Read Awing Lukasə 20 Bible Online

Lukasə 20 - Awing bible

Lukasə 20

¹A nə ḿbə́ táʼə alě yətsə̌ Yeso a chîə tə́kɔʼndɛ̂sê ńtə́ ńdzéʼkə ə́sóŋə Anǔəsê, pətə́kɔʼ pə́ ngaŋə́pêsê, ngaŋə́zéʼkə pənoŋkə, ḿbá mətû mə́ aláʼ pó yǐ

²ə́sóŋ nə́ yí ńgə́, “fiʼtə̂ áwə́g nə́ ndú páʼ gho lɔg nə mətɨ ə́wɨ́ ə́faʼ ndɛn mənuə nə ə́wə́, əwə a fɛ̂ nə mətɨ mɨ́d məənə́ á mbô gho?”

³Yeso a kwěe ághɔ́b ńgə́, “maŋ kə́ ńtúgə azéemə apítə, fiʼtə̂ nə mə ńgə́

⁴Jɔnə a kə̈ fɛ̂ nkǐ lə́ nə́ mətɨ mə́ lǒo nə́ á nəpó kəənə mbô pɨ pə́ mbîə?”

⁵Pó tíʼə ńtsəmnə̂ a mə́m pó ə́sóŋə ńgə́, “Mbɔʼ pɛn kwěe ńgə́, á nəpóolə, tə ḿbə́ a yǐ pítə áwɛ́n ńgə́, ‘Akə̂ nə ḿbə́ ńgɛd nə́ kě yí pí pô?’

⁶Lə́ mbɔʼ pɛn kə́ ə́sóŋ ńgə́ á mbô pɨ pə́ mbîə, tə ḿbə́ ŋwu məsɔŋə́ nə́ aliʼə́ nə́ ntsəm a yǐ tə́mtə áwɛ́n nə́ məngɔʼə, ńté ńgə́ á pɛ́d tə ńchîə atû pó ńgə́, Jɔnə a nə ḿbə́ lə́ ntûsê.”

⁷Pó tíʼ ńkwěe ńgə́, “pəg kě jîə aliʼ mə́ nə̈ ńdǒ nə́ ə́wɨ́ pô.”

⁸Yeso a tíʼ ə́sóŋ ńgə́, “maŋ kě áwɨ́ yǐ kə́ fiʼtə̂ nə́ aliʼ məmá mətɨ mə́ lǒo nə́ ə́wɨ́ maŋ faʼ ndɛn mənuə nə ə́wɨ́ pô.”

⁹Yeso a chúʼə á mə́ zéʼkə nə́ pɨ nə́ yətsə́ atséebə́nə́múʼə́ ńgə́ “Ŋwu tsə̌ a nə ńtúg nkáʼ əyí ńtíʼ ńtsoŋkə̂ nkáʼ yi wɨ́ ḿbǐ mətǐ mə́ məloʼ páʼ mə́ fɛ̂ nə́ mənta pə̈ fóŋə nə́ glebə, ńtíʼ ńnéŋ pɨ ə́wɨ́ ńgə́ pó tə́ ə́faʼə̂ á mbô yə́, ńtíʼ ńgɛnə̂ yə́ atú yi ndaʼ ḿbyádnə ńchî ə́wə́.

¹⁰Əghâ ándó ndɛlə akyɛmə́nta mə́ atǐ mə̂ ə́ nə́ ńkoʼ nə́ lə́ a túmə táʼ ngaŋəfaʼ əyǐ ńgə́ a ghɛn ńkwá əyǐ gleb páʼ pə́ kyɛ̂ nə́. Lə́, ngaŋə́shíʼnə nkáʼ zə̂ ə́shúmə yi, ńkəmə̂ yə́ a ghɛn nə́ mbô mə́ kətaŋə.

¹¹A pɨ ńkə́ ńtúmə yitsə̌ ngaŋəfaʼ, ngaŋə́shíʼnə nkáʼ zə̂ ə́ kə́ ḿbɨ ə́shúmə yí, ńnéŋ əsə́ənə atû yí ńkə́ ńkəmə̂ yə́ a pɨ ńkə́ ńgɛn mbô mə́ kətaŋə.

¹²Ngaŋnkáʼ ə́wə́ a kə́ ḿbɨ ńtúmə a yitsə̌ ngaŋəfaʼə á pə́ pó pɛ́n pə́ teelə́. Nə́ ghɛn lɛ̌ ŋwu, pə́ néŋ məfəŋ nə́ yí, ńchǐə yí ḿmaʼə̂ apeŋə́.”

¹³“Ngaŋnkáʼ wə̂ a tíʼ ə́sóŋ nə́ mbɨ əjǐ ńgə́, Maŋ yǐ ghɛd lə́ ə́lɛ́ əghâ nə́? Maŋ yǐ tíʼ túmə á ndə̌ móonə mə yi mbyâŋnə páʼ maŋ kɔŋ nə́, əghâ tsə̌ pó ghóʼkə yə́.”

¹⁴“Ndzaŋə ándó ngaŋə́shíʼnə nkáʼ zə̂ ə́ nə ńjɨ́ nə́ a mɔ́ yí wə̂ páʼ a kɔŋ nə́ lə́, ńtíʼ ə́sóŋ ńgə́ ‘Lɛ̌ njîndɛ̂ əyǐə, Pɛn jwítə a yí ńjî ńgə́ nkáʼ gleb ghɛn ə́ tíʼ ḿbə́ əwɛ́nə.’

¹⁵Pó fyáalə yí ə́fógə á mə́m nkáʼ ńtíʼ ńjwítə yə́.” Əghâ ándó Yeso a nə́ məgtə̂ nə́ á mə́ tsáb nə́ atséebə́nə́múʼ zɨ lə́ ńtíʼ ḿbítə pɨ pə̂ ńgə́, “Nə́ kwaŋ ńgə́ ngaŋnkáʼ gleb wə̂ a yǐ ghɛd ə́lɛ́ nə́ pɨ pə̂?

¹⁶A yǐ jwítə ngaŋə́shíʼnə nkáʼ zə̂ ə́ tíʼ ə́fɛ̂ nkáʼ gleb əyə́ á mbô pɨ pə́ ndaʼə.” Ndzaŋə ándó pɨ pó nə ńdzóʼ nə́ anu zɨ́ lə́ ə́sóŋ ńgə́, “Kɔ Əsê a pí ńgə́ mbô anu zɨ ə́ laŋə̂.”

¹⁷Lə́ Yeso a tə́g əmə́g ńnáŋ pɨ pə̂ ńtíʼ sóŋ ńgə́, “Anu zɨ páʼ á chî nə́ á mə́m aŋwaʼlə Əsê ä sóŋə lə́ ńgə́ akə̂? Anu yə ə́wə́ ä sóŋə lə́ ńgə́, ‘Tsɔʼə ngɔʼ ngaŋə́póomə ndɛ̂ ə́ nə ḿmyaʼ nə́ ńgə́ ə́ kě pɔŋ pô ə́ tíʼ ḿbə́ pə́ ngɔʼ nəlwî nə́ ndɛ̂ páʼ ə́ wam nə́ ndɛ̂ ńtsɛ məngɔʼ mətsəmə.’

¹⁸Ŋwu ntsəm páʼ a wǔ nə́ á ndu ngɔʼ zɨ a yǐ pə́ʼkə akəmə akəmə, lə́ ŋwu ntsəm páʼ ngɔʼ yi wɨ́ ə́ wǔ nə́ nə́ yí ə́ yǐ ghɔʼə̂ yə́.”

¹⁹Ngaŋə́zéʼkə pənoŋkə pópə pətə́kɔʼ pə́ ngaŋə́pêsê ə́ jî ńgə́ Yeso a nə ńtséebə atséebə́nə́múʼ zə̂ ə́fɛ̂ lə́ nə́ pó, tsɔʼə əghâ yi wɨ́, pó lɔ ndúmə á mə́ wam nə́ yə́. Lə́ pó nə ńtə́ ḿbɔ́gə pɨ páʼ pó nə ńchî nə́ ə́wə́.

²⁰Pó pɛ́d ńkə́ ńtə́g əmə́g nə́ Yeso, ńtíʼ ńtú məŋkɔ́ʼ ńgə́ pó yǐ ḿbɨ́ʼkə əmə́g ńgə́ pó pɔŋə̂, ḿbə́ ńdoonə̂ lə́ əsêndúmə mə́ wam nə́ Yeso nə́ anu yətsə́ a kə́ sóŋ nə́ ə́ tíʼ fɛ̂ yə́ á mbô nətû zɔ́b mbɔʼ a ghɛlə̂ anuə atsəm nə́ yə́.

²¹Məŋkɔ́ʼ mə́ pə́ nə ńtú nə́ lə́ mə́ tíʼ ḿbítə Yeso ńgə́, “Ndzéʼkə, pəg jî ńgə́ anu ghö sóŋ nə́ ńkə̈ ńdzéʼkə lə́ á koʼə̂. Pəg jî ńgə́ gho kě ŋwu tsə́ kɔŋ ńtsɛɛlə̂ yitsə́ pô, pəg jî ńgə́ gho zéʼkə lə́ ndə̌ŋdəŋ ńté Əsê á mbô ŋwu məsɔŋə́.

²²Tíʼ ə́fiʼtə̂ áwə́g ńgə́, a koʼnə̂ á mə́ tû nə́ nchubə aláʼə á mbô Siza kəənə a kě koʼnə̂?”

²³Lə́ Yeso a pə́ ńdeŋ píd pö tə́m nə́ lə́ ńtíʼ ə́sóŋ nə́ pó ńgə́,

²⁴“Nɨd nə́ mə nə́ nkéebə atəənə́, ńgə́ lə́ chî əshî wə́ pó əlɛ́n wə́ á ndú nkáb yi wə́? Pó sóŋ ńgə́,” yí Siza.

²⁵Yeso a tíʼ ə́sóŋ ńgə́, mbɔʼ a pə́ ə́lɨ́d, nə́ fɛ̂ ajúmə Siza á mbô Siza ńkə́ fɛ̂ yə́ Əsê á mbô Əsê.

²⁶Pó tíʼ ńká ńté ńgə́ pó nə ńkě awǔənu yətsə́ nə́ atséebə Yeso zɨ́ pô, akwe zɨ́d zəənə́ á nə ńkɨʼnə̂ ághɔ́b pó tíʼ ńnaʼə̂ ághóobə́.

²⁷Pə Sadusi pətsə́ pó yǐəə á mbô Yeso, páʼ pó nə̈ ə́sóŋ nə́ ńgə́ tə mbɔʼ ŋwunə a kě kwû mbɨ ńjúmnə a nəwû pô, ńtíʼ ḿbítə yí ńgə́,

²⁸“Ndzéʼkə, Mosisə a kə ŋwaʼlə̂ noŋkə ghɛnə́ á mbô pəg ńgə́, Təmbɔʼ ŋwunə a kwû ḿmyaʼə̂ ngwě əyǐ tsɔʼə tə pɔ́, ndim ndú yə a shib ńdɔgə̂ məngyě yi wə́ á əkogə́. Ńjî ńgə́ pó yí tíʼ ḿbî pɔ́ nə́ əlɛ́n ndim əyǐ wə́ páʼ a nə ńkwû nə́ lə̂.

²⁹Mbyâŋnə yitsə́ ə́ kə láʼ ńchîə akɔʼə ndɛ̂ pó pɛ́n asaambɛ̂, ntsɛɛmbi əghoobə́ a zɔ́ʼ ńkwûə yí tsɔʼə tə móonə.

³⁰Azoŋə yə́ a lɔgə̂ nkog əyǐ wə́,

³¹ńkə́ ńkwû ḿmyaʼ nə́ ajíə azoŋ tə ḿməgə̂ ághóobə́ asaambɛ̂ wə̂ pətsəm tsɔʼə tə móonə.

³²Məngyě wə́ a yǐ ńkə́ ḿmegnə̂ ńkwûə ajíə.

³³Əghâ nə, pəkwû pə́ lǒo ə́ júmnə lə́ məngyě nə́ a pə́ lə́ ngwě əwə? Ńté ńgə́ pó pətsəm pɛ́nə asaambɛ̂ kə zɔ́ʼə a yə́.”

³⁴Yeso a kwěe ńgə́, pɨ pə́ ngoʼ pɨ pə̈ zɔ́ʼə, ńkə́ fɛ̂ pəənə á ndzɔʼə́

³⁵lə́ pɨ pə́ yǒ nə́ júmnə á nəwû ə́ kə́ jî nchîntɨ nə́ ndɛd yi wɨ́ pó yǒ kë ə́zɔ́ʼə pô.

³⁶Pó chî lə́ ándó pətseŋpə́ndɛ́pə́sê, təmbɔʼ pó kě pɨ ńkwû pô. Pó lə́ pɔ́ pə́ Əsê ńté ńgə́ pó júmnə nəwûə.

³⁷Lə́ Mosisə nə ḿbə́ ńkyaʼ ńgə́ pəkwû pə̈ yǒ júmnə. Nə́ atsáb ńté akɔb yə kɛ́d nə́ a nə sóŋ ńgə́, Əsê lə́ Əsê Ablaamə, ḿbə́ yi Azigə ńkə́ ḿbə́ yi Jekɔbə.

³⁸Zəənə́ ä nəələ̂ ńgə́ Əsê lə́ Əsê pɨ pə́ chî nə́ á mbîə ńkě pə́ lə́ yi pəkwû pô ńté ńgə́ pɨ páʼ pó chî nə́ á mbô Əsê pó chîə á mbîə.

³⁹Ngaŋə́zéʼkə pənoŋkə pitsə́ pó kwěe ńgə́, “Zə̂ lə́ akwe yə əshîʼnə ḿbə́ Ndzéʼkə.”

⁴⁰Pó tíʼ ńkě pɨ fiʼə̂ á mə́ pítə nə́ yí nə́ atsáb yətsə́ pô.

⁴¹Yeso a pítə ághɔ́b ńgə́, “Pə́ sóŋə ńgə́ Nchwádkə lə́ mɔ́ Debid lə́ ńté akə̂?

⁴²Debid a nə sóŋ nə́ ntso yə́ á mə́mə aŋwaʼlə Mənkǐ ńgə́, ‘Mmaʼmbîə a sóŋ nə́ Mmaʼmbîə mə ńgə́, Náanə á əlá apô maŋ yə təənə.

⁴³Tə maŋ yǒ ńdɔg ngaŋkə́pa əzô ńgɛd nətəgnə́ məko mô ə́wə́.’

⁴⁴Debilə a nə fóŋə a yi ńgə́ Mmaʼmbî, təmbɔʼ a pɨ ńtíʼ ḿbímə mɔ́ əyǐ lə́ ə́lɛ́.”

⁴⁵Ndzaŋ ŋwu ntsəmə a nə ḿbɛ́d nə́ ńtə́ ńjwə́ʼtə lə́, Yeso a sóŋə á mbô ngaŋə́zoŋə́ndzəm əjí ńgə́,

⁴⁶“Lɔg nə́ ndɛd nə́ ngaŋə́zéʼkə pənoŋkə, pó kɔŋə̂ a mə́ nyi nə́ nə́ pətə́sɛ pə́ ətsəʼə́ a mbɨ pó ńkə́ ńkɔŋ ńgə́ pə́ chaʼtə̂ ághóobə́ a ndu məteenə́, ńkə́ ńkɔŋ ńgə́ pətə́kɔʼ pə́ ələŋ ə́ chî nə́ á ndɛ̂sê pəjusə, ḿbá əliʼ dina ətsəm ə́ pə́ əpóobə́.

⁴⁷Pó kwáalə məláʼ mə́ pəkog pə́ pəngyě ńtíʼə ńdɔgə̂ tə́sɛ achaʼtə́sê ńkə́bkə mənu mɔ́b ə́wə́. Pó yǒ zɨ́ ngə́ʼ páʼ ə́ laŋ nə́ yi wə̂.”