Read Awing Magə 16 Bible Online

Magə 16 - Awing bible

Magə 16

¹Ndzaŋə ándó páʼə Alěláʼə́sê á nə ńdaŋ nə́ lə́, Mɛɛlə Magdalɛn pó Mɛɛlə mǎpə Jɛmsə, ḿbɨ ḿbə́ nə́ Salomɛ pó jú məghɔ́d mimə ləmkə̂ nə́ á mə́ ghɛn nə́ ə́zɔ́ʼə akwubə Yeso wə́.

²Chigə mɛ́ məsânə á ntsɛɛmbiə alě á mə́m ngeebə, á əsáʼmə́nu, pó ghɛnə̂ á nəse

³ńtíʼ ḿbítə məmbɨ mɔ́b ńgə́, “Əwə a yǐ kabkə̂ ngɔʼ zə̂ á ntso nəse ə́fɛ̂ nə́ pɛnə̂?”

⁴Əghâ ándó pó nə ńnáŋ nə́ atǐ lə́, pó nə ńjɨ́ ńgə́ ngɔʼ zə̂ páʼ ə́ nə ḿbyádnə nə́ fáŋ lə́, pə́ nə ńkabkə̂ zə́ələ́.

⁵Ndzaŋ pó nə ńkwú nə́ á mə́m nəse lə́, ńdzə́ənə mɔ́ nkaŋŋwu yitsə̌ a wê fúfúə atsəʼ ńnáanə á əlá yi təənə, pó tíʼ ḿbɔ́gə.

⁶A sóŋ nə́ pó ńgə́, “Kɔ nə́ pɔ́gə, Maŋ jî ńgə́ pɨ náŋə lə́ Yeso mɔ́ Nazalɛd páʼ pə́ nə ńkwumtə̂ nə́ yí lə́. A júmnə á nəwûə, a kě aliʼə́ nə́ chî pô, jɨ́ nə́ aliʼ páʼ pə́ nə ńnoŋkə̂ nə́ yí ə́wə́.

⁷Ghɛn nə́ ə́fiʼtə̂ ngaŋə́zoŋə́ndzəm əjí pópə Pita ńgə́, A chîə á mbi pɨ ńtə́ ńgɛnə̂ Galiliə. Nə́ yǐ zə́ənə yə́ aliʼ yi wɨ́ tsɔʼə ndzaŋ a nə ə́fiʼtə̂ nə́ áwɨ́ lə̂.”

⁸Pó tíʼ ə́fɛ́lə á mə́m nəse ńkəələ̂ ághóobə́, ńté ńgə́ pó nə́ ńtə́ ḿbɛ́nkə, á tûə ńkɨʼnə̂ ághóobə́. Pó nə ńkě anu yitsə̌ á mbô ŋwu tsə̌ sóŋ pô ńté ńgə́ pó nə ńtə́ ḿbɔ́gə.

⁹Ndzaŋ Yeso a nə ńjúmnə nə́ á nəwû lə́, á yǒ ḿbə́ á ntsɛɛmbiə alě á mə́m ngab, Yeso a nɨd mbɨ əjǐə á mbô Mɛɛlə Madalɛnə, páʼə a nə ńkəm nə́ pɛ̌sê pɛ́n asaambɛ̂ á mbɨ yí lə̂.

¹⁰A nə ńgɛn ə́fiʼtə̂ zə́ələ́ á mbô ngaŋmə́ko əjí páʼ pó nə̈ ńkyéŋ nə́ ńtûə ə́fɨnə̂.

¹¹Ndzaŋ pó nə ńdzóʼ nə́ ńgə́ Yeso a chîə á mbî tə a kə́ ńdzə́ənə yí lə́, pó nə ńkě pí pô.

¹²Zɨ́d zəənə́ anu á laŋ, Yeso a jáʼə á mbi pɨ pə̂ pə́ pɛ̌ nə́ ndzaŋ yi ndaʼə, á əghâ ándó pó nə ńchî nə́ á alaŋə́ ńtə́ ńgɛnə̂ aláʼə.

¹³Pó sɛdnə̂ ḿbɨ ə́fiʼtə̂ anu zəənə́ á mbô pətsə́ pəənə, pó pə́ ńkě pí pô.

¹⁴Tsɔʼə ngǎ pɛ̌, Yeso a jáʼə á mbi ngaŋə́zoŋə́ndzəm əjí zə̂ ntsɔb mɔʼə́ á əghâ ándó pó nə ńtə́ nə́ ńjîə məjîə. A sáʼə ághɔ́b ńté ńgə́ pó nə ńkě mbimə́ túg pô, ńkə́ ńkwúd məntɨ́ móobə́, ńkə́ ńkǐəə á mə́ pí nə́ nə́ pɨ páʼ pə́ nə ńjɨ́ nə́ yə́ a júmnə á nəwûə.

¹⁵A sóŋə á mbô pó ńgə́, “Ghɛn nə́ á mə́m mbî ntsəm ə́fiʼtə̂ nkɨ yi əshîʼnə ghɛnə́ á mbô ŋwu ntsəmə.

¹⁶Ŋwu ntsəm páʼə a túg nə́ mbimə́ ńkə́ ńkwá nkǐ, a yǒ chwáalə, lə́ ŋwu ntsəm páʼə a kě nə́ mbimə́ túg pô, pə́ yǒ tsaŋkə̂ yə́.

¹⁷Pɨ pə́ túg nə́ mbimə́ nə́ maŋ, pó yǒ túg əkyeʼmə́nu pəənə́, nə́ əlɛ́nə mə pó yǒ kəm əjwi təpɔŋə, pó yǒ tsáb ətsáb pəfîə;

¹⁸pó yǒ pyá mənó nə́ mbô móobə́, kɨ kə́ nô ndíʼ təpɔŋ ə́ kě anu yitsə̌ nə́ pó ghɛd pô, pó yǒ noŋkə̂ mbô móobə́ atû pəghɔ pó yáŋə.”

¹⁹Əghâ ándó Mmaʼmbî Yeso a nə ḿməgtə̂ nə́ á mə́ tsáb nə́ pó po lə́, Əsê a lɔgə̂ yí ńkɔ́ʼə á nəpó ńnáakə yə́ á əlá apô yí yə təənə.

²⁰Ngaŋə́zoŋə́ndzəm əjí pó tíʼ ə́fɛ́d ńgɛ̈n ə́sóŋə anǔəsê aliʼə́ atsəmə, Mmaʼmbîə ä tíʼə ə́faʼə̂ pó po, ńkə́ ńnɨd ńgə́ afaʼ páʼ pö faʼ nə́ lə́ pö faʼə̂ lə́ ndə̌ŋdəŋ ńté əkyeʼmə́nu páʼə a fɛ̂ nə́ á mbô pó. Amɛn.