Read Awing Lukasə 15 Bible Online

Lukasə 15 - Awing bible

Lukasə 15

¹Á nə ḿbə́ alě tsə́ ngaŋə́kwáalə́ nchubə aláʼ pópə ngaŋə́ghɛlə təpɔŋ ə́ tíʼə ńgyǐəə á mə́ jwə́ʼtə nə́ atséebə Yeso.

²Lə́ Pəfalasi pópə ngaŋə́zéʼkə pənoŋkə ə́ chúʼə á mə́ ŋwuntə̂ nə́ ə́sóŋə ńgə́, “Ŋwu nə́ a lɔg ngaŋə́ghɛlə təpɔŋ əshîʼnə ńtíʼə ńkə́ ńjîə məjî pó po!

³Yeso a tíʼ fiʼtə̂ ághɔ́b nə́ atséebə́nə́múʼ zəənə́.”

⁴Mbɔʼ ŋwu əwɨ yitsə̌ a túg məmbéŋ mə́ ndzɛd táʼ nkɛd, táʼə á yǐ ḿbéŋə á mə́m ə́wɨ́ a ghɛd ə́lɛ́? A kě mɛdtə̂ apuʼ zə́ məghə́m nəpuʼə́ nə́ mɛ́n nəpuʼə́ á ndu kɔŋ ńgɛn ńchwaalə̂ táʼ wə̂ páʼ á péŋ nə́ lə́ tə ńdzə́ənə áwɨ́d?

⁵Mbɔʼ a zə́ənə áwɨ́d, mbɨ əjǐ ə́ pɔŋ lɛ tətətə a tíʼ ńtwáamə áwɨ́d ńnoŋkə̂ á mbeʼtə yí,

⁶Ńkwə̂ nə́ wə́ələ́. Ńtíʼ ə́fóŋ pəghɨ pí pópə ngaŋ məpad ə́sóŋə á mbô pó ńgə́, “Pɛn kɔŋtə̂ ńté ńgə́ maŋ jɨ́ mbéŋ ndzɛlə mə páʼ ə́ nə mbéŋ nə́.

⁷Mäŋ fiʼtə̂ áwɨ́ ńgə́ ndzaŋ mbɨ ŋwu wə̂ ə́ pɔŋ nə́ ńgə́ a jɨ́ mbéŋ ndzɛd əjǐ zə́ lə́, lə́ ndzaŋ páʼ akɔŋtə á yǐ nə́ kə́ chîə á nəpó té táʼ ngɛdtəpɔŋ páʼ a kwúblə nə́ ńtsɛ pɨ məghə́m nəpuʼə́ nə́ nəpuʼə́ páʼ pó kwaŋ nə́ ńgə́ pó ŋwaʼ ḿbɨ ńkě chî mbɔʼ pó kwúblə pô.”

⁸“Kɨ pɛn lɔg ńgə́ məngyě yitsə̌ a túg nkéebə atəənə́ ntáʼ nəghə́mə, táʼə á péŋə á mə́m ə́wə́, A yǐ ghɛd ə́lɛ́? A yǐ chúʼ nkyaʼ, ə́zəg mbindɛ̂, ə́ lɔg ndɛd ńnáŋ əliʼ ətsəm tə ə́zə́ənə zə́ələ́.

⁹Ndzaŋ a jɨ́ nə́ ájɨ́d lə́, ə́fóŋ pəghɨ pí pópə ngaŋ məpad əjíə, aliʼə́ mɔʼə́ ńtíʼ ə́sóŋ nə́ pó ńgə́, ‘Pɛn kɔŋtə̂, maŋ jɨ́ nkéebə mə páʼ ə́ nə ḿbéŋ nə́!’

¹⁰Maŋ lɔg ə́lɨ́d ə́fiʼtə̂ áwɨ́ ńgə́ pətseŋpə́ndɛ́pə́sê pə́ kɔŋtə̂ ńté táʼ ngɛdtəpɔŋ páʼə a kwúblə nə́.”

¹¹Yeso a ghɛn nə́ mbiə á mə́ sóŋ nə́ ńgə́, “Ŋwu tsə́ a nə ńdáʼ ńchî ə́wɨ́ ńtúg pɔ́ pí pə́ pɛ̌.

¹²Yi ńkoʼnə̂ nə́ a yǐ ə́sóŋ nə́ yí ńgə́, ‘Tǎ, fɛ̂ azéemə apeʼ nə́ maŋə.’ Ŋwu wə̂ a tíʼ ńgeebə̂ apeʼə ajíə á mbô pó.

¹³Əlě pətsə́ ə́ ghə́ laŋə̂ mɔ́ yi ńkoʼnə̂ nə́ wə̂ a finə̂ ajíə apeʼ zə̂ tsɔʼə atsəm ńdɔg nkáb ə́fɛ́lə yə́ aláʼ ńgɛnə̂ atú yi ndaʼ tə ndi ə́ sag ńtə́mə́sɛ́ nə́ zɨ́d, ńdɔg ńjî əpú mbî ə́wə́.

¹⁴A nə ńkə́ ńgə́ kɔ́d nkáb zə̂ tə məg, nji ə́ wǔəə á mə́mə aláʼ páʼ a kə chî nə́ ə́wɨ́ lə̂, ajûtsə́ á pə́ ńkě á mbô yí pɛ́d pô.

¹⁵A tíʼ ńgɛnə̂ á mə́ faʼ nə́ á mbô ŋwunə aláʼ wɨ́d wə̂ yitsə̌, a túmə yə́ akad pəkwúna yə́ ńgə́ a ghɛn ńtə́ ńdzə́gə pəkwúna píə.

¹⁶Nji nə ńdzáŋə yí tə a tíʼə ńdoonə̂ á mə́ jî nə́ mənta mə́ atǐ pə́ nə̈ ə́fɛ̂ nə́ nə́ pəkwúneemə, lə́ ŋwu tsə̌ a pə́ ńkě nə́ yí fɛ̂ pô.

¹⁷Əghâ əjî əyí ə́ nə ḿbɨ nə́ ḿbɨ lə́, a sóŋ ńgə́, Ngaŋə́faʼ tǎ mə tsɔʼə ətsəm ə́ túg məjî tə mə́ tsɛɛlə̂ ághóobə́ á mə́ jî nə́, maŋ pə́ ńchîə aliʼə́ nə́ ńtə́ ńkwû njiə.

¹⁸Maŋ yǐ lǒo á əsê pɨ pəənə̂ á mbô tǎ mə ə́sóŋ nə́ yí ńgə́, Tǎ, maŋ ghɛlə̂ təpɔŋə á mbô Əsê ńkə́ ńgɛlə̂ á mbô gho.

¹⁹Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô. Lɔgə̂ mə ándó táʼ ngaŋəfaʼ əgho yitsə̌.”

²⁰A tíʼ ńdǒo á əsê ḿbəənə̂ á mbô tǎ əyǐə. “A nə ḿbɛ́d tsɔʼə á ndi yi sɛ, tǎ əyǐə a zə́ənə yí ńkó mələ́ŋ míə, ńkə ńgɛn ńtégə mɔ́ yí wɨ́ ḿmaʼ mbô mí nə́ yí ńtíʼ ńchwegə̂ yə́.

²¹A tíʼ ə́sóŋ nə́ tǎ əyǐ ńgə́, ‘Maŋ ghɛlə̂ təpɔŋ á mbô Əsê ńkə́ ńgɛlə̂ á mbô gho. Maŋ kě pɨ ńkoʼ mbɔʼ pə́ fóŋə mə nə́ mɔ́ əgho pô.’

²²Lə́, tǎ əyǐə a pə́ ə́fóŋ ngaŋə́faʼ əjí ə́sóŋ ńgə́, Ghə́glə nə́! yǐ nə́ nə́ chigə atsəʼ yə əshîʼnə ḿmaʼə̂ á mbɨ yə́. Néŋ nə́ yílə á fîəpô yə́ ńkə́ ńgwê ngwubə á məko yə́.

²³Ńtíʼ ńgyǐ nə́ tə́kɔʼ ndu na wə́ ńgwaalə̂ áwɨ́d pɛn ghɛd məjî ə́wɨ́ ńjî ńkɔŋtə̂.

²⁴Ńté ńgə́ móonə mə ghɛnə́ a nə ńkwûə, a pɛn ḿbɨ ńjúmnə, a nə ḿbéŋə, pə pɛn ḿbɨ ńdzə́ənə yə́. Pó tíʼ ńchúʼə á mə́ kɔŋtə̂ nə́.”

²⁵“Əghâ yi wɨ́ lə́, mɔ́ əyǐ yi ntəŋkaŋə́ a pə́ ńchîə yə́ afoonə. Ndzaŋə a kə kwə̂ nə́ tə ńtíʼə ḿbáatə nchîndɛ̂ lə̂, ńdzóʼ ndzaŋ pə̈ póʼ nə́ apɛ́n ḿbɛ́nə.

²⁶A fóŋə táʼ ngaŋəfaʼ yitsə̌ ńtíʼ ḿbítə yí nə́ anu páʼ á laŋ nə́.

²⁷A sóŋ nə́ yí ńgə́, ‘Ndim əgho a kwə̂ tə tǎ əwəənə́ a waalə̂ tə́kɔʼ ndú na wə̂ ńté ńgə́ a kwə̂ əshîʼnə tə alɔʼ yətsə́.’

²⁸Ntsɛɛmbi əyǐ wə̂ a záŋ ndě lɛ tətətə ńkǐəə yə́ á mə́ kwú nə́ á ndɛ̂. Tǎ əyǐə a fɛ́lə apeŋ ńtíʼ ḿbóʼmbô nə́ yí ńgə́ a kwúnə á ndɛ̂.

²⁹A pə́ ńkwěe tǎ əyǐ ńgə́, ‘zə́ənə! Ndɛn məngoʼ ghɛn tsɔʼə ətsəm mäŋ faʼə̂ á mbô gho ándó apoʼə, ńdáʼ ńkě anu yətsə́ á mbô gho kǐ pô. Gho pɛ́dtə əfɛ̂ akə̂ á mbô maŋə? Kɛ́ tsɔʼə mɔ́ mbéŋ təmbɔʼ pə̂gpə ngaŋ məkoolə mə tɔ ńkɔ́d ńkɔŋtə̂!

³⁰Lə́ mɔ́ əgho ghɛnə́ a nə ḿbɛn ńtə́mə́sɛ́ nə́ apeʼə azô tsɔʼə atsəmə á ndzəm əkwɛlə. A pɛn ńkwə̂ gho waalə̂ tə́kɔʼ ndú na wə̂ ńté yə́.’

³¹Tǎ əyǐə a kwěe yí ńgə́, ‘Móonə mə, lə̈ chîə tsɔʼə pɔ̌ əghâ ətsəmə, ajúmə atsəm maŋ túg nə́ á pə́ azô.

³²Pɛn pə́ ńchîə á mə́ jî nə́ ə́ kɔŋtə̂ ńté ńgə́ ndim əgho ghɛnə́ a nə ńkwûə, a pɛn mbɨ ńjúmnə, a nə ḿbéŋə, pə́ pɛn mbɨ ńdzə́ənə yə́.’ ”