Read Awing Lukasə 16 Bible Online

Lukasə 16 - Awing bible

Lukasə 16

¹Yeso a sóŋə á mbô ngaŋə́zoŋə́ndzəm əjí ńgə́, “Ngaŋnkáb yitsə̌ a kə chî ə́wɨ́, atséebə á yǐ ńkwúnə á mbô yí ńgə́ ŋwu páʼə a náŋ nə́ apeʼə ajíə a tə́ ńtsəŋkə̂ nkáb əjǐə,

²A tíʼ ə́fóŋə yə́ á ndɛ̂ ḿbítə yí ńgə́, ‘Mäŋ zóʼə lɛ̌ akə̂ mənu ńté gho? Fɛ̂ əŋwaʼlə ətsəmə á mbô maŋ ndzaŋ gho kə̈ faʼ nə́ ńté ńgə́ mbɔʼ gho kě pɨ ḿbɛ́d ńgɛn nə́ mbiə á mə́ náŋ nə́ apeʼə mə pô.’

³Ŋwu wə̂ a nə̈ náŋ nə́ apeʼ zə̂ lə́ a tíʼə ńdəmtə̂ á ngǎ yí ə́sóŋə ńgə́, ‘Tǎ afaʼ mə a yǐ fógə mə afaʼə. Nə́ əghâ nə́ maŋ yǐ tíʼ ghɛd lə́ ə́lɛ́? Maŋ kě mətɨ túg təmbɔʼ maŋ líʼə alíʼ pô, əshɨ́ ə́ pɨ ńtə́ ńkóolə mə á mə́ tə́ nə́ lɔ́nə.

⁴Əghâ nə́, maŋ jîə zóŋ páʼ maŋ yǐ nə́ ə́ tá ńjî ńgə́ mbɔʼ maŋ yǐ ə́fɛ́lə afaʼ maŋ pɛ́d ńtúg pɨ mbɔʼ pó lɔgə̂ mə əshîʼnə á məláʼ pô.’

⁵A tíʼ ə́fóŋ ngaŋ məkyɛ́ tǎ afaʼ əyǐ tsɔʼə ətsəm. Ḿbítə ntsɛɛmbi ŋwu ńgə́, ‘Ghö waamə̂ tǎ afaʼ mə lə́ nə́ ə́lɛ́?’

⁶A kwěe ńgə́, ‘Məŋkag mə́ məghɔ́d mə́ məzaŋ táʼ nkɛlə́.’ A tíʼ ə́sóŋ nə́ yí ńgə́, ‘Náanə á əsê ńtíʼ ŋ́ŋwaʼlə̂ pə́ məghə́m mɛ́n tênə, ghə́glə.’

⁷A pɨ ńkə́ ḿbítə yitsə̌ ŋwu ńgə́, ‘Gho waamə̂ azô lə́ ə́lɛ́?’ A kwěe ńgə́, ‘apéenə məkálə́ yə ghɔʼ nə́ əpa nkɛlə́.’ A sóŋə mbô wɨ́d wə̂ ŋwu ńgə́, ‘Náanə á əsê ńtíʼ ŋ́ŋwaʼlə̂ pə́ məghə́m mɛ́n nəfeemə́.’

⁸Tǎ afaʼ wə́ a pímtə anu páʼ ngaŋəfaʼ wə̂ a nə ńgɛd nə́ lə́ ńté ńgə́ a nə faʼ nə́ ajíənuə, pɨ pə́ mbî pə́ yáŋ á mə́ faʼ nə́ məmɔ́b mənu ńtsɛ pɨ pó chî nə́ á mə́m nkyaʼə.”

⁹Yeso a ghɛn nə́ mbiə á mə́ sóŋ nə́ ńgə́, “Mäŋ fiʼtə̂ áwɨ́ ńgə́ lɔg nə́ əpú mbî ńkaŋ pəshu pɨ ə́wə́, ńjî ńgə́ əghâ pɨ́d ə́ lǒo nə́ ḿměe pə́ lɔgə̂ áwɨ́ əshîʼnə á mə́m məláʼ mə́ mɛdnə̂ nə́ ngǎ mɔʼə́.

¹⁰Ŋwu páʼ pə́ néŋ nə́ ntɨ́ nə́ yí nə́ pɔ́ pə́ mənu, təmbɔʼ pə́ kə́ ńnéŋ ntɨ́ nə́ yí nə́ pətə́kɔʼ pə́ mənuə. Ŋwunə a kě nə́ ndə̌ŋdəŋ tséebə nə́ pɔ́ pə́ mənu, mbɔʼ a kě ndə̌ŋdəŋ nə́ pətə́kɔʼ kə́ ńtsáb pô.

¹¹Lə́ələ́ pə́ ńgə́ mbɔʼ gho chîə ndə̌ŋdəŋə́ á mə́m əpú mbî tsáb, əwə a yǐ ńnéŋ ntɨ́ nə́ gho nə́ mənu mə́ Əsê?

¹²Təmbɔʼ gho chîə ndə̌ŋdəŋə́ á mə́mə apeʼə ŋwu ndaʼ ə́ tsáb pô, əwə a yǐ ə́fɛ̂ azô?”

¹³“Ngaŋəfaʼ yitsə̌ a kě ə́wɨ́ chî təmbɔʼ a faʼə̂ á mbô pətǎ pɛ́n pɛ̌ pô; tə ḿbə́ a yǐ peenə̂ táʼ ə́ kɔŋə̂ táʼə, kəənə a lánə ńtə́ ə́faʼə̂ á mbô yitsə̌ ńdəgnə̂ yitsə̌. Təmbɔʼ gho kě nɔd ə́faʼə̂ á mbô Əsê pó nkáb pô.”

¹⁴Pəfalasi pó zóʼ ətsáb pɨ tsɔʼə ətsəm ńtíʼə ńdeŋnə̂ Yeso ńté ńgə́ pó nə ńkɔŋ nkéebə.

¹⁵Yeso a sóŋə á mbô pó ńgə́, nə́ kɔŋə̂ á mə́ nɨd nə́ mbɨ əzəənə́ á mbi ŋwu məsɔŋ ńgə́ nə́ koʼnə̂, lə́ Əsê a pə́ ńjî ntɨ́ əwə́ənə́. Ajú nə́ zɨ́ nə́ ńgə́ á túgə nəsəgə á mbô pɨ, lə́ afanə anuə á mbi Əsê.

¹⁶“Pə́ nə̈ ńdzoŋə̂ pənoŋkə pə́ Mosisə pópə məntəgə́ mə́ məntúmə́sê tə ńkoʼ nə́ ndɛd páʼ Jɔn Əfɛ̂nkǐə a nə ńgyǐ nə́. Ə́fɛ́d nə́ ndɛd jɨ́d zə̂, atséebə Əsê a tíʼə ńnyinə̂ ńté anuə nəfoonə Əsê tə ŋwu ntsəmə a tíʼə ə́fyád mbɨ əjǐə á mə́ kwú nə́ á mə́m ə́wə́.

¹⁷Lə́ á pwɔ́dnə mbɔʼ nəpó pó ndəsê péŋ ńtsɛ ndzaŋ mbɔʼ mɔ́ aliʼə́ á péŋ nə́ pənoŋkə pə́ Əsê.”

¹⁸“Ŋwu ntsəm páʼ a kəm nə́ ngwě əyǐ ńdzɔ́ʼə yi ndaʼ, a jî lə́ mə̂ghabə, lə́, ŋwu ntsəm páʼ a kə́ nə́ ńdzɔ́ʼə məngyě páʼ a fɛ́d nə́ á ndɛ̂ ŋwu a kə́ ńjî lə́ mə̂ghabə.”

¹⁹Əfoʼ yitsə̌ a nə ńdáʼ ńchî ə́wɨ̈ ńgwê yí tsɔʼə ətsəʼ nkéebə̈, ńdzóʼ əshîʼnə tsɔʼə á mə́m əpú nkáb əlě ətsəmə.

²⁰Njɨ̂ngə́ʼ yitsə́ a nə ńkə́ ńchî ə́wɨ́ pə yǐəə ńnáakə yə́ á ntsǒndɛ̂ əfoʼ wə́, əlɛ́n yí pə́ Lazalɔsə, məfəŋ mə́ chíkə á mbɨ yə́,

²¹Ä kwaŋə̂ ńgə́ a yǐ lagtə̂ əpúʼ məjî páʼ ə́ lǒo nə́ á ndu təpɛlə əfo wə̂ ńgwukə̂. A kə chî tə məngwû mə́ kə̈ ńgyǐəə ḿbəŋə̂ məfəŋ míə.

²²Ndɛd ə́ nə ḿbɛn ńkoʼ njɨ̂ngə́ʼ wə̂ a kwûə yə́, pətseŋpə́ndɛ́pə́sê pə́ twáamə yí ńgɛnə̂ á nəpɛnə́ Ablaamə. Əfoʼ wə̂ a yǐ ńkə́ ńkwû pə́ twə́ŋə.

²³A kə chîə á mə́m móg Satan ńtə́ ńjɨ́ ngə́ʼ ḿmaʼ əmə́g mí ńdzə́ənə Ablaamə á ndi yitsə̌ pó Lazalɔsə á nəpɛnə́ yə́.

²⁴Ńtíʼ ə́fóŋnə ńgə́, “Tǎ Ablaam, kó mələ́ŋə mə ńtúmə Lazalɔsə a tsɛn nətû nə́ fîəpô jí nə́ nkǐ yi féŋtə nə́ ńgyǐ ńkwumə̂ á alɨ́ maŋə; ńté ńgə́ maŋ chîə á ngə́ʼə á mə́m mógə́ nə́.”

²⁵Ablaam a kwěe ńgə́, móonə mə, kwúmtə ńgə́ gho nə́ ńchîə á mbî lə́ ńjî əpɔŋ əghô tsɔʼə ətsəmə lə́ Lazalɔsə tə́ ńjɨ́ ngə́ʼə. Lazalɔsə a pɛn ńkə́ ńtə́ ńdzóʼ əshîʼnə əghâ nə́, gho kə́ ńchîə azô á ngə́ʼə.

²⁶A pěʼ ńkě tsɔʼə ə́lɨ́d pô, tə́kɔʼ atéemə á chîə tətɨ pɛnə̂, páʼ təmbɔʼ ŋwunə a kě lǒo á ndzɛnə́ wə̂ ńgyǐəə á ndzɛnə́ nə́ kɨ ŋwunə a kə́ ńdǒo á ndzɛnə́ nə́ ńgɛnə̂ á ndzɛnə́ wə̂ pô.

²⁷A pɨ ńkə́ ńkwěe ají ńgə́, “Maŋ póʼmbô nə́ gho tǎ, túmə Lazalɔsə a ngyaʼə́ pəgə́.

²⁸Ńté ńgə́ maŋ túg pɔ́pə́mɛ́ pɛ́n pə́ tênə, ńjî ńgə́ a kwantə̂ ághɔ́b ńgə́ kɔ pó yǐ ńkə́ ńgyǐ ńkwúnə á mə́mə aliʼə́ ngə́ʼə.”

²⁹Ablaamə a kə́ ńkwěe ají ńgə́, Mosisə pópə məntúmə́sê ə́ chî ə́wɨ́ páʼ təmbɔʼ pó jwə́ʼtə á mbô pó.

³⁰A sóŋ ńgə́ ngá ḿbə́ Tǎ Ablaam, təmbɔʼ ŋwu tsə́ a fɛ́lə á mə́m pəkwû ńgɛnə̂ á mbô pó, pó kwúblə.

³¹Lə́ Ablaam a pɨ ńkə́ ə́sóŋ nə́ yí ńgə́, “Təmbɔʼ pó chîə á mbô Mosisə pópə məntúmə́sê jwə́ʼtə pô, á pə́ ńgə́ pó yǐ kě pí páʼ təmbɔʼ ŋwunə a pěʼ ńjúmnə á pə́ nəwû ńgɛn ə́wɨ́ pô.”