Read Awing Lukasə 12 Bible Online

Lukasə 12 - Awing bible

Lukasə 12

¹Əghâ yi wɨ́ lə̂, pɨ pə́ nə ńkɔ́ʼ tə ńkoʼ pətɔsə, tə pətsə́ pə́ tíʼə ńdaŋə̂ á ndu pətsə́. Yeso a chúʼə á mə́ tsáb nə́ nə́ ngaŋə́zoŋə́ndzəm əjí ə́sóŋə ńgə́, “Ntsɛɛmbiə anu lə́ ńgə́ nə́ lɔg ndɛd nə́ məfɨg mə́ Pəfalasi ńté ńgə́ pó chî lə́ ándó mbê apéenə məkálə́.

²Ajúmə atsəm páʼ pə́ kə́bkə nə́, pə́ yǒ ŋáʼə. Anuə nəlyaŋnə́ atsəmə á kyaʼnə̂.

³Anuə atsəm gho sóŋ nə́ á mə́m ndzəmə́, pə́ yǒ zóʼə zə́ələ́ á mə́m əliʼ pə ŋwaʼ nə́. Anuə atsəm gho chámtə nə́ á nətôglə ŋwunə á mə́m ndɛ̂ yi ńgwuʼnə̂ nə́ pə́ yǒ kɔ́ʼ tə́əmə á ndu məláʼ ə́sóŋə zə́ələ́.”

⁴“Pəshunə́ mə, maŋ fiʼtə̂ áwɨ́ ńgə́ kɔ nə́ pɔ́g pɨ páʼ pó jwítə nə́ mbəəmə, ḿbə́ ńkě chî təmbɔʼ pó pɨ ńgɛlə̂ anu yitsə́ pô.

⁵Lə́, maŋ yǐ nəələ̂ áwɨ́ nə́ ŋwu mbɔʼ nə́ pɔ́gə: pɔ́g nə́ yí wə́ páʼ təmbɔʼ a jwítə mbəəmə, ńkə́ ḿbɨ́ ńtúg mətɨ mbɔʼ a maʼə̂ áwə́ənə́ á mə́m mógə́. Nə́ ndə̌ŋdəŋ, maŋ fiʼtə̂ áwɨ́ ńgə́ nə́ pɔ́gə yə́.”

⁶Mbɔʼ gho kě mənchwînə mɛ́n tâ nə́ ndɔ́la pɛ̌ jú? Lə́, Əsê a pə́ ńkě chî təmbɔʼə a ləgnə̂ táʼ yitsə̌ pô.

⁷Á lǒo mənoŋ mə́ atû mô, mə́ chî lə́ pə́ sháŋə mɨ́d tsɔʼə mətsəmə. Kɔ nə́ pɔ́gə, nə́ səglə̂ ńtsɛɛlə̂ aláʼə mənchwînə.

⁸Mäŋ fiʼtə̂ áwɨ́ ńgə́ ŋwu ntsəm páʼə a pí nə́ á mə á əshîsaŋ, mɔ́ ŋwunə a yǒ kə́ pímə yə́ á əshîsaŋə á mbi pətseŋpə́ndɛ́pə́sê.

⁹Lə́ ŋwu ntsəm páʼə a kǐ nə́ mə á əshîsaŋ, Mɔ́ ŋwunə a yǒ kə́ kǐəə yə́ á mbi pətseŋpə́ndɛ́pə́sê.

¹⁰“Mbɔʼ ŋwunə a sóŋə anuə təpɔŋ ńté Mɔ́ Ŋwu, pə́ chî təmbɔʼ pə́ ləgnə̂ təpɔŋ əyǐə; lə, mbɔʼ ŋwunə a zoomə̂ Ajwǐəsê, əyǐ təpɔŋ á pə́ yi tə ləgnə̂.”

¹¹“Mbɔʼ pə́ lɔgə̂ áwɨ́ ńgɛn nə́ pəənə́ á mə́m ndɛ̂sê Pəjus, kəənə á mbô mətû mə́ aláʼə á mə́ sáʼ nə́ əsáʼ əwɨ́, kɔ nə́ jwaʼ mbɨ əzɨ nə́ anu pɨ yǐ nə́ ə́sóŋə, kɨ ńgə́ nə́ yǐ kwěe pə́ ə́lɛ́.

¹²Ńté ńgə́ á yǐ pə́ á əghâ yi wɨ́, Ajwǐəsê a zéʼkə áwɨ́ nə́ anu mbɔʼ nə́ kwěe.”

¹³Ŋwu tsə̌ á mə́m mboŋ pəənə a sóŋ nə́ Yeso ńgə́, “Ndzéʼkə, sóŋ nə́ ndimə́ mə ńgə́ pəg yí gheebə̂ apeʼ páʼ tǎ əwəgə́ a kə mɛdtə̂ nə́ á mbô pəg yə́.”

¹⁴Yeso a kwěe yí ńgə́, “Əshu, əwə a tsɔ́ʼ nə́ mə ńgə́ maŋ sáʼ əsáʼ ə́wɨ́ ndim əgho, kɨ ńgeebə̂ apeʼə tǎ əwəənə́ á mbô pəənə́?”

¹⁵Yeso a ghɛn nə́ mbiə á mə́ sóŋ nə́ nə́ pó ńgə́, “Lɔg nə́ ndɛlə́; kɔ nələ́g jɨ́ nə́ tə́ ə́sagə̂ ńté əpûmbîə, ńté ńgə́ nchîmbî ŋwu ə́ kě lə́ ndɛn əpú páʼə a túg nə́ pô, kəənə a pěʼ foʼə̂ pə́ ə́lɛ́.”

¹⁶A tíʼ ə́fiʼtə̂ ághɔ́b nə́ atséebə́nə́múʼ zəənə́: “Əfoʼ yitsə̌ a kə láʼ ńchî ə́wə́, ə́foʼə̂ məjîə á nkáʼ yí lɛ tətətə.

¹⁷Ńtíʼ ńchúʼə á mə́ kwaŋ nə́ ńgə́, ‘Maŋ kě pɨ ńtúgə á aliʼ mbɔʼ maŋ lɔʼkə̂ məjîə mə ə́wɨ́ mətsəm pô. Maŋ yǐ ghɛd lə́ ə́lɛ́?’

¹⁸A tíʼ ə́sóŋ ńgə́, lɛ̌ anu maŋ yǐ nə́ ghɛlə̂. Maŋ yǐ saʼ mənkye mə pɨ kwúd mə́ fáŋkə nə́ ndú páʼ təmbɔʼ maŋ néŋ məjîə mə ə́wɨ́ pópə apeʼə mə.

¹⁹Ńtíʼ ə́sóŋ nə́ mbəəmə mə ńgə́, mbɔŋə atûə! Gho cháabə apeʼ mbɔʼ gho jîə ájɨ́d nə́ məngoʼ mimə nɨ́ nə́. Kɔ gho jwaʼ mbɨ əzo. Jîə, ńnô, ńdzóʼ əshîʼnə əghô.”

²⁰“Lə́ Əsê a pə́ ə́sóŋə á mbô yí ńgə́, akəkógə́ ŋwu! á nətúʼ ə́sɛ̂nə̌, pə́ yǐ lɔg nchîmbî əzo, əwə a tíʼ ńtúgə apeʼə azô zəənə́ atsəmə?”

²¹“Lɛ̌ ndzaŋ páʼə á yǒ nə chîə á mbô ŋwu ntsəm páʼə a foʼ nə́ əpú mbî ḿbə́ ńkě á mə́m Əsê foʼ pô.”

²²Yeso a tíʼ ə́sóŋ nə́ ngaŋə́zoŋə́ndzəm əjí ńgə́, “Ńdaŋ ə́lɨ́d maŋ ə́sóŋə nə́ pɨ ńgə́ kɔ nə́ jwaʼ nchîmbî əjɨ ńté ajú páʼ nə́ yǐ nə́ jîə, kɔ nə́ kə́ ńjwaʼ mbɨ əjɨ ńté ajú páʼ nə́ yǐ nə́ wê.

²³Nchîmbî ə́ lánə ḿbyádnə ńtsɛ məjîə, mbɨ əzo ə́ kə́ ḿbyádnə ńtsɛɛlə̂ atsəʼə́.

²⁴Náŋ nə́ Əŋkəŋâ, pó kě əpü pǐə pô, ńkě kə́ ə́foʼə̂ pô, pó kě ndɛ̂ alɔʼkə məjî kɨ nkye túg pô, lə́ Əsê a pə́ ḿbɛ́lə ńdzə́gə ághóobə́, ńtíʼ ńgɛd ə́lɛ́ nə́ pɨ páʼ nə́ səglə̂ nə́ ńtsɛ pəsə́ŋə́?

²⁵Mbɔʼ əwə ŋwunə á mə́m pəənə́ a jwaʼ mbɨ əjǐ tə ḿbegə̂ mɔ́ akəmə ndɛlə́ á mə́m nchîmbî əjǐə?

²⁶Mbɔʼ nə́ chî chî təmbɔʼ nə́ faʼə̂ mɔ́ anuə ándó wɨ́d ghɛn pô, nə́ pə́ ńjwaʼ mbɨ əjɨ ńté mətsə́ mənu ńté akə̂?

²⁷Náŋ nə́ ndzaŋ pəflǎwa pə́ kɔ́ʼ nə́: pɨ́d pə́ kě táŋnə kɨ ḿbáʼə atəshǐ pô. Maŋ pɛn ə́fiʼtə̂ áwɨ́ ńgə́ a lǒo Solomun páʼə a kə foʼ nə́ ándó akə̂, a nə ńkě atsəʼ yə əshîʼnə kə̈ wê ándó táʼ flǎwa wɨ́d ghɛn yitsə̌ pô.

²⁸Mbɔʼ lɛ̌ pə́ ndzaŋ páʼ Əsê a wê nə́ ətsəʼ nə́ nəyeŋ páʼə á chî nə́ á kɔŋ ə́sɛ̂n, pə́ lǒo á ngwɛʼə́ ńtoonə̂ wə́ələ́ á móg, a yǐ kwíʼnə wê ətsəʼə́ á mbɨ pəənə́ pə́ ə́lɛ́? Mbimə́ əjɨ ə́ chígə́ ńkə́g lɛ ə́lɛ́!”

²⁹Lə́ələ́ pə́ ńgə́, kɔ nə́ jwaʼ mbɨ əjɨ ńté ajú páʼ nə́ yǐ nə́ jî kɨ nô.

³⁰Ńté ńgə́ pɨ páʼ pó kě nə́ Əsê jî pô, pó zoŋə̂ ə́fɛ́d ndzaŋ əpú jɨ́d zə̂, Tǎ əwəənə́ a pə́ ńkə́ ńjî ńgə́ nə́ póŋə pə́ələ́.

³¹Lə́ náŋ nə́ pə́ anuə nəfoonə ajíə, pə́ yǐ kə́ tíʼ ə́fɛ̂ əpú pɨ tsɔʼə ətsəm nə́ pəənə́.

³²“Mɔ́ akwɛlə məmbéŋə mə, kɔ nə́ pɔ́g ńté ńgə́ Tǎ əwəənə́ a kɔŋə̂ á mə́ fɛ̂ nə́ anuə nəfoonə ajíə á mbô pəənə́.

³³Fi nə́ apeʼə ajɨ́ ə́fɛ̂ nkéebə á mbô pəpóŋə. Chwa nə́ pɔ́ pə́ əpa páʼ nkáb ə́ kě nə́ á mə́m ə́wɨ́ póŋə pô. Ńdɔʼkə̂ afoʼə azə́ənə́ á nəpóolə, páʼ zə́ələ́ á láʼ nə́ kě měe pô, páʼ təmbɔʼ ndzə̌lə a kě ə́wɨ́ kwú pô, əsəʼ ə́ kě kə́ ńjî pô.

³⁴Ńté ńgə́ aliʼə́ atsəm páʼ afoʼə azô á chî nə́ ə́wɨ́, ntɨ́ əghô ə́ kə́ ńchî lə́ ə́wə́.”

³⁵“Kwúd nə́ ətwíŋ əpɨ́ ḿbyáabə, ńtú ńchúʼ nkyaʼ əwɨ́ ńtə́gə

³⁶ándó ngaŋə́faʼ ə́ tə́ ḿbyáabə tǎ afaʼ əghoobə́ a kwə̂ aliʼə́ ndzɔʼə́. Ńjî ńgə́ təmbɔʼ a yǐ ḿbóʼtə ntsǒndɛ̂ pó tɔ́g ŋ́ŋáʼə á mbô yə́.

³⁷Mbɔŋə́ á yǐ pə́ lə́ yə ngaŋə́faʼ páʼ tǎ afaʼ əghoobə́ a tə́ nə́ ńgyǐəə ńtégə ághɔ́b pó lɛ́ɛlə ńtə́ ḿbyáabə. Mäŋ fiʼtə̂ áwɨ́ ńgə́ a yǐ twéetə ətwéŋ pí, ə́ ghɛd pó náanə á əsê a téelə ághóobə́.

³⁸Mbɔŋə́ yə pɨ páʼ tǎ afaʼ əghoobə́ a tə́ nə́ ńkwə̂ ńtégə ághɔ́b pó náanə ńtə́ ḿbyáabə, kəənə a kwə̂ pə́ á ntɨ̌túʼ kɨ a ndɛd ntsəmə.

³⁹Lə́, jî nə́ áwɨ́ ńgə́ mbɔʼ ngaŋ ndɛ̂ a pěʼ ńjî ndɛd páʼ ndzə̌lə ä yǐ nə́, ḿbə́ a kě mɛdtə̂ a pə́ʼ ndɛ̂ əjǐ pô.

⁴⁰Kə́ nə́ ńdɛ́ɛlə mbɨ əjɨ ńté ńgə́ mɔ́ Ŋwunə a yǒ yǐ lə́ nə́ ndɛd páʼ nə́ pěʼ nə́ ńkě yí tə́ ḿbyáabə pô.”

⁴¹Pita a pítə ńgə́, “Mmaʼmbî, gho tséebə atséebə́nə́múʼ zɨ lɛ̌ lə́ á mbô pəg kəənə á mbô ŋwu ntsəmə?”

⁴²Mmaʼmbîə a kwěe ńgə́, “Əwə a chîə á mə́m pɨ páʼ mbɔʼ pə́ néŋ ntɨ́ nə́ yə́, a kə́ ńgyáŋ təmbɔʼ tǎ afaʼə a mɛdtə̂ yitsə́ ngaŋə́faʼ á mbô yə́ a tíʼ ńkə́ ə́fɛ̂ məjî nə́ pó nə́ ndɛlə́?

⁴³A yǐ lánə pɔŋə̂ á mbô ngaŋəfaʼ wɨ́d wə̂ mbɔʼ tǎ afaʼə a tə́ ńkwə̂ ńdzə́ənə yə́ a tə́ faʼə̂ tsɔʼə ə́lə́ələ́.

⁴⁴Mäŋ fiʼtə̂ áwɨ́ nə́ ndə̌ŋdəŋ ńgə́ tǎ afaʼ wɨ́d wə̂ a yǐ ghɛd ngaŋəfaʼ wɨ́d wə̂ a tə́ ńnáŋə apeʼə ají tsɔʼə atsəmə.

⁴⁵Lə́, təmbɔʼ ngaŋəfaʼ wə̂ a pə́ ńkwaŋ ńgə́, ‘Tǎ afaʼə mə a yǐ lɛ́ɛlə á mə́ kwə̂ nə́,’ Ńtíʼ ńchúʼə á mə́ póʼ nə́ yitsə́ ngaŋə́faʼ, pəngyě pópə mbyâŋnə, ńkə́ ńtíʼə ńjîə, ńnô ḿbɛ́ɛlə yí,

⁴⁶tǎ afaʼə a ghɛd ńtíʼ ńgabkə̂ ńkwə̂ alě tsə́ páʼə a pěʼ nə́ ńkě tə́ ḿbyáabə ńgə́ a yǐ kwə̂ nə́ ndɛd yi wɨ́ pô. Tǎ yǐ límkə yí ə́ túmə yə́ aliʼə́ ngaŋə́ghɛlə təpɔŋə.”

⁴⁷“Ngaŋəfaʼ ándó a jî nə́ anu páʼ tǎ afaʼ əyǐə a lɔ nə́ ńgə́ a faʼ ḿbə́ ńkě mbɨ əjǐ lɛ́ɛlə á mə́ faʼ nə́ ájɨ́d pô kɨ ńkě ájɨ́d faʼ pô, pə́ yǐ pyádnə ə́shúmə yí ndɛn ngwan ə́ nə́ənə.

⁴⁸Lə́, ngaŋəfaʼ páʼə a kě nə jîə anuə ándó tǎ afaʼ əyǐə a lɔ nə́ ńgə́ a faʼ pô, ḿbə́ ə́faʼə̂ yi páʼə á kě nə́ koʼnə̂ pô, mbɔʼ pə́ ghə́ ə́shúmə yí, əjǐ ndɛn ngwan ə́ kə́gə. Ŋwu pə́ fɛ̂ nə́ yə weŋə́ á mbô yí, pə̈ kə́ ńnáŋə yə weŋə́ á mbô yə. Ŋwu pə́ pyádnə nə́ ə́fɛ̂ yə nɨ́ nə́ á mbô yí, pə́ kə̈ ḿbyádnə ńnáŋə yə nɨ́ nə́ á mbô yə́.”

⁴⁹“Maŋ yǐ lə́ á mə́ maʼ nə́ mógə́ á ndu ndəsê nə́, maŋ pə́ ḿbyádnə ńkɔŋ ńgə́ mbɔʼ wɨ́d ə́ pěʼ ḿbɛ́dtə ńtə́ ńkɛ́lə.

⁵⁰Maŋ chî nə́ akwáalə́nkǐ yətsə́ á tə́ nə́ ḿbyáabə mə, lə́ ḿbə́ ńchîə á mə́m ngə́ʼ yitsə̌ tə anu yəwə́ á yǒ ńdaŋə̂.

⁵¹Nə́ kwaŋ ńgə́ maŋ yǐ lə́ á mə́ fɛ̂ nə́ mbwɔ́dnə á ndu mbî? Ngá, maŋ yǐ lə́ pə́ á mə́ ghabtə̂ nə́ pəənə.

⁵²Ə́fɛ́d nə́ pə ə́sɛ̂n ńgɛn nə́ mbi, nchîndɛ̂ pə́ chî nə́ ə́wɨ́ pə́ tâ, pə́ yǐ ghabnə̂, pɛ́n teelə́ pó tɨ́ nə́ əghɔ́b əlá pə́ pɛ̌ pó tɨ́ nə́ əghɔ́b əlá.

⁵³Pó yǒ ghabnə̂, pətǎ pó sɔb məsɔŋ nə́ pɔ́ pɔ́b pi pə́ mbyâŋnə, pɔ́ pə́ mbyâŋnə pó sɔb məsɔŋ nə́ pətǎ póobə́, pəmǎ pó sɔb məsɔŋ nə́ pɔ́ pɔ́b pi pə́ pəngyě, pɔ́ pə́ pəngyě pó sɔb məsɔŋ nə́ pəmǎ póobə́, pəmə́pɨ́ pə́ sɔb məsɔŋ nə́ pəngyě pə́ pɔ́ póobə́, pəngyě pə́ pɔ́ pə́ sɔb məsɔŋ nə́ pəmə́pɨ́ póobə́.”

⁵⁴Yeso a sóŋə á mbô mboŋ pɨ zə̂ ńgə́, “Mbɔʼ nə́ jɨ́ alə́mə á fɛ́lə á ndú páʼ mə́numə á mɛ́d nə́ əwɨ́, nə́ tɔ́g ə́sóŋ ńgə́ ‘Mbəŋ ə́ yǐ lô,’ ə́ kə́ ńdô.

⁵⁵Mbɔʼ kəfəələ á fɛ́lə á mətoŋə́ ńtə́ ńgwəg əliʼ ńkɔ́ʼə, nə́ sóŋ ńgə́, ‘Əliʼ pi tɔnə̂ nə́ ə́ tə́ ńgyǐəə,’ ə́ kə́ ńgyǐəə.

⁵⁶Ngaŋmə́fɨg! nə́ jîə á mə́ fiʼtə̂ nə́ ndzaŋ páʼ ndəsê pó nəpó ə́ chî nə́, lə́ pə́ ńgɛlə̂ akə̂ nə́ pə́ ńkě chî təmbɔʼ nə́ fiʼtə̂ ndzaŋ páʼ ndɛd mbî jɨ ə́ chî nə́ pô?”

⁵⁷“Mbɔʼ nə́ kě kwaŋə̂ ngǎ pɨ ńjîə anu páʼə á koʼ nə́ mbɔʼ nə́ faʼ lə́ ńté akə̂?

⁵⁸Mbɔʼ ŋwunə a yǐ nə́ əsáʼ ńtéekə gho, ńdɔgə̂ gho ńgɛnə̂ á aliʼə́sáʼə́məsáʼ, chwa ndú ətsəmə á mə́ məgtə̂ nə́ əsáʼ yi wə́ alaŋə́sêndúmə, ńjî ńgə́ kɔ a lɔgə̂ gho ńgɛn nə́ gho á mbi ngaŋə́sáʼə́məsáʼə, kɔ ngaŋə́sáʼə́məsáʼ ə́ fɛ̂ gho á mbô ngaŋə́maʼə́ntso pó néŋə gho á nkáʼə atsáŋə.

⁵⁹Mäŋ fiʼtə̂ gho ńgə́ gho kě atsáŋ wə̂ yǐ fɛ́d pô tə ńdéʼtə gho yǒ ńtûə atsóobə azô tsɔʼə atsəm tə puʼkə̂ táʼ ndɔ́la záʼ pɔŋə́ ə́fɛ́lə.”