Read Awing Lukasə 17 Bible Online

Lukasə 17 - Awing bible

Lukasə 17

¹Yeso a sóŋə á mbô ngaŋə́zoŋə́ndzəm əjí ńgə́, Mənu mə́ ghɛd nə́ pɨ pə̈ ghɛlə̂ təpɔŋ mə́ chîə á mə́ yǐ nə́, lə́ ndɔ ə́ pə́ ńchîə atû ŋwu páʼ mə́ laŋ nə́ á mbô yə́.

²Á pěʼ ḿbɔŋ ńgə́ pə́ kwúd ngɔʼə aghɔʼə́púmə á ndě yí ḿmaʼə̂ yə́ á mə́m mɛ́ nkǐə, ńtsɛɛlə̂ ándó təmbɔʼ a chîə á mbî ńgɛd táʼ mɔ́ nə́ yitsə̌ a ghɛlə̂ təpɔŋə.

³Lə́ələ́ pə́ ńgə́, nə́ lɔg ndɛlə́! “Təmbɔʼ mɔ́mɛ́ əgho a fankə̂ anuə á mbô gho, gho sáʼə yə́, a kwúblə, gho ləgnə̂ afankə́nuə ajíə.

⁴Təmbɔʼ a wǔəə anuə á mbô gho ngǎ asaambɛ̂ ə́sóŋ ńgə́ ləgnə̂ awǔənuə mə, gho ləgnə̂.”

⁵Məntú mə́ Yeso mə́ sóŋ nə́ Mmaʼmbî ńgə́, “Peg mbimə́ əzəgə́.”

⁶A kwěe ńgə́, “Təmbɔʼ nə́ túg mbimə́ zɨ́d ə́ kə́gə pə́ ándó mbaŋ fɔ́lə́sə, nə́ sóŋ nə́ tə́kɔʼə atǐ ńgə́, ‘Tsɔ́ʼ mbɨ əzo ńgɛn ḿbǐə á mə́m nkǐə,’ zə́ələ́ á zóʼnə áwə́ənə́.”

⁷“Lɔg ńgə́ táʼ ŋwu əwɨ yitsə̌ a túgə ngaŋəfaʼ, a tə́ ńdíʼə alíʼə, kɨ ńtə́ ńtseŋnə̂ məmbéŋ. Əghâ ándó a kwə̂ nə́ afɔ, a yǐ ə́sóŋ nə́ ngaŋəfaʼ wə́ ńgə́, ‘A yǐ ńnáanə ńjî məjî?’

⁸A kě yǐ sóŋə pə́ ńgə́, ‘Ghɛd məjîə mə, ńkwúblə ətsəʼ əpô, ḿbyáb maŋ jîə mɨ́d ńkə́ ńnô, gho tíʼ ḿbɔŋə̂ jî məmô ə́ kə́ nô?’

⁹Kɨ nə́ kwaŋ ńgə́ a yǐ láʼkə ngaŋəfaʼ wə̂ ńté ńgə́ a faʼə̂ anu páʼə a pěʼ nə́ ə́sóŋ ńgə́ a faʼ lə́?

¹⁰Lə́ kə́ ḿbə́ ndzaŋ á chî nə́ nə́ pəənə́, təmbɔʼ nə́ faʼə̂ anuə atsəm pə́ sóŋ nə́ ńgə́ nə́ faʼ nə́ sóŋ ńgə́, ‘Pəg lə́ tsɔʼə ngaŋə́faʼə, pəg faʼə̂ lə́ tsɔʼə afaʼə azə́gə́.’ ”

¹¹Ndzaŋ Yeso a kə tə́ nə́ ńgɛnə̂ á Jɛlusalɛm lə́, ńdaŋə̂ á mə́m ndɛdtə Samalya pó Galiliə.

¹²Ndzaŋ a kə tə́ nə́ ńkwúnə á mə́mə aláʼ yitsə́ lə́, ngǎŋnkaʼ zɛ́n nəghə́m tégə yí ńtíʼ ńtə́əmə á ndi yi sɛ,

¹³ə́fóŋnə nə́ tə́kɔʼ ngye, ńgə́, “Yeso, Tǎ kó mələ́ŋ mə́gə́.”

¹⁴Ndzaŋ a nə ńjɨ́ nə́ ághɔ́b lə́, ə́sóŋ ńgə́ “ghɛn nə́ ńnɨd mbɨ əzəənə́ á mbô pəpépə́sê” Ndzaŋ pó nə ńgɛn nə́ lə́, ńtíʼ ŋ́ŋwaʼə̂ ághóobə́.

¹⁵Táʼ ŋwu əghɔb yitsə̌ a jɨ́ ńgə́ pə́ tsóʼə yə́, ə́sɛdnə̂ apəənənəndzə̈m, ńtíʼə ńgóʼkə Əsê nə́ tə́kɔʼ ngye,

¹⁶ńgɛn ńgwǔəə á məko Yeso ńdáʼkə yə́. Lə́ nə ḿbə́ ŋwu Samalitanə.

¹⁷Yeso a pítə ńgə́, “Lə́ pěʼ ḿbə́ pɨ nəghə́m páʼ pə́ tsóʼ nə́, pətsə́ pɛ́n nəpuʼə́ ə́ pə́ ə́fó?

¹⁸Lə́ ghɛlə̂ akə̂ lə́ yǐ tsɔʼə ŋwunə atú ghɛnə́ á mə́ láʼkə nə́ Əsê.”

¹⁹Yeso a tíʼ ə́sóŋə á mbô yí ńgə́, “Lǒo á əsê ńgɛnə̂, mbimə́ əzo ə́ ghɛd gho yáŋə.”

²⁰Pəfalasi pə́ nə ńdáʼ ḿbítə Yeso ńgə́ Anuə nəfoonə Əsê á ghɛd yǐ lə́ əghâ akə̂? Yeso a kwěe ńgə́, “Anuə nəfoonə Əsê á kë yǐəə lə́ nə́ ndú páʼ mbɔʼ pɨ jɨ́ pô.

²¹Kɨ pɨ pə̈ tíʼə ə́sóŋə ńgə́ á zəənə́ kɨ á jǐə ńté ńgə́ anuə nəfoonə Əsê á chî lə́ á mə́m gho.”

²²A tíʼ ə́sóŋə á mbô ngaŋə́zoŋə́ndzəm əjí ńgə́, “Ndɛd ə́ tə́ ńgyǐəə páʼ nə́ yǐ nə́ kyéŋə á mə́ pɨ nə́ jɨ́ tsɔʼə táʼə alě mɔ́ ŋwu, lə́ pə́ kě jɨ́ pô.

²³Pɨ pə́ yǒ ə́sóŋə áwɨ́ ńgə́, ‘A yǐəə!’ kɨ ‘A ghɛnə̂!’ lə kɔ nə́ tə́ ńkéelə ḿbúmə á ndzəm pó.

²⁴Ńté ńgə́ mɔ́ ŋwunə a yǒ tə́ pəənə́ lə́, Alěmbî yəwə́ á chî lə́ ándó nəfaŋ nə́ ŋwaŋkə̂ nə́, nkyaʼ ə́ fɛ́lə á əlá nəpó yitsə̌ ńgɛn ńkoʼ nə́ yitsə́ lə́.

²⁵Lə́, a yǐ peg zɨ ngə́ʼ nə́ mənu mimə́ nɨ́ nə́ pɨ pə́ ngoʼ pɨ pó kəŋkə̂ yə́.

²⁶Ndzaŋə á nə ńchî nə́ nə́ əlě mbî Nwâ lə́, lə́ tsɔʼə ndzaŋ á yǐ nə́ chî nə́ əlě mbî Mɔ́ Ŋwunə.

²⁷Pɨ pə́ kə tə́ ńjîə, ńnô, ńdzɔ́ʼə məndzɔʼə́ ḿbɨ ńkə́ ə́fɛ̂ póonə á ndzɔʼə́, tə́ ńkoʼə̂ alě Nwâ a nə́ ńkwú nə́ á mə́mə apáŋə. Nkǐ ə́ tíʼ ńgyǐ ńjwítə ághɔ́b tsɔʼə pətsəmə.

²⁸Lə́ tsɔʼə ndzaŋ á nə ńkə́ nə́ ńchî nə́ əlěmbî lɔlə, Pɨ pə́ kə̈ jîə, ńnô, ńjúnə, ə́finə̂, ḿbî əpú ńkə́ ḿbóomə.

²⁹Lə́ alě ándó lɔlə a nə́ fɛ́d nə́ Sodom lə́, móg pópə məngɔʼ mimə kɛ́d nə̈ ńdə́ŋə mə́ lǒo nəpó ńtsó ńtsəŋkə̂ ághɔ́b pətsəmə.

³⁰Lə́ tsɔʼə ndzaŋ páʼ a yǒ nə́ chîə á alě páʼ Mɔ́ Ŋwunə a yǒ nə́ jáʼə.

³¹Á lǒo pə́ alě yi wɨ́ lə́, ŋwunə a chî nə́ á ndu ndɛ̂ yə́ apeʼə ajíə á chîə á mə́m ndɛ̂, kɔ a tsóolə á mə́ fóg nə́. Kɨ ŋwunə a pěʼ nə́ ńchîə pə́ afɔ, kɔ a kwə̂ á mə́ pyá nə́ ajûtsə́.

³²Wə́ʼtə anuə a nə́ ńdaŋ nə́ nə́ ngwě Lɔlə!

³³Ŋwunə ä náŋ nə́ á mə́ chwádkə nə́ ńchî mbî əjǐ a yǐ péŋkə á zə́ələ́, ŋwu ntsəm páʼ a péŋkə nə́ nchîmbî əjǐ a yǐ chwádkə zə́ələ́.

³⁴Mäŋ sóŋə áwɨ́ ńgə́ á láʼ pə́ nətúʼə a alě wɨ́ pɨ pə́ pɛ̌ pə́ yǒ noŋnə̂ nə́ táʼ əkwunə́, pə́ lɔgə̂ táʼ ḿmɛdtə̂ táʼə.

³⁵Pəngyě pə́ pɛ̌ pə́ yǒ tə́ ghɔʼə̂ apéenə, pə́ lɔgə̂ a táʼ ḿmɛdtə̂ táʼə.”

³⁶Mbyâŋnə pɛ̌ yǒ chîə afoonə, pə́ lɔgə̂ táʼ ḿmɛdtə̂ táʼə.[9]

³⁷Ngaŋə́zoŋə́ndzəm əjí ə́ tíʼ ḿbítə ńgə́, “Ndɛn mənu ghɛn ə́ yǒ lɔgə̂ aliʼ lə́ ə́fó, Mmaʼmbî?” A kwěe ńgə́, “Aliʼə́ akwûə ajúmə á noŋnə̂ nə́ ə́wə́, lə́ aliʼ əŋkəŋâ ə́ tsɛntə̂ nə́ ə́wə́.”