Read Awing Magə 8 Bible Online

Magə 8 - Awing bible

Magə 8

¹Nə́ əlěmbî pipə wɨ́, mboŋ pɨ pətsə́ pó yǐ ńtsɛntə̂. Ndzaŋə ándó pó nə́ ńkě nə́ ajú túgə á mə́ jî nə́ lə́, Yeso a fóŋ ngaŋə́zoŋə́ndzəm əjí ə́sóŋ nə́ pó ńgə́,

²“Maŋ túgə akóolə́mə́lə́ŋ ńté pɨ pəənə́, ńté ńgə́ pó pɛ́d tə ńchî pə̌gpo lɛ̌ əlěmbî pɛ́n teelə́, ḿbə́ ńkě ajú túg mbɔʼ pó jî pô.

³Təmbɔʼ maŋ ghɛd pó kwə̂ məngyaʼə́ pó, tə ghə́ maŋ zə́gə ághɔ́b, tə ḿbə́ pó yǐ wǔ njiə alaŋə́ ndúmə, ńté ńgə́ pɨ pətsə́ pó fɛ́d məndi mɔ́b mə́ sakə̂.”

⁴Ngaŋə́zoŋə́ndzəm əjí pó pítə yí ńgə́, “Mbɔʼ ŋwunə a lánə ńdɔg məjî lə́ ə́fó aliʼə́ tə́ ŋwu ghɛn mə́ koʼə̂ á mə́ zə́g nə́ ndɛn pɨ ghɛn ə́wə́?”

⁵Yeso a pítə ághɔ́b ńgə́ “Pɨ túgə apá lə́ ntáʼ ə́shíʼə́?” Pó kwěe ńgə́, “ntáʼə asaambɛ̂.”

⁶A tíʼ ńgɛd mboŋ pɨ zə̂ ə́ náanə á ndəsê. A kwáalə apá zə̂ ntáʼə asaambɛ̂ ə́fɛ̂ ndǎ á mbô Əsê, ḿbagtə̂ ázɨ́d ə́fɛ̂ á mbô ngaŋə́zoŋə́ndzəm əjí ńgə́ pó ghabtə̂ á mbô pɨ pə̂; pó kə́ ńgɛd ə́lə́ələ́.

⁷Pó nə ńkə́ ńtúg pɔ́ pə́ ntáʼ pə́ kə́yé əshûə. Yeso a kə́ fɛ̂ ndǎ nə́ zə́ələ́, ńtíʼ fɛ̂ á mbô ngaŋə́zoŋə́ndzəm əjí ńgə́ pó ghabtə̂ zə́ələ́ á mbô pó.

⁸Ŋwu ntsəmə a nə ńjî tə ńdzɛ́lə. Ngaŋə́zoŋə́ndzəm əjí tíʼ ńdagtə̂ əpuʼ ə́ nə ḿbɛ́d nə́ ə́ lwɛ́nkə mənka mɛ́n asaambɛ̂.

⁹Mbyâŋnə ə́ nə ńchî nə́ aliʼ yi wɨ́ ə́ nə ḿbə́ ándó tɔsə zɛ́n nəkwa. A tíʼ ńgɛd ńgə́ pó kwə́əkə,

¹⁰ńkwúnə á mə́mə aŋkənúʼə́ pópə ngaŋə́zoŋə́ndzəm əjí ə́ tíʼ ńgɛnə̂ á əlá aláʼə Dalmanuta.

¹¹Pəfalasi pətsə́, pó yǐəə á mbô Yeso ńchúʼə á mə́ zɔŋnə̂ nə́ atséebə. Pó nə̈ ńdoonə̂ lə́ á mə́ kwaʼlə̂ nə́ yə́, ńtíʼ ḿbítə yi nə́ akyeʼə́nu páʼə á lǒo nə́ á nəpóolə.

¹²Yeso a pyádnə ńtsámnə ńtíʼ ə́sóŋ ńgə́, “Lə́ ghɛlə̂ akə̂ pɨ pə́ ngoʼ pɨ pə́ pítə akyeʼə́nuə? Maŋ sóŋə áwɨ́ nə́ ndə̌ŋdəŋ ńgə́, pə́ kě akyeʼə́nu yətsə́ á mbô pó yǐ fɛ̂ pô!”

¹³A tíʼ ḿmɛdtə̂ ághɔ́b mbɨ ńkwúnə aŋkənúʼə́ ńtú ńgɛnə̂ ndzɛnə́.

¹⁴Ngaŋə́zoŋə́ndzəm Yeso nə ńdəgnə̂ á mə́ nyi nə́ nə́ apéenə məkálə́. Tə ńdéʼtə táʼ pó nə́ ńtúg nə́ á mə́mə aŋkənúʼə́.

¹⁵Yeso a kwantə̂ ághɔ́b ńgə́, “Pó lɔg ndɛlə,” ńté mbê apá Pəfalasi pópə yǐ Ɛlɔdə.

¹⁶Pó chúʼə á mə́ tsáb nə́ á mə́m pó ə́sóŋə ńgə́: “A sóŋ lɛ̌ ńté ńgə́ pɛn kě apá túg pô.”

¹⁷Yeso a pə́ ńjîə anu pö sóŋ nə́ ńtíʼ ḿbítə ághɔ́b ńgə́, “Lə́ ghɛlə̂ akə̂ nə́ tséebə ńté pə́ anu nə́ kě nə́ apá túg pô? Nə́ kě kə́ zə́ənə kɨ atûə azə́ənə́ á kě kə́ léenə? Məntɨ́ mɨ́ mə́ chígə́ ńtyantə̂ á pə́ ə́lɛ́?

¹⁸Nə́ túg əmə́g, ḿbə́ ńkě chî mbɔʼ nə́ jɨ́, ńkə́ ńtúg mətôglə ḿbə́ ńkě kə́ ńchî mbɔʼ nə́ zóʼ? Nə́ kě tə́ ńkwúmtə

¹⁹ndzaŋ maŋ nə ḿbagtə̂ nə́ apá zə̂ ntáʼ tâ á mbô pɨ pə̂ tɔsə tâ? Pɨ nə ńdagtə̂ əpuʼ lə́ mənka mɛ́n ə́shíʼə́?” Pó kwěe ńgə́, “Ntsɔb pɛ̌.”

²⁰“Ńkə́ ḿbə́ nə́ ndzaŋ maŋ nə ḿbagtə̂ nə́ apá ntáʼə asaambɛ̂ á mbô pɨ pə̂ tɔsə nəkwa,” Pɨ nə́ ńdagtə̂ əpuʼ lə́ mənka mɛ́n ə́shíʼə́? Pó kwěe ńgə́ “Mɛ́n asaambɛ̂.”

²¹A pítə ághɔ́b ńgə́, “Atûə azə́ənə́ á kě kə́ ḿbɛ́d ńdá?”

²²Pó yǐ ńkwúnə Bɛdsada, pɨ pətsə́ pó yǐ nə́ əfəg yitsə̌ ńtíʼə ḿbóʼmbô nə́ Yeso ńgə́ a kwumə̂ yə́.

²³A waamə̂ apô əfəg wə̂ ńdɔgə̂ yí ə́fɛ́d nə́ yə́ á mə́mə aláʼə. Əghâ ándó Yeso a nə ńtwǐ nə́ mətwê á əmə́g ŋwu wə̂ ńtíʼ noŋkə̂ mbô míə á ndu yí lə́ ḿbítə yí ńgə́, “Təmbɔʼ gho zə́ənə ajûtsə́?”

²⁴Ŋwu wə̂ a tíʼ ńnáŋə atǐ ə́sóŋ ńgə́ “Maŋ jɨ́ pɨ pó chîə pə́ ándó mətǐ mə́ tə́ nə́ ńkéelə ńnyinə̂.”

²⁵Yeso a kə́ ḿbɨ ńnoŋkə̂ mbô míə á əmə́g ŋwu wə̂. A tíʼ ə́fóokə əmə́g mí ńnáŋ əliʼ, əmə́g mí mə́ ŋwaʼə̂, a tíʼ ńdzə́ənə ajúmə atsəm əshîʼnə.

²⁶Yeso a ghɛlə̂ a kwə̂ ngyaʼə́ yí ḿbə́ ńkwantə̂ yi ńgə́, “Kɔ gho pɨ ńkwúnə á mə́mə aláʼə.”

²⁷Yeso pópə ngaŋə́zoŋə́ndzəm əjí pó tə́m ńgɛn nə́ əláʼ ə́ chî nə́ Seselya á mboʼ Filipi. Ndzaŋə ándó pó po nə́ ńtə́ nə́ ńgɛnə̂ lə́, Yeso a pítə ághɔ́b ńgə́, “Pɨ pə̈ sóŋə ńgə́ maŋ lə́ ə́wə́?”

²⁸Pó kwěe ńgə́, “Pɨ pətsə́ pə̈ sóŋə ńgə́ gho lə́ Jɔn Əfɛ̂nkǐə, pətsə́ pə́ ghə́ gho lə́ Elayija, pətsə́ pə́ pɨ ńgə́ gho lə́ táʼ ntûsê yitsə̌.”

²⁹Yeso a pítə ághɔ́b ńgə́, “Ńgɛd ə́lɛ́ nə́ pəənə́? Nə̈ sóŋə azɨ́ ńgə́ maŋ lə́ əwə?” Pita a kwěe ńgə́ “Gho lə́ Nchwádkə.”

³⁰Yeso a kwantə̂ ághɔ́b ńgə́, “Kɔ nə́ fiʼtə̂ ŋwu tsə̌ nə́ ŋwu maŋ pə́ nə́ wə́ələ́.”

³¹Yeso a chúʼə á mə́ zéʼkə nə́ ngaŋə́zoŋə́ndzəm əjí ńgə́: “Mɔ́ Ŋwunə a chîə á mə́ zɨ́ nə́ ngə́ʼ yi nɨ́ nə́, mətû mə́ aláʼ pópə pətə́kɔʼ pə́ ngaŋə́pêsê ḿbɨ ḿbə́ nə́ ngaŋə́zéʼkə pənoŋkə pə kǐəə yə. Pə́ yǒ jwítə yə́, lə́ əlě teelə́ ə́ laŋ a júmnə nəwûə.”

³²A nə ḿbyádnə ə́sóŋə anu yə́ ə́wə́ á ŋwaʼə̂ á mbô pó. Pita a pə́ ńdɔgə̂ yi ńgɛnə̂ á ntsəmə́ ńchúʼə á mə́ sáʼ nə́ yə́.

³³Lə́ Yeso a sɛdnə̂ ńnáŋ ngaŋə́zoŋə́ndzəm əjí ńtíʼ əsáʼə Pita ə́sóŋ ńgə́, “Lǒo gho á ndzəm maŋə, Satan,” Akwaŋə azô lə́ akwaŋə pəənə, lə́ kě akwaŋə Əsê pô.

³⁴Yeso a tíʼ ə́fóŋə apoŋə pɨ zə̂ pópə ngaŋə́zoŋə́ndzəm əjí ə́sóŋə á mbô pó ńgə́, “Mbɔʼ ŋwu tsə́ a tə́ ńdoonə̂ á mə́ zoŋ nə́ mə, a shib ńkǐ mbɨ əjǐ ńtwáamə atǐəpagləpaglə ají ńdzoŋə̂ mə.

³⁵Ńté ńgə́ ŋwu ntsəm páʼə ä lɔ nə́ á mə́ chwádkə nə́ nchîmbî əjǐ, a yǐ péŋkə zə́ələ́; lə́ ŋwu ntsəm páʼə a péŋkə nə́ nchîmbî əjǐ ńté mə pópə Anǔəsê a yǐ chwádkə zə́ələ́.

³⁶Ape páʼ ŋwunə a yǐ nə́ jî á yǐ pə́ lə́ akə̂ páʼ təmbɔʼ a kamtə̂ mbî jɨ ntsəm ḿbə́ ḿbéŋkə nchîmbî əjǐə?

³⁷Kɨ mbɔʼ ŋwunə a fɛ̂ lə́ akə̂ ńdɔg ńkwúblə nchîmbî əjǐ ə́wə́?

³⁸Mbɔʼ ŋwunə a kó əshɨ́ ńté mə pópə ndzeʼkə́ mə á mə́m ngoʼ mbî pɨ pə́ tə́ jî Əsê jɨ, pó ngoʼ ngaŋə́ghɛlə təpɔŋ jɨ, tə ḿbə́ Mɔ́ Ŋwunə a yǒ kə́ kó əshɨ́ té yə́ á əghâ ándó Mɔ́ Ŋwunə a yǒ nə́ tə́ yǐəə pópə məntúmə́sê mimə ŋwaʼ nə́ á mə́m nəgháʼ Tǎ əyǐə.”