Read Awing Lukasə 21 Bible Online

Lukasə 21 - Awing bible

Lukasə 21

¹Yeso a chîə á Tə́kɔʼndɛ̂sê ḿbɨg əmə́g mí ńdzɨ́ ndzaŋ pəfoʼ pə́ néŋ nə́ akáŋə́sê azóobə́ á mə́m nkwum nkéebə.

²Ńkə́ ńdzɨ́ ndzaŋ nkog mengyě yitsə̌ páʼ a pə́ nə́ chigə mbóŋə a yǐ nə́ ají ńnéŋ pɔ́ pə́ ndɔ́la pə́ pɛ̌.

³Yeso a sóŋ ńgə́, “Mäŋ sóŋə áwɨ́ nə́ ndə̌ŋdəŋ ńgə́ nkog mengyě nə́ páʼ a pə́ nə́ mbóŋ lə́ a fɛ̂ ńtsɛɛlə̂ a ŋwu ntsəmə.

⁴Ńté ńgə́ pö ŋɔʼtə̂ lə́ mɔ́ ajúmə á mə́mə afoʼə azɔ́b əfɛ̂, lə́ nkog mengyě nə́ páʼ a pə́ nə́ mbóŋ lə́, a pə́ ńkɔdtə̂ lə́ əpa əpí ə́fɛ̂ tə ajûtsə́ á kě pɨ ḿbɛ́d təmbɔʼ a pɨ ńjî pô.”

⁵Pɨ pətsə́ pó tíʼə ńtséebə ńté ndzaŋ pə́ pɔ́ nə́ Tə́kɔʼndɛ̂sê nə́ məngɔʼ mimə́ əshîʼnə pópə akáŋə́sê pə́ nə̈ ńgyǐ nə́ ə́fɛ̂, lə́ Yeso a pə́ ə́sóŋ ńgə́,

⁶“Əpú pɨ ətsəm nə́ jɨ́ nə́ lə́, ndɛd ə́ yǒ koʼ pə́ kwɛd məngɔʼ məənə́ á ndəsê tsɔʼə mətsəmə, tə táʼ ngɔʼə á kě á ndu yitsə̌ pɨ ḿbɛ́d ńdzámnə pô. Pə́ yǒ shaʼtə̂ mɨ́d tsɔʼə mətsəm ə́ kwɛlə̂ á ndəsê.”

⁷Ngaŋə́zoŋə́ndzəm əjí ə́ pítə ńgə́ “Ndzéʼkə, zəənə́ anu á yǒ lɔg alíʼ lə́ əghâ akə̂? Təmbɔʼ pəg yǒ ńdzə́ənə akyeʼə́nu zə́ənə́, pəg jî ńgə́ ndɛd yi wɨ́ ə́ páatə?”

⁸Yeso a kwěe ághɔ́b ńgə́, “Lɔg nə́ ndɛd ńgə́ kɔ pə́ yǐ ə́fɨgə̂ áwə́ənə́. Ńté ńgə́ pɨ pipə nɨ́ nə́ pó yǐ əyǐ nə́ əlɛ́nə mə, ə́sóŋə ńgə́, ‘Lə́ maŋ ńchwádkə, ndɛd ə́ kə́ ḿbáatə!’ Lə́ kɔ nə́ zoŋə̂ ághóobə́.

⁹Təmbɔʼ nə́ zóʼ məntso pópə əjwaʼlə á mə́m əláʼ kɔ nə́ ghɔdlə̂. Ndɛn mənu ghɛn ətsəm ə́ chîə á mə́ peg nə́ lɔgə̂ aliʼə́, lə́ ndwigtə ə́ pə́ ńkě tɔ́g ńgyǐ pô.”

¹⁰A pɛ́d ńgɛn nə́ mbiə á mə́ sóŋ nə́ nə́ nə́ pó ńgə́, “Əláʼ ə́ yǒ tíʼə póʼnə məlaʼ pópə pətsə́ əláʼə, əláʼ páʼ pəfo pə́ sáʼ nə́ ə́ yǒ póʼnə məlaʼ pópə pətsə́.

¹¹Ndəsê yǒ pyádnə chiʼnə̂ tə əliʼ pətsə́ ə́ kəmnə̂, nji ə́ chaanə̂, məghɔ mə́ təpɔŋ mə́ wam pɨ pətsə́, ətyǎntə əkyeʼmə́nu ə́ fɛ́lə nəpó páʼ ə́ yǐ nə́ ghɛd pɨ pó ghɔdlə̂.

¹²Záʼ mənu mɨ mə́ yǒ jǐ tə́ lɔgə̂ aliʼ lə́, pə́ yǒ wamtə̂ áwə́ənə́, ə́ lánə tsaŋkə̂ áwə́ənə́, pə́ yǒ lɔgə̂ áwɨ́ ghɛnə̂ á ndɛ̂sê Pəjusə, ə̈ lɔgə̂ ghɛnə̂ á mbi pəfo, ə́ lɔgə̂ áwɨ́ ghɛnə̂ á mbi ngaŋə́sáʼə́láʼə, ə́ tíʼ ńnéŋə áwə́ənə́ atsáŋ ə́ pə́ té lə́ əlɛ́nə mə.

¹³Zəənə́ á yǒ fɛ̂ lə́ əseenə á mbô pɨ ńgə́ nə́ lánə ə́sóŋə anu ńté mə.

¹⁴Lə́, kɔ nə́ tíʼə ńkwaŋə̂ anu páʼ nə́ yǐ nə́ ghɛn ə́sóŋə á mə́ kwá nə́ atûə azɨ́ záʼ ndɛd ə́ pɔŋə̂ koʼə̂,

¹⁵Ńté ńgə́ maŋ yǐ fɛ̂ atséebə ajíənuə á mbô pəənə́, páʼ ngaŋkəpa əwɨ yitsə̌ a kě nə́ zɨ́d yǐ kǐ pô, kɨ pɨ po tə́ ńdzɔŋnə̂ atsáb pô.

¹⁶Pətǎ pɨ́ po pə pəmǎ pɨ́ nə́ pɔ́pə́mɛ́ pɨ́ nə́ ngaŋə́láʼ əzɨ́ ḿbɨ ḿbə́ nə́ pəshu pɨ́ pó yǒ finə̂ áwɨ́ tə pə́ jwítə áwɨ́ pətsə́.

¹⁷Ŋwu ntsəmə a yǒ peenə̂ áwɨ́ ə́ té mə.

¹⁸Lə́ tsɔʼə táʼ nənoŋə á yǒ kě atû pɨ péŋ pô.

¹⁹Tɨ́ nə́ ńtyantə̂ ńté ńgə́ nə́ yǐ lǎa lə́ ə́lɨ́d ə́ chwádkə mbɨ əzəənə́.”

²⁰“Təmbɔʼ nə́ yǒ ńdzɨ́ ngaŋə́maʼə̂ ntso ə́ tɨ́ ńdíblə á Jɛlusalɛm, nə́ jî ńgə́ lə́ alě pə́ yǐ nə́ tsəŋkə̂ áwə́ələ́.

²¹Əghâ yi wɨ́ pɨ pə́ chî nə́ á Judya pó kə ndə̌ ńgɛnə̂ á məŋnkwəənə, pɨ pə́ chî nə́ á mə́mə aláʼ pə́ fɛ́dkə, pɨ pə́ nə ńkě nə́ aláʼ chî pô, pó ghɔ́ŋə apeŋə́.

²²Ńté ńgə́ lɛ̌ ndɛd Əsê a yǐ nə́ néŋ ngə́ʼə atû pəənə á mə́ ghɛd nə́ ńgə́ anu atsəm pə́ nə ŋwaʼlə̂ nə́, á lɔgə̂ aliʼə́.

²³Á yǒ pə́ nə́ əlě pə wɨ́ á pyádnə ńtyantə̂ á mbô pəngyě pə́ nəpəm pópə pəmə́puə. Ngə́ʼ təpɔŋ ə́ yǒ chîə á mə́m mbî wɨ́d ghɛn ńté ńgə́ azáŋə́ndé Əsê a yǒ tsóolə á ndu pó.

²⁴Pə́ yǒ jwítə pətsə́ nə́ pɔ́ pə́ ŋwíŋə́, ə́lɔgə̂ pətsə́ ándó ngaŋə́tsáŋ ghɛn nə́ pó atú yə ndaʼə, Pətəjǐsê pə́ lǒo ńnyinə̂ á ndu Jɛlusalɛm kə́ ńnəələ̂ ághɔ́b nə́ ngə́ʼ tə koʼ nə́ ndɛd páʼ Əsê a nə ńtsɔ́ʼ nə́ á mbô pó.”

²⁵“Əkyeʼ mə́nu ə́ yǒ chîə á mə́m mə́nu pó sáŋ mbɨ ḿbə́ nə́ pɔ́ pə́ sáŋə, ətú ətsəmə á ndu mbî ə́ lǒ chîə á mə́m tə́kɔʼ ngə́ʼə, ətû əpɔ́b ə́ tíʼ ńjwaʼlə̂, ńté tə́kɔʼ nkǐ ndzaŋ páʼ wə́ələ́ á yǒ nə́ kɔ́ʼ ə́ tíʼə̈ tóʼnə ə́zoolə̂.

²⁶Aləmə á yǒ kə́ʼ pɨ pó tíʼ ńgwukə̂ ándó əkwû pɨ ńté ńgə́ pó tə́ ḿbɔ́gə anu páʼ á yǐ nə́ á ndu mbîə; ńté ńgə́ mətɨ mə́ nəpó mə́ yǒ chiʼnə̂.

²⁷Əghâ yi wɨ́, pə́ zə́ənə Mɔ́ Ŋwunə ä tíʼə ńgyǐəə á mə́mə alə́m nə́ tə́kɔʼ mətɨ pópə nəsəgə.

²⁸Təmbɔʼ mənu mɨ mətsəm mə́ yǒ ńchwáakə á mə́ lɔg nə́ aliʼ, nə́ lǒo á əsê ḿbɨg ətû pə́ənə́ atǐ, ńté ńgə́ ndɛd mə́ chwádkə áwɨ́ ə́ tə́ ḿbáatə.”

²⁹Yeso a tíʼ ńtséebə atséebə́nə́múʼ zəənə́ á mbô pó ńgə́ náŋ nə́ atǐə fig pópə mətǐ mətsəmə.

³⁰Təmbɔʼ nə́ zɨ́ məfǔ mɔ́b mə́ tə́ ńtô nə́ jî ńgə́ məgheemə́ á páatə.

³¹Təmbɔʼ nə́ yǒ ńkə́ ńdzɨ́ ndɛn mənu ghɛn ə́ tə́ ńdaŋə̂, nə́ jî ńgə́ Anuə Nəfoonə Əsê á páatə.

³²Maŋ sóŋə áwɨ́ ndə̌ŋdəŋ ńgə́ pɨ pə́ ngoʼ pɨ pó yǒ kě pətsəm kwúkə záʼə anu zəənə́ á pɔŋə̂ lɔgə̂ alíʼ pô.

³³Nəpó pó ndəsê ə́ yǒ měe lə́ atséebə Mə á pə́ ńkě kətaŋ laŋ pô.

³⁴Lɔg nə́ ndɛd nə́ məmbɨ mə́ənə́ kɔ nə́ ghɔ́ŋə á ndu məjî pó məloʼ mimə tyantə̂ nə́, kɔ nə néŋ ntɨ́ wɨ́ nə́ mənu mə́ mbîə, tə ḿbə́ alěmbî yəwə́ á yǒ ghognə̂ ə́ waamə̂ áwə́ənə́

³⁵ándó atəənə́. Ńté ńgə́ alě yəwə́ á yǒ yǐ lə́ á mbô ŋwu ntsəmə á mə́m mbî ntsəmə.

³⁶Tə́ nə́ ḿbyáb əliʼ ńkə́ ńtə́ ńchaʼtə́sê əghâ ətsəmə, ńjî ńgə́ nə́ túg mətəənə á mə́ laŋ nə́ á mə́m ndɛn mənu ghɛn páʼ mə́ yǐ nə́ lɔgə̂ alíʼə, ńjî ńgə́ nə́ yǐ ńtíʼ ńtə́əmə á mbi Mɔ́ Ŋwunə.

³⁷Əlě ətsəm lə́ Yeso ä jwígə ńdzéʼkə á Tə́kɔʼndɛ̂sê, Pənətúʼ pətsəm lə́, ä fɛ́lə ńgɛnə̂ á nkwəənə Olif ńdê yí wə́.

³⁸Ŋwu ntsəmə ä lê ńgyǐəə məsânə á mə́ jwə́ʼtə nə́ á mbô yə́ á Tə́kɔʼndɛ̂sê.