Read Awing Lukasə 11 Bible Online

Lukasə 11 - Awing bible

Lukasə 11

¹A kə láʼ ḿbə́ alě tsə̌ Yeso a tə́ ńchaʼtə́sê aliʼ yitsə̌, ndzaŋ a kə məgtə̂ nə́ lə́, táʼ ŋwunə á mə́m ngaŋə́zoŋə́ndzəm əjíə a sóŋ nə́ yí ńgə́, “Mmaʼmbî, zéʼkə áwə́g ndzaŋ mbɔʼ pəg chaʼtə́sê tsɔʼə ndzaŋ Jɔnə a kə zéʼkə nə́ ngaŋə́zoŋə́ndzəm əjíə.”

²Yeso a sóŋə á mbô pó ńgə́, “Mbɔʼ nə́ tə́ ńchaʼtə́sê nə́ sóŋ ńgə́, Tǎ: Tíʼ ngóʼkə ə́ chî nə́ əlɛ́n əghô; ńgə́ mbɔʼ Anuə Nəfoonə azô á yǐəə.

³Fɛ̂ áwə́g nə́ məjî mbɔʼ pəg jî əlě ətsəmə.

⁴Ləgnə̂ pətəpɔŋ pə́g ńté ńgə́ pəg kə́ ńdəgnə̂ pi pə́ ŋwu ntsəm páʼə a fankə̂ nə́ á mbô pəgə́. Kɔ gho pí pəg kwúnə á mə́mə akwaʼlə.”

⁵Yeso a tíʼ ə́sóŋə á mbô ngaŋə́zoŋə́ndzəm əjí ńgə́, “Lɔg nə́ ńgə́ táʼ ŋwu əwɨ yitsə̌ a ghɛnə̂ á ndɛ̂ ngaŋəko əyǐ yitsə̌ á ntɨ̌túʼ ə́sóŋ nə́ yí ńgə́, tsɔ́ʼkə mə nə́ apéenə məkálə́ ntáʼ teelə́,

⁶ńté ńgə́ ngaŋəkoolə mə yitsə̌ a lǒo tə́sɛ nənyi ńgyǐəə á ndɛ̌ maŋ, ajúmə á pə́ ńkě ə́wɨ́ chî mbɔʼ a jî pô.

⁷Lɔg ńgə́ ngaŋəko gho yi wə́ a kwěe á mə́m ndɛ̂ ńgə́, Kɔ gho jwaʼə̂ mə, maŋ pɛ́d tə ə́fwɔn ntsǒndɛ̂ tə pə̂gpə póonə mə pɛ́dtə noŋtə̂. Mbɔʼ maŋ kě á əsê lǒo ə́fɛ̂ ajûtsə́ á mbô gho pô.

⁸Mäŋ fiʼtə̂ áwɨ́ ńgə́, mbɔʼə a chî chîə á mə́ lǒo nə́ á əsê ə́fɛ̂ apá yə wɨ nə́ yí ńté ńgə́ yí lə́ ngaŋəko əyǐ pô, tə ḿbə́ a yǐ pɛ́d lǒo á əsê ə́fɛ̂ ajúmə atsəmə á mbô yí ńté ńgə́ a wam ntə́əmə á mə́ póʼtə nə́ ntsǒndɛ̂ əyíə.

⁹Ńdaŋ ə́lɨ́d, mäŋ sóŋə á mbô pɨ ńgə́, pítə nə́, pə́ yǐ fɛ̂ á mbô pəənə́; chwa nə́, nə́ yǐ zə́ənə, póʼtə nə́, pə́ yǐ ŋáʼ ntsǒndɛ̂ á mbô pəənə́.

¹⁰Ńté ńgə́ ŋwu ntsəm páʼə ä pítə nə́, pə̈ fɛ̂ nə́ yə́; ŋwu ntsəm páʼə ä chwa nə́, ä zə́ənə mbɨ ḿbə́ nə́ ŋwu ntsəmə ä póʼtə nə́, pə̈ ŋáʼ ntsǒndɛ̂ á mbô yə́.”

¹¹“Əwə á mə́m pəənə́ a pə́ nə́ Tǎ páʼ mbɔʼ mɔ́ əyǐə a pítə əshû a fɛ̂ nóolə á mbô yə́?

¹²Kɨ páʼ mbɔʼə a pítə nəpu nə́ ngə́b a fɛ̂ mə́ŋgâsê nə́ yə́?

¹³Mbɔʼ nə́ pə́ ngaŋə́ghɛlə təpɔŋ, ńjî ndzaŋ mbɔʼ nə́ fɛ̂ əpú pi əshîʼnə á mbô pɔ́ pɨ́, nə́ kwaŋ ńgə́ mbɔʼ Tǎ əwɨ páʼə a chî nə́ á nəpóolə a fɛ̂ Ajwǐəsê á mbô pɨ páʼ pó pítə nə́ yí lə́ ə́lɛ́ pópə ə́lɛ́.”

¹⁴Yeso a kə tə́ ńkəmə̂ pɛ̌sê yitsə̌ páʼə a kə ghɛd nə́ ŋwunə a pə́ chípóʼə́. Ndzaŋ pɛ̌sê wə́ a kə fɛ́d nə́ lə́, chípóʼə́ yi wə́ a chúʼə á mə́ tsáb nə́, anu yəwə́ á kɨʼnə̂ ŋwu ntsəmə a kə chî nə́ aliʼ yi wə́.

¹⁵Lə́ pətsə́ pɨ pó sóŋ ńgə́, “Lə̈ fɛ̂ Bɛlzebul páʼə a pə́ nə́ əfo pɛ̌sê lə́, ə́fɛ̂ mətəənə ä lɔgə̂ ńkəmə̂ ághɔ́b ə́wə́”

¹⁶Pətsə́ pɨ pó loonə̂ mə́ mɔ nə́ yí ńtíʼ ə́sóŋ ńgə́ a nəələ̂ lə́ akyeʼə́nu páʼə á lǒo nə́ nəpóolə á mə́ nɨd nə́ ńgə́ mətɨ mí mə́ fɛ́d lə́ á mbô Əsê.

¹⁷Lə́ Yeso a pə́ ńjîə akwaŋə azóobə́, ńtíʼ ə́sóŋə á mbô pó ńgə́, “Aláʼə atsəmə á chî nə́ mənchwa mənchwa lə́ aláʼ yə péŋ nə́, ndɛ̂ ntsəm ə́ kə́ nə́ ńchîə məntsoolə məntso lə́ yi ḿbéŋ nə́.

¹⁸Mbɔʼ Nəfɔ nə́ Satan nə́ chîə mənchwa mənchwa, nə́ pə́ ńtɨ́ lə́ ə́lɛ́? Mäŋ ə́sóŋə ə́lɛ́ lə́ ńté ńgə́ pɨ sóŋ ńgə́ mäŋ kəmə̂ pɛ̌sê lə́ nə́ mətɨ mə́ Bɛlzebulə.

¹⁹Mbɔʼ mäŋ kəmə̂ pɛ̌sê lə́ nə́ əlɛ́n Bɛlzebul, ngaŋə́zoŋə́ndzəm əzɨ́ ə́ pə́ ńtíʼə ńkəmə̂ azɔ́b lə́ nə́ əlɛ́n əwə? Jî nə́ ńgə́ əzɨ́ ngaŋə́zoŋə́ndzəm ə́ ghɛd nəələ̂ áwɨ́ ńgə́ pɨ kě koʼnə̂ pô.

²⁰Lə́ mbɔʼ mäŋ kəmə̂ pɛ̌sê lə́ nə́ əlɛ́n Əsê, tə ḿbə́ Anuə Nəfoonə Əsê á yǐəə á mbô pəənə́.”

²¹Mbɔʼ atyǎntə ŋwunə ándó a túg nə́ əpú ntso píə a pyáb nchîndɛ̂ əjǐ əshîʼnə, ajúmə ají yətsə́ á kě péŋ pô.

²²Lə́ mbɔʼ ŋwu tsə̌ ándó a tyantə̂ nə́ ńtsɛɛlə̂ yə́ a yǐ ḿbóʼə yí, a kwá əpú ntso pə́ páʼ ngaŋə a kə néŋ nə́ ntɨ́ yí wɨ́ lə́, ńtíʼ ńkwáalə apeʼə ají ńgeebə̂.

²³Ŋwu páʼə a kě nə́ pəg yí chî pô lə́ ngaŋkəpeenə́ mə, ŋwu pəg yí kě nə́ kə́ ńkyeetə̂ pô ä shamkə̂ lə́ shamkə̂ nə́.

²⁴“Mbɔʼə ajwiə təpɔŋə á fɛ́lə á mbɨ ŋwu, zə́ələ́ tíʼə ńkéelə ńtə́əmə á mə́m pəkɔŋ pəjǔbtə, ńnáŋə aliʼə́ á mə́ náanə nə́ ə́wə́. Mbɔʼə á chî zɨ́ pô, á sóŋ nə́ mbɨ əjǐ ńgə́, ‘Maŋ yǐ pɨ pəənə̂ á ndɛ̂ maŋ nə fɛ́d nə́ ə́wə́.’

²⁵Ndzaŋ á pɨ nə́ lə́, ńjɨ́ ndɛ̂ əjǐ pə́ zəgə̂ zɨ́d ə́ ŋwaʼə̂, ajúmə atsəmə á tɨ́ əshîʼnə.

²⁶Á tíʼ ńgɛn ńchwa pətsə́ əjwi təpɔŋ ə́ tsɛ nə́ yí pó po yǐ ńchîə á ndɛ̂ yi wə́. Ngə́ʼ ŋwu wə́ ə́ pɨ ḿbə́g ńtsɛ ndzaŋ ə́ kə pěʼ nə́ ḿbeg ńchîə.”

²⁷Ndzaŋ Yeso a kə tə́ nə́ ə́sóŋə mənu mɨ lə́, məngyě yitsə̌ á mə́m ŋwuməsɔŋə́ á kə chî nə́ aliʼ yəwə́ a sóŋə á mbô Yeso ńgə́, “Mbwɔ́dnə ə́ pə́ yi məngyě páʼə a kə pî nə́ gho ńkə́ ńkwíŋkə gho.”

²⁸Yeso a kwěe ńgə́, “Mbwɔ́dnə ə́ chî lə́ á mbô pəənə ándó pó zóʼ nə́ anǔəsê ńkə́ ńnéŋə á mə́mə afaʼə.”

²⁹Ndzaŋə ándó mboŋ pɨ zə̂ ə́ kə̈ kɔ́ʼ nə́ ńnə́ənə lə́, Yeso a sóŋ ńgə́, “Pɨ pə́ ndɛd mbî jɨ lə́ chigə pɨ pə́ təpɔŋə. Pó tə́ ḿbítə akyeʼə́nuə á mbô maŋə, lə́ pó kě akyeʼə́nu yətsə́ yǐ zɨ́ pô tə ńdéʼtə yə Jona.

³⁰Jona a kə pə́ lə́ akyeʼə́nuə á mbô pɨ pə́ Ninibe, ndzaŋə ándó Mɔ́ Ŋwunə a pə́ nə́ akyeʼə́nuə á mbô pɨ pə́ əghâ nə́.

³¹A lǒo pə́ alě asáʼə́məsáʼ lə́ mɛ̂fo Shɛba a pɨ ńjúmnə əsáʼ pɨ pə́ ngoʼ pəənə́, ńté ńgə́ a nə ə́fɛ́lə aláʼ yí tsɔʼə á mə́ ghɛn nə́ ə́zóʼ ńdzéʼkə solomun páʼ ə́ túg nə́ ajíənuə. Mäŋ pɛn ə́fiʼtə̂ áwɨ́ ńgə́ ŋwu tsə̌ a pɛn ńchîə aliʼə́ nə́ páʼə a tsɛ nə́ Solomunə.

³²A láʼ pə́ alěsáʼə́məsáʼ lə́ pɨ pə́ Ninibe pó lǒo á əsê ńtsɔ́ʼtə məsáʼ mə́ pɨ pə́ ngoʼ pɨ ə́soŋ ńgə́ pó wǔ əsáʼə, ńté ńgə́ Jona a kə ə́sóŋə anǔəsê á mbô pɨ pə́ Ninibe lə́ pó kwúblə; maŋ pɛn ə́fiʼtə̂ áwɨ́ ńgə́ ŋwunə a chîə aliʼə́ nə́ páʼə a tsɛ nə́ Jona.”

³³“Təmbɔʼ ŋwunə a kě lam chúʼ ńtə́gə á nəlyaŋnə́ pô kɨ ńdɔg məkwuʼ ńkə́bkə ə́wɨ́ pô, atiʼə ə́lɨ́d a tə́gə á tətɨ mbindɛ̂ ńjî ńgə́ á tə́ ńkyaʼə̂ ŋwu ntsəmə a kwú nə́ á ndɛ̂.

³⁴Əmə́g mô lə́ nkyaʼ mbɨ əzo, təmbɔʼ əmə́g mô mə́ ŋwaʼ mbɨ əzo ntsəm ə́ túg nkyaʼə, lə təmbɔʼ mə́ chî əliʼ tə́ zə́ənə, mbɨ əzo ntsəm ə́ chîə á mə́m ndzəmə́

³⁵Lɔg nə́ ndɛd ńgə́ nkyaʼ páʼ ə́ chî nə́ á mə́m pɨ kɔ wɨ́d yǐ ḿbə́ ndzəmə́.

³⁶Lə́ələ́ pə́ ńgə́ təmbɔʼ mbɨ əzo ntsəm ə́ túg nkyaʼ tə mɔ́ aliʼ yitsə̌ á chîə á mə́m ndzəmə chî pô, mbɨ əzo ə́ ŋwaʼ ntsəmə ándó nkyaʼ lám ə̈ kyaʼ nə́ gho.”

³⁷Ndzaŋ Yeso a kə məgtə̂ nə́ á mə́ tsáb nə́ lə́, ŋwu Falasi yitsə̌ a wúnə yí ńgə́ a yǐ pó yí jî məjîə. A tíʼ ńkwú ńgɛn ńnáanə á mə́ jî nə́ mə́ələ́.

³⁸A nə ńkɨʼnə̂ ŋwu Falasi wə̂ ndzaŋ páʼə a kə jɨ́ nə́ Yeso a jî məjî tsɔʼə tə sog mbô.

³⁹Mmaʼmbîə a tíʼ ə́sóŋ nə́ yí ńgə́, “Pɨ Pəfalasi, nə̈ sogə̂ məndzəm mə́ məndɔ́ŋ pópə əkáŋə, lə́ á mə́m, əsɔ́ pópə awaaməńkwáalə́ ə́ pə́ ńdwɛ́nkə ə́wə́.

⁴⁰Əkəkóg pətsə́! Əsê páʼə a kə tsoŋkə̂ nə́ ndzəmə apeŋ, lə́ nə ńkě tsɔʼə yí tsoŋkə̂ mə́m?

⁴¹Lə́, fɛ̂ ajúmə atsəm páʼə á chî nə́ á mə́m akáŋ pó ndɔ́ŋə á mbô pəpóŋ ńjî ńgə́ ajúmə atsəmə á ŋwaʼə̂ á mbô gho.”

⁴²“Pəfalasi, ndɔ ə́ chîə atû pəənə́, ńté ńgə́ ajúmə atsəm páʼ nə foʼ nə́ kɨ ńkyɛ̂, pɨ̈ fɛ̂ táʼ aliʼə́ á mə́m pɛ́n nəghə́mə á mbô Əsê ḿbə́ ńdəgnə̂ á mə́ tɨ́ nə́ ndə̌ŋdəŋ ə́ kə́ kɔŋ Əsê. Nə́ pěʼ ńkě chîə á mə́ ghɛd nə́ táʼ yitsə̌ myaʼə̂ yitsə̌ pô.”

⁴³“Pəfalasi, ndɔ ə́ chî atû pɨ ńté ńgə́ nə́ kɔŋə̂ á mə́ náanə nə́ aliʼ pətə́kɔʼ pə́ pəənə á mə́m ndɛ̂sê Pəjusə ńkə́ ńkɔŋ ńgə́ á mə́m məta, pə̈ chaʼtə̂ áwɨ́ nə́ ngóʼkə.

⁴⁴Ndɔ ə́ chîə atû pɨ ńté ńgə́ nə́ chîə ándó məse mə́ tə aleŋkə, páʼ pɨ pə̈ nyi nə́ á ndu ə́wɨ́ ḿbə́ ńkě jî pô.”

⁴⁵Táʼ ngaŋə́zéʼkə pənoŋkə yitsə̌ a sóŋ nə́ yí ńgə́, “Ndzéʼkə, ghö sóŋə lə́, ńkə́ ńtûə ńdzoomə̂ áwə́gə́.”

⁴⁶Yeso a kwěe ńgə́, “Ngaŋə́ zéʼkə pənoŋkə, ndɔ ə́ kə́ ńchîə atû pəənə́! ńté ńgə́ nə́ tə́gə apeʼə á atû pɨ páʼə á tsɛ nə́ ághóobə́ á mə́ pěʼ nə́, lə́ təmbɔʼ nə́ kě ághɔ́b kwíʼnə ńtɔ́mtə tsɔʼə nə́ fîəpô pô.

⁴⁷Ndɔ ə́ chîə atû pɨ ńté ńgə́ nə̈ póomə məse mə́ məntúmə́sê páʼ pətǎ pə́ pətǎ pɨ pə́ nə ńjwítə nə́ ághóobə́.

⁴⁸Lə́ələ́ pə́ ńgə́ nə́ kə́ ńjɨ́ ńkə́ ḿbímə azə́ənə́ anu páʼ pətǎ pə́ pətǎ pɨ́ pə́ nə́ ńgɛd nə́ lə́ ńté ńgə́ pó nə ńjwítə məntúmə́sê, nə́ pɔ́ məse móobə́.

⁴⁹Ńdaŋ ə́lɨ́d Əsê a lɔgə̂ ajíənu ají ə́sóŋ ńgə́, ‘Maŋ yǐ tsɛɛkə̂ məntúmə́sê pópə mətsə́ məntúmə á mbô pó, pó jwítə pətsə́ ńkə́ ńtsaŋkə̂ pətsə́.’

⁵⁰Ńdaŋ ə́lɨ́d, achǐə á məntúmə́sê páʼ pə́ nə ńkwɛd nə́ ə́fɛ́lə nəchwaakənə́ nə́ mbî, á yǐ tə́əmə atû pɨ pə́ ngoʼ pəənə́.

⁵¹Ə́fɛ́d nə́ achǐə Abɛl tə ńkoʼ nə́ yə Zakalya páʼ pə́ nə ńjwítə nə́ yə́ á tətɨ nəpá nə́ Əsê pó tə́kɔʼ ndɛ̂ əsê ə́ chî nə́ Jɛlusalɛm lə́. Ndə̌ŋdəŋə́, mäŋ fiʼtə̂ áwɨ́ ńgə́ pɨ pə́ ngoʼ pɨ pə́ yǐ zɨ́ ngə́ʼ té anu yəwə́ atsəmə.”

⁵²“Ngaŋə́zéʼkə pənoŋkə, ndɔ ə́ chîə atû pəənə́, ńté ńgə́ nə́ lɔʼkə̂ pəkî páʼ pə́ tsɔʼ nə́ ntsǒndɛ̂ ajíənu ə́wə́, pɨ nə́ nkɔ̌ʼmbɨ əwɨ́ nə́ kě kə́ ńchîə á mə́ kwú nə́ ə́wɨ́ pô, mbɨ ńkě kə́ ḿbí ńgə́ pɨ páʼ pó tə́ nə́ ńdoonə̂ á mə́ kwú nə́ ə́wɨ́ pó kwú pô.”

⁵³Əghâ ándó Yeso a kə fɛ́d nə́ yə́ aliʼ yi wɨ́, ngaŋə́zéʼkə pənoŋkə pópə Pəfalasi ə́ chúʼə á mə́ pyádnə nə́ kǐəə atséebə ají, ńkə̈ ńtwaglə̂ yí nə́ əpítə ətsáb pi tyantə̂ nə́,

⁵⁴ńtá ətəənə́ á mə́ wam nə́ yí nə́ anuə təpɔŋ yətsə́ páʼə a yǐ nə́ sóŋə.