Read Awing Magə 6 Bible Online

Magə 6 - Awing bible

Magə 6

¹Yeso a fɛ́lə aliʼ yí wɨ́ ḿbɨ ḿbəənə̂ aláʼ pó, ngaŋə́zoŋə́ndzəm əjí ə́ zoŋə̂ yə́.

²Alěláʼə́sê á yǒ ńkoʼə̂ a chúʼə á mə́ zéʼkə nə́ á ndɛ̂sê Pəjusə. Ndzeʼkə́ əjǐ ə́ nə ńkɨʼnə̂ pɨ pipə nɨ́ nə́ pó tíʼ ḿbítə ńgə́, “Ŋwu nə́ a nə ńdɔg ndɛn mənu ghɛn lə́ ə́fó? Lɛ̌ zə́ənə́ ndzaŋə ayáŋ pə́ fɛ̂ nə́ nə́ yí tə a kə́ ńtûə ńgɛd əkɨʼnəmə́nuə?

³Lɛ̌ kě nkɔ̂pú wə́ pô? Lɛ̌ kě mɔ́ Mɛɛlə páʼ pɔ́pə́mɛ́ pí pi pə́ mbyâŋnə pó pə́ nə́ Jɛmsə pó Josef nə́ Judas ḿbéenə Saamun pô? Pɔ́pə́mɛ́ pí pi pə́ pəngyě pə́ kě lə́ pɛ̌npo ə́fɛ̂ chîə?” Ńdɔg ə́lɨ́d pó kǐəə yə́.

⁴Yeso a sóŋə á mbô pó ńgə́, “Pə̈ ghóʼkə ntûsê aliʼə́ atsəmə, lə́ ḿbə́ ńkě yə́ aláʼ pó ghóʼkə pô, pəlim pí pópə ndɛ̂ əzɔb kě yí kə́ ńgóʼkə pô.”

⁵A nə ńkě əkɨʼnəmə́nu pətsə́ ə́wɨ́ ghɛd pô, tə ńdéʼtə ńgə́ a noŋkə̂ mbô míə atû pɔ́ pə́ ntaʼlə pəghɔ pətsə́ ńtsóʼə ághóobə́.

⁶Á nə ńkɨʼnə̂ Yeso ndzaŋ pó nə ńkě nə́ mbimə́ túg pô. Yeso a tíʼə ńkéelə ńnyinə̂ ńdzéʼkə, ə́fɛ́lə nə́ táʼə aláʼ ńkwúnə nə́ yətsə́.

⁷Ə́fóŋ ngaŋə́zoŋə́ndzəm əjí zə̂ ntsɔb pɛ̌ ńtúmə ághóobə́ á apeŋ pə́ pɛ̌ pə́ pɛ̌ ńkə́ ə́fɛ̂ mətəənə á mbô pó á mə́ kəm nə́ əjwi təpɔŋə.

⁸A nə sóŋə á mbô pó ńgə́, “Kɔ nə́ lɔgə̂ ajûtsə́ á mə́ ghɛn nə́ nə́ zə́ələ́ á nənyi ghɛn tə ńdéʼtə mbaŋə, kɔ nə lɔg məjîə, kəənə apeemə nənyinə, kɨ nkéebə á apa pəənə́.

⁹Wê nə́ ngwubə, lə́ kɔ nə́ pə́ ḿmaʼə̂ atsəʼə́ á ndu yi páʼə á pɛ́d nə́ tə ńchîə á mbɨ pəənə́.”

¹⁰A nə ńkə́ ə́sóŋə á mbô pó ńgə́, “Mbɔʼ nə́ ghɛn ńkwúnə á ndɛ̂ nə́ kwú nə́ ə́wɨ́, kə́ nə̈ ńchîə tsɔʼə á ndɛ̂ yi wɨ́ tə ńdáʼ ə́fɛ́lə á tɔ̂ŋ yi wə́.

¹¹Lə́ mbɔʼ nə́ yǐ ńkwúnə aliʼ yətsə́ pə́ chîə áwɨ́ ə́wɨ́ əshîʼnə lɔg pô, kɨ ńchîə anu pɨ sóŋ nə́ tə́ jwə́ʼtə pô, nə́ kɔdtə̂ akəpóglə́ páʼə á chî nə́ á məko pɨ ńgɛnə̂ áwə́ənə́. Zəənə́ a yǐ chîə ándó akwantə anuə á mbô pó.”

¹²Pó fɛ́d ńgɛnə̂ á apeŋ ə́sóŋə anǔəsê ńgə́ pɨ pə́ kwúblə á mə́m pətəpɔŋ póobə́.

¹³Pó nə ńkəm pɛ̌sê pə nɨ́ nə́, ńkə́ ńtû ńdzɔ́ʼ pəghɔ pi nɨ́ nə́ nə́ məghɔ́d pó yáŋə.

¹⁴Əfo Ɛlɔdə a zóʼ mənu mɨ tsɔʼə mətsəm ńté ńgə́ əlɛ́n Yeso ə́ nə ńnyinə̂ á mə́mə aláʼə atsəmə. Pɨ pətsə́ pə́ nə̈ sóŋə ńgə́, “Lə́ Jɔn Əfɛ̂nkǐə páʼə a pɨ nə́ ńjúmnə á nəwûə! Lə́ ghɛd ə́lɨ́d a túg mətəənə á mə́ faʼ nə́ əkɨʼnəmə́nu pəənə́.”

¹⁵Pətsə́ pə́ sóŋ ńgə́, “Lə́ Elayija.” Lə́ pətsə́ pə́ pə́ ńkə́ ḿbɛ́d ə́sóŋ ńgə́, “Lə́ ntûsê ándó táʼ ntûsê ngoʼ pəchə́ yitsə̌.”

¹⁶Əghâ ándó Ɛlɔdə a nə ńdzóʼ nə́ anu jɨ lə́ ńtíʼ sóŋ ńgə́, “Jɔn páʼ maŋ nə ńdə́g nə́ atûə ají lə́ a pɨ ńjúmnə nəwûə!”

¹⁷Ńté ńgə́ Ɛlɔd nə́ nkɔ̌ʼmbɨ əyí a nə ńgɛd pə́ waamə̂ Jɔn ńkwúd ńnéŋə a nkáʼə atsáŋə. A nə ńgɛd ə́lɨ́d lə́ ńté ńgə́ a nə ńdzɔ́ʼə Ɛlɔdyasə páʼə a nə ḿbə́ nə́ ngwě mɔ́mɛ́ əyǐ Filibə.

¹⁸Jɔnə a nə ḿbə́ ə́fiʼtə̂ Ɛlɔd ńgə́, “Noŋkə á kě pí ńgə́ təmbɔʼ a zɔ́ʼə ngwě mɔ́mɛ́ əyǐ pô!”

¹⁹Ńdaŋ ə́lɨ́d, Ɛlɔdyasə a tíʼ ńtúgə azáŋə́ndé ńté Jɔnə. Ńtíʼə ńnáŋ ndúmə á mə́ jwítə nə́ yí, ndú ə́ pə́ ńkě ə́wɨ́ chî pô.

²⁰Ńté ńgə́ Ɛlɔdə a nə ḿbɔ́gə Jɔn ńté ńgə́ a nə ńjî ńgə́ Jɔn lə́ ŋwu páʼə a tɨ́ nə́ ndə̌ŋdəŋ ńkə́ ŋwaʼə̂. Ńtíʼə ńkɨ́ʼə yí ńgə́ kɔ anu yətsə́ á ghɛlə̂ yə́. Əghâ ətsəm páʼ Ɛlɔdə a nə ńdzóʼ nə́ atséebə Jɔn lə́ á pyádnə ńjwaʼə̂ yə́, lə́ a pə́ ḿbɛ́d ńkɔŋə̂ á mə́ jwə́ʼtə nə́ á mbô yə́.

²¹Á ndwigtə, Ɛlɔdyasə a jɨ́ ndúmə anuə a nə ḿběʼ nə́ ńdoonə̂ á mə́ ghɛd nə́ lə́. Lə́ nə́ ḿbə́ alě pə́ nə ḿbî nə́ Ɛlɔd, páʼə a nə ńgɛd nə́ akɔŋtə á mbô pəkəm pə́ aláʼ tsɔʼə pətsəm, ḿbɨ́ ḿbə́ nə́ mətû mə́ ngaŋə́maʼə́ntso mətsəm pópə mətû mə́ aláʼ mətsəmə á Galiliə.

²²Mɔ́ Ɛlɔdyasə yi məngyě a yǐ ḿbɛ́nə apɛ́n, anu yəwə́ á kwéʼnə ḿbɔŋə̂ Ɛlɔd pópə pɨ páʼə a nə ńgwú nə́ ághóobə́. Əfo wə̂ a sóŋə á mbô mɔ̂ məngyě wə̂ ńgə́, “Pítə mə nə́ ajúmə atsəm páʼ gho kɔŋ nə́, maŋ yǐ fɛ̂ á mbô gho.”

²³A tíʼ ńdaʼnə̂ yí tə ńgɛlə̂ atyǎntə ndaʼnə ńgə́, “Ɛlɔdə a yǐ fɛ̂ ajúmə atsəmə á mbô yí páʼə a pítə nə́, kəənə á pə́ pə́ táʼ əlá aláʼ əyí yətsə́!”

²⁴A tíʼ ə́fɛ́d ńgɛn ḿbítə mǎ əyǐ ńgə́, “Maŋ pítə akə̂?” A kwěe ńgə́, “Pítə atûə Jɔn Əfɛ̂nkǐə.”

²⁵Mɔ̂ məngyě wə̂ a tɔ́g ńgə́glə ńgɛnə̂ á mbô Əfo ə́sóŋ ńgə́, “Maŋ loonə̂ ńgə́ gho fɛ̂ atûə Jɔn Əfɛ̂nkǐə á mbô maŋ əghâ nə́ á mə́mə apagə akáŋə!”

²⁶Ndzaŋ páʼə a nə ḿbítə nə́ atûə Jɔn Əfɛ̂nkǐ lə́, əfo yi wə́ a fɨnə̂ lɛ tətətə. Lə́, ńté atyǎntə ndaʼnə páʼə a nə ḿbɛ́d nə́ tə ńgɛd pó mɔ̂ məngyě wə̂ a mbi pɨ páʼə a nə ńgwú nə́ lə́, a tíʼ ńdoonə̂ á mə́ ghɛd nə́ tsɔʼə ndzaŋ páʼə a nə ńdaʼnə̂ nə́.

²⁷A tíʼ ńtɔ́g ńtúmə táʼ ngaŋəmaʼə́ntso yitsə̌ páʼə a nə̈ ḿbyáb nə́ yí lə́ ńgə́ a ghɛn ńgyǐ nə́ atûə Jɔnə. Ngaŋəmaʼə́ntso wə̂ a mɛdtə̂ ághɔ́b ńgɛnə̂ á nkáʼə atsáŋ, ńdə́gə atûə Jɔnə;

²⁸ńtíʼ ńgyǐ nə́ zə́ələ́ á mə́mə apagə akáŋ ə́fɛ̂ á mbô mɔ̂ məngyě wə̂, a tíʼ ə́fɛ̂ á mbô mǎ əyǐə.

²⁹Əghâ ándó ngaŋə́zoŋə́ndzəm Jɔn ə́ nə ńdzóʼ nə́ anu yə́ wɨ́ lə́, ńtíʼ ńgyǐ ńdɔgə̂ akwûə ají ńgɛn ńtwə́ŋə.

³⁰Məntú mə́ Yeso mə́ páʼə a nə ńtú nə́ ághɔ́b lə́, pó nə́ ḿbɨ ə́fiʼtə̂ yí nə́ anuə atsəm pó faʼ nə́ ńkə́ ńdzéʼkə.

³¹Pɨ pə́ nə̈ ńgyǐ nə́ ńkə́ ńgɛnə̂ pó nə́ nɨ́ tə́shú tə Yeso pópə ngaŋə́zoŋə́ndzəm əjí kě túg ndɛd təmbɔʼ pó jîə ajú pô. A tíʼ ə́sóŋə á mbô pó ńgə́, “Yǐ nə́ pɛn ghɛnə̂ aliʼ yitsə̌ tsɔʼə pɛn pɛn ńjî ńgə́ mbɔʼ nə́ nyáʼ ńjwitə̂.”

³²Pó tíʼ ńkwúnə á mə́m aŋkənúʼə́ ńgɛnə̂ ngǎ pó aliʼ páʼ ŋwunə a kě nə́ ə́wɨ́ chî pô.

³³Pɨ pi nɨ́ nə́ pó pə̂ ńdzə́ənə ághɔ́b əghâ ándó pó nə ńtə́ nə́ ńgɛnə̂ lə́, ńdeŋə̂ ághɔ́b ńkə́ ńtɔ́g ńjî pɨ páʼ pó pə́ nə́ pɨ́d, ńtíʼ ə́fɛ́d ḿmɛdtə̂ əláʼ əpɔ́b, ńkwá mbi ḿbegə̂ á aliʼ yi wɨ́ záʼ Yeso pópə ngaŋə́zoŋə́ndzəm əjí ə́ pɔŋə̂ tə́ yǐəə.

³⁴Əghâ ándó Yeso a nə fɛ́d nə́ á mə́mə aŋkənúʼə́ lə́, ńjɨ́ mboŋ pɨ, ńtíʼ ńtúgə akóolə́mə́lə́ŋə á mbô pó ńté ńgə́ pó nə́ ńchî lə́ ándó məmbéŋ mə́ ndzɛd mə́ tə ntseŋnə. Ńtíʼ ńchwáakə á mə́ zéʼkə nə́ ághɔ́b nə́ mənu mimə nɨ́ nə́.

³⁵Ndzaŋ túʼə á nə ńtə́ nə́ ə́sɛ́nə lə́, ngaŋə́zoŋə́ndzəm əjí ə́ yǐəə á mbô yí ə́sóŋ ńgə́, “Ndɛd ə́ pɛ́d tə ńgɛn tə́shúnə́, lɛ̌ kə́ ḿbə́ aliʼə́ tə́ ŋwunə.

³⁶Ghɛd ŋwu ntsəmə a ghɛnə̂ á mə́m əfɔ pópə əláʼ ə́ páatə nə́ ńjî ńgə́ pó jú məjî ə́wɨ́ ńjîə.”

³⁷Yeso a kwěe ńgə́, “Fɛ̂ nə́ ajú pó jîə.” Pó pítə yí ńgə́, “Gho loonə̂ lə́ ńgə́ pəg ghɛn ńjúnə apéenə məkálə́ páʼə á koʼ nə́ nkáb əpa pɛ̌ ə́fɛ̂ á mbô pó?”

³⁸Yeso a tíʼ ḿbítə ághɔ́b ńgə́, “Nə́ túgə apá lə́ ntáʼ zɛ́n ə́shíʼə́? Ghɛn nə́ ńnáŋə.” Ndzaŋə ándó pó nə ńgɛn nə́ ńnáŋ lə́, ńtíʼ fiʼtə̂ yí ńgə́, “Lə́ apá ntáʼ tâ nə́ əshû ntáʼ pɛ̌.”

³⁹Yeso a tíʼ ə́sóŋə á mbô ngaŋə́zoŋə́ndzəm əjí ńgə́ pó ghabtə̂ ŋwu ntsəm nə́ əkwɛlə́ pó náanə á ndəsê á ndu ngɔ́n yi féŋtə nə́.

⁴⁰Pó tíʼ ńnáanə á ndəsê á əkwɛlə́, əkwɛlə́, pətsə́ táʼ nkɛd, pətsə́ məghə́m mɛ́n tênə.

⁴¹Yeso a lɔgə̂ apá zə̂ ntáʼ tâ nə́ əshû zə̂ ntáʼ pɛ̌ ńtíʼ ńnáŋ nəpó fɛ̂ ndǎ á mbô Əsê, ḿbagtə̂ apá zə̂ ə́fɛ̂ á mbô ngaŋə́zoŋə́ndzəm əjí, pó tíʼ ńgabtə̂ á mbô ŋwu ntsəmə. A kə́ mbɨ ńgabtə̂ əshû zə̂ ntáʼ pɛ̌ á mbô ŋwu ntsəmə.

⁴²Ŋwu ntsəmə a nə ńjî tə ńdzɛ́lə.

⁴³Ngaŋə́zoŋə́ndzəm əjí ə́ tíʼ ńdagtə̂ əpuʼ əpá pópə əpuʼ əshû ə́ nə ḿbɛ́d nə́, ə́ pə́ mənka ntsɔb pɛ̌.

⁴⁴Ndɛn mbyâŋnə páʼ ə́ nə ńkɔ́d nə́ apá yə wɨ́ ə́ nə́ ḿbə́ tɔsə tênə.

⁴⁵Tsɔʼə əghâ yi wɨ́, Yeso a tíʼ ńgɛd ngaŋə́zoŋə́ndzəm əjí ə́ kwúnə á mə́mə aŋkənúʼə́ ńkwá mbi ńgɛnə̂ á Bɛdsada, a tíʼ ńtə́ ńgɛlə̂ ńgə́ pɨ pó kwə́əkə,

⁴⁶ndzaŋə a nə ḿbookə̂ nə́ ághɔ́b lə́, ńtíʼ ńkɔ́ʼ ńgɛnə̂ á ndu nkwəənə á mə́ chaʼtə̂ nə́ Əsê.

⁴⁷Á nə ḿbɛn ḿbə́ á ndɛd nkwanə́, aŋkənúʼə́ zə̂ á chîə á tətɨ əfooghəəmə́, lə́ Yeso a pə́ ḿbɛ́lə á asəg tsɔʼə yí təjiʼə.

⁴⁸A jɨ́ ńgə́ ngaŋə́zoŋə́ndzəm əjí ə́ tə́ ńjɨ́ ngə́ʼə á mə́ tɛ́n nə́ aŋkənúʼə́ ńté ńgə́ kəfəələ á nə́ ńtə́ ńkɔ́ʼə á ndú páʼə aŋkənúʼə́ á nə ńchî nə́ ə́wə́. Á yǐ ḿbə́ ándó pəmə́nu pɛ́n teelə́ á ndú mbî, Yeso a nyinə̂ á ndu nkǐ ńgɛn ńtég ngaŋə́zoŋə́ndzəm əjíə. A nə ńdoonə̂ mə́ laŋ nə́ ə́ tóokə ághóobə́.

⁴⁹Lə́ əghâ pó nə ńjɨ́ nə́ yə́ a tə́ ńnyinə̂ á ndu nkǐ lə́, pó kwaŋ ńgə́ lə́ nkwûsê, ńtíʼ ḿbóʼ məngoŋə,

⁵⁰ńté ńgə́ pó pətsəm nə ńdzə́ənə́ yí ńtíʼ ḿbɔ́gə. Tsɔʼə əghâ yi wɨ́, Yeso a tséebə á mbô pó ə́sóŋ ńgə́, “Wam nə́ ntɨ́ wə́ənə́! lə́ maŋə, kɔ nə́ pɔ́gə!”

⁵¹A tíʼ ńkwú ńtégə ághóobə́ á mə́mə aŋkənúʼə́, kəfɨd wə̂ á měe yə́. Anu yəwə́ á nə ńchígə́ ńkɨʼnə̂ ngaŋə́zoŋə́ndzəm əjíə.

⁵²Atûə azóobə́ a nə ńkě lánə ńdá nə́ anu ńté apá zə́ pô, ńté ńgə́ pə́ nə́ fwɔnə̂ ajíə anuə azóobə́.

⁵³Pó nə ńtú nkǐ tə ńkoʼə̂ á ndzɛnə́ Jɛnɛsɛlɛlə, ńtəŋnə̂ aŋkənúʼə́ azɔ́b ə́wə́.

⁵⁴Əghâ ándó pó nə fɛ́d nə́ á mə́mə aŋkənúʼə́ lə́, pɨ pə́ tɔ́g ńdeŋə̂ Yeso.

⁵⁵Ńtíʼ ńkə ndə̌ ńdíblə aláʼ tsɔʼə atsəm, ńtwá pəghoonə́ á ndu pə mə́ta ńgɛn nə́ pó aliʼə́ atsəm pó nə ńdzóʼ nə́ ńgə́ Yeso a chî ə́wə́.

⁵⁶Aliʼə́ atsəm Yeso a nə ńgɛn nə́ ə́wɨ́, á mə́mə aláʼ kəənə á mə́m tɔ̂ŋ, kəənə á mə́m əfɔ, pɨ pə̈ lɔgə̂ pəghɔ ńgyǐəə nə́ pó á əliʼ məta, ńtíʼə ḿbóʼmbô nə́ yí ńgə́ a tíʼ pó kwum tsɔʼə nəlwî nə́ atsəʼə́ ajíə. Lə́ ŋwu ntsəm páʼə a nə ńkwum nə́ yə́ a nə ńgyáŋə.