Read Awing Lukasə 1 Bible Online

Lukasə 1 - Awing bible

Lukasə 1

¹Tǎ Tiyofilos: Pɨ pipə nɨ́ nə́ pə́ kə fǔəlóʼə á mə́ ŋwaʼlə̂ nə́ mənu páʼ mə́ kə lɔg nə́ aliʼə́ á mə́m pɛnə̂.

²Pó kə ŋwaʼlə̂ lə́ tsɔʼə ndzaŋ pəənə ándó pə́ kə jɨ́ nə́ ə́fɛ́lə á nəfɛdnə́ pə́ kə fiʼtə̂ nə́ áwɛ̂nə. Po kə jɨ́ lə́ ńkə́ ńkád ńgeebə̂ atsáb yəwə́.

³Ndzaŋ maŋ kə lɔg nə́ ndɛd ńdzéʼ mənu mɨ ə́fɛ́lə á nəfɛdnə́ lə́ ńkwaŋ ńgə́ á yǐ pɔŋ mbɔʼ maŋ ŋwaʼlə̂ mɨ́d ndzaŋ mə́ kə lɔg nə́ aliʼə́ á mbô gho Tiyofilos, ŋwu ngóʼkə.

⁴Maŋ loonə̂ lə́ á mə́ ghɛd nə́ ə́lɛ̌ ńjî ńgə́ gho jîə ndə̌ŋdəŋ ńté mənu ándó páʼ pə́ kə fiʼtə̂ nə́ gho ə́wɨ́ lə̂. Pə́ lyaʼtə̂ ndɛd pə́ yǒ nə́ pîə Jɔnə, ŋwunə ä fɛ̂ nə́ nkǐ lə́.

⁵A nə ḿbə́ nə́ ndɛd Ɛlɔdə a kə pə́ nə́ əfo á Judya lə́, ŋwu Əsê yitsə̌ a kə chî ə́wɨ́ pə́ fóŋə nə́ Zakalya. A kə fɛ́d lə́ nə́ nkyeetə pɨ pə́ Əsê pə́ Abija. Ngwě əyǐ Elisabɛlə a kə kə́ ə́fɛ́d lə́ nə́ əla pɨ pə́ Əsê.

⁶Pó kə tɨ́ ndə̌ŋdəŋə́ á mbi Əsê nə́ ngɛdmə́nu əghóobə́, ńkə́ ńdzóʼnə məntəgə́ mə́ Mmaʼmbî pópə pənoŋkə pí tsɔʼə pətsəm tə fid yitsə̌.

⁷Pó nə ńkě mɔ́ túg pô ńté ńgə́ Elisabɛlə a kə pə́ lə́ nkyě məngyě, pó pətsəm pɨ ńdɛnə̂ ághóobə́.

⁸A kə pɛn ḿbə́ alě tsə́ Zakalya a tə́ faʼə̂ afaʼə yə́ ándó ŋwu əsê á mə́m Tə́kɔʼndɛ̂sê ə́ chî nə́ á Jɛlusalɛm lə̂. Lə́ kə pə́ ndɛd nkyeetə əzoobə́ á mə́ faʼ nə́.

⁹Ndzaŋ noŋkə pɨ pə́ Əsê á kə nɨd nə́, pó kə maʼ əpúmə á ndəsê, əlɛ́n əyí ə́ fɛ́lə a chîə á mə́ kwú nə́ á mə́m Tə́kɔʼndɛ̂sê ghɛnə̂ á mə́m nəpá nə́ Əsê ə́ toonə̂ aleŋ ghóʼkə Əsê ə́wə́.

¹⁰Ndzaŋə ándó ənɔ pɨ ə́ kə chî nə́ apeŋ nə́ ndɛlə́ a kə tɔ nə́ aleŋ ńté ńchaʼtə́sê lə́,

¹¹ntseŋndɛ̂ Mmaʼmbîə a ghabkə̂ ə́fɛ́lə á mbi yə́, ntə́əmə á mbi nəpá zə̂, nə́ əlá apô yə təənə.

¹²Ndzaŋ Zakalya a kə jɨ́ nə́ yí lə́ ḿbɛ́nkə, apɔ́gə á kwúnə á mbɨ yə́.

¹³Lə́ ntseŋndɛ̂sê wə̂ a sóŋə á mbô yí ńgə́, “Kɔ gho pɔ́gə, Əsê a zóʼə achaʼtə́sê azô, ngwě əgho Elisabɛlə a yǐ pîə mɔ́ mbyâŋnə, gho chwǐ əlɛ́n əyí nə́ Jɔnə.

¹⁴Mɔ́ wə̂ a yǒ yǐ nə́ akɔŋtə. Pɨ pi nɨ́ nə́ pə́ kə́ ńkɔŋtə̂ ńté ńgə́ pə́ pîə yə́.

¹⁵A yǒ pə́ lə́ chigə mɛ́ ŋwunə á mbi Mmaʼmbîə, ə́ láʼ kě məloʼ mimə tyantə̂ nə́ ńnô pô kə́ lwɛ́nkə nə́ Ajwǐəsê ə́fɛ́d nə́ alě pə́ pî nə́ yə́,

¹⁶A yǒ sɛdkə̂ pɔ́ pə́ Islɛl pi pə́ nɨ́ nə́ pó pəənə̂ á mbô Mmaʼmbî páʼə a pə́ nə́ Əsê əzoobə́.

¹⁷A yǐ kwá mbi Mmaʼmbî nə́ ajwi pó mətɨ mə́ ntûsê Elayija. A lǒo kyeetə̂ məntɨ́ mə́ pɔ́ pópə pətǎ ngǎ yitsə̌, ə́ pɨ ghɛd pɨ pə́ kə̈ tyantə̂ nə́ atû pó jî ənu ńtíʼə ə́faʼə̂ anu páʼ á koʼnə̂ nə́. A yǒ tyáŋtə pɨ pə́ Mmaʼmbî pó koʼnə̂ ńtə́ ḿbyáabə yə́.”

¹⁸Zakalya a pítə ntseŋndɛ̂sê ńgə́, “Maŋ yǐ jî lə́ ə́lɛ́ ńgə́ á yǐ pə́ lə́ ndzaŋ gho sóŋ nə́? Ńté ńgə́ maŋ lə́ ndɛn ŋwunə, ngwě mə a kə ńdɛnə̂.”

¹⁹Ntseŋndɛ̂sê a kwěe yí ńgə́ maŋ lə́ Gabliya, mäŋ tə́əmə á mbi Əsê; a pɛn ńtúmə mə ńgə́ maŋ yǐ ńtséebə á mbô gho, ńtû ńnáŋkə nkɨ yi əshîʼnə ghɛnə́ á mbô gho.

²⁰Lə́ gho pɛn ńkě nkəənə mə pí pô, á chîə mə́ chî nə́ tsɔʼə ndzaŋ maŋ sóŋ nə́ nə́ gho lə́, nə́ ndɛd yi wə́. Ə́fɛ́d nə́ pə əghâ nə́, gho yǐ sɛlə̂ chípóʼə́, tə koʼə̂ alě páʼ mənu mɨ́d mɨ mə́ yǐ nə́ lɔgə̂ aliʼə́.

²¹Nə́ ndɛd jɨ pɨ pó kə chî nə́ apeŋ ḿbyáabə Zakalya lə́, pó tíʼə ńkwaŋə̂ á kɨʼnə̂ ághɔ́b ńgə́ a pɨ ńtíʼ ńgɔ́ŋə á mə́m Tə́kɔʼndɛ̂sê ə́faʼə̂ lə́ akə̂?

²²Ndzaŋ a kə fɛ́d nə́ apeŋ lə́ ńkě pɨ ńjîə á mə́ tsáb nə́ pô, pó tíʼ ńjî ńgə́ a zə́ənə alə́ŋkə anu yitsə̌ á mə́m Tə́kɔʼndɛ̂sê. A kə kě chî təmbɔʼə a pɨ ńtsáb pô, ńtíʼə ńnəələ̂ mənu mətsəm tsɔʼə nə́ mbô.

²³Ndzaŋə ándó páʼ ndɛlə́ afaʼ əjǐ ə́ kə měe nə́ lə́, a pəənə̂ á ngyaʼə́ yə́.

²⁴Ndɛd yitsə̌ ə́ laŋ, ngwě yi Elisabɛlə a chî nə́ móonə, ńdɔg sáŋ tâ ńkə̈ ńdyáŋə tsɔʼə á ndɛ̂:

²⁵Ə́sóŋə ńgə́, “Mmaʼmbîə a faʼə̂ zəənə́ á mbô maŋ nə́ ndɛd zəənə́, a nəələ̂ akɔŋnə ajíə á mbô maŋ ńtû ə́fóg əsə́ənə atû maŋə.”

²⁶Sáŋ ntogə́ ə́ laŋ, páʼ Elisabɛlə a kə chî nə́ nə́ mɔ́, Əsê a túmə ntseŋndɛ̂ əyǐ Gabliya á Nazalɛlə, á aláʼ yətsə́ á mə́m Galiliə,

²⁷á mbô mɔ̂ məngyě yitsə̌ páʼ a nə ńkě nə́ anuə ŋwu mbyâŋnə kə̂ jîə pó, əlɛ́n əyí pə́ Mɛɛlə. A pə́ mɔ̂ məngyě páʼ Jɔsɛfə, a kə fɛ́d nə́ nə́ əla pə Debid lə́ a kə tə́g nə́ nə́ ngwě yə́.

²⁸Ntseŋndɛ̂ wə̂ a ghɛnə̂ á mbô yí ə́sóŋ ńgə́, “Mäŋ chaʼtə̂ gho. Əsê a kɔŋə̂ gho lɛ tətətə. Mmaʼmbîə a pɨ ńnéŋ mbwɔ́dnə nə́ gho.”

²⁹Atsáb zəənə́ á nə ńjwaʼə̂ Mɛɛlə lɛ tətətə, a kwaŋ ńgə́ lɛ̌ zə́ənə́ ntê achaʼtə?

³⁰Lə́ ntseŋndɛ̂sê wə̂ a pə́ ə́sóŋ nə́ yí ńgə́, “Mɛɛlə, kɔ gho pɔ́gə, Əsê a kɔŋə̂ gho.

³¹Gho yǐ chî nə́ móonə, ə́ pîə mɔ́ mbyâŋnə, ə́fɛ̂ əlɛ́n yí ńgə́ Yeso.

³²A yǒ pə́ lə́ ŋwu yi ngweŋə́ pə̈ fóŋə yí nə́ Mɔ́ Əsê, Əsê páʼ a tsɛ nə́ ajúmə atsəmə. Mmaʼmbî Əsê á yǒ fɛ̂ nəfɔ nə́ tǎ əyǐ Debilə á mbô yə́,

³³A yǒ sáʼ nəfɔ nə́ ndɛ̂ Jekɔb tə mɛdnə̂. Lə́ nəfɔ jí nə́ láʼ kě měe pô.”

³⁴Mɛɛlə a pítə ntseŋndɛ̂ wə̂ ńgə́, “Á yǐ pə́ lǎa lə́ ə́lɛ́ páʼ maŋ kě nə́ anuə ŋwu mbyâŋnə kə́ jîə pô?”

³⁵Ntseŋndɛ̂ wə̂ a kwěe ńgə́, “Ajwǐəsê páʼ a tsɛ nə́ ajúmə atsəmə a yǐ tsóolə á mbɨ gho mətɨ mə́ Əsê mə́ kə́bkə gho, ńjî ńgə́ mɔ́ yi ŋwaʼ nə́ pə́ yǐ nə́ pî lə́, pə́ lǒo fóŋ nə́ mɔ́ Əsê.

³⁶Tsɔʼə ndim əgho Elisabɛlə a pǎtə ńdɛn lə́, ḿbə́ ńchî nə́ móonə, yí páʼ pə́ nə̈ ə́fóŋ nə́ yí nə́ nkyě məngyě lə́, a chî nə́ mɔ́ sáŋ ntogə́ əghâ nə́

³⁷ńté ńgə́ anu yətsə́ á kě Əsë tsɛɛlə̂ pô.”

³⁸Mɛɛlə a kwěe ńgə́, “ô, maŋ lə́ ngaŋəfaʼ Əsê, tíʼə á chîə á mbô maŋ tsɔʼə ndzaŋ páʼ gho sóŋ nə́ lə́. Ntseŋndɛ̂ wə̂ a tíʼ ńgɛnə̂ yə́.”

³⁹Əghâ yi wɨ́, Mɛɛlə a lǒo á əsê ńgə́glə ńgɛnə̂ á tɔ̂ŋ yitsə̌ á mə́mə aláʼə Judya,

⁴⁰ńtíʼ ńkwúnə á ndɛ̂ Zakalya ńchaʼtə̂ Elisabɛlə.

⁴¹Əghâ ándó Elisabɛlə a kə zóʼ nə́ achaʼtə Mɛɛlə lə, móonə a lîə á nəpəm yə́, a lwɛ́nkə nə́ Ajwǐəsê.

⁴²A tsáb ngye əjǐ ə́ kɔ́ʼə atǐə, a ə́sóŋ ńgə́, “Mbwɔ́dnə ə́ chîə á mbô gho á mə́m pəngyě, Mbwɔ́dnə ə́ kə́ ńchî nə́ mɔ́ páʼ gho yǐ nə́ pîə!

⁴³Lə́ ghɛlə̂ akə̂ pə́ chígə́ ńkɔŋə̂ mə lɛ tə mǎpə Mmaʼmbîə mə a yǐəə á mbi maŋə?

⁴⁴Maŋ jî ńgə́ gho lə́ mǎpə Mmaʼmbîə mə ńté ńgə́ ndzaŋ maŋ pěʼ nə́ ńdzóʼə achaʼtə azô lə́, móonə a kɔŋtə̂ tə ńdîə á nəpəm maŋə.

⁴⁵Mbwɔ́dnə ə́ chîə á mbô gho páʼ gho pí nə́ ńgə́ anuə atsəm Mmaʼmbîə a sóŋ nə́ á yǐ lɔgə̂ aliʼə́.”

⁴⁶Mɛɛlə a sóŋ ńgə́, “Nchîmbîə mə ə́ ghóʼkə Mmaʼmbîə.

⁴⁷Ntə́əmə mə ə́ kɔŋtə̂ nə́ Əsê páʼ a pə́ nə́ nchwádkə mə.

⁴⁸Ńté ńgə́ a kwúmtə ndzaŋə ándó páʼ ngaŋəfaʼ yə́ a kə tsóokə nə́ mbɨ əjǐə. Ə́fɛ́d nə́ pə ə́sɛ̂n ńgɛn nə́ mbi, akɔʼə ŋwu mɔsɔŋə́ atsəmə á láʼ tíʼə ə́sóŋə ńgə́, Əsê a néŋ mbwɔ́dnə nə́ maŋə.

⁴⁹Ńté ńgə́ Əsê páʼ ə́ tyantə̂ nə́ ńtsɛɛlə̂ ŋwu ntsəm ə́ faʼ pətə́kɔʼ pə́ mənuə á mbô maŋə, əlɛ́n əyí lə́ yi ŋwaʼ nə́.

⁵⁰Ä kóolə mələ́ŋ mə́ ŋwu ntsəm páʼ a pɔ́g nə́ yə́, ə́fɛ́lə nə́ táʼə akɔʼ ńkwúnə nə́ yitsə̌.

⁵¹Ä tsɛɛkə̂ apô ají páʼ á túg nə́ mətɨ ə́shaʼtə̂ pɨ pó kɔ́ʼkə nə́ mbɨ əzɔb pópə əkwaŋ mənu əpóobə́.

⁵²A tsóokə pəfo (pətsə́) á aləŋ pó, ḿbə́ ńkɔ́ʼkə pɨ páʼ pó tsóokə nə́ mbɨ əzoobə́.

⁵³A zə́g pɨ páʼ nji ə́ záŋ nə́ ághɔ́b nə́ əpú pi əshîʼnə. Ḿbə́ ńkəm ngǎŋnkáb pó ghɛn mbô kətaŋə.

⁵⁴A kwáalə ngaŋəfaʼ əyǐ Islɛlə, ńkwúmtə akóolə́mə́lə́ŋə ají ndzaŋ a kə laʼnə̂ nə́

⁵⁵á mbô Ablaamə pópə ngwud əjǐ tə mbî měe.”

⁵⁶Mɛɛlə a nə ńchî pó Elisabɛlə ándó sáŋ teelə́ ńtíʼ ḿbəənə̂ á ngyaʼə́ yə́.

⁵⁷Ndɛd ə́ nə ńkoʼə̂ á mbô Elisabɛlə á mə́ pî nə́ mɔ́ əyǐ lə́, A pîə mɔ́ mbyâŋnə.

⁵⁸Ngaŋ məpad əjí pópə pəlim pí pó zóʼ ńgə́ Mmaʼmbîə a nəələ̂ akóolə́mə́lə́ŋ ajíə á mbô yə́, pó po tíʼ ńkɔŋtə̂.

⁵⁹Móonə a nə ḿbə́ əlěmbî nəfeemə́ pə́ yǐəə á mə́ póʼ nə́ yə́, ńchîə á mə́ chwǐ nə́ əlɛ́n yí nə́ Zakalya páʼ a pə́ nə́ əlɛ́n tǎ əyǐə.

⁶⁰Lə́ mǎ əyǐə a kǐ ə́sóŋ ńgə́, “Ngá, əlɛ́n yí lə́ Jɔnə.”

⁶¹Pó sóŋ nə́ yí ńgə́, “Ŋwu əla wɨ́ yitsə̌ a kě əlɛ́n ghɛn túg pô.”

⁶²Pó tsáb nə́ tǎ əyǐ nə́ mbô, ḿbítə yí nə́ əlɛ́n páʼ a kɔŋ nə́ ńgə́ təmbɔʼ pə́ fóŋə mɔ́ yi wɨ́ ə́wə́.

⁶³A pítə táafɛlə, pə́ fɛ̂. A ŋwaʼlə̂ ńgə́, “Əlɛ́n mɔ́ lə́ Jɔnə.” A kɨʼnə̂ ŋwu ntsəmə.

⁶⁴Tsɔʼə əghâ yi ə́wɨ́, ntso əyí ə́ ŋáʼnə, alə́əmə yə́ á kyakə̂ a chwáakə á mə́ tsáb nə́ ə́ghóʼkə Əsê.

⁶⁵Ngaŋ məpad əjí tsɔʼə ətsəm ə́ nə ḿbɔ́gə. Á mə́mə aláʼə Judya tsɔʼə atsəm, pɨ pə́ nə̈ ə́sóŋə tsɔʼə mənu mɨ́d məənə́.

⁶⁶Á kə kɨʼnə̂ ŋwu ntsəm páʼə a kə zóʼ nə́ anu zəənə́, pó tíʼə ḿbítə ńgə́, “Mɔ́ nə́ a ghɛd pə́ pə́ zə́ənə́ ntê móonə?” Ńté ńgə́ apô Əsê á chîə á ndu yə́.

⁶⁷Ajwǐəsê a kwú nə́ tǎ əyǐ Zakalya a tíʼə̈ ə́sóŋə mənu páʼ Əsê a fiʼtə̂ nə́ yə́.

⁶⁸Ə́sóŋə ńgə́ ngóʼkə ə́ chîə á mbô Mmaʼmbîə, Əsê pɔ́ pə́ Islɛlə, ńté ńgə́ a yǐ tsóʼə atûə pɨ píə.

⁶⁹A lookə̂ tə́kɔʼ nchwádkə á mbô pɛn, a fɛ́lə á mə́mə akɔʼə ndɛ̂ Debilə,

⁷⁰ndzaŋə a kə fɛ̂ nə́ atséebə yə́ á laŋə̂ á mbô məntû mí mimə ŋwaʼ nə́ á ngoʼ pəchə́.

⁷¹A yǐ chwádkə áwɛ̂nə á mbô ngaŋkə́pa əzɛ̂n, ə́ kə́ kwáalə áwɛ̂nə á mbô ŋwu ntsəm páʼə a pa nə́ áwɛ̂nə,

⁷²á mə́ nɨd nə́ akóolə́mə́lə́ŋə á mbô pətǎ pɛ́n, ə́lǎ ə́lɨ́d ə́ kwúmtə əka páʼə a kə wad nə́.

⁷³Əka páʼə a kə wad nə́ áwɨ́d pó tǎ əwɛn Ablaamə,

⁷⁴á mə́ kwá nə́ áwɛ̂nə á mbô ngaŋkə́pa əzɛ̂n ńjî ńgə́ pɛn ghóʼkə yí tsɔʼə tə apɔ́gə,

⁷⁵nə́ məndú mə́ ŋwáʼ nə́ ńkə́ ńtɨ́ ndə̌ŋdəŋə́ á mbi Əsê (tə məg nchîmbî əzɛnə̂).

⁷⁶“Lə́ gho, móonə mə, pə́ lǒo fóŋə gho nə́ ntûsê páʼə a Tsɛ Nə́ Ajúmə Atsəmə, ńté ńgə́ gho lǒo kwá mbi Mmaʼmbîə ghɛn tsoŋkə̂ ndúmə á mbô yə́.

⁷⁷Á mə́ fiʼtə̂ nə́ pɨ pí ńgə́ pə́ yǒ chwádkə ághɔ́b ə́laŋə̂ ndzəm təpɔŋ əghɔb páʼ Əsê a ləgnə̂ nə́,

⁷⁸ńté akóolə́mə́lə́ŋə Əsê əzɛn, mə́nu yi sáʼ nə́ á yǒ fɛ́lə á nəpó tɛ̂ atû pɛnə̂.

⁷⁹Ə́ tɛ̂ atû pɨ páʼ pó chî nə́ á mə́m ndzəmə́ tə ńtə́əmə á mə́m mə́lə́glə nəwûə, ə́ tə́gə áwɛ́n nə́ alaŋə́ mbwɔ́dnə.”

⁸⁰Mɔ́ yi wə̂ a kə kwéŋ ńkə́ ńtyantə̂ á mə́mə ajwiə, ńchîə á kɔŋ məŋkwâʼlə̌ tə ńdáʼ ə́fɛ́lə á əshîsaŋə á mə́m Islɛlə.