Read Awing Lukasə 19 Bible Online

Lukasə 19 - Awing bible

Lukasə 19

¹Yeso a kwúnə aláʼə Jɛliko ńtə́ ńgwadnə̂ ńdaŋə̂ ə́wə́.

²Əfoʼ yitsə̌ a chî ə́wɨ́ pə́ fóŋə nə́ zakyɔsə a pə́ nətû nə́ ngaŋə́kwáalə́ nchubə aláʼə.

³A kə tə́ ńdoonə̂ á mə́ jɨ́ nə́ Yeso, ḿbə́ ńté ńgə́ a nə ńkəmkə̂ tə́shúnə́, ŋwu məsɔŋə́ a kɨ́ʼə yí a kě chî təmbɔʼ a zə́ənə Yeso pô,

⁴Ńtíʼ ńkə ńgɛnə̂ a mbi ńgwaamə̂ atǐ yitsə̌ ńkɔ́ʼ ńnáanə ə́wə́ á mə́ jɨ́ nə́ Yeso ńté ńgə́ a kə chîə á mə́ laŋ nə́ alaŋə́ yi wə́.

⁵Ndzaŋ Yeso a kə yǐ nə́ ńkoʼə̂ aliʼ yi wɨ́ lə́, ḿbɨgə̂ atûə ajíə atǐ ə́sóŋ nə́ yí ńgə́, “zakyɔsə, ghə́glə ńtsóolə atûə atǐ wə̂ ńté ńgə́ maŋ yǐ shib lê á ndɛ̂ gho ə́sɛ̂nə̌.”

⁶Zakyɔsə a ghə́glə ńtsóolə atǐ wə́ ńtíʼ ńdɔgə̂ yí nə́ akɔŋtə.

⁷Ŋwu ntsəm páʼ a nə ńjɨ́ nə́ anu yə́ wɨ́ a chúʼə á mə́ ŋwuntə̂ nə ə́sóŋə ńgə́, “ŋwu nə́ a ghɛnə̂ á mə́ ghá nə́ ngɛdtəpɔŋə.”

⁸Lə́ Zakyɔsə a pə́ ńdǒ əsê ə́sóŋə á mbô Mmaʼmbî ńgə́, “Jwə́ʼtə Mmaʼmbî! maŋ yǐ gheebə̂ apeʼə mə ndə̌ŋdəŋə́ aliʼə́ nə́ əghâ nə́ ə́fɛ̂ á mbô pəpóŋə. Mbɔʼ maŋ nə ḿbɛ́dtə ə́fɨgə̂ ŋwu ńkwáalə ajúmə ají, tə ḿbə́ maŋ yǐ pɨ fɛ̂ ájɨ́d nə́ yí ə́jábtə ngǎ nəkwa.”

⁹Yeso a sóŋə á mbô yi ńgə́, “Ə́sɛ̂nə̌, pə́ chwádkə pɨ pə́ ndɛ̂ pɨ, ńté ńgə́ ŋwu nə́ a kə pə́ lə́ Mɔ́ Ablaamə.

¹⁰Ńté ńgə́ Mɔ́ Ŋwunə a kə yǐ lə́ á mə́ chwa nə́ pɨ páʼ pó péŋ nə́ ə́ kə́ chwádkə ághóobə́.”

¹¹Ndzaŋ pɨ pə́ nə́ ḿbɛ́d nə̈ ńjwə́ʼtə lə́, Yeso a ghɛn nə́ mbiə á mə́ tsáb nə́ atséebə́nə́múʼə́ a mbô pó, ńté ńgə́ a nə ńtíʼə ḿbáatə Jɛlusalɛm, pɨ pə́ kə́ ńkwaŋ ńgə́ Anuə Nəfoonə Əsê a yǐ əyǐ tsɔʼə əghâ yí wə́.

¹²A tíʼ sóŋə á mbô pó ńgə́, “Mɔ́ ntɔ́ʼə aláʼə atú yitsə́ a nə́ ńdáʼ ńtə́ ńgɛnə̂ aláʼə atú yitsə́ tə ndi sagə̂, ńgə́ pə́ lɔgə̂ yí ńdzɔ́ʼə əfo ə́wə́ a pɨ ḿbəənə̂ aláʼə.

¹³A nə́ ńjǐ tə́ ə́fɛ́lə lə́, ə́fóŋ ngaŋə́faʼ əjí zɛ́n nəghə́mə, əfɛ̂ táʼ táʼə apeemə nkéebə á mbô pó pətsəm ə́sóŋ ńgə́, Ghɛn nə́ ńtə́ ńtáŋ nkáb jɨ tə maŋ láʼ ḿbəənə̂.”

¹⁴“Lə́ pɨ pə́ aláʼ pí pó pə́ ḿbeenə̂ yə́, ńtíʼ ńtú pəənə a ndzəm yí ńgə́ pó ghɛn ə́sóŋ ńgə́, Pəg kě kɔŋ ńgə́ ŋwu nə́ a pə́ əfo əwəg pô.”

¹⁵“Pə́ nə́ ḿbɛ́d ńdzɔ́ʼə yí nə́ əfo tsɔʼə zɔ́ʼ nə́, a tíʼ ḿbəənə̂ aláʼə. Ä kə́ ńgə́ pəənə̂ lə́ ńtɔ́g ńtú nkɨ nə́ ngaŋə́faʼ əjí zə́ páʼ a nə fɛ̂ nə́ nkáb nə pó lə́ ńgə́ ŋwu ntsəmə a yǐ ə́fiʼtə̂ ndɛnə ape páʼ a jí nə́ nə́ nkáb əjǐ zə̂.”

¹⁶“Ntsɛɛmbi ŋwunə a yǐ ə́sóŋ ńgə́, Mmaʼmbî, táʼə apeemə nkáb əgho wə́ gho nə fɛ̂ nə́ nə́ maŋ lə́ a faʼ zɛ́n nəghə́mə.”

¹⁷“A sóŋə a mbô yí ńgə́, ‘Gho faʼ əshîʼnə, gho lə́ ngaŋəfaʼə mə yi əshîʼnə. Ndzaŋ gho faʼ nə́ əshîʼnə nə́ pɔ́ pə́ kə́nyaŋ pə́ mənu lə́, maŋ yǐ ghɛd gho tə́ ńnáŋ əláʼ pɛ́n nəghə́mə.’

¹⁸Yi páʼ a zoŋkə̂ nə́ a yǐ ə́sóŋ ńgə́, ‘Mmaʼmbî, táʼə apeemə nkáb əgho wê páʼ gho nə fɛ̂ nə nə́ maŋ lə́ a faʼ pɛ́n tênə.’

¹⁹A sóŋə á mbô wɨ́d ghɛn ŋwu ńgə́, Gho yǐ tə́ náŋ əláʼ pɛ́n tênə.”

²⁰“Yitsə̌ a pɨ́ ńgyǐəə ají ə́sóŋ ńgə́, ‘Mmaʼmbî, lɛ̌ táʼə apeemə nkáb gho wə́; Maŋ nə ńkwúlə ájɨ́d nə́ ajúmə atsəʼ ńdɔʼkə̂.

²¹Maŋ nə ńtə́ ḿbɔ́gə gho ńté ńgə́ mbɔ́ gho a tyantə̂ tə́shúnə́; gho kwáalə ajú páʼ a kě nə́ azô pô ńkə́ foʼə̂ aliʼ páʼ gho nə ńkě nə ə́wɨ́ pǐ pô.’

²²Əfo wə́ a sóŋə á mbô yí ńgə́, ‘Gho lə́ ngaŋə afaʼ təpɔŋə! əsáʼ əsáʼ əzo ə́fɛ́d nə́ ətsáb pô! gho jî ńgə́ mbóomə mə a tyantə̂, mäŋ kwáalə ajú páʼ a kě nə́ azá pô, ńkə̈ ə́foʼə̂ alíʼ maŋ kě nə́ wɨ́ pǐ pô.

²³Lə́ nə ńgɛlə̂ akə̂ gho kě ghɛn ńnéŋ nkéebə mə á nəlɔʼkə nə́ nkáb pô? Tə́ ḿbə́ maŋ pěʼ ńkwə̂ ə́fógə zɨ́d ape á kwú ə́wə́.’

²⁴A tíʼ ə́sóŋə á mbô pɨ pə́ nə ńtɨ́ nə́ alíʼ yə wɨ́ ńgə́, ‘kwá nə táʼə apeemə nkáb yi wə́ á mbô yí ə́fɛ̂ á mbô ŋwu páʼ a túg nə́ əpa nəghə́m lə̂.’

²⁵Pó sóŋə á mbô yí ńgə́, Mmaʼmbî, a pɛ́d tə ńtúg əpa nəghə́mə!”

²⁶“Yeso a sóŋ ńgə́, ‘Maŋ sóŋə áwɨ́ ńgə́ ŋwu ntsəm páʼ a túg nə́, pə́ yǐ pegə̂ yə nɨ́ nə́ á mbô yə́, lə́ ŋwu páʼ a kě nə́ túg pó, mɔ́ alíʼ páʼ a túg nə́ pə́ yǐ kwáalə áwə́ələ́ á mbô yə́.

²⁷Lə́, yǐ nə nə́ ngaŋkə́peenə́ mə zə̂ pó nə ńkě nə́ kɔŋ ńgə́ maŋ pə́ əfo pô lə́ ńjwítə ághóobə́ a mbi maŋə.’ ”

²⁸Yeso a nə ńtsáb ətsáb pɨ lɛ̌ lə́, ńtíʼ ńkwá mbi əzɔb ńtə́ ńkɔ́ʼə ńgɛnə̂ á Jɛlusalɛm.

²⁹Ndzaŋ a nə́ ńtə́ nə́ ḿbáatə Bɛlfas pó Bɛtani lə́, ńkoʼə̂ á nkwəənə Olif, ńtú ngaŋə́zoŋə́ndzəm əjí zɛ́n pɛ̌

³⁰ə́sóŋ nə́ pó ńgə́, “Ghɛn nə́ aláʼ páʼ á chî nə́ mbi pɨ lə́; nə́ yǐ kə́ ghə́ kwúnə aláʼ yi wɨ́ lə́, ə́zə́ənə mɔ́ kə́nyaŋ njakasə yitsə̌ páʼ pə́ təŋnə̂ nə́, páʼ ŋwu tsə̌ a nə́ ńkě nə́ á ndú wɨ́ kə́ kɔ́ʼə pô. Kyag nə́ zɨ́d ńgyǐ nə́ zə́ələ́.

³¹Mbɔʼ ŋwu tsə̌ a pítə wɨ́ ńgə́, ‘Nə́ kyagə̂ zɨ́d lə́ ńgə́ akə̂?’ Nə́ sóŋ ńgə́, ‘Mmaʼmbîə a loonə̂ á zə́ələ́.’ ”

³²Pó ghɛn ńkə́ ńdzə́ənə anuə atsəm tsɔʼə ndzaŋ páʼ Yeso a pěʼ nə́ ə́sóŋ nə́ pó lə́.

³³Ndzaŋ pó nə ńtə́ nə́ ńkyag njakasə zə́ lə́, ŋwúlə́ apítə ághɔ́b ńgə́, “Nə́ kyagə̂ lə́ ńgə́ akə̂?”

³⁴Pó kwěe ńgə́, “Mmaʼmbîə a loonə̂ á zə́ələ́,”

³⁵Pó tíʼ ńdɔgə̂ zɨ́d ńgɛn ə́fɛ̂ nə́ Yeso. Ńtíʼ ḿmaʼ ətsəʼ əpóobə́ á ndu mɔ́ njakasə yi wɨ́ ńtɔ́mtə Yeso a kɔ́ʼ ńnáanə a ndu wə́.

³⁶Ndzaŋ a nə ńtə́ nə́ ńgɛnə̂ lə́, pɨ pə́ tíʼə ḿmaʼ ətsəʼ əpóobə́ á alaŋə́.

³⁷Əghâ a nə ńgyǐ nə́ ḿbáatə Jɛlusalɛm, nə́ alaŋə́ á nə ńdǒ nə́ á nkwəənə Olif ńtə́ ńtsóolə lə́, apoŋə ngaŋə́zoŋə́ndzəm ajíə a chúʼə mə́ kɔŋtə̂ nə́, ə́ ghóʼkə Əsê nə́ pətə́kɔʼ pə́ məngye ńté pətə́kɔʼ pə́ mənu páʼ pó jɨ́ nə́.

³⁸Ə́sóŋ ńgə́, “Mbwɔ́dnə ə́ chîə á mbô əfo páʼ a yǐ nə́ nə́ əlɛ́n Mmaʼmbîə! Mbwɔ́dnə á nəpóolə, ngóʼkə ə́ chî nə́ əlɛ́n Əsê páʼ a tsɛ nə́ ajúmə atsəmə!”

³⁹Pɨ pə́ Falasi pətsə́ páʼ pə́ nə ńchî nə́ á mə́m ənɔ pó sóŋə a mbô Yeso ńgə́, “Ndzéʼkə, sáʼ ngaŋə́zoŋə́ndzəm əzô jɨ pó naʼə̂.”

⁴⁰Yeso a kwěe ńgə́, “Mäŋ fiʼtə̂ áwɨ́ ńgə́ mbɔʼ pó naʼ, á pə́ pə́ məngɔʼ, mə́ chúʼə á mə́ jwáglə nə́.”

⁴¹Ndzaŋ Yeso a nə́ ńjáʼ nə́ ńdzə́ənə Jɛlusalɛm lə́, ńkyéŋ ńté aláʼ yəwə́.

⁴²Ə́sóŋ ńgə́ “á pěʼ ḿbɔŋ ńgə́ nə́ jî mənu páʼ mə̈ yǐ nə́ nə́ mbwɔ́dnə á mbô pɨ ə́sɛ̂nə̌, lə́ nə́ pə əghâ nə́, pə́ pɛn ńdyáŋə mə́ələ́ á əmə́g pəənə́.

⁴³Ndɛd tə́ ńgyǐəə páʼ ngaŋkə́pa əzɨ́ ə́ yǒ nə́ kwúd nkáʼ líblə áwɨ́ ə́wə́, ə́ kə́ tsélə áwɨ́ məlá mətsəmə.

⁴⁴Pó yǒ kwíʼnə ghɔʼə̂ áwɨ́ pə pɔ́ pɨ pətsəmə, tsɔʼə táʼ ngɔʼə á yǒ kě pɛ́d ńnoŋnə̂ á ndú yitsə̌ pô, ńté ńgə́ pɨ nə ńkě jî chigə ndɛd páʼ Əsê a nə ńgyǐ nə́ á mə́ chwádkə nə́ áwɨ́ pô!”

⁴⁵Yeso kwúnə á mə́m tə́kɔʼndɛ̂sê ńkəm ngaŋə́táŋə́mə́tá ə́wə́,

⁴⁶Ńtíʼ ə́sóŋə á mbô pó ńgə́, “Pə́ ŋwaʼlə̂ á mə́mə aŋwaʼlə Əsê ńgə́, ‘Ndɛ̂ Mə ə́ yǒ pə́ lə́ aliʼə́ achaʼtə́sê.’ Nə́ pɛn ńtíʼ ńdɔgə̂ ázɨ́d ńgɛlə̂ pə́ alíʼə nəlyaŋnə́ pəzə̌ ə́wə́.”

⁴⁷Yeso a nə̈ ńdzéʼkə á tə́kɔʼndɛ̂sê lə́ əlě ətsəmə, lə́, pətə́kɔʼ pə́ ngaŋə́pêsê, ngaŋə́zéʼkə pənoŋkə, ḿbɨ́ ḿbə́ nə́ mətû mə́ aláʼ pó nə ńtə́ ńdɔ ndúmə a mə́ jwítə nə yə́,

⁴⁸ḿbə́ ńkě əsa jɨ́ pô ńté ńgə́ ŋwu ntsəmə a nə fɛ̂ mətôglə mí nə́ yí ńtə́ ńjwə́ʼtə anuə atsəm páʼə ä sóŋ nə́.