Read Awing Lukasə 10 Bible Online

Lukasə 10 - Awing bible

Lukasə 10

¹Ndzaŋ pó po kə məgtə̂ nə́ lə́, Mmaʼmbîə a tíʼ ńtsɔ́ʼ pətsə́ pɨ məghə́mə asaambɛ̂ nə́ pɨ pɛ́n pɛ̌ [8] ńtúmə ághɔ́b pə́ pɛ̌ pə́ pɛ̌ ńgə́ pó kwá mbi ńgɛn nə́ əláʼ ətsəm pópə aliʼə́ atsəm páʼə a chî nə́ á mə́ ghɛn nə́ ə́wə́.

²Yeso a sóŋə á mbô pó ńgə́, “Məjî mə́ nə́ənə, lə́ pɨ pə́ foʼ nə́ pə́ pə́ ńkə́gə. Póʼ mbô á mbô ngaŋ məjî ńjî ńgə́ a tú ngaŋə́faʼə á afɔ pə́ ghɛn ə́foʼə̂ mə́ələ́.

³Ghɛn nə́, mäŋ túmə áwɨ́ lə́ ándó məmbéŋ mə́ ndzɛlə á mə́m əfunə́.

⁴Kɔ nə́ lɔg nkéebə, kəənə apeemə, kɨ ngwub məkoolə, kɔ nə́ kə́ ńchaʼtə̂ ŋwu tsə̌ alaŋə́.

⁵Ndɛ̂ ntsəm nə́ kwú nə́ ə́wɨ́ nə́ peg ə́sóŋ ńgə́, mbwɔ́dnə ə́ chîə á ndɛ̂ nə́

⁶Mbɔʼ ŋwu mbwɔ́dnə a chîə á ndɛ̂ yi wɨ́, mbwɔ́dnə əjǐ ə́ ghɛnə̂ á mbô yə́, ńchî ə́wɨ́ chî, mbwɔ́dnə əzɨ ə́ pɨ ḿbəənə̂ á mbô pəənə́.

⁷Chî nə́ á ndɛ̂ yi wɨ́ ńjîə ńkə́ ńnô ajúmə atsəm pə̈ fɛ̂ nə́ á mbô pəənə́, ńté ńgə́ ngaŋəfaʼ ntsəmə a chîə á mə́ kwá nə́ ntsɔ́ʼəfaʼ əjǐə. Kɔ nə́ tə́ ə́fɛ́lə nə́ táʼ ndɛ̂ ńkwúnə nə́ yitsə̌.

⁸Aláʼə atsəm nə́ kwú nə́ ə́wɨ́ pə́ lɔgə̂ áwɨ́ ə́wɨ́ əshîʼnə, nə́ jîə ajúmə atsəm pə́ tə́g nə́ á mbi pəənə́.

⁹Tsóʼ nə́ pəghɔ pə́ chî nə́ ə́wɨ́ ńkə́ ə́fiʼtə̂ ngaŋə́láʼ yi wɨ́ ńgə́, Anuə Nəfoonə Əsê á yǐ tə ḿbáatə áwə́ənə́.

¹⁰Lə́ mbɔʼ nə́ ghɛnə̂ aláʼ yitsə̌ pə́ chîə áwɨ́ pí, nə́ ghɛn nə́ əlaŋə́ əpɔ́b ə́sóŋ ńgə́,

¹¹Tsɔʼə akəpóglə́ aláʼə azɨ́ páʼə á chî nə́ á məko pəg, pəg kɔdtə̂ zɨ́d ńkwɛlə̂, á mə́ nɨd nə́ ńgə́ anu nə ghɛd nə́ á kě koʼnə̂ pô. Lə́, nə́ pə́ ńjî ńgə́ Anuə Nəfoonə Əsê á yǐ tə ḿbáatə áwə́ənə́.

¹²Mäŋ fiʼtə̂ áwɨ́ ńgə́ á yǒ pɔŋə̂ á mbô pɨ pə́ Sodomə Alě asáʼə́məsáʼ ńtsɛ pɨ pə́ aláʼ pɨ́d pə̂.”

¹³“Pɨ pə́ kolazin, ndɔ ə́ chîə atû pəənə́, pɨ pə́ Bɛdsada, ndɔ ə́ kə́ ńchîə atû pəənə́. Ńté ńgə́ pətə́kɔʼ pə́ mənu pə́ kə ghɛd nə́ pə́ələ́ á mbô pɨ lə́ mbɔʼ pə́ kə ghɛlə̂ pɨd lə́ á Tayile kəənə á Sidɔn tə ḿbə́ pó kə kɔ́g ńkwúblə ńgwê pəshíshí pə́ ətsəʼ ə́fuʼə̂ apû ńtíʼ ńnáanə nə́ afɨnə.

¹⁴A yǒ pə́ Alěsáʼə́məsáʼ, á pɔŋə̂ á mbô Tayile pó Sidɔn ńtsɛɛlə̂ áwə́ənə́.

¹⁵Pɨ ngaŋ Kapanawum, pɨ loonə̂ lə́ á mə́ ŋáŋkə nə́ mbɨ əzɨ ə́ kɔ́ʼə á nəpó? Ngá, pə́ yǒ tsóokə áwɨ́ ḿmaʼə̂ á ntɛ́n əsê.”

¹⁶Yeso a sóŋə á mbô ngaŋə́zoŋə́ndzəm əjí ńgə́, “Ŋwu ntsəm páʼə a jwə́ʼtə nə́ á mbô pəənə́ a jwə́ʼtə lə́ á mbô maŋə, ŋwu ntsəm páʼ a kǐ nə́ áwə́ənə́ a kǐ lə́ mə. Lə́ ŋwu ntsəm páʼ a kǐ nə́ mə a kǐ lə́ ŋwu páʼ a tú nə́ mə.”

¹⁷Pɨ pə́ məghə́mə asaambɛ̂ nə́ pɨ pɛ́n pɛ̌ kə pɨ nə́ akɔŋtə á ntɨ́ pó ńtíʼə ə́sóŋə ńgə́, “Mmaʼmbî, tə pɛ̌sê ə́ kə̈ ńdzóʼnə áwə́g ńdaŋə̂ nə́ əlɛ́n əghô.”

¹⁸Yeso a kwěe ághɔ́b ńgə́, “Maŋ kə zə́ənə satanə a lǒo á nəpó ńgwǔəə ándó nəfaŋ yi nə́ ŋwaŋkə̂ nə́.

¹⁹Jɨ́ nə́, maŋ fɛ̂ mətəənə á mbô pɨ mbɔʼ nə́ nyinə̂ á ndu mənó pópə pəmə́ŋgâsê pə́ təpɔŋə anu yitsə̌ á kě áwɨ́ ghɛd pô, mətɨ mɨ́ mə́ kə́ ńtsɛ mimə́ ngaŋkə́peenə́.

²⁰Lə́ kɔ nə́ pə́ ńkɔŋtə̂ ńgə́ əjwi təpɔŋ ə́ zóʼnə áwə́ənə́, kɔŋtə̂ nə́ pə́ ńgə́ pə́ ŋwaʼlə̂ məlɛ́n mə́ənə́ á nəpóolə.”

²¹Nə́ ndɛd yi wɨ́, Ajwǐəsê a ghɛd akɔŋnə á lwɛ́nkə á ntɨ́ Yeso, a sóŋ ńgə́, “Mäŋ ghóʼkə gho Tǎ, Mmaʼmbî pə nəpó pó ndəsê ńté ńgə́ gho lyáŋ mənu məənə́ á mbô pɨ pó yáŋ nə́ ńkə́ ńjî ənuə, ḿbə́ ńnəələ̂ mə́ələ́ á mbô kə́yé ŋwunə. Tǎ, lə́ ndə̌ŋdəŋ ńgə́ gho kə faʼə̂ anuə ntsəm lə́ ndzaŋ páʼ a koʼnə̂ nə́ gho.”

²²“Tǎ mə a fɛ̂ ajúmə atsəmə á mbô maŋə. Ŋwu tsə̌ a kě jîə ŋwu páʼ móonə a pə́ nə́ wɨ́d pô tə ńdéʼtə Tǎ. Ŋwu tsə̌ a kě kə́ ńjîə ŋwu páʼ Tǎ a pə́ nə́ wɨ́d pô tə ńdéʼtə Móonə, ḿbɨ ḿbə́ nə́ pɨ páʼ Móonə a tsɔʼ nə́ á mə́ nɨd nə́ yə́ á mbô pó.”

²³Yeso a sɛdnə̂ ə́sóŋ nə́ ngaŋə́zoŋə́ndzəm əjíə á ndzəmə ndzəm ńgə́, “Mbɔŋə́ azɨ́ nə́ zɨ́ mənu páʼ nə́ zɨ́ nə́ lɛ̌.

²⁴Mäŋ fiʼtə̂ áwɨ́ ńgə́ məntúmə́sê mimə nɨ́ nə́ pópə pəfo pi nɨ́ nə́ pó kə loonə̂ á mə́ zɨ́ nə́ mənu páʼ nə́ zɨ́ nə́, ḿbə́ ńkě zɨ́ pô, ńdoonə̂ á mə́ zóʼ nə́ mənu páʼ nə́ zóʼ nə́ ḿbə́ ńkě zóʼ pô.”

²⁵A nə ńdáʼ ḿbə́ alě tsə́ táʼ ŋwu tsə̌ á mə́m ngaŋə́zéʼkə pənoŋkə a yǐəə á mə́ mɔ nə́ Yeso. Ḿbítə ńgə́, “Ndzéʼkə, mbɔʼ maŋ ghɛd ə́lɛ́ ḿbɔŋə́ jî nchîntɨ páʼ ə́ mɛdnə̂ nə́ ngǎ mɔʼə́?”

²⁶Yeso á kwěe yí ńgə́, “Aŋwaʼlə Əsê á sóŋ ńgə́ akə̂, pɨ̈ zóʼə azə́ənə́ pə́ ə́lɛ́?”

²⁷Ŋwu wə̂ a kwěe ńgə́, “Kɔŋə̂ Mmaʼmbî páʼ a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ mətɨ mô mətsəmə nə́ akwaŋə azô atsəmə; ńkə́ ńkɔŋə̂ ngaŋ nəpad əgho ándó mbɨ əzo.”

²⁸Yeso a kwěe yi ńgə́, “Gho koʼnə̂, Faʼ ə́lə́ələ́, gho yǐ chîə á mbîə.”

²⁹Lə́, ndzéʼkə pənoŋkə wə̂ a pə́ ńtə́ ńdoonə̂ á mə́ nɨd nə́ ńgə́ yə́ a koʼnə̂, ńtíʼ ḿbítə Yeso ńgə́, “Ngaŋ nəpeelə mə lə́ əwə?”

³⁰Yeso a kwěe yí ńgə́, “Ŋwu tsə̌ a kə láʼ ə́fɛ́lə á Jɛlusalɛm ńtə́ ńtsóolə ńgɛnə̂ á Jɛliko, pəzə̌ pə́ waamə̂ yí ńtsɔ́ʼtə ətsəʼ pí, ḿbóʼə yí tə a tíʼə ńdoonə̂ á mə́ kwû nə́, pó mɛdtə̂ yí ńgɛnə̂ ághóobə́.

³¹Mbêsê yitsə̌ a kə tə́ ńdaŋə̂ alaŋə́ yi wɨ́ ńdzə́ənə yí páʼə a noŋnə̂ nə́, ńdə́ʼ ńdaŋə̂ yə́ á əlá alaŋə́ yi ndaʼə.

³²Ŋwu Lebi yitsə̌ a kə ńtə́ ńdaŋə̂ ají ńdzə́ənə yi páʼə a noŋnə̂ nə́ ńdə́ʼ ńdaŋə̂ yə́ á əlá alaŋə́ yi ndaʼə.

³³Lə́ Samalitan yitsə̌ a pə́ ńtə́ ńdaŋə̂ ńdzə́ənə yí páʼə a noŋnə̂ nə́ ńkó mələ́ŋ míə.

³⁴Ńgɛn ḿbáatə yí ńdzɔ́ʼ məghɔ́d pó afǔ nə́ məfəŋ mí ńkwúlə mə́ələ́, ńnáakə yə́ á ndu njakasə əjǐ ńdɔgə̂ yi ńgɛnə̂ á ndɛ̂ pəghɨ ńdɔʼkə̂ yí ə́wɨ́ ńtə́ ḿbyádnə yə́.

³⁵Mbî ə́ fógə a tə́ ńgɛnə̂ yí ə́fɛ̂ nkéebə atəənə́ ntáʼ pɛ̌ á mbô ngaŋ ndɛ̂ ə́sóŋ nə́ yí ńgə́, ‘Tíʼ ńtə́ ńnáŋə yə́, maŋ yǐ tə́ pəənə̂ ə́ tûə ajúmə atsəm páʼ gho pɨ nə́ ńtsəŋə̂.’ ”

³⁶“Gho kwaŋ ńgə́ á mə́m pɨ pɨ pɛ́n pə́ teelə́, ngaŋ nəpad ŋwunə ándó pəzə̌ pə́ nə ńgwam nə́ yí lə́ nə ḿbə́ əwə?”

³⁷Ndzéʼkə pənoŋkə wə̂ a kwěe ńgə́, “Yə ándó a kə kó nə́ mələ́ŋ mí lə̂.” Yeso a sóŋə á mbô yí ńgə́, “Ghɛn ńkə́ ə́faʼə̂ azô ə́lə́ələ́.”

³⁸Ndzaŋ Yeso pópə ngaŋə́zoŋə́ndzəm əjí ə́ kə tə́ nə̈ ńnyinə̂ lə́, ńgyǐ ńkwúnə aláʼ yitsə̌, məngyě yitsə̌ pə́ fóŋ nə́ yi nə́ Mata a lɔgə̂ yí əshîʼnə á ndɛ̂ yə́.

³⁹A kə túgə mɔ́mɛ́ əyǐ yitsə̌ pə́ fóŋə nə́ Mɛɛlə. Mɛɛlə a kə náanə á məko Mmaʼmbî ńtə́ ńjwə́ʼtə anu páʼə ä kə sóŋ nə́.

⁴⁰Lə́ Mata a pə́ ə́fɛ̂ ntɨ́ əyí nə́ mənu páʼ pə́ nə ńchî nə́ á mə́ ghɛd nə́ ə́ pyáabə yí ə́wə́, ńtíʼ ńgyǐ ə́sóŋə á mbô Yeso ńgə́, “Gho zə́ənə azô lə́ á pɔŋ ndzaŋ Mɔ́mɛ́ mə a mɛdtə̂ nə́ məfaʼ mətsəmə á mbô maŋ lɛ? Sóŋ nə́ yí ńgə́ a yǐ ńkwáalə mə.”

⁴¹Mmaʼmbîə a kwěe yí ńgə́, “Mata, Mata, gho jwaʼ mbɨ əzo nə́ mənu mimə nɨ́ nə́ lə́ kətaŋə

⁴²Chigə ntəənə anuə á pə́ ḿbə́ lə́ tsɔʼə táʼə. Mɛɛlə a lɔg lə́ zə́ələ́, mbɔʼ pə kě á mbô yí kə́ ńkwá pô.”