Read Awing Magə 2 Bible Online

Magə 2 - Awing bible

Magə 2

¹Əlěmbî pətsə́ ə́ laŋ, Yeso a pɨ ḿbəənə̂ á Kapanawum, nkɨ ə́ nyinə̂ á mə́mə aláʼə atsəm ńgə́ a pɨ ńchîə aláʼə.

²Pɨ pə́ nɨ́ nə́ pə́ tíʼ ńgyǐ ńkyeetə̂ tə aliʼə́ á kě mə́m ndɛ̂ yi wɨ́ pɨ ńchî pô, tsɔʼə á ntsǒndɛ̂ yi wə́ apeŋ, aliʼə́ á nə ńkě ə́wɨ́ pɨ ḿbɛ́d pô. Yeso a tíʼ sóŋə Anǔəsê á mbô pó.

³Pɨ pətsə́ pɛ́n nəkwa pə́ peʼə̂ nkweglə yitsə̌ ńgyǐ nə́ yə́ á mbô Yeso.

⁴Ndzaŋə ándó ndú ə́ nə́ ńkě nə́ ə́wɨ́ chî təmbɔʼ pó ghɛn nə́ yi ńtégə Yeso, ńté ŋwu məsɔŋə́ á nə́ ńchî nə́ aliʼ yí wɨ́ lə́, pó kɔ́ʼə atûə nəloŋ nə́ ndɛ̂ ŋ́ŋáʼ ngɔ́lə atû Yeso, ńtíʼ ńtsóokə apaʼ páʼ nkweglə wə̂ a nə́ noŋnə̂ nə́ ə́wə́ á mbi Yeso.

⁵Yeso a jɨ́ mbimə́ əzɔb ńtíʼ sóŋ nə́ nkweglə wə̂ ńgə́, “Móonə mə, pə́ ləgnə̂ pətəpɔŋ pô.”

⁶Ngaŋə́zéʼkə pənoŋkə pətsə́ páʼ pó nə́ náanə nə́ aliʼ yi wɨ́ pó tíʼə ńkwaŋə̂ á məntɨ́ pó ńgə́,

⁷“Lə́ ghɛlə̂ akə̂ ŋwu nə́ a tséebə lɛ̌? Ä zɔmtə̂ lə́ Əsê! mbɔʼ əwə a ləgnə̂ pətəpɔŋ tə ńdéʼtə Əsê?”

⁸Tsɔʼə əghâ yi wɨ́ Yeso a jîə akwaŋə anuə á chî nə́ á məntɨ́ pó, ńtíʼ sóŋə á mbô pó ńgə́, “Lə́ ghɛlə̂ akə̂ nə́ kwaŋ mənu mɨ lɛ̌ á məntɨ́ pəənə́?

⁹Lə́ pwɔ́dnə zə́ənə́! á mə́ sóŋ nə́ á mbô nkweglə ńgə́, ‘Pə́ ləgnə̂ pətəpɔŋ pô,’ kəənə á mə́ sóŋ nə́ ńgə́, ‘Lǒo á əsê, ḿbyáanə mə́ta əgho ńnyinə̂?’ ”

¹⁰Maŋ yǐ nəələ̂ á mbô pɨ ńgə́, “Mɔ́ Ŋwunə a túg mətəənə á ndu mbiə á mə́ ləgnə̂ nə́ pətəpɔŋə.” Ńtíʼ ə́sóŋə á mbô nkweglə wə̂ ńgə́,

¹¹“Maŋ sóŋə á mbô gho, lǒo á əsê ḿbyáanə mə́ta əgho ńkwə̂ á nchîndɛ̂!”

¹²A lǒo á əsê, tsɔʼə əghâ yi ə́wɨ́, a pyáanə mə́ta əyǐ ńnyinə̂ á mbi pó pətsəmə; anu yə́ wə́ á nə́ ńkɨʼnə̂ ŋwu ntsəm pó tíʼə ŋ́ŋáŋkə Əsê ə́sóŋə ńgə́, “Pəg kě ntê anuə ándó zɨ kə́ zə́ənə pô.”

¹³Yeso a pɨ ḿbəənə̂ a nkaŋ əfooghɨ Galiliə, apoŋə ŋwu məsɔŋə́ a yǐəə á mbô yə́, a tíʼ ńchúʼə á mə́ zéʼkə nə́ ághóobə́.

¹⁴Ndzaŋə a nə ńtə́ nə́ ńnyinə̂ ńgɛnə̂ lə́, ńdzə́ənə Lebi mɔ́ Alfɔsə a náanə aliʼə́ kwáalə nchubə aláʼ yə́. Yeso a sóŋə á mbô yí ńgə́, “Zoŋə̂ mə” Lebi a lǒo á əsê ńdzoŋə̂ yə́.

¹⁵Əghâ ándó Yeso a nə́ ńtə́ nə́ ńjîə məjîə á ndɛ̂ Lebi lə́, ngaŋə́kwáalə́ nchubə aláʼ pópə ngaŋə́ghɛlə təpɔŋ tə nɨ́ ə́ nə ńtə́ ńjîə məjî pópə Yeso ḿbá ngaŋə́zoŋə́ndzəm əjíə, ńté ńgə́ pɨ pi nɨ́ nə́ pə́ nə ńdzoŋə̂ yə́.

¹⁶Ngaŋə́zéʼkə pənoŋkə pətsə́ páʼ pó nə́ ḿbə́ nə́ Pəfalasi ə́ jɨ́ ndzaŋ páʼ Yeso a nə ńtə́ nə́ ńjîə məjî pó ngaŋə́ghɛlə təpɔŋ ḿbá ngaŋə́kwáalə́ nchubə aláʼ lə́, ńtíʼ ḿbítə ngaŋə́zoŋə́ndzəm əjí ńgə́, “Lə́ ghɛlə̂ akə̂ a jîə məjî pópə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”

¹⁷Yeso a zóʼə atséebə azɔ́b ńtíʼ ńkwěe ághɔ́b ńgə́, “Pɨ páʼ pó tə́ nə́ ńtyantə̂ pə́ kě a ntsóʼ loonə̂ pô, lə́ loonə̂ pɨ páʼ pó tə́ nə́ ńgoonə̂. Maŋ kě yǐ lə́ á mə́ fóŋ nə́ pɨ pó tɨ́ nə́ ndə̌ŋdəŋ pô, maŋ yǐ lə́ á mə́ fóŋ nə́ ngaŋə́ghɛlə təpɔŋə.”

¹⁸Əghâ ándó ngaŋə́zoŋə́ndzəm Jɔn pó Pəfalasi ə́ nə ńtə́ nə́ ńgɛlə̂ Achaʼtə́sê nji lə́, pɨ pətsə́ pó yǐ ḿbítə Yeso ńgə́, “Lə́ ghɛlə̂ akə̂ ngaŋə́zoŋə́ndzəm Jɔn pópə ngaŋə́zoŋə́ndzəm Pəfalasi ə́ ghɛlə̂ achaʼtə́sênji, əzô ngaŋə́zoŋə́ndzəm pə́ ńkě ghɛlə̂ pô?”

¹⁹Yeso a kwěe ághɔ́b ńgə́, “Nə́ kwaŋ ńgə́ mbɔʼ ngaŋmə́ko tǎdndzɔʼə́ ghɛlə̂ achaʼtə́sênji páʼ tǎdndzɔʼə́ a chî nə́ pó po? Ndzaŋə ándó tǎdndzɔʼə́ a chî nə́ pó po lə́, təmbɔʼ pó kě ə́lɨ́d ghɛd pô.

²⁰Lə́, ndɛd yǒ koʼ páʼ pə́ yǒ nə́ kwáalə tǎdndzɔʼə́ á mbô pó, pó tíʼ ńgɛlə̂ achaʼtə́sênjiə.”

²¹“Ŋwu tsə́ a kě apagə atsəʼ yə fï lɔgə̂ ńtɛ̂ atsəʼ yə lɛn ə́wɨ́ pô, təmbɔʼ a ghɛd ə́lɨ́d, apagə atsəʼ yə fî zə́ a yǐ ńtsɔ́ʼnə yə́ á mə́mə atsəʼ yə lɛn zə́ mbɨ ḿbeg ngɔ́lə atsəʼ yə lɛn wə́ ə́ gháʼ ńtsɛɛlə̂ ándó wɨ́d nə ńchî nə́.

²²Ŋwu tsə́ a kě kə̈ ńtwáamə məloʼ mimə fî ńnéŋə á mə́m ngwub pə́ néŋ nə́ məloʼ ə́wɨ́ páʼ ə́ lɛn nə́ pô, mbɔʼ a ghɛd ə́lɨ́d məloʼ mimə wɨ́ mə́ yǐ sá ngwubə, ńtíʼ ńkwɛdnə̂, ngwub yi wɨ́ ə́ pə́gə zə́ələ́. Ngá, pə̈ néŋə məloʼ mimə fî lə́ á mə́m ngwub yi fîə.”

²³Á nə́ ḿbə́ Alěláʼə́sê yitsə̌ Yeso pópə ngaŋə́zoŋə́ndzəm əjí tə́ ńdaŋə̂ á mə́mə alíʼə ngəsáŋ yətsə́, ndzaŋə ándó ngaŋə́zoŋə́ndzəm əjí nə́ ńtə́ nə́ ńnyinə̂ á mbeelə́ lə́, ńchúʼə á mə́ lagtə̂ nə́ ətsoʼ ngəsáŋə́.

²⁴Pəfalasi pó sóŋə á mbô yí ńgə́, “Zə́ənə, lə́ ghɛlə̂ akə̂ ngaŋə́zoŋə́ndzəm əzô ə́ faʼə̂ anu páʼ á kě nə́ koʼnə̂ á mə́ faʼ nə́ Alěláʼsê pô?”

²⁵Yeso a kwěe ághɔ́b ńgə́, Nə́ kě kə́ fóŋə anu páʼ Debilə a nə́ ńgɛd nə́ əghâ páʼ nji nə́ ńdzáŋ nə́ yí pópə ngaŋə́ko əjí pó tə́ ńnáŋə məjîə á mə́ jî nə?

²⁶Á nə́ ḿbə́ ndɛd páʼ Abyata a nə́ ḿbə́ nə́ Mbêsê yi Ngweŋ lə́, Debilə a kwúnə á ndɛ̂sê ńtwáamə apéenə məkálə́ pə́ nə fɛ̂ nə́ á mbô Əsê ńkɔ́lə yə́, páʼ noŋkə á nə́ nɨd nə́ ńgə́ mbɔʼ lə́ kɔ́d tsɔʼə Mbêsê. Debilə a nə mbɛn ńjî tə ńtû ə́fɛ̂ yətsə́ á mbô ngaŋmə́ko əjíə.

²⁷Yeso a tíʼ ə́sóŋə á mbô pó ńgə́, “Pə́ nə́ ńtsoŋkə̂ Alěláʼə́sê lə́ a mbô ŋwunə, pə́ nə́ ńkě lə́ ŋwunə á mbô Alěláʼə́sê tsoŋkə̂ pô.

²⁸Lə́ələ́ pə́ ńgə́ Mɔ́ Ŋwu lə́ mmaʼmbî lə́, ńkə́ ḿbə́ lə́ yə alěláʼə́sê.”