Read Awing Lukasə 2 Bible Online

Lukasə 2 - Awing bible

Lukasə 2

¹Nə́ ndɛd jɨ́d zə̂, əfo Kasa Ɔgɔstusə a sáʼ ńgə́ pə́ sháŋə ŋwu ntsəm páʼə a chî nə́ á mə́m ətú ətsəm páʼ Lomə á kə̈ sáʼ nə́.

²Lɛ̌ nə ḿbə́ ntsɛɛmbi ndɛlə́ á mə́ sháŋ nə́ pəənə, əghâ yi wɨ́ Kwilinusə a pə́ lə́ nətû nə́ Silya.

³Ŋwu ntsəmə a tíʼ ḿbəənə̂ aláʼ pó á mə́ ŋwaʼlə̂ nə́ əlɛ́n əyíə.

⁴Jɔsɛfə a tíʼ ńkə́ ə́fɛ́lə ajíə á Nazalɛlə á mə́mə aláʼə Galili ńkɔ́ʼ ńgɛnə̂ á Bɛtəlɛɛmə á aláʼ pə Debid á mə́m Judya, ńté ńgə́ a kə fɛ́d lə́ á mə́m əla pə Debilə.

⁵A nə ńgɛn ə́wɨ́ lə́ pó Mɛɛlə á mə́ ŋwaʼlə̂ nə́ məlɛ́n móobə́. Mɛɛlə páʼə a kə tə́g nə́ nə́ ngwě əyǐ lə́ a kə chî nə́ móonə.

⁶Ndzaŋ pó kə chî nə́ ə́wɨ́ lə́, ndɛd ə́ koʼə̂ á mə́ pî nə́ mɔ́ yi wə́.

⁷A pîə mɔ́ nətû əyə́, a pə́ yi mbyâŋnə, a lə́mə yí nə́ əpag ətsəʼ ńnéŋə yə́ á mə́m nəkwuʼ páʼ məna mə́ jî nə́ ə́wə́, ńté ńgə́ aliʼə́ á kə kě pɛ́d mbɔʼ pó lê ə́wə́ á mə́m ndɛ̂ pəghɨ pô.

⁸Pətseŋnə pətsə́ pə́ nə ńchîə á kɔŋə á əlá aláʼ wɨ́d wə̂ á nətúʼ ńtə́ ńnáŋə məna móobə́,

⁹Ntseŋndɛ̂ Mmaʼmbîə a ghabkə̂ ə́fɛ́lə á mbi pó nkyaʼ Mmaʼmbî páʼ ə́ ŋwaŋkə̂ nə́ ə́ kyaʼ ńdíblə ághóobə́, pó pɔ́g lɛ tətətə.

¹⁰Lə́ ntseŋndɛ̂ Mmaʼmbî wə̂ a pə́ ə́sóŋə á mbô pó ńgə́, “Kɔ nə́ pɔ́gə, jɨ́ nə́, maŋ yǐ lə́ nə́ nkɨ yi əshîʼnə á mbô pəənə́, páʼ wɨ́d ə́ yǐ nə́ yǐ nə́ akɔŋtə á mbô ŋwu ntsəmə.

¹¹Ə́sɛ̂nə̌ á mə́mə aláʼə pə Debid pə́ pîə Nchwádkə, yi páʼ Əsê a Tsəʼ nə́ lə́, a pə́ nə́ Mmaʼmbîə.

¹²Akyeʼə́nuə á mbô pəənə á yǐ pə́ lə́ ńgə́, nə́ yǐ zə́ənə á mɔ́ pə́ lə́m nə́ nə́ əpag ətsəʼ, ńnéŋə á mə́m nəkwuʼ páʼ məna mə́ jî nə́ ə́wə́.”

¹³Tsɔʼə əghâ yi wɨ́ aláʼə pətseŋpə́ndɛ́pə́sê pətsə́ pə́ jáʼ ńtégə yitsə̌ wə̂ pó po tíʼə ńgóʼkə Əsê ə́sóŋə ńgə́,

¹⁴“Ńgóʼkə á mbô Əsê páʼ ə́ chî nə́ á nəpóolə atǐə, mbwɔ́dnə ə́ kə ńchîə á mbô pəənə á ndu ndəsê páʼ mbɨ Əsê ə̈ pɔŋ nə́ ńté ághóobə́.”

¹⁵Pətseŋpə́ndɛ́pə́sê pə̂ pə́ mɛdtə̂ pətseŋnə pə́ məna pə́ ńgɛnə̂ ághóobə́ á nəpóolə. Pətseŋnə pə́ məna pə̂ Pó tíʼ ə́sóŋə á tətɨ pó ńgə́, “Yǐ nə́ pɛn ghɛnə̂ á Bɛtəlɛɛmə, ńdzə́ənə anu jɨ páʼə á laŋ nə́ ə́wɨ́, Mmaʼmbîə a tíʼ ńkyaʼə̂ áwɛ̂n lɛ.”

¹⁶Pó tíʼ ńgə́glə ńgɛn ńdzə́ənə Mɛɛlə pó Jɔsɛf nə́ mɔ́ yi wə́ a noŋnə̂ á mə́m nəkwuʼ páʼ məna mə́ jî nə́ ə́wə́.

¹⁷Pó tíʼ fiʼtə̂ a ŋwu ntsəm nə́ anu páʼ á laŋ nə́, ńkə́ ḿbɨ ḿbə́ nə́ anu páʼ ntseŋndɛ̂sê a pěʼ nə́ ə́fiʼtə̂ ághɔ́b ńté mɔ́ yi wə́.

¹⁸Á kə kɨʼnə̂ ŋwu ntsəm páʼ a kə zóʼ nə́ anu páʼ pətseŋnə pə́ məna pə́ pə́ sóŋ nə́.

¹⁹Lə́ Mɛɛlə a pə́ ńdɔʼkə̂ mənu mɨ mətsəmə á ntɨ́ yə́, ńnáanə ńkwaŋə̂ mɨ́d əghâ ətsəmə.

²⁰Pətseŋnə pə́ məna pə́ pó pəənə̂, ńdzoobə̂ ńgóʼkə Əsê nə́ anuə atsəm páʼ pó zóʼ nə́ ńkə́ ńdzə́ənə á kə́ ńchî tsɔʼə ndzaŋ páʼ pə́ nə ə́fiʼtə̂ ághóobə́.

²¹Ngab ə́ kə tə́m lə́, ndɛd ə́ koʼə̂ á mə́ póʼ nə́ mɔ́ yi wə́, pə́ tíʼ ə́fɛ̂ əlɛ́n yí nə́ Yeso, á pə́ əlɛ́n ntseŋndɛ̂sê a kə fɛ̂ nə́ záʼ pə́ yǒ ḿbɔŋə̂ chî nə́ yə́.

²²Ndɛd ə́ kə koʼ páʼ Jɔsɛf pó Mɛɛlə pó kə chî nə́ á mə́ yǐ nə́ nə́ akáŋə́sê pə́ sogə̂ ághɔ́b ndzaŋ Noŋkə Mosisə á kə nɨd nə́; pó tíʼ ńdɔgə̂ mɔ́ yi wɨ́ ńgɛn nə́ yə́ á Jɛlusalɛmə á mə́ nɨd nə́ yə́ á mbô Mmaʼmbîə.

²³Pə́ ŋwaʼlə̂ á mə́m noŋkə Mmaʼmbî ńgə́, “Mbɔʼ ŋwunə a pîə mɔ́ nətû əyǐ yi mbyâŋnə a yǐ nə́ wɨ́d ə́fɛ̂ á mbô Mmaʼmbîə.”

²⁴Pó kə ghɛn lə́ á mə́ kə́ nə́ ə́ tû fyaʼə́nuə á mbô Əsê nə́ əlúʼə pɛ́n pɛ̌ kɨ pɔ́ pəsə́ŋ pə́ məkálə́ pɛ́n pɛ̌ ńdzoŋ ndzaŋ noŋkə Mmaʼmbîə a kə nɨd nə́.

²⁵A kə pə́ nə́ ndɛd yi wɨ́ lə́, ŋwu tsə̌ a chîə Jɛlusalɛm pə̈ fóŋə nə́ Saamunə ḿbə́ ndə̌ŋdəŋ ŋwu ḿbɔ́g Əsê ńkə́ ńdwɛ́nkə nə́ Ajwǐəsê. A kə náanə lə́ ńtə́ ḿbyáb ndɛd páʼ yi páʼ Əsê a Tsəʼ nə́ lə́ a yǐ nə́ legtə̂ məntɨ́ mə́ pɔ́ pə́ Islɛlə.

²⁶Ajwǐəsê a kə fiʼtə̂ yí ńgə́ a kě yǐ kwû tsɔʼə tə ghə́ a zə́ənə yi páʼ Əsê a Tsəʼ nə́ lə́, páʼ Mmaʼmbîə a kə sóŋ nə́ ńgə́ á yǒ yǐ lə̂ pô.

²⁷Á kə pə́ nə́ ndɛlə́ ándó pətǎ pə́ Yeso pə́ nə ńdɔg nə́ yí ńgɛn nə́ Tə́kɔʼndɛ̂sê á mə́ faʼ nə́ mənu páʼ noŋkə á kə lɔ nə́ á mbô pó lə́, Ajwǐəsê a kwumə̂ Saamun, a yǐəə á mə́m Tə́kɔʼndɛ̂sê ghɛnə́,

²⁸ńkwáalə mɔ́ wə̂ ńtúgə á mbô yí ńtíʼə ə́fɛ̂ ndǎ á mbô Əsê ə́sóŋə ńgə́,

²⁹“Mmaʼmbî, ndzaŋə ándó gho zoŋnə̂ nə́ ndaʼnə əzo lə́, mɛdtə̂ ngaŋəfaʼ gho a ghɛn nə́ mbwɔ́dnə.”

³⁰Maŋ lɔg əmə́gə mə ńdzə́ənə mɔ́ nə́ páʼ gho tú nə́ ńgə́ a yǐ ńchwádkə pɨ lɛ.

³¹Gho tyáŋtə nə́ ńgə́ ŋwu ntsəm ntsəmə a zə́ənə yə́.

³²A yǐ pə́ lə́ nkyaʼ páʼ ə́ yǐ nə́ nɨd məndú mô á mbô pɨ pə́ atú pi ndaʼə, ə́ pɨ yǐ nə́ ngóʼkə á mbô pɨ pô páʼ pó pə́ nə́ pɔ́ pə́ Islɛlə lə̂.

³³Anu pə́ nə ə́sóŋ nə́ ńté mɔ́ nə́ á nə ńkɨʼnə̂ mǎ əyǐ pó tǎ əyǐ lɛ tətətə.

³⁴Saamun a kə sóŋ lə́ ə́fɛ̂ mbwɔ́dnə nə́ pó, ńtíʼ ə́sóŋ nə́ Mɛɛlə páʼə a pə́ nə́ mǎ əyǐ lə́ ńgə́ “Əsê a túmə mɔ́ nə́ lɛ̌ lə́ ńgə́ a yǐ ńgɛd pɨ pipə nɨ́ nə́ pó wukə̂ á Islɛlə, a pɨ ńkə́ ńdookə̂ pətsə́. A yǒ pə́ lə́ akyeʼə́nuə á lǒo nə́ á mbô Əsê páʼ pɨ pi nɨ́ nə́ pə́ yǒ nə kǐəə ághóobə́.

³⁵Ə́laŋ ə́lɨ́d ə́ kyaʼ məntɨ́ móobə́, anu yəwə́ á ghɛd gho fɨnə̂ tə á chîə pə́ ándó təmbɔʼ ntɨ́ əgho ə́ lə́gnə ńgwǔəə á mə́m ə́wə́.”

³⁶Ntəŋkaŋ məngyě yitsə̌, ḿbə́ ntûsê, a nə́ ńkə́ ńchî ə́wɨ́ pə̈ fóŋə nə́ Ana, á pə́ mɔ́ fanuɛlə ə́fɛ́d nə́ əla Asha. A kə chîə á ndɛ̂ ndzɔʼə́ lə́ tsɔʼə ngoʼə́ asaambɛ̂,

³⁷ndú əyǐə a kwûə yə́ a tíʼ ḿbə́ nkog məngyě, tə ńkoʼ ngoʼ məghə́m nəfeemə́ nə́ ngoʼ nəkwa. A kə̈ ńchîə lə́ tsɔʼə á mə́m Tə́kɔʼndɛ̂sê á nətúʼ pó nənumnə ńchîə tə jî məjî ńchaʼtə́sê.

³⁸Ndzaŋə ándó Saamunə a kə məgtə̂ nə́ atséebə ají lə́, Ana a yǐəə á mbi pó əfɛ̂ ndǎ á mbô Əsê ńtíʼ ə́sóŋə anu ńté mɔ́ wɨ́d wə́ á mbô ŋwu ntsəmə a kə náanə nə́ ńtə́ ḿbyáabə ńgə́ pə́ yǐ ə́fógə Jɛlusalɛm á mə́m ngə́ʼə.

³⁹Əghâ ándó Jɔsɛf pó Mɛɛlə ə́ kə məgtə̂ nə́ mənu mətsəmə ándó noŋkə Mmaʼmbîə á kə nɨd nə́ ńgə́ pó faʼ lə́, ńtíʼ ḿbəənə̂ á aláʼ pó á Nazalɛlə á chî nə́ á mə́m Galiliə.

⁴⁰Mɔ́ wə̂ a kwéŋ ńkə́ ńtyantə̂, ńdwɛ́nkə nə́ ajíənuə ḿbɨ ńtúg mbwɔ́dnə Əsê á mə́m yə́.

⁴¹Tǎ pə Yeso pó mǎ əyǐ pó nə̈ ńgɛnə̂ á Jɛlusalɛm á ngoʼ ntsəm nə́ ndɛlə akɔŋtə ndzáʼkə.

⁴²Yeso á nə ḿbɛn ḿbə́ ngoʼ ntsɔb pɛ̌ lə́, pó kɔ́ʼ ńgɛnə̂ aliʼə́ akɔŋtə yi wɨ́ ndzaŋ pó ghə́ pěʼə̈ ńgɛnə̂.

⁴³Ndzaŋ akɔŋtə á kə měe nə́ lə́, pó chúʼə á mə́ kwə̂ nə́, lə́ mɔ́ əghɔb Yeso a pə́ ńgɔ́ŋə yə́ á Jɛlusalɛmə. Tǎ əyǐ pó mǎ əyǐ ə́ pə́ ńkě jî ńgə́ a pɛ́lə á ndzəm pô.

⁴⁴Akwaŋə azóobə́ á kə nɨd ńgə́ a chîə á mə́m ənoonə, pó nə ḿbɛn ńnyi tə alěmbîə á měe pó náŋə á mə́m pəlim pópə pəshu ńkě yí jɨ́ pô.

⁴⁵Pó nə ńkě yí jɨ́ pô lə́, ńtíʼ ə́sɛdnə̂ ḿbəənə̂ á Jɛlusalɛmə á mə́ chwa nə́ yə́.

⁴⁶Á laŋ əlě teelə́ pó zə́ənə yə́ á mə́m Tə́kɔʼndɛ̂sê, a náanə pópə ngaŋə́zéʼkə pənoŋkə, ńjwə́ʼtə á mbô pó ḿbəənə̂ ḿbítə ághɔ́b nə́ əpítə ətséebə.

⁴⁷Á kə kɨʼnə̂ á ŋwu ntsəm ndzaŋə a kə̈ zóʼ nə́ a kwěe mənu nə́ ajíənuə.

⁴⁸Tǎ əyǐ pó mǎ əyǐ ə́ kə zə́ənə yí lə́ anu yəwə́ á kɨʼnə̂ ághóobə́, mǎ əyǐə a sóŋə á mbô yí ńgə́, “Mɔ́, lə́ ghɛlə̂ akə̂ gho ghɛd nə́ pəg ə́lênə̌? Pəg tǎ əgho pěʼ ńtə́ ńdánə ńnáŋə gho ńdzoŋə̂ ḿbɔ́gə ńgə́ əghâ tsə̌ gho péŋə.”

⁴⁹A sóŋə á mbô pó ńgə́, “Nə́ pěʼə́ ńnáŋə mə lə́ ńgə́ akə̂? Nə́ kě jî ńgə́ maŋ kə pěʼ ńchîə á mə́ chî nə́ á ndɛ̂ Tǎ mə?”

⁵⁰Atûə azóobə́ á pə́ ńkě lá nə́ anuə ándó páʼ a sóŋ nə́ lə́ pô.

⁵¹Pó po kə pəənə̂ á Nazalɛlə a ghɛn nə́ mbiə á mə́ zóʼnə nə́ ághóobə́. Lə́ mǎ əyǐə a pə́ ńdɔʼkə̂ mənu mɨ mətsəmə á ntɨ́ yə́

⁵²Yeso a ghɛn nə́ mbiə á mə́ kwíŋ nə́ nə́ ajíənuə pópə nkɔ̌ʼmbɨ əyə́. Əsê pópə ŋwu məsɔŋ ə́ kə́ ńkɔŋə̂ yə́.