə nə́ ńtsɛɛlə̂ ajúmə atsəmə!”

¹¹Yeso a kwúnə Jɛlusalɛm ńgɛnə̂ á Tə́kɔʼndɛ̂sê ńnáŋə ajúmə atsəm ńdíblə. Ndzaŋə ándó ndɛd nə ḿbɛ́d nə́ tə ńdaŋ lə́, pópə ngaŋə́zoŋə́ndzəm əjí zə̂ ntsɔb pɛ̌ ə́ fɛ́d ńgɛnə̂ Bɛtaniə.

¹²Mbî ə́ nə ə́fóg pó tə́ ə́fɛ́lə Bɛtani lə́ nji ə́ tə́ ńdzáŋə Yeso.

¹³A tə́əmə á ndi yi sɛ ḿmaʼ əmə́g mí ńdzə́ənə atǐə figə á pə́ tsɔʼə məfǔ məfǔə. A tíʼ ńgɛnə̂ á nətɛ́n ə́wə́ á mə́ náŋ nə́ ńgə́ á lɛ ńdzə́mə. Ndzaŋə a nə ńgyǐ nə́ tə ńkoʼə̂ á nətɛ́n wɨ́ lə́, ńdzə́ənə pə́ məfǔ ńté ńgə́ lə́ nə ńkě ndɛd páʼ pəfig pə́ zə́m nə́ pô.

¹⁴Yeso a tíʼ ə́sóŋə á mbô atǐə fig zə̂ ńgə́, “Ŋwu tsə̌ a láʼ kě mənta mô pɨ jî pô.” Ngaŋə́zoŋə́ndzəm əjí ə́ zóʼ ndzaŋə a sóŋ nə́.

¹⁵Ndzaŋ pó nə ńkoʼ nə́ á Jɛlusalɛm lə́, Yeso a kwúnə Tə́kɔʼndɛ̂sê, ńchúʼə á mə́ kəm nə́ pɨ pó nə̈ ńjú nə́ ńkə́ fi əpú ə́wə́. Ńchǐ pətəpɛlə pə́ ngaŋə́kwúblə́nkéebə pópə əkɔʼ ngaŋə́finə́lúʼə ḿmaʼə̂ á əsê.

¹⁶Ńkě pí ńgə́ ŋwu tsə̌ a peʼə̂ ajûtsə́ ńkwú ńdaŋ nə́ zə́ələ́ á Tə́kɔʼndɛ̂sê pô.

¹⁷Ndzaŋə a nə ńtə́ nə́ ńdzéʼkə ághɔ́b lə́, ə́sóŋ nə́ pó ńgə́, “Pə́ ŋwaʼlə̂ ńgə́, ‘Pə́ yǒ fóŋ ndɛ̂ mə lə́ nə́ ndɛ̂ achaʼtə́sê á mə́m ətú ətsəmə.’ Nə́ pɛn ńtíʼ ńdɔg ńgɛlə̂ pə́ nəlyaŋnə́ nə́ pəzə̌ ə́wə́!”

¹⁸Pətə́kɔʼ pə́ ngaŋə́pêsê pópə ngaŋə́zéʼkə pənoŋkə ə́ zóʼə atsáb jɨ́d jɨ ńtíʼə ńdɔ ndúmə á mə́ jwítə nə́ yí, lə́ ḿbə́ ḿbɔ́gə yí ńté ńgə́ ndzeʼkə́ əjǐ ə́ nə ńkɨʼnə̂ ŋwu məsɔŋ ntsəmə.

¹⁹Ndɛd nkwanə́ ə́ yǐ ńkoʼ, Yeso pópə ngaŋə́zoŋə́ndzəm əjí ə́ fɛ́lə Jɛlusalɛmə.

²⁰A yǒ ḿbə́ məsânə, pó tə́ ńdaŋə̂ ńdzə́ənə atǐə fig zə̂ á júm tə ńtsó əfɛ̂ nə́ məŋaŋə́.

²¹Pita a kwúmtə anu páʼə á nə ńdaŋ nə́ ńtíʼ ə́sóŋ nə́ Yeso ńgə́, “Ndzéʼkə, náŋə! Atǐə fig zə̂ páʼ gho nə ńdɔʼ nə́ lə́ á júmə!”

²²Yeso a kwěe ńgə́, “Túg nə́ mbimə́ nə́ Əsê.

²³Mäŋ fiʼtə̂ áwɨ́ nə́ ndə̌ŋdəŋ ńgə́ mbɔʼ ŋwunə a sóŋ nə́ nkwəənə ghɛn ńgə́, Ghɛn ḿmaʼ mbɨ əzo á mə́m nə́ənə, atûə ajíə á chî koʼlə̂ pô, a túg mbimə́ ńgə́ anu páʼə ä sóŋ nə́ lə́ á yǐ lɔgə̂ aliʼ, pə́ faʼə̂ zə́ələ́ á mbô yə́.

²⁴Ńdaŋ ə́lɨ́d maŋ fiʼtə̂ áwɨ́ ńgə́ anuə atsəm páʼ gho pítə nə́ á mə́mə achaʼtə́sê, túg mbimə́ ńgə́ gho pɛ́dtə ńtúgə zə́ələ́, á yǐ pə́ azô.

²⁵Mbɔʼ gho kə́ ńtɨ́ ńtə́ ńchaʼtə́sê ńtúgə anu yətsə́ á ntɨ́ gho ńté ŋwu tsə̌, gho ləgnə̂ fankə əyǐ, ńjî ńgə́ Tǎ gho á nəpóolə a yǐ ńkə́ ńdəgnə̂ pəpô pətəpɔŋə.” [8]

²⁷Pó pɨ ńkə́ ḿbəənə̂ á Jɛlusalɛm, ndzaŋə ándó Yeso a ńtə́ nə́ ńnyinə̂ á mə́m Tə́kɔʼndɛ̂sê lə́, pətə́kɔʼ pə́ ngaŋə́pêsê pópə ngaŋə́zéʼkə pənoŋkə ḿbá mətû mə́ aláʼ mə́ yǐəə á mbô yí

²⁸ḿbítə yí ńgə́, “Ghö lɔgə̂ mətɨ lə́ ə́fó ə́faʼə̂ mənu mɨ ə́wə́? Mətɨ mimə wə́ á mbô gho lə́ ə́fɛ̂ əwə ńgə́ gho faʼ mənu mimə wɨ́ ə́wə́?”

²⁹Yeso a kwěe ńgə́, “Maŋ yǐ pítə áwɨ́ tsɔʼə nə́ táʼə apítə, mbɔʼ nə́ kwěe mə, tə ḿbə́ maŋ yǐ kə́ ə́fiʼtə̂ áwɨ́ nə́ aliʼ mäŋ lɔg nə́ mətɨ ə́wɨ́ ə́faʼə̂ mənu məənə́.

³⁰Fiʼtə̂ nə́ mə, Akwáalə́nkǐə Jɔnə á kə́ lǒo lə́ á nəpó kəənə á mbô ŋwu mbîə?”

³¹Pó tíʼ ńtsəmnə̂ á tətɨ pó ə́sóŋ ńgə́, “Mbɔʼ pɛn sóŋ ńgə́ á kə́ fɛ́d lə́ á nəpó tə ḿbə́ a yǐ pítə áwɛ́n ńgə́, akə̂ á nə́ ḿbə́ ńgɛd pɛn kě anu páʼə a nə̈ ə́sóŋ nə́ pímə?”

³²Kɨ mbɔʼ pɛn sóŋə pə́ ńgə́, “á lǒo lə́ á mbô ŋwu mbî?” (Pó nə ńtə́ ḿbɔ́gə pəənə, ńté ńgə́ ŋwu ntsəmə a nə ńdɔg ńgə́ Jɔnə a nə ḿbyádnə ḿbə́ lə́ Ntûsê.)

³³Pó tíʼ ńkwěe Yeso ńgə́, “Pəg kě jî pô.” Yeso a tíʼ ə́sóŋ ńgə́, “Maŋ kě áwɨ́ yǐ kə́ fiʼtə̂ nə́ aliʼ mäŋ lɔg nə́ mətɨ ə́wɨ́ ə́faʼə̂ mənu mɨ ə́wɨ́ pô.”