Read Awing Magə 13 Bible Online

Magə 13 - Awing bible

Magə 13

¹Əghâ ándó Yeso a nə ńtə́ nə́ ə́fɛ́lə á mə́m Tə́kɔʼndɛ̂sê lə́, táʼ ndzoŋdzəm əyǐ yitsə̌ a sóŋ nə́ yí ńgə́, “Ndzéʼkə, zə́ənə! Jɨ́ əshwi məngɔʼ mətsə́! Jɨ́ əshwi məláʼ mətsə́!”

²Yeso a kwěe ńgə́, “Gho jɨ́ pəmɛ́ pə́ məláʼ mɨ tsɔʼə mətsəm? Tsɔʼə táʼ ngɔʼə á láʼ kě á ndu yitsə̌ noŋnə̂ pô. Pə́ yǒ kwɛlə̂ ajúmə atsəmə á əsê.”

³Ndzaŋə ándó Yeso a nə ńnáanə nə́ á ndu Nkwəənə Olifə páʼ wɨ́d ə́ nə ńtə́ nə́ ńnáŋə Tə́kɔʼndɛ̂sê lə́, Pita pó Jɛmsə nə́ Jɔn ḿbéenə Andəlu pó yǐ ḿbítə yə á ndzəmə á ndzəm ńgə́,

⁴“Fiʼtə̂ áwə́g nə́ ndɛd páʼ ndɛn mənu ghɛn ətsəm ə́ yǒ nə́ lɔgə̂ aliʼə́, ńkə́ fiʼtə̂ áwə́g nə́ akyeʼə́nu á yǒ nə́ nɨd ńgə́ ndɛd ə́ koʼ nə́ mənu məənə́ á mə́ lɔg nə́ aliʼə́.”

⁵Yeso a kwěe ághɔ́b ńgə́, “Lɔg nə́ ndɛd ńgə́ kɔ ŋwu tsə̌ a fɨgə̂ áwə́ənə́.

⁶Pɨ pi nɨ́ nə́ pə́ yǒ yǐ nə́ əlɛ́nə mə ə́sóŋə ńgə́, ‘Maŋ lə́ yə́,’ ə́ tíʼ fɨg pɨ pi nɨ́ nə́.

⁷Mbɔʼ nə́ zóʼə anu ńté məntso ḿbɨ ḿbə́ nə́ ndzaŋə ándó pɨ pə̈ tsáb nə́ ńté məntso, kɔ nə́ pɔ́gə. Ndɛn mənu wɨ́d ghɛn ə́ chîə á mə́ lɔg nə́ aliʼə́, lə́ ndwegtə ə́ pə́ ḿbɛ́d pɔŋə̂ yǐəə.

⁸Aláʼə á yǒ lǒo á əsê sɔb məsɔŋə́ á ndzəm yətsə́, aláʼ páʼ əfo ä sáʼ nə́ á lǒo á əsê ə́sɔb məsɔŋə́ á ndzəm yətsə́: Ndəsê ə́ chiʼnə̂ aliʼə́ aliʼə́, nji ə́ gháʼə. Ndɛn mənu ghɛn ətsəm ə́ ghɛd chî lə́ tsɔʼə ándó məngyě nəpəmə a zóʼə móonə.”

⁹Nə́ shib ńdɔg ndɛlə. Pə́ yǒ waamə̂ áwɨ́ ə́fɛ̂ á mbô ngaŋə́sáʼə́məsáʼ pə́ ə́shúmə áwə́ənə́ á mə́m məláʼ mə́ Əsê mə́ Pəjusə. Nə́ yǒ tə́əmə á mbi pəgɔ́bnɔ pópə Pəfo ə́ té mə á mə́ náŋkə nə́ nkɨ yi əshîʼnə á mbô pó.

¹⁰Pə pə́ ə́shib ḿbeg ə́sóŋə anǔəsê á mbô əláʼ ətsəmə.

¹¹Mbɔʼ pə́ ghɛd ńgwaamə̂ áwɨ́ ńgɛn nə́ pəənə́ á mbô ngaŋə́sáʼə́məsáʼ, kɔ nə jwaʼ mbɨ əjɨ záʼ ndɛd ə́ pɔŋə̂ koʼ nə́ anu pɨ yǐ nə́ ghɛn sóŋə. Mbɔʼ ndɛd yi wɨ́ ə́ ghɛd ńkoʼ, nə sóŋə anuə atsəm páʼ Əsê a fiʼtə̂ nə́ áwə́ənə́. Ńté ńgə́ lə́ yǒ kě pɨ tséebə pô, lə́ yǒ tséebə Ajwǐəsê.

¹²Pɨ pə́ yǒ fi pəlim pɔ́b ńgə́ pə jwítə, tǎ a kə́ ə́fɛ̂ mɔ́ əyǐ ńgə́ pə jwítə. Pɔ́ pə́ yǒ sɔb məsɔŋə́ á ndzəm pətǎ pɔ́b pópə pəmǎ pɔ́b ə́ ghɛd pə jwítə ághóobə́.

¹³Ŋwu ntsəmə a yǒ peenə̂ áwɨ́ ə́ té mə. Lə́ ŋwu ntsəm páʼə a tɨ́ nə́ ńtyantə̂ tə ńkoʼə̂ á ndwegtə, a yǒ chwáalə.

¹⁴Mbɔʼ nə́ yǒ ńdzə́ənə ajúmə təpɔŋ páʼ Əsê a pa nə́ a tə́əmə aliʼ páʼ a pěʼ nə́ ńkě chîə á mə́ tɨ́ nə́ ə́wɨ́ pô, (tíʼ ŋwu ntsəm páʼə a tə́ nə́ ə́fóŋə, atûə ajíə á léenə), pɨ pó chî nə́ á Judya pó tíʼ ńkə ndə̌ ńgɛnə̂ məŋnkwəənə.

¹⁵Ŋwunə a chî nə́ atûndɛ̂ kɔ a tsóolə á ndəsê kɨ ńkwúnə á ndɛ̂ yə́ á mə́ lɔg nə́ ajûtsə́

¹⁶Ŋwunə a chî nə́ afoonə, kɔ a pɨ ḿbəənə̂ á mə́ lɔg nə́ kód əyǐə.

¹⁷Əlě pə wɨ́ ə́ yǒ tyantə̂ á mbô pəngyě pə́ nəpəm pópə pəngyě pə́ tə́ nə́ ńnɔ́ŋkə!

¹⁸Tə́ nə́ ńchaʼtə́sê ńgə́ kɔ mənu mɨ́d mɨ mə́ yǐ ńtégə áwə́ənə́ á əghâ əfə́gə.

¹⁹Ńté ńgə́ ngə́ʼ əlě pə wɨ́ ə́ yǒ chaanə̂ tə tsɛ ngə́ʼ ntsəm páʼ ə́ nə ḿbɛ́d nə́ tə ńchîə á mbîə ə́fɛ́lə nəchwaakənə́ Əsê a nə ńtsoŋkə̂ nə́ mbî tə ńkoʼə̂ əghâ nə́. Yitsə̌ ngə́ʼ ə́ láʼ kě ándó yi wɨ́ kə́ pɨ chî pô.

²⁰Mbɔʼ Əsê a nə ńchî əlě pə wɨ́ lə́g pô tə ḿbə́ ŋwu tsə̌ a ghɛd ńkě chwád pô. A pɛn ńdə́g əlě pə wɨ́ ńté pɨ pí páʼə a tsɔ́ʼ nə́.

²¹A yǒ ḿbə́ nə́ ndɛd yi wɨ́ ŋwu tsə̌ a yǐ ə́sóŋə á mbô pɨ ńgə́, “Náŋ nə́, Nchwádkə yi wə́ a ghɛnə́ kɨ ńgə́ a yǐəə, kɔ nə pímə atséebə ajíə.

²²Ńté ńgə́ pənchwádkə pə́ məfɨg pópə məntúmə́sê mə́ məfɨg, mə́ yǒ yǐ ghɛd əkyeʼmə́nu pópə əkɨʼnəmə́nu á mə́ fɨg nə́ pɨ páʼ Əsê a tsɔ́ʼ nə páʼ təmbɔʼ ndu ə́ chî ə́wə́.

²³Lə́ələ́ pə́ ńgə́ nə́ lɔg ndɛlə́! Maŋ fiʼtə̂ áwɨ́ nə́ anuə atsəm záʼ ndɛd ə́ pɔŋə̂ koʼə̂.”

²⁴Nə́ əlě pə wɨ́ páʼ ngə́ʼ yi wɨ́ ə́ laŋ nə́ lə́, mə́numə á yǒ sɛ́nə, sáŋə á kě nkyaʼ pɨ fɛ̂ pô,

²⁵pɔ́ pə́ sáŋ pə lǒo á nəpó ńgwukə̂ ndəsê, pə́ kə́ ńchiʼ mətɨ mə́ nəpóolə.

²⁶Əghâ yi wɨ́ lə́, pɨ pə́ zə́ənə Mɔ́ Ŋwunə a tə́ ńgyǐəə á mə́mə alə́m nə́ mətɨ mə weŋ pó nəgháʼə.

²⁷A yǒ tú pətseŋpə́ndɛ̂ pí á mə́m məlá mə́ mbî mə̂ nəkwa, pó ghɛn nkyeetə pɨ páʼ Əsê a tsɔ́ʼ nə́ ə́fɛ́d nə́ táʼ əlá mbî ńgɛn ńkoʼ nə́ yitsə̌.

²⁸Əghâ nə́, zéʼ nə́ anu zəənə́ á mbô atǐə figə. Mbɔʼ nə́ jɨ́ məntá mí mə́ tə́ ńtô ə́fógə məfǔ mimə fî, nə́ jî ńgə́ məgheemə́ a tə́ ńkwə̂.

²⁹Mbɔʼ nə́ kə́ ńjɨ́ ndɛn mənu wɨ́d ghɛn ə́ tə́ ńdɔgə̂ aliʼ, nə́ jî ńgə́ ndɛd ə́ páatə tə ńtə́əmə á ntsoolə́poʼə.

³⁰Mäŋ fiʼtə̂ áwɨ́ nə́ ndə̌ŋdəŋ ńgə́ pɨ pə́ ngoʼ pɨ pə́ yǒ kě pətsəm kwû záʼ ndɛn mənu ghɛn ə́ pɔŋə̂ lɔgə̂ aliʼ pô.

³¹Nəpó pó ndəsê ə́ yǒ laŋə̂, lə́ atséebə mə á pə́ ńkě laŋ pô.

³²“Ŋwu tsə̌ a kě alě yə wɨ́ kɨ ndɛd yi wɨ́ jî pô. Alǒ pətseŋpə́ndɛ́pə́sê á nəpó kɨ Mɔ́ Əsê, pó kě jî pô, tə ńdéʼtə Tǎ páʼə a jî nə́.

³³Lɔg nə́ ndɛlə́! Chî nə́ atǐ ńtə́ ḿbyáabə!.[9] Ńté ńgə́ nə́ kě jî əghâ páʼ ndɛd yi wɨ́ ə́ yǐ nə́ yǐ pô.

³⁴Á chî lə́ ándó ŋwunə a tə́ ńgɛnə̂ nənyi ḿmɛdtə̂ ndɛ̂ əjǐə á mbô ngaŋə́faʼ əjí ə́fiʼtə̂ ŋwu ntsəm nə́ anuə a tə́ faʼə̂. Ńtíʼ ə́sóŋ nə́ mbyáb nchîndɛ̂ ńgə́ a tə́ ḿbyáb əliʼə́.

³⁵Lə́ələ́ pə́ ńgə́, tə́ nə́ ḿbyáabə, ńté ńgə́ nə́ kě jî ndɛd páʼ ngaŋnchîndɛ̂ a yǐ nə́ kwə̂ pô, kəənə á ndɛd nkwanə́, kəənə á ntɨ̌túʼ, kəənə á ndú mbî, kəənə á məsânə.

³⁶Mbɔʼ a ghabkə̂ ńkwə̂, kɔ a yǐ ńtégə gho gho tə́ ńdê.

³⁷Anu maŋ sóŋ nə́ á mbô pɨ, mäŋ sóŋə lə́ á mbô ŋwu ntsəm ńgə́: pyáb nə́.”