Read Awing Magə 4 Bible Online

Magə 4 - Awing bible

Magə 4

¹Yeso a kə́ ḿbɨ ńchúʼə á mə́ zéʼkə nə́ á nkaŋ əfooghɨ Galiliə. Ŋwu məsɔŋə́ a nə ńtɨ́ nə́ ńdíblə yə́ a nə ńnɨ́ tə́shú tə a tíʼ ńkwú ńnáanə pə́ á mə́mə aŋkənúʼə́ á mə́m nkǐə, ŋwu ntsəmə a tíʼ ńtə́əmə á nkǎŋkǐə.

²A zéʼkə ághɔ́b nə́ mənu mimə nɨ́ nə́ nə́ ətsábnə́múʼə́. Ńdzéʼkə ághɔ́b ə́sóŋə ńgə́:

³“Jwə́ʼtə nə́! Ŋwu tsə̌ a nə ńdáʼ ńgɛnə̂ á mə́ pǐ nə́ əpú əpíə.

⁴Ndzaŋə a nə ńtə́ nə́ ḿmaʼ mbǐpú lə́, yitsə̌ ə́ wukə̂ á alaŋə́ pəsə́ŋ pə́ yǐ ḿbyá ńkɔ́lə ághóobə́.

⁵Yitsə̌ ə́ wukə̂ á ndu ngwúb aliʼ páʼ ndəsê ə́ nə ńkě nə́ ə́wɨ́ chî ńnɨ́ pô, ńdzaŋkə̂ ə́sáʼ ńté ńgə́ ndəsê ə́ nə ńkě shǐ pô.

⁶Lə́ əghâ ándó mə́numə á nə sáʼ nə́ lə́ ńtoonə̂ zə́ələ́, ə́ júmə ájɨ́d ńté ńgə́ məŋaŋ mí mə́ nə ńkě á əsê kwú pô.

⁷Yitsə̌ mbǐpú yi wɨ́ ə́ wukə̂ á mə́m məsɔbsoobə, məsɔbsɔb mə́ kɔ́ʼ ńkwúlə ájɨ́d ə́ kě mənta zə́m pô.

⁸Lə́ yitsə̌ mbǐpú ə́ pə́ ńgwǔəə á ndu ndəsê yi əshîʼnə, ə́sáʼ, ńkə́ ńdzə́m mənteemə́: yitsə̌ ə́ zə́m mbəm məghə́m mɛ́n mə́ teelə́, yitsə̌ ə́ zə́m mbəm məghə́m mɛ́n ntogə́, yitsə̌ ə́ zə́m mbəm nkɛlə́.”

⁹Yeso a tíʼ sóŋ ńgə́, “Ŋwu páʼ a túg nə́ mətôglə á mə́ zóʼ nə́ a zóʼə.”

¹⁰Əghâ ándó Yeso a nə ńchî nə́ á ngǎ yí, pɨ pətsə́ páʼ pə́ nə ńdzóʼ nə́ atséebə ají, pópə ngaŋə́zoŋə́ndzəm əjí ə́ yǐəə á mbô yí ḿbítə yí nə́ anu páʼ ətsábnə́múʼ pə́ ə̈ sóŋ nə́.

¹¹Yeso a fiʼtə̂ ághɔ́b ńgə́, “Pə́ fɛ̂ ajíənu nə́ pɨ mbɔʼ nə́ jî mənu mə́ nəlyaŋnə́ mətsəm ńté Anuə Nəfoonə Əsê,” Ńgɛn nə́ pɨ pə́ ndaʼ páʼ pó chî nə́ á apeŋ, pə́ sóŋə anuə atsəm nə́ pó lə́ nə́ ətsábnə́múʼə́,

¹²ńjî ńgə́, Mbɔʼ pó náŋə ḿbə́ ńkě jɨ́ pô, ńjwə́ʼtə, atûə azóobə́ á pə́ ńkě ə́wɨ́ lá pô. Tə ḿbə́ pó yǐ kwúblə pə́ ləgnə̂ pətəpɔŋ póobə́.

¹³Yeso a tíʼ ḿbítə ághɔ́b ńgə́, “Nə́ kě anu páʼ atséebə́nə́múʼ zəənə́ ä sóŋ nə́ jî? Nə́ yǒ pə́ tíʼ lǎa ə́lɛ́ pɔŋə̂ jîə atséebə́nə́múʼ yətsə́?

¹⁴Mbipú wə̂ a pǐ lə́ atséebə Əsê.

¹⁵Pɨ pətsə́ pə́ chî lə́ ándó mbǐpúmə á alaŋə́ páʼ pə́ pǐ nə́ atséebə Əsê ə́wə́. Ndzaŋə ándó pó kə́ nə́ ńgə́ zóʼə ájɨ́d lə́, Satanə a yǐ fógə atsáb yəwə́ á mə́m pó.

¹⁶Pətsə́ pɨ pə́ chî lə́ ándó mbǐpú pə́ maʼ nə́ á ndu ngwúbə, pó zóʼə atsáb yə wɨ́ ńtɔ́g ńdɔgə̂ ájɨ́d nə́ akɔŋtə.

¹⁷Lə́ ndzaŋ pó kě nə́ məŋaŋ túg pô lə́, ḿbí tsɔʼə nə́ mɔ́ akəmə ndɛlə́, á yǐ ḿbə́ əghâ páʼ ngə́ʼ ə́ yǐ nə́ á mbô pó kɨ pə́ tsaŋkə̂ ághɔ́b ńté atséebə Əsê lə́, pó zaŋkə̂ ńgwǔ ḿbɨ nə́ ndzəmə.

¹⁸Pətsə́ pɨ pó chî lə́ ándó mbǐpú pə́ pǐ nə́ á mə́m məsɔbsoobə. Lɛ̌ lə́ pɨ pə́ zóʼ nə́ atséebə Əsê,

¹⁹lə́ nətáŋ mbî, pópə afoʼə mbî, nə́ mə́ kɔŋ nə́ əpú mbî ə́ kwúlə ághɔ́b pó kě chî təmbɔʼ pó zə́m mənta pô.

²⁰Lə́ pətsə́ pɨ pə́ pə́ ńchî lə́ ándó mbǐpú pə́ maʼ nə́ á ndu ndəsê yi əshîʼnə. Pó zóʼə atséebə Əsê, ḿbímə ájɨ́d ńtíʼ ńdzə́m mənteemə́. Pətsə́ pə́ zə́m məghə́m mɛ́n mə́ teelə́, pətsə́ pə́ zə́m məghə́m mɛ́n ntogə́, pətsə́ pə́ zə́m nkɛlə́.”

²¹Yeso a ghɛn nə́ mbiə á mə́ sóŋ nə́ ńgə́, “Ŋwu tsə̌ a chî ə́wɨ́ mbɔʼ a yǐ nə́ lám ńkə́bkə áwɨ́d nə́ atsɛ̂káŋ kɨ ńnéŋə a ntɛ́n əkwu? A kě áwɨ́d lə́ á ndu nəchwɛ́d yǐ tə́g?

²²Anuə atsəm páʼ pə́ lyáŋ nə́, pə́ yǒ kyaʼə̂. Anuə atsəm pə́ kə́ nə́ ńkə́bkə, pə́ yǒ ŋ́ŋáʼə.

²³Mbɔʼ ŋwu ntsəmə a túg mətôglə á mə́ zóʼ nə́, a zóʼə!”

²⁴Yeso a ghɛn nə́ mbiə á mə́ sóŋ nə́ nə́ pó ńgə́, “Lɔg nə́ ndɛd nə́ anuə atsəm páʼ nə́ zóʼ nə́ ńté ńgə́ ndzaŋ páʼ gho kə́ʼ nə́ ə́fɛ̂ nə́ pɨ lə́, lə́ ndzaŋ páʼ pə́ yǒ nə́ kə́ kə́ʼ ə́fɛ̂ nə́ gho tə pɨ pegtə̂.

²⁵Ŋwu ntsəm páʼə a túg nə ajú, pə́ yǐ pegə̂ ajíə á nə́ənə; lə́ ŋwu ntsəm páʼə a kě nə́ ajú túg, á lǒo mɔ́ aliʼ páʼ a túg nə́, pə́ yǐ kwáalə á mbô yə́.”

²⁶Yeso a kə́ ə́sóŋ ńgə́, “Anuə Nəfoonə Əsê á chî lə́ ándó ŋwunə a maʼ mbǐpúmə alíʼ yə́

²⁷Nətúʼ pópə ənumnə, kəənə a lê, kɨ ńjimnə̂, mbǐpú zə̂ ə́ sáʼ ńkə́ ńkɔ́ʼə. Lə́ a pə́ ńkě jî ndzaŋ páʼ ə́ lǎa nə́ ḿbɔŋə́ sáʼ kɨ ńkɔ́ʼ pô.

²⁸Ndəsê yi wə̂ á ngǎ yí ə́ ghɛd mbǐpú zə̂ ə́ sáʼ, ə́fóg məfǔ, ńkɔ́ʼ ńtíʼ ńdzə́m mənteemə́; ńchúʼ nə́ məfǔ mə́ ngəsáŋ ńkoʼ nə́ akɔŋ ńtíʼ ńkoʼ nə́ atsoʼə.

²⁹Əghâ ándó ngəsáŋə́ a kə́ nə́ ńgə́ təənə̂, a néŋ ngaŋə́faʼ á mə́m ə́wɨ́ ńté ńgə́ ndɛlə́ á pə́ʼə ngəsáŋ ə́ koʼə̂.”

³⁰Yeso a kə́ ḿbɨ ə́sóŋ ńgə́, “Mbɔʼ pɛn sóŋ ńgə́ Anuə Nəfoonə Əsê á chî lə́ ándó akə̂?” Kɨ mbɔʼ pɛn lɔgə̂ azə́ənə́ atséebə́nə́múʼ ńdyaʼtə̂ ə́wə́?

³¹Anuə nəfoonə Əsê á chî lə́ ándó mbaŋ fɔ́lə́sə páʼ ə́ kə́g nə́ ńtsɛ mbǐpú ətsəm páʼ pə̈ pǐ nə́ á ndəsê.

³²Ndzaŋ pə́ pǐ nə́ zɨ́d lə́, ə́ sáʼ ńtíʼ ńkɔ́ʼ ḿbə́ chigə tə́kɔʼə atǐə á mə́m mətǐ mə́ nkáʼ mətsəm nə́ pətə́kɔʼ pə́ məfag, pəsə́ŋ pə́ tíʼə ńgyǐəə ńkwúlə mənka mɔ́b ə́wə́.

³³Yeso a sóŋə anǔəsê á mbô pó nə́ ətsábnə́múʼ pə nɨ́ nə́ ándó pəənə́. A nə sóŋə á mbô pó nə́ ndú ətsəm mbɔʼ pó zóʼə.

³⁴A nə ńkě anu yətsə́ á mbô pó sóŋ tsɔʼə tə ghə́ ä tséebə pə́ nə́ atséebə́nə́múʼ pô, lə́ əghâ páʼə a yǐ nə́ ńtíʼ ńchî tsɔʼə pópə ngaŋə́zoŋə́ndzəm əjí lə́, a tíʼ ńtsoŋkə̂ ə́fiʼtə̂ anuə atsəmə á mbô pó.

³⁵A nə mbɛn ḿbə́ ndɛd nkwanə́ alě yi wɨ́, Yeso a sóŋə á mbô ngaŋə́zoŋə́ndzəm əjí ńgə́, “Pɛn túmə əfooghɨ ńgɛnə̂ ndzɛnə́.”

³⁶Pó mɛdtə̂ ŋwu məsɔŋ wə̂ á ndzəmə; ngaŋə́zoŋə́ndzəm əjí ə́ tíʼ ńkwúnə á mə́mə aŋkənúʼə́ páʼ Yeso a pěʼ nə́ ḿbɛ́dtə ńnáanə ə́wɨ́ ńtíʼ ńdɔgə̂ yí pó po ghɛnə̂. Pətsə́ əŋkənúʼə́ ə́ nə ńkə́ ńchî ə́wə́.

³⁷Atyǎntə kəfəələ á chúʼə á mə́ kɔ́ʼ nə́, nkǐ ə́ tíʼə ńtóʼnə ńkɔ́ʼə ńkwúnə á mə́mə aŋkənúʼə́ tə ńtíʼə ńdwɛ́nkə zə́ələ́.

³⁸Yeso a nə noŋnə̂ á mə́mə aŋkənúʼə́ á ndzəm ńdiʼə̂ atûə ají nə́ pilo ńtə́ ńdê yə́. Ngaŋə́zoŋə́ndzəm əjí ə́ jimkə̂ yí ə́sóŋ ńgə́, “Ndzéʼkə, gho kě kwág pô lə́ ńkě jî ńgə́ mbɔʼ pɛn kwûə á mə́m nkǐ ghɛn?”

³⁹Yeso a lǒo á əsê ńtíʼ sáʼə kəfɨd wə̂ ə́sóŋ ńgə́, “Pɔ́ʼnə ńnaʼə̂!” ńtíʼ sóŋ nə́ nkǐ wə̂ ə́ tóʼnə nə́ lə́ ńgə́, “Pwɔ́dnə!” kəfɨd wə̂ á kě əliʼ pɛ́lə ńchiʼə̂ pô tə əliʼ ətsəm ə́ kə́ ḿbwɔ́dnə.

⁴⁰Yeso a tíʼ sóŋə á mbô ngaŋə́zoŋə́ndzəm əjí ńgə́, “Nə́ lánə ńchígə́ ḿbɔ́gə lə́ akə̂? Nə́ kě mbimə́ kə́ túg?”

⁴¹Pó pɔ́g lɛ tətə ńtíʼə ə́sóŋə á mə́m pó ńgə́, “Lɛ̌ əwə ŋwu tə kəfɨd pópə nkǐ yi kɔ́ʼ nə́ ə́ kə̈ ńdzóʼnə yí lɛ?”