Read Awing Magə 14 Bible Online

Magə 14 - Awing bible

Magə 14

¹Lə́ nə ḿbɛ́d tsɔʼə əlě pɛ̌ záʼ, alě Ndzáʼkə pó alě jîə apéenə məkálə́ tə mbê á pɔŋə́ koʼə̂. Pətə́kɔʼ pə́ ngaŋə́pêsê pópə ngaŋə́zéʼkə Pənoŋkə ə́ kə́ tə ńnáŋ ndúmə á mə́ pánə nə́ waamə̂ Yeso á ndzəmə á ndzəm ə́ jwítə yə́.

²Ńtíʼ ə́sóŋ ńgə́, “Lə́ kɔ pɛn waamə̂ yə́ pə́ nə́ alě akɔŋtə tə ḿbə́ pɨ pə́ yǐ yɛ́ɛlə.”

³Əghâ ándó Yeso a nə ńchî nə́ á Bɛtani á ndɛ̂ ŋwu tsə̌ pə́ nə̈ ə́fóŋ nə́ nə́ Saamun ngaŋnkaʼ ńtə́ ńjîə məjî lə́. Məngyě yitsə̌ a yǐəə á mbô yí nə́ ntsə́ŋ məghɔ́d mə́ zɔ́ʼə akwub mimə́ azagə́ yə əshîʼnə páʼ pə́ nə̈ ńtsoŋkə̂ nə́ chigə nə́ nad páʼ ndɛn nkáb əyí nə ńnɨ́ nə́. A yǐ ə́sá ntsə́ŋ zə̂ ńkwɛd məghɔ́d mimə wə̂ á atû Yeso.

⁴Pɨ pətsə́ pə́ nə ńchî nə́ aliʼ yi wɨ́ pə́ nə ńdzáŋ ndě ńtíʼə ńtséebə á tətɨ pó ə́sóŋə ńgə́, “Pə́ chígə́ ńtə́mə́sɛ́ nə́ məghɔ́d mə́ azagə́ yə əshîʼnə mɨ lə́ ńgə́ akə̂?

⁵Mbɔʼ pə́ pěʼ ə́fi ńdaŋ nkáb əpa teelə́ ə́fɛ̂ á mbô pəpóŋə!” Pó tíʼ ə́sáʼə məngyě yi wə́.[10]

⁶Lə́ Yeso a pə́ ə́sóŋ ńgə́, “Mɛdtə̂ nə́ yə́, nə́ lánə ńjwaʼə̂ yí lə́ ńgə́ akə̂? A ghɛd lə́ anu yə əshîʼnə á mbô maŋə.

⁷Pɨ̌pə pəpóŋ ə́ yǒ zá ə́ chîə, əghâ ətsəm nə́ kɔŋ nə́ á mə́ kwá nə́ ághɔ́b, nə́ kwáalə. Lə́ maŋ yǒ kě pɛn əghâ ətsəm zá chîə pô.

⁸A faʼ lə́ anu páʼ təmbɔʼ a faʼə̂; A zaŋkə̂ ńkwɛd məghɔ́d mə́ azagə́ yə əshîʼnə á mbɨ maŋ lə́ ńjî ńgə́ a tsoŋkə̂ mə záʼ pə́ pɔŋə́ twə́ŋə.

⁹Mäŋ fiʼtə̂ áwɨ́ nə́ ndə̌ŋdəŋ ńgə́ aliʼə́ atsəm pə́ yǒ nə́ ə́sóŋə Anǔəsê ə́wə́ á mə́m mbî ntsəm, anu páʼə a ghɛd nə́ lə́ pə́ yǒ kə́ sóŋə ájɨ́d lɔgə̂ kwúmtə yí ə́wə́.”

¹⁰Juda Iskaliɔt, táʼə á mə́m ngaŋə́zoŋə́ndzəm Yeso zə̂ ntsɔb pɛ̌ a tíʼ ńgɛnə̂ á mbô pətə́kɔʼ pə́ ngaŋə́pêsê á mə́ fi nə́ Yeso á mbô pó.

¹¹Mbɨ əzɔb ə́ nə ńchígə́ ḿbɔŋ ndzaŋ pó nə ńdzóʼ nə anu yə wɨ́ ńtíʼ ńdaʼnə̂ yí ńgə́ pó yǐ fɛ̂ nkáb nə́ yə́. Juda a tíʼ ńchúʼə á mə́ náŋ nə́ alaŋə́sêndú yə əshîʼnə á mə́ fi nə́ Yeso.

¹²A nə ḿbə́ á ntsɛɛmbiə alě akɔ́lə́péenə məkálə́ yə tə́ mbê lə́, alě páʼ pə́ nə̈ ńgwad nə́ pɔ́ pə́ mbéŋ pə́ ndzɛd pə́ Ndzáʼkə lə́, ngaŋə́zoŋə́ndzəm Yeso pó pítə yí ńgə́, “Gho kwaŋ ńgə́ mbɔʼ pəg ghɛn ńtsoŋkə̂ aliʼ mbɔʼ gho jî məjî mə́ Ndzáʼkə ə́wɨ́ lə́ ə́fó?”

¹³Yeso a tíʼ ńtú ngaŋə́zoŋə́ndzəm əjí zɛ́n pɛ̌ ə́sóŋ nə́ pó ńgə́, “Ghɛn nə́ á mə́mə aláʼə, ŋwu tsə̌ páʼə a pěʼ nə́ nkǐə á mə́mə ambáŋə́ a yǐ tégə áwə́ənə́, zoŋ nə́ yí

¹⁴ńgɛn ńkwúnə á ndɛ̂ páʼə a kwú nə́ ə́wɨ́ ńtíʼ ə́sóŋ nə́ ngaŋndɛ̂ ńgə́: Ndzéʼkə a pítə ńgə́ atɔ́gə ndɛ̂ páʼ pópə ngaŋə́zoŋə́ndzəm əjí ə́ yǐ nə́ jî məjî mə́ Ndzáʼkə ə́wɨ́ lə́ á ə́fó lə́?

¹⁵A yǐ tíʼ ńnəələ̂ áwɨ́ nə́ tə́kɔʼ atɔ́gə ndɛ̂ yitsə̌ atǐ páʼ pə́ tsoŋkə̂ nə́ áwɨ́d tə á koʼə̂. Tyáŋtə nə́ əliʼ ə́wə́ á mbô pɛnə̂.”

¹⁶Ngaŋə́zoŋə́ndzəm əjí zə̂ ə́ ghɛn ńkwúnə á mə́mə aláʼ ńkə́ ńdzə́ənə anuə atsəm tsɔʼə ndzaŋ páʼ Yeso a pěʼ nə́ ə́sóŋ nə́ pó lə̂. Ńtíʼ ńtsoŋkə̂ məjî mə́ Ndzáʼkə mə̂ ə́wə́.

¹⁷Á yǐ ḿbə́ ndɛd nkwanə́ Yeso pópə ngaŋə́zoŋə́ndzəm əjí ə́ yǐəə.

¹⁸Əghâ pó nə ńnáanə nə́ á ndu təpɛlə ńtə́ ńjîə məjî lə́, Yeso a sóŋ ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́ táʼ ŋwu əwɨ yitsə̌ a yǐ finə̂ mə, yi pəg yí tə́ nə́ ńjîə məjîə.”

¹⁹Anu yəwə́ á nə ńjwaʼ ngaŋə́zoŋə́ndzəm əjí lɛ tə, pó tíʼə ḿbítə yí táʼ táʼ ńgə́, “Maŋ kwaŋ ńgə́ gho kě lə́ mə sóŋə pô, kɨ lə́ maŋ lóo?”

²⁰Yeso a kwěe ńgə́, “Lə́ yǐ pə́ táʼ ŋwunə á mə́m pɨ ghɛn ntsɔb pɛ̌, ŋwu pəg yí tə́ nə́ ńtsɛnə̂ apéenə məkálə́ á mə́m táʼə akáŋə.

²¹Mɔ́ Ŋwunə a yǐ kwû tsɔʼə ndzaŋ páʼə aŋwaʼlə Əsê á sóŋ nə́ ńté yə́, lə́ ndɔ ə́ pə́ ńchîə atû ŋwu wə̂ páʼə a fi nə́ Mɔ́ Ŋwu lə̂. A kə pěʼ ḿbɔŋə̂ á mbô yí ńgə́ kɔ pə́ pěʼ ńkwéʼnə mbîə yí pî nə́!”

²²Əghâ ándó pó nə́ ńtə́ nə́ ńjîə məjî lə́, Yeso a pyáanə apá, əfɛ̂ ndǎ á mbô Əsê, ḿbagtə̂ zɨ́d ńtíʼ ə́fɛ̂ á mbô ngaŋə́zoŋə́ndzəm əjí ə́sóŋ ńgə́, “Ko nə́ zə́ələ́! Lɛ̌ na mbəəmə mə.”

²³Ńtíʼ ńtwám ndɔ́ŋ, ə́fɛ̂ ndǎ á mbô Əsê ə́fɛ̂ á mbô pó, pó pətsəm tíʼ ńnô.

²⁴A sóŋ ńgə́, “Lɛ̌ lə́ achǐə mə páʼ zə́ələ́ á wad nə́ əkeenə. [11] Páʼ pə́ kwɛd nə́ ájɨ́d ńté pɨ pi nɨ́ nə́.

²⁵Mäŋ fiʼtə̂ áwɨ́ nə́ ndə̌ŋdəŋ ńgə́ maŋ láʼ kě məloʼ mɨ pɨ nô pô, tə ə́ koʼə̂ alě páʼ maŋ láʼ nə́ ḿbɨ ńnô məloʼ mimə wɨ́ əfîfîə á mə́mə Anuə Nəfoonə Əsê.”

²⁶Pó tíʼ ńdzɔb nkǐ ə́fɛ́d ńgɛnə̂ á nkwəənə Olifə.

²⁷Yeso a sóŋə á mbô pó ńgə́, “Pɨ pətsəm ə́ yǐ kə́ mɛdtə̂ mə, ńté ńgə́ aŋwaʼlə Əsê á sóŋ ńgə́, ‘Maŋ yǐ jwítə ntseŋnə, məmbéŋ mə́ shamnə̂.’ [12]

²⁸Lə́ əghâ maŋ yǐ nə́ ńjúmnə á nəwû, maŋ yǐ kwá mbi əzɨ ə́ ghɛnə̂ Galiliə.”

²⁹Pita a sóŋ ńgə́, “Mbɔʼ ŋwu ntsəmə a kɔŋə̂ a kəələ̂, maŋ yǐ kě fiʼ pô.”

³⁰Yeso a kwěe ńgə́, “Mäŋ fiʼtə̂ gho nə́ ndə̌ŋdəŋ ńgə́ aŋkəʼə́ á yǐ jǐ tə́ tɔ́ŋə á nətúʼ ə́sɛ̂n ngǎ pɛ̌ lə́ gho sóŋ ngǎ teelə́ ńgə́ gho kě mə jî pô.”

³¹Pita a pə́ ḿbɨ ńněe ə́sóŋ ńgə́, “Mbɔʼ a pə́ pə́ ńgə́ pɔ̌ kwû, maŋ láʼ ńkě gho kǐ pô.” Ngaŋə́zoŋə́ndzəm əjí tsɔʼə ətsəm pó kə́ sóŋ tsɔʼə ə́lə́ələ́.

³²Pó yǐ ńkoʼə̂ aliʼ yitsə̌ pə́ fóŋ nə́ nə́ Gɛtsɛmani, Yeso a sóŋə á mbô ngaŋə́zoŋə́ndzəm əjí ńgə́, “Náanə nə́ aliʼə́ nə́ ńtíʼ maŋ chaʼtə́sê.”

³³Ńtíʼ ńdɔgə̂ Pita pó Jɛmsə nə́ Jɔn pó po ghɛnə̂, a chúʼə á mə́ tə́ nə́ fɨnə̂, á tûə ńjwaʼə̂ yə́.

³⁴A tíʼ ə́sóŋə á mbô pó ńgə́, “Afɨnə páʼə á chî nə́ á ntɨ́ maŋ á chaanə̂, nə́ ndu páʼ təmbɔʼ á jwítə mə. ‘Náanə nə́ aliʼə́ nə́ ńtə́ ḿbyáb əliʼə́.’

³⁵Ńtíʼ ńnyáʼ ńkwádtə ńgɛn ńnoŋnə̂ á ndəsê ńchaʼtə́sê ńgə́, mbɔʼ ndú ə́ chî ə́wɨ́ ndɛd ngə́ʼ jɨ ə́ laŋə̂ yi tsɔʼə tə ghə́ maŋ zə́ənə zə́ələ́.

³⁶Ə́sóŋə ńgə́, Aba!, Tǎ mə, Anuə atsəmə á pwɔ́dnə á mbô gho. Kwá ndɔ́ŋ ngə́ʼ zəənə́ á mbô maŋə. Lə́ kɔ á pə́ pə́ ndzaŋ maŋ kɔŋ nə́. Tíʼə a pə́ pə́ ndzaŋ páʼ gho kɔŋ nə́.”

³⁷A pɨ ńtíʼ ḿbəənə̂ á mbô ngaŋə́zoŋə́ndzəm əjí ńdzə́ənə ághɔ́b pó tə́ ńdê. A sóŋə á mbô Pita ńgə́, “Saamun, gho tə́ ńdê? Mbɔʼ gho kě chî tə lê nə́ mɔ́ akəmə ndɛd ńtə́ ḿbyáb əliʼ?”[13]

³⁸A tíʼ ə́sóŋə á mbô pó ńgə́, “Tə́ nə́ ḿbyáb əliʼ ńkə́ ńchaʼtə́sê ńgə́ kɔ nə́ yǐ ńgwǔəə á mə́mə akwaʼlə. Ajwiə á tə́ ńkɔŋə̂ lə́ na mbɨ ə́ pə́ ḿbóolə.”

³⁹Ngǎ yitsə̌, a kə́ ḿbɨ ńgɛn ńchaʼtə́sê ə́sóŋ tsɔʼə anu páʼə a pěʼ nə ə́sóŋ lə̂.

⁴⁰Ńtíʼ ḿbɨ ḿbəənə̂ á mbô ngaŋə́zoŋə́ndzəm əjí ńdzə́ənə ághɔ́b pó pɨ ńkə́ ńtə́ ńdê ńté ńgə́ pəlê á nə ńchîə á əmə́g pó. Pó tíʼ ńkě jîə anu mbɔʼ pó sóŋ nə́ yí pô.

⁴¹A nə ḿbɨ ńtə́ ḿbəənə̂ á mbô pó tə́ ńkoʼ ngǎ teelə́, ə́sóŋə á mbô pó ńgə́, “Nə tə́ ḿbɛ́lə ńdê ńtûə ńjwitə̂? Á koʼə̂. Ndɛd ə́ koʼə̂. Jɨ́ nə́, pə́ finə̂ Mɔ́ Ŋwunə á mbô ngaŋə́ghɛlə təpɔŋə.

⁴²Lǒo nə́ á əsê pɛn ghɛnə̂. Jɨ́ nə́, ŋwu páʼə a fi nə́ mə lə́, a ghɛnə́ a yǐ nə́ lɛ̌.”

⁴³Tsɔʼə ndzaŋ páʼ Yeso a nə ńtə́ nə́ ḿbɛ́lə ńtséebə lə́, Juda táʼ ŋwunə á mə́m ngaŋə́zoŋə́ndzəm əjí zə̂ ntsɔb pɛ̌ a jáʼ nə́ mboŋ pɨ páʼ pətə́kɔʼ pə́ ngaŋə́pêsê pópə ngaŋə́zéʼkə pənoŋkə nə́ mətû mə́ aláʼ mə́ nə ńtú nə́, pó túg məŋwíŋ pópə məmbaŋə.

⁴⁴Ŋwu páʼə a nə ə́fi nə́ Yeso lə́ a nə ə́fiʼtə̂ ághɔ́b nə́ akyeʼə́nu ńgə́, “Ŋwu maŋ yǐ nə́ ńchweg, nə́ jî ńgə́ lə́ ŋwu yi wə́; Wam nə́ yə́, ńtə́ ńgɛnə̂ nə́ yí, nə́ pyáabə yə́.”

⁴⁵Ndzaŋə ándó Juda a nə ńgyǐ nə́ lə́ ńtɔ́g ńgɛnə̂ á mbô Yeso ə́sóŋ ńgə́, “Ndzéʼkə!” ńchwegə̂ yə́.

⁴⁶Pɨ pə̂ pə́ tíʼ ńtɔ́g ńgɛn ńgwaamə̂ yə́.

⁴⁷Táʼ ŋwu tsə̌ páʼə a nə ńtɨ́ nə́ ḿbáatə aliʼ yəwə́ a sɔŋ ŋwíŋ əjǐ ńkə́ʼə ngaŋəfaʼ mbêsê yi ngweŋ ńdə́g nətôglə yə́.

⁴⁸Yeso a pítə ághɔ́b ńgə́, “Nə́ fɛ́lə á mə́ wam nə́ mə nə́ məŋwíŋ pópə məmbaŋə ándó nə́ fɛ́lə á mə́ wam nə́ pə́ ndzə̌?

⁴⁹Pɛn nə̈ ńchîə tsɔʼə əlě ətsəm maŋ zéʼkə á tə́kɔʼndɛ̂sê nə́ pə́ ńkě mə wam pô. Lə́ anu páʼə Aŋwaʼlə Əsê ä sóŋ nə́ á shib ńdɔgə̂ aliʼə́.”

⁵⁰Ngaŋə́zoŋə́ndzəm əjí tsɔʼə ətsəm ə́ tíʼ ḿmɛdtə̂ yí ńkəələ̂ ághóobə́.

⁵¹Mɔ̂nkə̂ nkaŋŋwu yitsə̌ páʼə a nə ńkě nə́ ajûtsə́ wê pô tə ńdéʼtə mɔ́ apagə atsəʼ yə əshîʼnə yətsə́ páʼə a nə ńgwáatə nə́ a nə ńtə́ ńdzoŋə̂ Yeso. Pə́ tə́ ńdoonə̂ á mə́ wam nə́ yə́,

⁵²lə́ a pə́ myaʼə̂ apagə atsəʼə́ ají zə̂ ńkə ntə̌blə.

⁵³Pó tíʼ ńdɔgə̂ Yeso ńgɛn nə́ yə á mbô Mbêsê yi Ngweŋə́. Pətə́kɔʼ pə́ ngaŋə́pêsê tsɔʼə pətsəm, ḿbá mətû mə́ aláʼ pópə ngaŋə́zéʼkə pənoŋkə ə́ tsɛntə̂ á aliʼə́ mɔʼə́.

⁵⁴Pita a zoŋə̂ yí ḿbə́ ńtə́əmə á pə́ á ndiə á ndiə tə́ ńgyǐ ńkwúnə á ntɔ́ʼ Mbêsê yi Ngweŋ, ńnáanə á nkaŋ móg pópə pɨ páʼ pə́ nə ńtə́ nə́ ḿbyáabə Tə́kɔʼndɛ̂sê ńtə́ ńdzɔ́gə mógə́.

⁵⁵Pətə́kɔʼ pə́ ngaŋə́pêsê pópə ngaŋə́sáʼə́məsáʼ tsɔʼə pətsəm tíʼə ńdɔ ndú ətsəm ńgə́ ŋwu tsə́ a sóŋə anu ńté Yeso mbɔʼ pó laŋ ə́wɨ́ ńjwítə yə́, ḿbə́ ńkě anu yətsə́ jɨ́ pô.

⁵⁶Pɨ pi nɨ́ nə́ pó nə ńnéŋ ntsəələ atû Yeso. Lə́ ətsáb əpɔ́b ə́ pə́ ńkě pímnə pô.

⁵⁷Pɨ pətsə́ pə́ tíʼ ńdǒ á əsê ńnéŋ ntsɨd zəənə́ atû yí ńgə́:

⁵⁸“Pəg nə ńdzóʼə a sóŋ ńgə́ a yǐ shaʼtə̂ Tə́kɔʼndɛ̂sê ghɛn páʼ pə́ nə ḿbɔ́ nə́ nə́ mbô lə́ á mə́m əlě teelə́ a pɨ ńkɔ́ʼkə yi ndaʼ páʼ pə́ kě nə́ lə́ nə́ mbô yǐ pɔ́ pô.”

⁵⁹Alǒ jɨ́d zəənə́ anu pó nə ə́sóŋ nə́ lə́, atséebə azóobə́ á pə́ ńkě kə́ ḿbɛ́d ḿbímnə pô.

⁶⁰Mbêsê yi Ngweŋə́ a tíʼ ńdǒo á əsê á mbi pó ḿbítə Yeso ńgə́, “Gho kě akwe yə ndaʼ túg nə́ anu jɨ pɨ pɨ pə̈ sóŋ nə́ ńté gho lɛ?”

⁶¹Lə́ Yeso a pə́ ńkə́ ńnaʼə̂ yí tsɔʼə naʼ nə́ ńkě anu yətsə́ kwěe pô. Mbêsê yi Ngweŋə́ a kə́ ḿbɨ ḿbítə yí ngǎ yitsə̌ ńgə́, “Gho lə́ Klisto, Mɔ́ Əsê páʼ pə́ ghóʼkə nə́ lə́?”

⁶²Yeso a kwěe ńgə́, “Maŋ lə́ yə́, Pɨ yǒ kə́ zə́ənə Mɔ́ Ŋwunə a náanə á əlá apô Əsê yə tɨ, Əsê páʼə a Tsɛ nə́ Ajúmə atsəm, ə́ tíʼə yǐəə á mə́mə alə́mə á nəpóolə.”

⁶³Mbêsê yi Ngweŋə́ a sɛɛtə̂ ətsəʼ əpí ńtíʼ ə́sóŋ ńgə́, “Pɛn pɨ ńtə́ ńdoonə̂ ńgə́ ŋwu tsə̌ a yǐ ńtɨ́ ə́sóŋə anu yətsə́?

⁶⁴Nə́ zóʼ ndzaŋ a zɔ nə́ Əsê. Nə́ kwaŋə̂ ajɨ́ ńgə́ akə̂?” Pó pətsəm lə́g əsáʼ əyí ńgə́ á koʼnə̂ ńgə́ pə jwítə yə́.

⁶⁵Pɨ pətsə́ pə́ tíʼ ńchúʼə á mə́ twǐ nə́ mətwê nə́ yə́, ńkwúd əshî əyí ńtíʼə ńkɔnə̂ yí ə́sóŋə nə́ yí ńgə́, “Sɛ̌ɛ ńgə́ á gho lə́ kɔn əwə lə́?” Ngaŋə́pyáabə Tə́kɔʼndɛ̂sê pó tíʼ ńdɔgə̂ yí ńgɛn ḿbóʼə yə́.

⁶⁶Pita a nə ḿbɛ́d ńnáanə á atətá á əlá mətoŋə́, táʼ ngaŋəfaʼ Mbêsê yi Ngweŋə́ yi məngyě yitsə̌ a tə́ ńdaŋə̂,

⁶⁷ńdzə́ənə Pita a náanə ńtə́ ńdzɔ́gə mógə́, a tsoŋkə̂ ńnáŋə yí ńtíʼ ə́sóŋ ńgə́: “Gho pěʼ ńkə́ ńchîə azô pɨ Yeso mɔ́ Nazalɛd wə̂.”

⁶⁸A pə́ ńkǐəə yə anu yə wɨ́ ə́sóŋ ńgə́, “Maŋ kě jî pô, atûə mə á kě kə́ ńdá nə́ anu páʼ gho sóŋ nə́ lə́ pô.” Ńtíʼ ńkɔ́ʼ ńgɛnə̂ yə́ á ntsoolə́poʼə.[14]

⁶⁹Mɔ̂ məngyě wə̂ a zə́ənə yí ńkə́ ḿbɨ ḿbégnə ə́sóŋə á mbô pɨ pə́ tɨ́ nə́ aliʼ yi wɨ́ ńgə́, “Lɛ̌ táʼ ŋwu əghɔ́b yitsə̌.”

⁷⁰A kə́ ḿbɨ ńkǐəə yí ngǎ yitsə̌. Tsɔʼə ngǎ pɛ̌, pɨ pó tɨ́ nə́ aliʼ yi wɨ́ pó sóŋə á mbô Pita ńgə́, “Gho shib ḿbə́ lə́ táʼ ŋwu əghɔb yitsə̌ ńté ńgə́ gho lə́ ŋwu Galiliə.”

⁷¹Pita a chúʼə á mə́ sóŋ nə́ ńgə́, “Maŋ kě ŋwu páʼ nə̈ sóŋ nə́ lə́ jî pô! Mbɔʼ á pə́ yǐ maŋ tsɨd nə́ lə́ ntsɨd, Əsê a néŋ ndoonə á atû maŋə.”

⁷²Tsɔʼə əghâ yi wɨ́, aŋkəʼə́ á kə́ ḿbɨ ńtɔ́ŋ ngǎ yitsə̌. Pita a tíʼ ńkwúmtə atsáb páʼ Yeso a pěʼ nə́ ə́sóŋə á mbô yí ńgə́, “Aŋkəʼə́ á yǐ jǐ tə́ tɔ́ŋ ngǎ pɛ̌ lə́ gho kǐəə mə ngǎ teelə́.” A wə́ʼtə ə́lɨ́d lə́ ńchúʼə nəkyéŋə.