Read Awing Magə 7 Bible Online

Magə 7 - Awing bible

Magə 7

¹Pəfalasi pópə ngaŋə́zéʼkə Pənoŋkə pətsə́ páʼ pó nə ńdǒo nə́ á Jɛlusalɛm pó tíʼ ńtɨ́ ńdíblə Yeso.

²Pó tíʼ ńjɨ́ ńgə́ ngaŋə́zoŋə́ndzəm Yeso yitsə̌ ə̈ jîə məjî nə́ mbô mə́ tə sogə̂, lə́ələ́ pə́ ńgə́ pó kě mɨ́d sog nə́ ndú Pəfalasi pó sóŋ nə́ ńgə́ pə́ sog pô.

³Ńté ńgə́ Pəfalasi pópə Pəjusə ə̈ zoŋə̂ lə́ noŋkə pətǎ pə́ pətǎ pɔ́b páʼə á sóŋ nə́ ńgə́: Mbɔʼ pó kě məjî jî tə ńdéʼtə pó sog mbô mɔ́b ndzaŋ páʼ noŋkə á nɨd nə́ pô.

⁴Mbɔʼ pó kwə̂ á məta, pó kě ajú jî pô, tə ńdéʼtə pó chwaglə̂ akwubə azóobə́. Pó kə̈ ńdzoŋə̂ pətsə́ pənoŋkə pə́ nɨ́ nə́ ándó mə́ sog nə́ məndɔ́ŋ pópə məkəŋ, nə́ əkáŋ páʼ pə́ tsoŋkə̂ nə́ nə́ atəənə́ kɔ́pa.

⁵Pəfalasi pópə ngaŋə́zéʼkə Pənoŋkə pó tíʼ ḿbítə Yeso ńgə́, “Lə́ ghɛlə̂ akə̂ ngaŋə́zoŋə́ndzəm əzô ə́ kě pənoŋkə páʼ pətǎ pə́ pətǎ pə́g pə́ nə́ fɛ̂ nə́ á mbô pəg zoŋə̂ pô? Pó kě mbô mɔ́b ə́sogə̂ ḿbɔŋə̂ jîə məjî pô!”

⁶Yeso a kwěe ághɔ́b ńgə́, “Ntú Əsê Izaya a nə ńkoʼnə̂ á mə́ ŋwaʼlə̂ nə́ mənu páʼ Əsê a nə sóŋ nə́ ńgə́ pɨ lə́ ngaŋmə́fɨgə. Pɨ lə́ ngaŋmə́fɨg tsɔʼə ndzaŋ páʼə a nə ŋ́ŋwaʼlə̂ nə́ ńgə́: ‘Pɨ pɨ lɛ pó ghóʼkə mə lə́ nə́ əkwub ntso əpóobə́, lə́ məntɨ́ mɔ́b mə́ pə́ ńchî ndi ə́ sag nə́ maŋə.

⁷Pó ghóʼkə mə lə́ tsɔʼə kətaŋə, pö zéʼkə lə́ pənoŋkə páʼ ŋwunə a noŋkə̂ nə́ ándó á pə́ pə́ pənoŋkə pə́ Əsê lə̂!’ ”

⁸“Pɨ myaʼ pənoŋkə pə́ Əsê ńtíʼə ńdzoŋə̂ pənoŋkə pə́ ŋwu mbîə.”

⁹Yeso a pɨ ə́sóŋə á mbô pó ńgə́, “Nə́ túg ndú yi əshîʼnə á mə́ myaʼ nə́ məntəgə́ mə́ Əsê ńjî ńgə́ nə́ tíʼə ńdzoŋə̂ pənoŋkə pə́ aláʼ pə́ənə́.

¹⁰Ńté ńgə́ Mosisə a nə sóŋ ńgə́, ‘Zóʼnə tǎ əgho pó mǎ əgho,’ lə́ ŋwu ntsəm páʼə a tsáb nə́ təpɔŋ ńté tǎ əyǐ kəənə mǎ əyǐ, pə́ shib ńjwítə yə́.

¹¹Lə́ nə́ pə́ ńdzéʼkə ńgə́ mbɔʼ ŋwunə a túgə ajú mbɔʼ a lɔg ńkwáalə tǎ əyǐ kəənə mǎ əyǐ, ḿbə́ sóŋ ńgə́, ‘Lɛ̌ Kɔbanə’ (páʼə ä sóŋ nə́ lə́ ńgə́, lɛ̌ ajúmə Əsê).

¹²Lə́ələ́ pə́ ńgə́ nə́ kě pɨ ńchîə á mə́ mɛdtə̂ nə́ yə́ a faʼə̂ anu yətsə́ á mbô tǎ əyǐ kɨ mǎ əyǐ pô.

¹³Lɛ̌ lə́ ndzaŋ nə́ myaʼ nə́ atséebə Əsê ńté noŋkə aláʼ əwɨ nə̈ zéʼkə nə́ pɨ ə́wə́. Mənu mimə nɨ́ nə́ mə́ kə́ ńchî ə́wə́ ándó mɨ́d mɨ páʼ nə̈ faʼ nə́.”

¹⁴Yeso a tíʼ ə́fóŋə apoŋə pɨ zə̂ ngǎ yitsə̌ ə́sóŋə á mbô pó ńgə́, “Jwə́ʼtə nə́ anu mäŋ sóŋ nə́, atûə azə́ənə́ á kə́ ńchígə́ ńdá ə́wə́.

¹⁵Ajú tsə́ á kě ə́wɨ́ chî páʼə á lǒo nə́ á apeŋ mbɔʼ ŋwunə a jîə á ghɛd ńgə́ kɔ a ŋwaʼ pô. Ajú páʼə ä ghɛd nə́ ńgə́ kɔ ŋwunə a ŋwaʼ lə̂ mənu páʼ mə̈ fɛ́d nə́ á mə́m yə́.”

¹⁶Ŋwu ntsəm páʼə a túg nə́ mətôglə, a zóʼə.

¹⁷Əghâ ándó a nə mɛdtə̂ nə́ apoŋə pɨ zə̂ ńgɛnə̂ ndɛ̂ lə́, ngaŋə́zoŋə́ndzəm əjí pó pítə yí nə́ anu páʼə atséebə́nə́múʼ zəənə́ ä sóŋ nə́.

¹⁸Yeso a sóŋə á mbô pó ńgə́, “Nə́ kě ənu kə́ jîə ə́ tsɛ pətsə́ pɨ, nə́ kě jî ńgə́ ajûtsə́ á kě ə́wɨ́ chî təmbɔʼ á lǒo á ndzəmə apeŋ ńkwúnə á mə́m ŋwu ńgɛd ńgə́ kɔ ngaŋə a ŋwaʼ?

¹⁹Ńté ńgə́ á kě lə́ á ntɨ́ yí kwúnə pô, á kwúnə lə́ á nəpəm yí ńtíʼə fɛ́lə á mbɨ yə́.” (Yeso a lɔg ə́lɨ́d lə́, á mə́ sóŋ nə́ ńgə́ məjî mətsəm mə́ ŋwaʼə̂ á mə́ jî nə́.)

²⁰A ghɛn nə́ mbiə á mə́ sóŋ nə́ ńgə́, “Ajú páʼə ä fɛ́d nə́ á mə́m ŋwu lə́ ajú páʼə ä ghɛd nə́ a kě ŋwaʼə̂ pô.

²¹Ńté ńgə́ əkwaŋ mənu təpɔŋ ətsəm ə̈ fɛ́lə lə́ á mə́m ntɨ́ ŋwunə ńtíʼə ńgɛlə̂ ńgə́ a jîə akwɛlə, ńdzəələ̂, ńjwítə, ńjîə mə̂ghabə.

²²Ńtúgə tɔ́gndě nə́ ajúmə ŋwu ndaʼə, ńtúg ntɨ́ təpɔŋə á mə́ fɨg nə́ pəənə, ńgɛlə̂ mənu mə́ nəféŋə, mə́ ŋwéetə nə́ pəənə, mə́ tsəŋ nə́ əlɛ́n ŋwunə, akɔ́ʼkə mbəəmə, pó mə ghəənə̂ nə́.

²³Mənu mə́ təpɔŋ mɨ mətsəm mə̈ fɛ́lə lə́ á mə́m ŋwu, ńtíʼə ńgɛlə̂ ngaŋə a kě ŋwaʼə̂ pô.”

²⁴Yeso a fɛ́lə aliʼ yi wɨ́ ńgɛnə̂ á əlá aláʼə Tayile pó Sidɔnə, ńkwúnə á ndɛ̂ yitsə̌, ḿbə́ ńkě kɔŋ ńgə́ ŋwu tsə́ a jî ńgə́ a chî ə́wɨ́ pô, ndú yitsə̌ ə́ pə́ ńkě ə́wɨ́ chî mbɔʼ a lyáŋ mbɨ əjǐ pô.

²⁵Məngyě yitsə̌ páʼə ajwiə təpɔŋ a nə ńchî nə́ á mbɨ mɔ́ əyǐ yi məngyě, a zóʼə anu ńté Yeso ńgyǐ ńgwǔəə á məko yə́.

²⁶Məngyě yi wə́ a nə ńkě lə́ Jus pô, pə́ nə ḿbîə yi lə́ aláʼə Fonisya á chî nə́ Silya. A tíʼ ḿbóʼmbô nə́ Yeso ńgə́ a kəmə̂ pɛ̌sê á mbɨ mɔ́ əyǐ yi məngyě.

²⁷Yeso a pə́ ńkwěe yí ńgə́, “Tíʼ pɔ̂nkə̂ pə́ jî tə́ ńdzɛ́d záʼə. Ńté ńgə́ á kě koʼnə̂ á mə́ kwá nə́ məjî mə́ pɔ̂nkə̂ ḿmaʼ nə́ məngwû pô.”

²⁸Məngyě wə̂ a kwěe ńgə́, “Lə́ anuə ḿbə́ Tǎ,” lə́, á lǒo məngwû mə́ noŋnə̂ nə́ á nətɛ́n nə́ təpɛlə pó jî əpuʼ məjî mə́ pɔ̂nkə̂.

²⁹Yeso a tíʼ sóŋə á mbô yí ńgə́, “Nə́ ntê akwe zɨ, mbɔʼ gho kwə̂ gho. Pɛ̌sê yi wə́ a fɛ́lə á mbɨ mɔ́ wə̂.”

³⁰A tíʼ ńkwə̂ á ngyaʼ yí ńdzə́ənə́ mɔ́ əyǐ wə̂ a noŋnə̂ á əkwu páʼ pɛ̌sê wə̂ a pɛ́d nə́ tə ə́fɛ́lə á mbɨ yə́.

³¹Yeso a tíʼ ə́fɛ́lə á əlá aláʼə Tayile, ńdaŋə̂ Sidɔn ńtsóolə á ndú Əfooghɨ Galiliə, ńdaŋə̂ mboʼ Dəkapoli

³²Pɨ pətsə́ pó yǐ nə́ akə̌tûə, ŋwu tsə́ páʼə a nə̈ ńtsáb nə́ kə́káŋ, ńtíʼ ḿbóʼmbô nə́ Yeso ńgə́ a noŋkə̂ apô ajíə á ndu yə́.

³³Yeso a tíʼ ə́fógə ŋwu wə̂ á mə́m ənɔ, ńdɔgə̂ yí ńgɛnə̂ aliʼ yitsə̌ tsɔʼə pó yí pə́ pɛ̌. Ńtíʼ ńnéŋ pəfî pə́ mbô píə á mətôglə yí, ńtwitə̂ mətwê ńkwumə̂ alə́əmə ají ə́wə́.

³⁴Ńnáŋ nəpó, ńtíʼ ḿbyádnə ńtsámnə ə́sóŋ nə́ ŋwu wə̂ ńgə́, “Efata” (páʼə á sóŋ lə́ ńgə́, “ŋáʼnə!”)

³⁵Tsɔʼə əghâ yí wɨ́ mətôglə mə́ ŋwu yi wɨ́ mə́ ŋáʼnə, alə́əmə ajíə á kyakə̂, a chúʼə á mə́ tsáb nə́ əshîʼnə.

³⁶Yeso a kwantə̂ ághɔ́b ńgə́ kɔ pó fiʼtə̂ ŋwu tsə̌, lə́ ndzaŋə a ghɛn nə́ nə́ mbiə á mə́ kwantə̂ nə́ ághɔ́b lə́, lə́ ndzaŋ pó ghɛn nə́ nə́ mbiə á mə́ lyaʼtə̂ nə́.

³⁷Anu yəwə́ á nə́ ḿbyádnə ńkɨʼnə̂ ŋwu ntsəm páʼə a nə ńdzóʼ nə́. Pó sóŋ ńgə́, “A faʼə̂ anuə atsəm əshîʼnə! A kə́ ńgɛlə̂ əkə̌tû ə́ zóʼ əliʼə́, pəchípóʼ pə́ tséebə!”