Read Awing Lukasə 18 Bible Online

Lukasə 18 - Awing bible

Lukasə 18

¹Yeso a tíʼ ńtséebə atséebə́nə́múʼə́ á mbô ngaŋə́zoŋə́ndzəm əjí á mə́ zéʼkə nə́ ághɔ́b ńgə́ pó tə́ ńdzá ńchaʼtə́sê tsɔʼə tə kéenə.

²Yeso a sóŋ ńgə́, “Əsáʼməsáʼ yitsə̌ a kə láʼ ńchîə aláʼ yitsə̌, ńkě Əsê pɔ́g pô, ńkě ŋwu nə́ anü néŋə pô.

³Nkog məngyě yitsə̌ a nə ńkə́ ńchîə aláʼ yi wɨ́ ńdzä ńgyǐəə á mbô əsáʼməsáʼ yi wɨ́ ḿbóʼmbô ə́sóŋə ńgə́, ‘Kwáalə mə á mbô ngaŋkə́peenə́ mə.’

⁴A nə ńkə́ ńkǐəə yi tsɔʼə kǐ nə́ tə ńdǒ ńdwegtə̂ ə́sóŋ nə́ mbɨ əjǐ ńgə́, ‘Maŋ pǎtə ńkě Əsê pɔ́g, ńkě ŋwu nə́ anu kə́ néŋ pô lə́,

⁵ḿbə́ ńté tsɔʼə ńgə́ nkog məngyě nə́ a jwaʼə̂ mə tə́shú, maŋ yǐ sáʼ əsáʼ əyí ə́ lə́gə áwɨ́d əshîʼnə ńjî ńgə́ kɔ a yǒ ńjwaʼə̂ mə tə maŋ kwûə.’ ”

⁶Mmaʼmbîə a tíʼ ńgɛn nə́ mbiə á mə́ sóŋ nə́ ńgə́, “jwə́ʼtə nə́ anu páʼ ŋwunə a kě nə́ məsáʼ ndə̌ŋdəŋ sáʼə pô a sóŋ nə́.

⁷Nə́ əghâ nə́ nə́ kwaŋ ńgə́ Əsê a kě yǐ kwěe əfɛ̂ nə́ pɨ pí páʼ pó kyéŋ nə́ á mətôglə yə́ á nətúʼ pópə nənumnə? Nə́ kwaŋ ńgə́ á yǐ lɛ́ɛlə á mə́ kwá nə́ ághɔ́b? Ngá! A kě yǐ lɛ́ɛlə pô.

⁸Maŋ kyaʼə̂ áwɨ́ ńgə́ a yǐ kwáalə ághɔ́b ə́sáʼ əsáʼ zoŋ ndzəm əzoobə́, ə́ kə́ ghə́glə ə́wə́. Lə́ təmbɔʼ Mɔ́ Ŋwunə a yǒ ńgyǐ, tə a jɨ́ mbimə́ á ndu ndəsê?”

⁹Yeso a kə́ ńtséebə atséebə́nə́múʼ zəənə́ á mbô pɨ páʼ pó nə̈ ńkɔn nə́ ndzɔʼ əzɔb ńgə́ pó tɨ́ ndə̌ŋdəŋ ńtíʼ ńkě ŋwu tsə̌ nə́ anu néŋ pô.

¹⁰“Pɨ pə́ pɛ̌ pó nə ńgɛnə̂ á tə́kɔʼndɛ̂sê á chaʼtə́sê; táʼə pə́ ŋwu Falasi, yitsə̌ pə́ nkwânchubə aláʼə.

¹¹Ŋwu Falasi wə́ á lǒ əsê ńchaʼtə́sê ńté mbɨ əjǐ ə́sóŋə ńgə́, Əsê, maŋ fɛ̂ ndǎ nə́ gho ńté ńgə́ maŋ kě lə́ ándó pətsə́ pɨ chî pô, páʼ pó pə́ nə́ pəwaaməńkwáalə́, ngaŋə́ghɛlə təpɔŋə, ngaŋə jîə mə̂ghabə, kɨ nkwânchubə aláʼ ghɛn pô.

¹²Mäŋ ghɛlə̂ achaʼtə́sênji əlě pɛ̌ atû ngeebə, ńkə́ ə́fɛ̂ táʼ ajúmə á mə́m əpú pɛ́n nəghə́m páʼ maŋ túg nə́ á mbô Əsê.

¹³Lə́ nkwânchubə aláʼ wə́ a pə́ ńtɨ́ ndi ə́sagə̂, ńkě pímə á mə́ pɨg nə́ atûə ají ńnáŋ nəpó ə́wɨ́ pô, ńgwam ndzɔʼ əji ə́fɨnə̂ ə́sóŋ ńgə́, ‘Əsê, kó mələ́ŋə mə ńté ńgə́ maŋ lə́ ngɛdtəpɔŋə.’ ”

¹⁴Yeso a tíʼ ə́sóŋ ńgə́, “Mäŋ fiʼtə̂ áwɨ́ ńgə́ ŋwu nə́ a kə tə́ ńkwə̂ lə́ ŋ́ŋwaʼə̂ á mbi Əsê ńtsɛɛlə̂ ŋwu Falasi wə̂. Ńté ńgə́ ŋwu ntsəm páʼ ä kɔ́ʼkə nə́ mbɨ əjǐ, pə́ yǐ tsóokə yə́, ŋwu ntsəm páʼ ä kə́ nə́ ńtsóokə əjǐ, pə yǐ kɔ́ʼkə yə́.”

¹⁵Pɨ pətsə́ pə́ nə ńtə́ ńgyǐəə nə́ pɔ̂nkə̂ ńgə́ Yeso a noŋkə̂ mbô míə á atû pó. Ngaŋə́zoŋə́ndzəm əjí ə́ zə́ənə ághɔ́b ə́sáʼə ághóobə́.

¹⁶Lə́ Yeso a pə́ ə́fóŋ ńgə́ pə́ yǐ nə́ pɔ́ pi wə́ á mbô yí ńtíʼ ə́sóŋ ńgə́ “mɛdtə̂ nə́ kə́yé ŋwunə a yǐəə á mbô maŋə, kɔ nə́ kəmə̂ ághóobə́ ńté ńgə́ anuə nəfoonə Əsê á chî lə á mbô pɔ̂nkə̂ ándó pəənə́.

¹⁷Mäŋ sóŋə áwɨ́ lɛ̌ nə́ ndə̌ŋdəŋ ńgə́ ŋwunə a kě nə́ anuə nəfoonə Əsê ándó Mɔ̂nkə̂ lɔg pô, a láʼ kě ə́wɨ́ kwú pô.”

¹⁸Nətû nə́ Pəjusə yi nətsə́ nə́ pítə Yeso ńgə́, “Ndzéʼkə yi Əshîʼnə mbɔʼ maŋ ghɛd ə́lɛ́ á mə́ jî nə́ nchîntɨ páʼ ə́ mɛdnə̂ nə́ ngǎ mɔʼə́.”

¹⁹Yeso a pítə yí ńgə́, “Lə́ ghɛlə̂ akə̂ gho fóŋə mə nə́ ŋwu yi əshîʼnə? Ŋwu tsə̌ a kě ə́wɨ́ chî páʼ a pɔŋ nə́ tə ńdéʼtə Əsê pô.

²⁰Gho jî məntəgə́ mə́ Əsê: ‘kɔ gho jîə mə̂ghabə, kɔ gho jwítə, kɔ gho zəələ̂, kɔ gho tsɨd ntsəələ, ghóʼkə tǎ əgho pó mǎ əgho.’ ”

²¹Ŋwu wə́ a kwěe ńgə́ “Ə́fɛ́d pɔ̂nkə̂, maŋ lɔʼkə̂ məntəgə́ mə́ Əsê məənə́.”

²²Ndzaŋə ándó Yeso a kə zóʼ nə́ atsáb jɨ lə́, ńtíʼ ə́sóŋ nə́ yí ńgə́ “Gho pɛ́d ḿbóŋə táʼə anuə. Finə̂ ajúmə atsəm gho túg nə́ ə́fɛ̂ nkéebə á mbô pəpóŋə; ńtíʼ ńgyǐ ńdzoŋə̂ mə, afoʼə azô a tíʼ ńchîə á nəpóolə.”

²³Əghâ ándó ŋwu nə́ a nə ńdzóʼ nə́ atsáb jɨ́ lə́, ə́fɨnə̂ lɛ̌ tətə ńté ńgə́ a nə ḿbə́ lə́ chigə əfoʼə.

²⁴Yeso a náŋə yí ńtíʼ ə́sóŋ ńgə́, “A tyantə̂ á mbô ngǎŋnkéebə á mə́ kwú nə́ á mə́mə anuə nəfoonə Əsê.

²⁵A pyádnə ḿbwɔ́dnə á mbô tə̂ŋkaʼə á mə́ kwú nə́ á mə́m ngɔ́d əsáʼə atɛ̂tsəʼ, ńtsɛɛlə̂ ándó mbɔʼ ngaŋnkéebə a kwúnə á mə́mə anuə nəfoonə Əsê.”

²⁶Pɨ pə́ nə ńdzóʼ nə́ atsáb jɨ pó tíʼ ḿbítə ńgə́ “Mbɔʼ əwə a pə́ ńtíʼ ńchwáalə?”

²⁷Yeso a kwěe ńgə́ “Anu pɨ pə́ jɨ́ nə́ ńgə́ á tyantə̂ á mbô pó, á pwɔ́dnə á mbô Əsê.”

²⁸Pita a sóŋ nə yí ńgə́, “zə́ənə, pəg myaʼə̂ ajúmə atsəm pəg nə ńtúg nə́ a mə́ zoŋ nə́ á gho.”

²⁹Yeso a sóŋ nə́ pó ńgə́, “Mäŋ fiʼtə̂ áwɨ́ nə ndə̌ŋdəŋ ńgə́, ŋwu ntsəm páʼ a myaʼ nə́ nchîndɛ̂ əjǐ, kəənə məngyě, kɨ pɔ́pə́mɛ́ pí, kɨ tǎ əyǐ pó mǎ əyǐ, kɨ pɔ́ pí, ńté pə́ anuə nəfoonə Əsê

³⁰əpú pə́ páʼ a myaʼ nə́ lə́ əyǐ pɨ yǐəə á mbô yí tə jábtə nə́ ndɛd mbî zəənə́, a yǐ ḿbɔŋə́ jî nchîntɨ páʼ ə́ mɛdnə̂ nə́ ngǎ mɔʼə́, nə́ ndɛd mbî páʼ ə́ yǐ nə́ pɔŋə̂ yǐəə.”

³¹Yeso a lɔg ngaŋə́zoŋə́ndzəm əjí zə́ ntsɔb pɛ̌ pó po tsɔ́ʼə chwaŋ, a sóŋ nə́ pó ńgə́, “Jwə́ʼtə nə́! pɛn kɔ́ʼə ńgɛnə̂ lɛ̌ Jɛlusalɛmə, mənu mətsəm páʼ məntúmə́sê mə́ nə́ ŋwaʼlə̂ nə́ ńtə́ Mɔ́ Ŋwu mə́ yǐ lɔgə̂ aliʼə́.

³²Pə́ yǐ fɛ̂ yə́ á mbô Pətəjǐsê, pó nyegnə̂ yə́, ńdzɔmtə̂ yə́, ńtwǐ mətwê nə́ yí,

³³ə́shúmə yí ńtíʼ ńjwítə yə́. Lə́ əlě teelə́ ə́ laŋ a pɨ ńjúmnə nəwûə.”

³⁴Ətsáb pɨ́d pɨ ə́ nə ńkě atû ngaŋə́zoŋə́ndzəm əjí lánə ŋ́ŋwaʼ pô; pə́ kə lyáŋə ághɔ́b nə́ nətɛ́n nə́ atsáb yi nə wɨ́ pó tíʼ ńkě lánə ńjîə anu páʼ Yeso a nə sóŋ nə́ pô.

³⁵Ndzaŋ Yeso a nə ńgyǐ nə́ ńtə́ ńkwúnə Jɛliko lə́, əfə̌gmə́g yitsə̌ a náanə a nkaŋə́ alaŋə́ ńtə́ ńdɔ́ əpúmə.

³⁶Ndzaŋə a kə zóʼ nə́ pɨ pə́ kwəŋnə̂ ńdaŋə̂ ńnə́ənə lə́, a pítə ńgə́ “Lə́ akə̂ anuə á laŋ nə́?”

³⁷Pó kwěe yí ńgə́ “Lə́ laŋə̂ Yeso Mɔ́ Nazalɛlə.”

³⁸A fóŋnə nə́ tə́kɔʼ ngye ńgə́ “Yeso Mɔ́ Debid, tsá mələ́ŋə mə.”

³⁹Pɨ pə́ nə ńchî nə́ á mbi Yeso pó sáʼə əfəg wə̂ ńgə́ “Naʼ nə́ ntso əgho.” A pɨ ḿmegnə̂ ńgyɛ́ɛlə yɛ́ɛlə nə́ ńgə́ “Yeso Mɔ́ Debid, tsá mələ́ŋə mə.”

⁴⁰Yeso a tɨ́ ə́sóŋ ńgə́ “yǐ nə́ nə́ yə́.” Ndzaŋ a kə yǐ nə́ ḿbáatə lə́, Yeso a pítə yí ńgə́,

⁴¹“Gho loonə̂ lə́ ńgə́ maŋ ghɛd ə́lɛ́ nə́ gho?” A kwěe ńgə́ “Mmaʼmbî, mäŋ loonə̂ á mə́ pɨ nə́ jɨ́ əliʼə́.”

⁴²Yeso a tíʼ sóŋ nə́ yí ńgə́ “Jɨ́ əliʼə́. Mbimə́ əzo ə́ ghɛd gho yáŋə.”

⁴³Tsɔʼə əghâ yi wɨ́, a chwáakə á mə́ jɨ́ nə́ əliʼ ńtíʼ ńdzoŋə̂ Yeso, ńnyinə̂ ńgóʼkə Əsê. Ŋwu ntsəmə a nə ńgóʼkə Əsê ndzaŋ pó nə ńjɨ́ nə́ anu zɨ lə̂.