Read Awing Lukasə 13 Bible Online

Lukasə 13 - Awing bible

Lukasə 13

¹Á nə ḿbə́ əghâ yi wɨ́ lə́, pɨ pətsə́ pó chîə aliʼ yi wɨ́ ə́fiʼtə̂ Yeso ndzaŋ Payilɛlə a kə jwítə nə́ pɨ pə́ Galili pətsə́ əghâ ándó pó nə ńtə́ nə̈ ə́fɛ̂ akáŋə́sê.

²Yeso a kwěe ághɔ́b ńgə́ “Nə́ kwaŋ ńgə́ pə́ kə jwítə pɨ pə́ Galili pɨ́d pɨ nə́ jɨ́d jɨ əsêndú lə́ ńté ńgə́ pó nə ńgɛlə̂ təpɔŋ ńtsɛ pətsə́ pɨ pə́ Galili?”

³Ngá, mäŋ fiʼtə̂ áwɨ́ ńgə́ mbɔʼ nə́ chî kwúblə á mə́m təpɔŋ əwɨ pô, nə́ yǐ ńkə́ ńkwúkə ándó pó nə ńkwúkə nə́ lə̂.

⁴Nə kwaŋ ńgə́ pətsə́ pə́ ntsɔb nəfeemə́ a Silɔm páʼ asagə́ ndɛ̂ a kə kəmnə̂ ńgwǔ nə pó ńjwítə ághɔ́b lə, pó ghɛd lə́ a təpɔŋ ńtsɛɛlə̂ a ŋwu ntsəm páʼ a chî nə́ a Jɛlusalɛm?

⁵Ngá, mäŋ fiʼtə̂ áwɨ́ ńgə́ mbɔʼ nə́ chî fɛ́lə á mə́m təpɔŋ əwɨ pô, nə yǐ ńkə́ ńkwúkə ándó pó nə ńkwúkə nə́ lə̂.

⁶Yeso a tíʼ ńtséebə atséebə́nə́múʼ zəənə́ á mbô pó ńgə́, “ŋwu tsə̌ a kə láʼ ḿbǐə atǐə figə á nkáʼ yə́, əghâ ətsəm əghâ tsəm a yǐəə ńnáŋə, atǐə fig zə́ á pə́ ńkě zə́m pô.

⁷A tíʼ ə́sóŋə á mbô ŋwu páʼ a nə̈ faʼ nə́ a nkáʼ yí wə́ ńgə́ ‘Lɛ̌ ngoʼ teelə́ əghâ nə́ páʼ maŋ kə nə́ ńgyǐəə ńnáŋə fígə á atǐə nə́ ḿbə́ ńdáʼ ńkě táʼə ata ə́wɨ́ jɨ́ pô. Á chígə́ ńtsəŋə̂ ají ndəsê lə́ ńté akə̂? Kə́ʼə ájɨ́d ḿmaʼə̂ ndəsê.’

⁸Ŋwu wə́ páʼ ä faʼ nə́ a nkáʼ yí lə́ a pə ńkwěe yí ńgə́ ‘Tǎ, pɨ ḿmɛdtə̂ ájɨ́d nə́ táʼ ngoʼə́, maŋ yǐ taʼ nətɛ́n yí ə́líblə ńnéŋə sɔləfâ ə́wə́.

⁹Mbɔʼ a yǒ ḿbə́ a ngoʼ ńdzə́m, á pɔŋə̂. Ńkə́ ńchî zə́m pô, gho kə́ʼ ḿmaʼə̂ əsê.’ ”

¹⁰A nə ńdáʼ ḿbə́ alěláʼə́sê yitsə̌, Yeso a tə ńdzéʼkə á mə́m Ndɛ̂sê Pəjus.

¹¹Məngyě yitsə́ a kə chî ə́wɨ́ páʼ ajwiə təpɔŋə a kə ghɛd nə́ a ghɔ nə ngoʼ ntsɔb nəfeemə́. A nə ńgɔ tə ŋ́ŋɔ́dnə ńkě kwíʼnə ńchî mbɔʼ a pɨ ə́shǐ mbɨ əjǐ pô.

¹²Ndzaŋ Yeso a kə jɨ́ nə yí lə́, ə́fóŋə yí ə́sóŋ nə́ yí ńgə́ “Pə́ tsóʼə á gho á mə́m aghoonə́ azô zə̂!”

¹³ńnoŋkə̂ mbô míə a ndu yə́, tsɔʼə əghâ yi wɨ́ a lǒo ə́shǐ mbɨ əjǐ ńtíʼə ńgóʼkə əsê.

¹⁴Nətû nə́ kə chî nə́ a ndɛ̂sê pəjusə nə́ kə záŋ ndě lɛ tətətə, ńgə́ Yeso a tsóʼə ŋwunə alěláʼə́sê. Ńtíʼ ə́sóŋ nə ŋwu ntsəmə a kə chî nə́ aliʼ yi wɨ́ ńgə́, “Əlě pɛ́n ntogə́ ə́ chî nə́ ə́wə́ á mə́ faʼ nə́, lə́ələ́ pə ńgə́ ŋwu ntsəmə a yǐ nə́ əlě pɨ́d pə́, pə́ tsóʼə yə́, kɔ a yǐəə pə́ alěláʼsê!”

¹⁵Mmaʼmbîə a kwěe yí ə́sóŋ ńgə́ “pɨ ngaŋmə́fɨg! pɨ pətsə́ nə́ kə̈ ńkyagə̂ məfwɔŋ mɨ́, kɨ mənjakásə mɨ́ a akad pó, ńdɔgə̂ ńgɛnə̂ nkǐ, ə́fɛ̂ nkǐ nə́ pó alěláʼə́sê.

¹⁶Əghâ nə, lɛ̌ mɔ́ Ablaam páʼ Satanə a kə kwúd nə́ məŋkɛd nə́ ngoʼ məghə́m mɛ́n nəfeemə́; mbɔʼ pə́ kě yə́ alěláʼsê kyagtə̂?”

¹⁷Akwe yə á nə ńgɛd əshɨ́ ə́ kó ngaŋkə́pa əjí tsɔʼə ətsəm, apuʼə ŋwu ntsəmə a kə chî nə́ aliʼ yi wɨ́ a pə́ ńkɔŋtə̂ ńté əkɨʼnəmə́nu páʼ Yeso a kə̈ ghɛd nə́.

¹⁸Yeso a tíʼ ḿbítə ńgə́ “Anuə Nəfoonə Əsê a chî lə́ ándó akə̂? maŋ chîə á mə́ fiʼkə̂ nə́ ájɨ́d lɛ nə́ akə̂?

¹⁹A chî lə́ ándó mbaŋ fɔ́lə́sə páʼ ŋwunə a kə lɔg nə ḿbǐə a nkáʼ yə́, wə́ələ́ a kɔ́ʼ ńtíʼ ḿbə́ atǐ, pəsə́ŋ pə́ tíʼ ńkwúd mənka mɔ́b nə məntá míə.”

²⁰Yeso a kə ḿbɨ ḿbítə ńgə́, “mbɔʼ maŋ fiʼə̂ anuə nəfoonə əsê lə́ nə́ akə̂?

²¹Á chî lə ándó mbê apá páʼ məngyě a lɔg nə́ ńnéŋə á mə́mə atsɛ̂káŋə flǎa, wə́ələ́ a nyinə̂ á mə́m flǎa yi wɨ́ tsɔʼə ntsəm ńtíʼ ńgɛd wə́ələ́ á kɔ́ʼə.”

²²Yeso a kə tíʼə ńdaŋə̂ á mə́m pətɔ̂ŋ pópə əláʼ ńdzéʼkə ńtsóolə ńgɛnə̂ Jɛlusalɛmə.

²³Ŋwu tsə̌ a pítə yí ńgə́ “Mmaʼmbî, lə́ yǒ chwád tsɔʼə pɔ́ pə́ ntaʼlə pɨ?” Yeso a kwěe ághɔ́b ńgə́,

²⁴“Ghɛd nə́ anuə atsəmə á mə́ jɨ nə́ ńgə́ nə́ kwú nə́ mɔ́ kə́nyaŋ ntsǒndɛ̂, Mäŋ fiʼtə̂ áwɨ́ ńgə́ pɨ pipə nɨ́ nə́ pə́ yǒ chwa ndúmə mə́ kwú nə́, ə́ pə́ kě jɨ́ pô.

²⁵Mbɔʼ ngaŋ ndɛ̂ a laŋ tə ńdǒ əsê ńgwuʼnə̂ ntsǒndɛ̂, nə́ tə́əmə apeŋ ńtíʼə ḿbóʼtə ntsǒndɛ̈ ḿbóʼmbô ə́sóŋə ńgə́ ‘Mmaʼmbî, ŋáʼ ntsǒndɛ̂ á mbô pəgə́.’ A yǐ kwěe ńgə́, maŋ kě áwɨ́ jî pô, ńkě nəfɛdnə́ jɨ́ kə́ ńjî pô.

²⁶Nə́ tíʼ ə́sóŋ ńgə́ ‘Pɛn kə̈ jînə ńkə́ ńnônə, gho kə̈ ńdzéʼkə á aláʼ pəgə́!’

²⁷A kə́ ḿbɨ ńkwěe áwɨ́ ńgə́, Maŋ kě áwɨ́ jî po, ńkě nəfɛdnə́ jɨ́ kə́ ńjî pô: lǒo nə́ a əshî maŋə ngaŋə́ghɛlə təpɔŋ.”

²⁸“Pɨ yǒ kyéŋə ə́ zoŋə̂ kɔ́lə na mbɨ əzɨ əghâ ándó nə yǒ nə́ ńdzə́ənə Ablaam pó Azigə nə́ Jekɔbə, ḿbá məntúmə́sê mətsəm pó chîə á mə́mə anuə nəfoonə əsê, pə́ pə́ ḿmyaʼə̂ áwə́ənə́ apeŋə́.

²⁹Pɨ pó yǒ fɛ́lə á ndú mə́numə sáʼ nə́ ə́wə́, ə́fɛ́lə a məkɔʼnə́, ə́fɛ́lə a mətoŋə́, ə́ yǐ ə́ lɔg əliʼ əpóobə́ aliʼə́ dina á mə́mə anuə nəfoonə əsê.

³⁰Lə́ nkwâmbiə a yǒ tíʼ ngaŋndzəmə, ngaŋndzəmə a tíʼ nkwâmbiə.”

³¹Tsɔʼə əghâ yi wɨ́, Pəfalasi pətsə́ pə́ yǐ ə́sóŋ nə́ Yeso ńgə́ “fɛ́d ńgɛnə̂ a gho aliʼə́ ndaʼə, ńté ńgə́ Ɛlɔdə a tə́ ńdoonə̂ á mə́ jwítə nə́ a gho.”

³²Yeso a kwěe ághɔ́b ńgə́, “Ghɛn nə́ fiʼtə̂ yə́, a túg nə́ ajíə ndzə̌lə ándó antsɔb lə́ ńgə́ maŋ yǐ kəm pɛ̌sê ə́ kə́ tsóʼ pɨ ə́sɛ̂n pó ngwɛʼə́ á tə́ ńkoʼ əlě teelə́ maŋ məgtə̂ afaʼə mə.

³³Lə́ maŋ chîə á mə́ tə́ nə́ ghɛnə̂ ə́sɛ̂n pó ngwɛʼə́ nə́ əlě yǐ, ńté ńgə́ a kě koʼnə̂ á mə́ jwítə nə ntûsê aliʼə́ ndaʼ tə ńdéʼtə á Jɛlusalɛm pô.”

³⁴“Pɨ pə́ Jɛlusalɛm, pɨ pə́ Jɛlusalɛm! pɨ nə ńjwítə məntúmə́sê ḿbɨ ńtə́mtə pɨ páʼ Əsê a tú nə́ á mbô pɨ nə́ məngɔʼə! Lə́ ngǎ ə́shíʼə́ maŋ táŋnə á mə́ kyeetə̂ nə́ pɔ́ pɨ́ táʼə aliʼə́ ándó mɛ́ ngə́bə ä kyeetə̂ pɔ́ pí nə́ mbab míə, nə pə́ ńkě kɔŋ pô!

³⁵Əghâ nə́, pə yǐ myaʼə̂ áwə́ənə́. Mäŋ fiʼtə̂ áwɨ́ ńgə́ nə́ kě mə yǐ pɨ jɨ́ pô tə ńdéʼtə nə́ sóŋ ńgə́ ‘Mbwɔ́dnə ə́ chîə á mbô ŋwu páʼ a yǐ nə́ nə́ əlɛ́n Mmaʼmbîə.’ ”