Read Awing Magə 5 Bible Online

Magə 5 - Awing bible

Magə 5

¹Pó túmə əfooghɨ Galili ńkwúnə á ndzɛnə́ á mboʼ Gɛlɛsen.

²Əghâ ándó Yeso a nə fɛ́d nə́ á mə́mə aŋkənúʼə́, ŋwu tsə̌ páʼ pɛ̌sê a nə ńchî nə́ á mbɨ yə́ á fɛ́lə á mə́m məse ńgyǐ ńtégə yə́.

³Ŋwu wɨ́d ghɛnə́ a nə̈ ńchîə lə́ á mə́m məse. Mbɔʼ ŋwu tsə̌ a nə ńkě yí pɨ ńkwúd pô, kɨ nə́ məŋkɛd mə́ atəənə́,

⁴ńté ńgə́ pə́ nə ńchî lə́ ńdzá ńkwúd mbô mí pópə məko mí nə́ məŋkɛd mə́ atəənə́, lə́ a pə́ ńdzá ńdə́gtə məŋkɛd mimə wə́ á mbô yí pópə ətəənə́ pə wə́ á məko yə́. A nə ńtyantə̂ tə́shú tə ŋwu tsə̌ a kě ə́wɨ́ chî təmbɔʼ a pɨ ńgwaamə̂ yí pô.

⁵Əlě ətsəm pópə mətúʼ mətsəm, a kéelə ńtə́əmə á mə́m məse pópə məŋnkwəənə ḿbóʼə məngoŋ ńtûə ńkə́ʼtə mbɨ əjǐ nə́ məngɔʼə.

⁶A nə ńdzə́ənə Yeso á ndi yi sɛ, ńkə ndə̌ ńgyǐ ńkwə́ʼtə á mbi yí ńgóʼkə yə́.

⁷A tíʼ ńkyéŋ nə́ tə́kɔʼ ngye ə́sóŋ ńgə́, “Yeso Mɔ́ Əsê páʼ a Tsɛ nə Ajúmə Atsəm! Gho kwáalə lə́ akə̂ á mbô maŋə? Maŋ póʼ mbô nə́ gho nə́ əlɛ́n Əsê ńgə́ kɔ gho fɛ̂ ngə́ʼ nə́ maŋə!”

⁸(A kə sóŋ ə́lɨ́d lə́ ńté ńgə́ Yeso a kə sóŋ nə́ yí ńgə́, “Ajwiə təpɔŋ, fɛ́lə á mə́m ŋwu nə́!”)

⁹Yeso a tíʼ ḿbítə yí ńgə́, “Əlɛ́n əghô lə́ əwə?” A kwěe ńgə́, “Əlɛ́nə mə lə́, Apoŋə Pəənə, ńté ńgə́ pəg nə́ənə!”

¹⁰A pyádnə ḿbóʼmbô nə́ Yeso ńgə́ kɔ a kəm pɛ̌sê pə̂ á mboʼ yi wə́.

¹¹Mɛ́ akwɛlə pəkwúna yətsə́ á nə ńchîə á mbɨ kɔŋ, ḿbáatə ńtə́ ńjîə.

¹²Pɛ̌sê pə wɨ́ pə́ póʼ mbô nə́ Yeso ńgə́, “Tsɛɛkə̂ áwə́gə́ á mə́m pəkwúna pi ńgɛd pəg ghɛn ńkwúnə á mə́m pó.”

¹³A tíʼ ḿbí ńgɛd əjwi təpɔŋ pə̂ ə́ fɛ́lə á mə́m ŋwu wə̂ ńgɛn ńkwúnə á mə́m pəkwúna pə̂. Akwɛlə pəkwúna zə̂ tsɔʼə atsəm tə ńkoʼə̂ ándó tɔsə pɛ̌ a tíʼ ə́shwəənə̂ á mbɨ nkəŋə́ ńtíʼ ńtsó ńkwúnə á mə́m əfooghɨ ə́fə́mnə á mə́m nkǐə.

¹⁴Pɨ páʼ pə́ nə̈ ńtseŋnə̂ nə́ pəkwúna pi wɨ́ pó tíʼ ńkə ndə̌ ńgɛnə̂ á mə́mə aláʼ pópə mbɛnə́ mə́ aláʼ ə́fiʼtə̂ anuə atsəm páʼ á laŋ nə́. Ŋwu ntsəmə a tíʼ fɛ́d ńgɛnə̂ á mə́ jɨ́ nə́ anu páʼə á laŋ nə́.

¹⁵Pó nə ńgyǐəə á mbô Yeso ńdzə́ənə ŋwu wə̂ páʼə apoŋə pɛ̌sê a nə ńchî nə́ á mbɨ yí lə́, a náanə ńgwê ətsəʼ pí, əjî əyí ə́ kə́ ńchî əshîʼnə. Pó pɔ́g lɛ tətətə.

¹⁶Pɨ pə́ nə́ ńjɨ́ nə́ anu yə wɨ́ pó tíʼ ə́fiʼtə̂ ŋwu ntsəm nə́ anu páʼə á laŋ nə́ nə́ ŋwu wə̂ páʼ pɛ̌sê a nə ńchî nə́ á mbɨ yí lə̂, ńkə́ ə́sóŋə anu ńté pəkwúna pə̂.

¹⁷Pɨ pipə wɨ́ pó tíʼ ńchúʼə á mə́ póʼ nə́ mbô nə́ Yeso ńgə́ a fɛ́lə yə́ á əlá aláʼ pó.

¹⁸Ndzaŋə ándó Yeso a nə ńtə́ nə́ ńkwúnə á mə́mə aŋkənúʼə́ lə́, ŋwu wə̂ páʼ pɛ̌sê ə́ nə ńchî nə́ á mbɨ yí lə́ a póʼ mbô nə́ yí ńgə́ pó yí ghɛnə̂.

¹⁹Yeso a nə ńkě pí pô lə́ ḿbə́ sóŋ nə́ yí ńgə́, “Kwə̂ ńtég pəlim pô ə́fiʼtə̂ ághɔ́b nə́ ndɛn mənu páʼ Mmaʼmbîə a ghɛd nə́ á mbô gho ńkə́ ḿbə́ nə́ ndzaŋ páʼə a kó nə́ mələ́ŋ mô.”

²⁰Ŋwu wə̂ a tíʼ ə́fɛ́lə aliʼ yi wɨ́ ńgɛnə̂ á mə́mə aláʼə Dekapolis tsɔʼə atsəm ə́fiʼtə̂ ndɛn mənu páʼ Yeso a faʼ nə́ nə́ yə́. Á nə ńkɨʼnə̂ ŋwu ntsəm páʼə a nə ńdzóʼ nə́ anu yəwə́.

²¹Yeso a kə́ ḿbɨ ńtúmə əfooghəəmə́ á mə́mə aŋkənúʼə́ ńkoʼə̂ á ndzɛnə́, mboŋ pɨ ə́ kyeetə̂ ńdíblə yí əghâ ándó a nə ńtɨ́ nə́ á nkaŋ əfooghɨ lə́.

²²Jailɔsə páʼə a nə ḿbə́ nə́ táʼ nətûə á mə́m ndɛ̂sê Pəjusə a yǐ ə́wɨ́ ńdzə́ənə Yeso ńtíʼ ńgwǔəə á məko yí

²³ńchígə́ ḿbóʼmbô nə́ yí ə́sóŋ ńgə́, “Mɔ́ kə́nyaŋ móonə mə yi məngyě a tə́əmə á ngə́ŋ nəse. Maŋ póʼ mbô, yǐ pɔ̌ ghɛn gho noŋkə̂ mbô mô atû yí ńjî ńgə́ a yáŋ ńchîə á mbîə.”

²⁴Yeso a zoŋə̂ yí pó yí tə́ ńgɛnə̂. Mboŋ pɨ ə́ zoŋə̂ yí ńtíʼə ńjwíʼnə nəpɛnə́ yə́.

²⁵Məngyě yitsə̌ a nə ńkə́ ńchî ə́wɨ́ páʼə a nə̈ ńgɔ nə́ mə́sɔ́ nə́ ngoʼ ntsɔb pɛ̌.

²⁶Ńtsaŋnə̂ á ndzəm pəlɔ́gta, ńtsəŋ nkáb əjǐ tsɔʼə ntsəmə á mbô pó, lə́ ńtíʼ ńgə́ a yáŋ, aghoonə́ á gháʼə ńgɛnə̂ pə́ nə́ mbiə.

²⁷Ndzaŋə a nə ńdzóʼ nə́ anu ńté Yeso lə́, ńtíʼ ńkɔ́ʼə á ndzəm yə́ á mə́m ənɔ ńkwumə̂ atsəʼə́ ají,

²⁸ńté ńgə́ a nə ńkwaŋ ńgə́, “Mbɔʼ maŋ kwumə̂ atsəʼə́ ají maŋ yáŋə.”

²⁹Tsɔʼə əghâ yí wɨ́, mə́sɔ́ əyǐ wə̂ á lə́gnə a zóʼ nə́ mbɨ əjǐ ńgə́ a chwád ngə́ʼ zə̂.

³⁰Yeso a tɔ́g ńjî ńgə́ mətɨ mə́ fɛ́lə a mbɨ yə́, ńtíʼ sɛdnə̂ á mə́m mboŋ pɨ zə̂ ḿbítə ńgə́, “Əwə a kwum nə́ ətsəʼə́ mə?”

³¹Ngaŋə́zoŋə́ndzəm əjí ə́ kwěe yí ńgə́, “Gho jɨ́ ndzaŋ pɨ pə́ jwíʼnə nə́ á mbɨ gho; gho pɨ ńtə́ ḿbítə ńgə́ əwə a kwum nə́ gho lə́ ə́lɛ́?”

³²Lə́ Yeso a pə́ ńkə́ ńnáŋə tsɔʼə əliʼə́ á mə́ jɨ́ nə́ ńgə́ lə́ kwum əwə ńkwumə̂ yə́.

³³Məngyě wə̂ a pə́ ńjîə anu páʼə á laŋ nə́ á mbɨ yí lə́, ńtíʼə ḿbénkə nə́ apɔ́g, ńgyǐ ńgwǔəə á məko Yeso ə́fiʼtə̂ ndə̌ŋdəŋ əyǐ ntsəmə á mbô yə́.

³⁴Yeso a tíʼ ə́sóŋə á mbô yí ńgə́, “Móonə mə, mbimə́ əzo ə́ ghɛd gho yáŋə. Ghɛn nə́ mbwɔ́dnə, aghoonə́ azô á měe.”

³⁵Ndzaŋə ándó Yeso a nə ńtə́ nə́ ḿbɛ́lə ńtséebə lə́, pɨ pətsə́ pə́ lǒo á ndɛ̂ Jailɔsə páʼə a nə ḿbə́ nə́ nətû nə́ ndɛ̂sê Pəjusə lə́, ńgyǐ ə́sóŋ ńgə́, “Mɔ́ əgho a kwûə yə́. Kɔ gho pɨ ńjwaʼə̂ Ndzéʼkə.”

³⁶Yeso a kě anu pó sóŋ nə́ lə́ nə́ anu yətsə́ néŋ pô, ḿbə́ ə́sóŋə á mbô nətû nə́ ndɛ̂sê Pəjusə zə̂ ńgə́, “Kɔ gho pɔ́gə, kə́ ńtúg tsɔʼə mbimə́.”

³⁷A nə ńkě pí ŋwu tsə̌ a zoŋə̂ yí pô tə ńdéʼtə Pita pó Jɛmsə nə́ mɔ́mɛ́ əyǐ Jɔnə.

³⁸Əghâ ándó pó nə ńgyǐ nə́ ńkwúnə á ngyaʼə́ nətû nə́ ndɛ̂sê Pəjusə zə̂ lə́, Yeso a zə́ənə ajwaʼlə páʼə á nə ńchî nə́ aliʼ yi wɨ́ pópə pɨ pə́ nə̈ ńkyéŋ nə́ nə́ pətə́kɔʼ pə́ məngye ńtûə ə́fɨnə̂.

³⁹Yeso a kwúnə á ndɛ̂ ńtíʼ ə́sóŋə á mbô pó ńgə́, “Ajwaʼlə jɨ pópə afɨnə jɨ ə́ lánə ḿbə́ lə́ yə́ akə̂? Mɔ́ yi wə́ a kě kwû pô. A lê lə́ lê nə́.”

⁴⁰Lə́ pó pə́ ńgweŋə̂ yə́, a kəmə̂ ŋwu ntsəm ə́fɛ̂ á apeŋ ńtíʼ ńdɔgə̂ tǎpə mɔ́ yi wɨ́ pó mǎ əyǐ ḿbɨ́ ḿbə́ nə́ ngaŋə́zoŋə́ndzəm əjí zɛ́n teelə́ pó po kwú ńgɛnə̂ á mə́m ntaŋ páʼ mɔ́ yi wə́ a nə ńnoŋnə̂ nə́ ə́wə́.

⁴¹A waamə̂ apô mɔ́ yi wɨ́ ńtíʼ sóŋ nə́ yí nə́ atséebə aláʼə azɔ́b ńgə́, “Talita, kum,” páʼə á pə́ nə́ lə́ ńgə́, “Mɔ̂ məngyě maŋ sóŋ nə́ gho ńgə́ gho lǒo á əsê!”

⁴²Mɔ́ wə̂ a tɔ́g ńdǒo á ndəsê tsɔʼə əghâ yi wɨ́ ńchúʼə á mə́ nyi nə́. (A nə ḿbə́ lə́ mɔ́ ngoʼ ntsɔb pɛ̌.) Anu yəwə́ á nə ḿbyádnə ńkɨʼnə̂ ághóobə́.

⁴³Yeso a chígə́ ńkwantə̂ ághɔ́b ńgə́ kɔ pó fiʼtə̂ ŋwu tsə́ nə́ anu yəwə́, ńtíʼ sóŋ nə́ pó ńgə́ pó fɛ̂ ajú nə́ yə́ a jîə.