Read Awing Magə 9 Bible Online

Magə 9 - Awing bible

Magə 9

¹Yeso a ghɛn nə́ mbiə á mə́ sóŋ nə́ ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, pɨ pətsə́ pə́ chîə aliʼə́ nə́ páʼ pó yǒ nə́ kě kwû tə ghə́ pó zə́ənə Anuə Nəfoonə Əsê á yǐ nə́ mətɨ mi pô.”

²Əlěmbî pɛ́n ntogə́ ə́ laŋ, Yeso a lɔgə̂ Pita pó Jɛmsə nə́ Jɔnə pó po kɔ́ʼ ńgɛnə̂ á ndu tə́sɛ nkwəənə tsɔʼə pó nə́ pó. A kwúblə ńtíʼ ŋ́ŋwaŋkə̂ ŋwaŋkə̂ nə́ á mbi pó.

³Ətsəʼ əpí ə́ tíʼə ə́fógə ńgə́ púu, ə́fóg tə ńtsɛɛlə̂ ándó mbɔʼ ŋwu tsə̌ á ndu mbîə a sogə̂ pɨ́d ə́ chîə.

⁴Elayija pó Mosisə jáʼ ńtíʼə ńtséebə pópə Yeso.

⁵Pita a sóŋə á mbô Yeso ńgə́, “Ndzéʼkə, á pɔŋ ndzaŋ pɛn chî nə́ aliʼə́ nə́. Tíʼ pəg kwúd məntaŋ mɛ́n mə́ teelə́, táʼə á mbô gho, táʼə á mbô Mosisə, táʼə yitsə̌ á mbô Elayija.”

⁶Pita a kə sóŋ ə́lɨ́d lə́ ńté ńgə́ a nə ńkě jîə anu mbɔʼ a sóŋ pô ńté ńgə́ pó nə ńtə́ ḿbyádnə ḿbɔ́gə.

⁷Əghâ yi wɨ́ alə́mə á jáʼ ńkə́bkə ághɔ́b, ngye yitsə̌ ə́ tíʼ ə́fɛ́lə á mə́m alə́m yə wɨ́ ə́sóŋ ńgə́, “Lɛ̌ lə́ móonə mə páʼ maŋ kɔŋ nə́ yə́, zóʼ nə́ á mbô yə́.”

⁸Tsɔʼə əghâ yi wɨ́ pó pɨ ńgə́ ńnáŋ əliʼ ńkě a ŋwu tsə́ pɨ ńjɨ́ pô tə ńdéʼtə Yeso.

⁹Əghâ ándó pó nə ńtə́ nə́ ńtsóolə á ndu nkwəənə wə́ lə́, Yeso a kwantə̂ ághɔ́b ńgə́ kɔ pó fiʼtə̂ ŋwu tsə́ nə́ anu pó jɨ́ nə́ tə ńkoʼə̂ alě Mɔ́ Ŋwunə a yǒ nə́ júmnə nəwûə.

¹⁰Pó nə ńdɔʼkə̂ anu yəwə́ á mə́m pó, lə́ ḿbə́ ńtíʼə ńtséebə á tətɨ pó ńgə́, “Mə́ júmnə nə́ nəwû lə́ akə̂?”

¹¹Pó tíʼ ḿbítə yí ńgə́, “Lə́ ghɛlə̂ akə̂ ngaŋə́zéʼkə pənoŋkə pó sóŋ ńgə́ Elayija a yǒ shib yǐəə?”

¹²Yeso a kwěe ńgə́, “Lə́ ndə̌ŋdəŋ Elayija a yǒ peg yǐəə á mə́ tsoŋkə̂ nə́ mənu mətsəm mə́ koʼnə̂. Lə́ pə́ ńgɛlə̂ akə̂ Aŋwaʼlə Əsê á sóŋə ńgə́ Mɔ́ Ŋwunə a yǒ zɨ́ ngə́ʼ yi nɨ́ nə́ pə kǐəə yə́?

¹³Mäŋ fiʼtə̂ áwɨ́ ńgə́, Elayija a nə ḿbɛ́d tə ńgyǐəə, lə́, pɨ pó pə́ ə́faʼə̂ anuə atsəmə a mbɨ yí ndzaŋ ntsəm pó kɔŋ nə́, tsɔʼə ndzaŋ páʼ Aŋwaʼlə Əsê á sóŋ nə́ ńté yə́.”

¹⁴Əghâ ándó pó nə ńtsó nə́ á ndu nkwəənə ńtéekə apuʼə ngaŋə́zoŋə́ndzəm Yeso lə́, ńjɨ́ mboŋ ŋwu məsɔŋə́ aliʼ yəwə́, ngaŋə́zéʼkə pənoŋkə pətsə́ pó nə ńtə́ ńdzɔŋnə̂ pópə ngaŋə́zoŋə́ndzəm Yeso.

¹⁵Əghâ ándó ŋwu ntsəmə a nə ńjɨ́ nə́ Yeso lə́, á kɨʼnə̂ ághɔ́b pó tíʼ ńgɛnə̂ á mə́ chaʼtə̂ nə́ yə́.

¹⁶Yeso a pítə ághɔ́b ńgə́, “Pɨ̌ po zɔŋə̂ lə́ akə̂?”

¹⁷Ŋwu tsə̌ á mə́m ŋwu məsɔŋ wə̂ a kwěe ńgə́, “Ndzéʼkə, maŋ pěʼ ńgyǐ nə́ móonə mə á mbô gho páʼə ajwiə təpɔŋ á chî nə́ á mbɨ yí ńgɛlə̂ ńgə́ kɔ a tséebə.

¹⁸Əghâ ətsəm páʼə á wam nə́ yí, á záʼkə yí ḿmaʼə̂ á ndəsê ä tíʼə ə́fwɔʼkə̂ mətwê á ntso yí, ńkɔ́lə məsɔŋ mí mbɨ əjǐ ə́ tíʼ ńtyantə̂ tsɔʼə ntsəmə. Maŋ pěʼ ə́sóŋ nə́ ngaŋə́zoŋə́ndzəm əzô ńgə́ pó kəmə̂ ajwi jɨ́d zə̂ pó pə́ ńkě chî təmbɔʼ pó kəm pô.”

¹⁹Yeso a kwěe ńgə́, “Wə̌ə, pɨ pə́ ngoʼ pɨ, pi pə́ tə mbimə́! Maŋ yǒ lánə chîə á mə́m pɨ tə koʼ lə́ ə́lɛ́? Maŋ yǒ wam ntɨ́ nə́ pɨ tə koʼ lə́ ə́lɛ́? Yǐ nə́ nə́ mɔ́ yi wə́ á mbô maŋə.”

²⁰Pó tíʼ ńgyǐ nə́ yə́. Əghâ ándó ajwi zə̂ a nə ńjɨ́ nə́ Yeso lə́, ńtɔ́g ńgwaamə̂ mɔ́ yi wɨ́, ńchiʼə̂ yí a tíʼ ńgwǔəə á ndəsê ńtíʼə ńkablə̂ ə́fwɔʼkə̂ mətwê a ntso yə́.

²¹Yeso a pítə tǎpə mɔ́ yi wɨ́ ńgə́, “Aghɔ zəənə́ á chîə á mbɨ yí lə́ ngoʼ ə́shíʼə́?” A kwěe ńgə́, “Ə́fɛ́d pɔ̂nkə̂.

²²Ä zá ḿmaʼə̂ yə́ á mə́m mógə́ kəənə á ńkǐəə á mə́ jwítə nə́ yə́. Lə́ mbɔʼ gho chî təmbɔʼ gho ghɛlə̂ anu yətsə́, gho kó mələ́ŋ mə́g ńkwáalə áwə́gə́.”

²³Yeso a sóŋ ńgə́, “Gho ə́sóŋə a pə́ ńgə́ təmbɔʼ maŋ chî təmbɔʼ maŋ ghɛlə̂ anu yətsə́?” Mbɔʼə anu yətsə́ a kě ŋwu páʼə a túg nə́ mbimə́ tsɛ pô.

²⁴Tǎ pə mɔ́ wə̂ a tɔ́g ńkyéŋ ńgə́, “Maŋ túg mbimə́ ə́ pə́ ńkə́gə; kwáalə mə ḿbeg mbimə́ mə.”

²⁵Ndzaŋə ándó Yeso a nə ńjɨ́ nə́ ńgə́ ŋwu məsɔŋə́ a tə ńkwəŋnə̂ ńgyǐəə aliʼ yi wɨ́ lə́, ńtíʼ ə́sáʼə ajwiə təpɔŋ zə̂ ə́sóŋ ńgə́, “Ajwiə akə̌tû pó chípóʼ, maŋ sóŋ ńgə́ gho fɛ́lə á mbɨ yí tə kɔ gho láʼ ḿbɨ ńkə́ ńkwúnə.”

²⁶Ajwi zə̂ a póʼ ngoŋ ńtíʼ ńchiʼə̂ mɔ́ wə́ nə́ mətɨ, ə́fɛ́lə á mbɨ yə́. Mɔ́ wə́ a tíʼ ńnoŋnə̂ ándó akwûə ajú tə pɨ pipə nɨ́ nə́ pə́ tíʼə ə́sóŋə ńgə́, “A kwûə.”

²⁷Lə́ Yeso a pə́ ńgwaamə̂ apô ají ńdookə̂ yə́ á ndəsê, a tíʼ ńdǒo á ndəsê ńtə́əmə.

²⁸Əghâ ándó Yeso a nə mbɨ nə ńtíʼ ńkwúnə á ndɛ̂, ngaŋə́zoŋə́ndzəm əjí ə́ pítə yə́ a ndzəmə ndzəm ńgə́, “Mbɔʼ pəg pěʼ ńkě kəm lə́ ńté akə̂?”

²⁹Yeso a kwěe ńgə́, “Mbɔʼ lə́ fóg tsɔʼə achaʼtə́sê ə́fóg ndzaŋ zəənə́[5].”

³⁰Pó fɛ́lə aliʼ yi wɨ́ ńtóokə Galiliə. Yeso a nə ńkě kɔŋ ńgə́ ŋwu tsə̌ a jîə aliʼ pó chî nə́ ə́wɨ́ pô,

³¹ńté ńgə́ a nə ńtə́ ńdzéʼkə ngaŋə́zoŋə́ndzəm əjíə, ə́sóŋə á mbô pó ńgə́, “Pə́ yǐ fɛ̂ Mɔ́ Ŋwunə á mbô pɨ pó jwítə yə́, əlě teelə́ ə́ laŋə̂ a pɨ ńjúmnə.”

³²Atûə azóobə́ á pə́ ńkě lá nə́ anu páʼ a sóŋ nə́ lə́ pô, pó pə́ ḿbɔ́gə á mə́ pítə nə́ yə́.

³³Pó yǐ ńkwúnə á Kapanawum, ńkwúnə á ndɛ̂ a pítə ághɔ́b ńgə́, “Nə́ pěʼə́ ńtséebə ə́sóŋə lə́ ńgə́ akə̂ á alaŋə́?”

³⁴Pó pə́ ńnaʼə̂ ághɔ́b ńté ńgə́ pó pěʼ ńtə́ ńnyinə̂ á alaŋə́ lə́ ńtə́ ńdzɔŋnə̂ ńgə́ ŋwu páʼə a tsɛ nə́ ŋwu ntsəm lə́ əwə?

³⁵Yeso a náanə á ndəsê ə́fóŋ ngaŋə́zoŋə́ndzəm əjí zə̂ ntsɔb pɛ̌ ə́sóŋ nə́ pó ńgə́, “Təmbɔʼ ŋwunə a tə́ ńdoonə̂ á mə́ chî nə́ á mbi, a shib ńdwegtə̂ ndzəm ńkə́ ḿbə́ ngaŋəfaʼ ŋwu ntsəmə.”

³⁶A lɔgə̂ mɔ́ kə́nyaŋ mɔ́ yitsə̌ ńgɛlə̂ a tə́əmə á mə́m pó, a twáamə yí ńtúgə á mbô yí ə́sóŋ nə́ pó ńgə́,

³⁷“Ŋwu ntsəm páʼə a kwá nə́ táʼ mɔ́ kə́nyaŋ mɔ́ nə́ yitsə̌ nə́ əlɛ́nə mə, a kwá lə́ mə; Ŋwu ntsəm páʼə a kə́ nə́ ńkwáalə mə, a kě lə́ mə kwá pô, ḿbə́ ńkwá lə́ ŋwu páʼə a tú nə́ mə.”

³⁸Jɔnə a sóŋə á mbô yí ńgə́, “Ndzéʼkə, pəg zə́ənə ŋwu tsə̌ a tə́ ńkəmə̂ pɛ̌sê nə́ əlɛ́n əghô, pəg sóŋ ńgə́ kɔ a pɨ ńkə́ fiʼ ńté ńgə́ lə́ kě táʼ ŋwu əwɛn yitsə̌ pô.”

³⁹Yeso a sóŋə á mbô yi ńgə́, “Kɔ nə zɔŋ nə́ yí ńté ńgə́ ŋwu ntsəm páʼə a faʼ nə́ nkɨʼnənu nə́ əlɛ́nə mə, mbɔʼ a yǐ ńkě mənaŋə́ atûə mə pɨ ńjî pô.

⁴⁰Ńté ńgə́ ŋwu ntsəm páʼ a kě nə́ məsɔŋə́ á ndzəm pɛn sɔb pô, lə́ ngaŋndzəm əwɛ́nə.

⁴¹Mäŋ fiʼtə̂ áwɨ́ nə́ ndə̌ŋdəŋ ńgə́, ŋwu ntsəm páʼə a fɛ̂ nə́ ndɔ́ŋ nkǐə á mbô pɨ nə́ əlɛ́nə mə ńté ńgə́ pɨ lə́ ngaŋə́zoŋə́ndzəm mə, a yǒ kě ntsɔ́ʼəfaʼ əjǐ póŋ pô.”

⁴²Mbɔʼ ŋwu tsə̌ a ghɛd táʼ mɔ́ nə́ yitsə̌ páʼə a pí nə́ nə́ maŋ a ghɛlə̂ təpɔŋ, tə ḿbə́ a pěʼ ḿbɔŋ ńgə́ mbɔʼ pə pěʼ ńkwúlə mɛ́ tə́kɔʼ ngɔʼə aghɔʼə́péenə á ndě yí ḿmaʼə̂ á mə́m tə́kɔʼ nkǐə.

⁴³Təmbɔʼ apô azô á ghɛd ńgə́ gho ghɛlə̂ təpɔŋ, gho lə́gə zə́ələ́. Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎmɔʼə́ nə́ táʼə apô ńtsɛɛlə̂ á mə́ túg nə́ mbô mə́ mbɛ̌ ə́ pə́ ghɛnə̂ á mə́m móg Satan páʼ wɨ́d ə́ kě nə̈ pə́gnə pô.[6]

⁴⁴

⁴⁵Təmbɔʼ akoolə azô á kə́ ńgɛd ńgə́ gho ghɛlə̂ təpɔŋ, lə́gə ájɨ́d ḿmyaʼə̂! Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎmɔʼə́ nə́ táʼ ntá ńtsɛɛlə̂ á mə́ túg nə́ məko mɛ́n mbɛ̌ ə́ pə́ ghɛnə̂ á mə́m móg Satanə. [7]

⁴⁶

⁴⁷Təmbɔʼ nələ́g zô nə́ kə́ ńgɛd ńgə́ gho ghɛlə̂ təpɔŋ, fwɔŋə̂ ájɨ́d ḿmyaʼ ńté ńgə́ á pɔŋə̂ á mə́ kwú nə́ á mə́mə Anuə Nəfoonə Əsê nə́ táʼ nələ́g ńtsɛɛlə̂ á mə́ túg nə́ əmə́g mə́ mbɛ̌ pə pə́ ḿmaʼə̂ gho á mə́m móg Satanə.

⁴⁸Aliʼ páʼ “əkəgho əpɔ́b ə́ kě nə́ kwûə pô, móg ə́ kě kə́ ḿbə́gnə pô.

⁴⁹Ńté ńgə́ pə́ yǒ tsoŋkə̂ ŋwu ntsəm nə́ móg tsɔʼə ndzaŋ páʼ pə̈ tsoŋkə̂ nə́ əpúmə afyaʼə́nu nə́ ngwáŋ lə̂.

⁵⁰Ngwáŋ mə́ pɔŋə̂, lə́ mbɔʼ mə́ chî ə́ pɛ́lə ləəmə̂ pô, nə́ ghɛd ə́lɛ́ mə́ pɔŋə̂ pɨ ləəmə̂? Túg nə́ ngwáŋə á mə́m pɨ ńjî ńgə́ mbwɔ́dnə ə́ chîə á tətɨ pəənə́.”