Read Awing Lukasə 22 Bible Online

Lukasə 22 - Awing bible

Lukasə 22

¹Ndɛlə akɔ́lə apéenə məkálə́ tə mbê ə́ kə tə́ ḿbáatə páʼ pə́ fóŋ nə́ nə́ Ndzáʼkə [10] lə̂.

²Pətə́kɔʼ pə́ ngaŋə́pêsê pópə ngaŋə́zéʼkə pənoŋkə ə́ tə́ ńnáŋ əsêndú yitsə̌ á mə́ jwítə nə́ Yeso lə́ ḿbə́ ńtə́ ḿbɔ́gə pəənə.

³Lə́ Satanə a tíʼ ńkwúnə á ntɨ́ Judas páʼ pə́ nə̈ fóŋ nə́ nə́ Iskaliɔt lə́. A nə ńkə́ ḿbə́ lə́ táʼ ŋwunə á mə́m ngaŋə́zoŋə́ndzəm Yeso páʼ pó nə ḿbə́ nə́ ntsɔb pɛ̌ lə̂.

⁴Judasə a tíʼ ńgɛn ńjɨ́ pətə́kɔʼ pə́ ngaŋə́pêsê pópə mətû mə́ pɨ pó nə ḿbyáb nə tə́kɔʼndɛ̂sê lə́, pó po kwúblə atsáb ndzaŋə ándó á yǐ nə fɛ̂ Yeso a mbô pó.

⁵Anu yəwə́ a pɔŋə̂ ághɔ́b lɛ tətətə pó laʼnə̂ ńgə́ pó yǐ tûə yí nə́ nkéebə.

⁶Ndzaŋ pó po pímnə nə́ lə́, Judasə a tíʼə ńnáŋ əsêndúmə á mə́ fɛ̂ nə́ yə́ á mbô pó aliʼ páʼ pɨ pə́ kě nə́ ə́wɨ́ chî ńnɨ́ pô.

⁷Alě akɔ́lə apéenə məkálə́ tə́ mbê á nə ńkoʼə̂, páʼ á nə́ ḿbə́ nə́ alě pə̈ wad nə́ mbéŋ ndzɛd Ndzáʼkə lə̂.

⁸Yeso a tíʼ ńtúmə Pita pó Jɔn ńgə́ pó ghɛn ńtsoŋkə̂ məjî mə́ Ndzáʼkə páʼ pó po yǐ nə́ jî.

⁹Pó pítə yí ńgə́, “Gho loonə̂ ńgə́ pəg ghɛn ńtsoŋkə̂ məjî mimə wɨ́ lə́ ə́fó?”

¹⁰A kwěe ághɔ́b ńgə́, “Maŋ fiʼtə̂ áwɨ́ ńgə́, ndzaŋ nə́ yǐ nə́ kə́ ghə́ kwúnə á mə́mə aláʼ lə́, ŋwu yitsə̌ a pěʼ nə atə́əmə nkǐə a yǐ téekə áwə́ənə́. Zoŋ nə́ yə́ á ndɛ̂ páʼ a ghɛn nə́ ńkwú ə́wə́,

¹¹Nə́ ghɛn ńkwú, nə́ tíʼ ə́sóŋ nə́ ngaŋ ndɛ̂ ńgə́, ‘Ndzéʼkə a pítə ńgə́, Atɔ́gə ndɛ̂ pəghɨ páʼ a yǐ nə́ náanə ə́wɨ́ ə́ jî məjî mə́ Ndzáʼkə pópə ngaŋə́zoŋə́ndzəm əjí lə́ á ə́fó lə́?’

¹²A yi nəələ̂ áwɨ́ nə́ tə́kɔʼ atɔ́gə ndɛ̂ a ndumə ajábtə́ndɛ̂, yi páʼ ajúmə atsəmə á chî nə ə́wə́, lə́ aliʼ pɨ yǐ nə́ tsoŋkə̂ məjî mimə wɨ́ ə́wə́.”

¹³Pó ghɛn ńkə́ ńdzə́ənə anuə atsəm tsɔʼə ndzaŋ a fiʼtə̂ nə́ ághɔ́b lə́ ńtíʼ ńgɛd məjî mə́ Ndzáʼkə mə́ ə́wə́.

¹⁴Ndzaŋ ndɛlə́ ajîə məjî zə́ ə́ kə koʼ nə́ lə́, Yeso a náanə ajîə məjî pópə məntú mi mə̂.

¹⁵A sóŋə á mbô pó ńgə́, “Maŋ nə ḿbyádnə ńdoonə̂ á mə́ jî nə́ məjî mə́ ndzáʼkə mɨ pɛn záʼ maŋ pɔŋə̂ zɨ́ ngə́ʼə.

¹⁶Maŋ pɛ̈n ə́fiʼtə̂ wɨ ńgə́, maŋ láʼ kě məjî mɨ pɨ jî pô tə ndɛd koʼ páʼ anuə ándó məjî mɨ mə̈ nɨd nə́ á lɔgə̂ aliʼə́ á mə́m Nəfɔ nə Əsê.”

¹⁷A tíʼ ńtwá ndɔ́ŋ məloʼ ə́fɛ̂ ndǎ á mbô Əsê ńtíʼ ə́sóŋ nə́ pó ńgə́, “ko nə́ ndɔ́ŋ məloʼ zɨ ńnô tsɔʼə pɨ pətsəmə.

¹⁸Mäŋ sóŋə wɨ́ ńgə́ ə́fɛ́d nə́ pə ə́sɛ̂n maŋ kě məloʼ yǒ pɨ nô pô tə anuə Nəfoonə Əsê a láʼ ńgyǐəə.”

¹⁹A pɨ ńtíʼ ḿbyáanə apéenə məkálə́, ə́fɛ̂ ndǎ a mbô Əsê nə zɨ́d, ḿbagtə̂ ńgabtə̂ a mbô pó ə́sóŋ ńgə́, “Lɛ̌ na mbəəmə mə maŋ yǐ nə́ fɛ̂ á mbô pəənə́, tə́ nə́ ńgɛlə̂ lɛ ńgwə́ʼtə mə.”

²⁰Əghâ məjî mə̂ mə́ nə ḿměe nə́ a twá ndɔ́ŋ məloʼ tsɔʼə ndzaŋə a pěʼ nə́ ḿbyáanə apá zə́ lə́ ə́sóŋ ńgə́, “Ndɔ́ŋ zɨ lə́ əka yi fî páʼ Əsê a wad nə́ pɨ po ńté achǐə mə maŋ yǐ nə́ ə́ kwɛd ə́ té atûə azə́ənə́.

²¹Lə́ jɨ́ nə́, ŋwu páʼ a yǐ nə́ ə́finə̂ mə a náanə pəg yə́ á təpɛlə.

²²Jî nə́, anu zɨ páʼ á yǐ nə́ laŋ nə́ Mɔ́ Ŋwu lə́, lə́ tsɔʼə ndzaŋ páʼ Əsê a nə ḿbɛ́d nə́ tə ə́sóŋə, lə́ ndɔ ə́ pə̂ ńchîə atû ŋwu páʼ a fi nə́ yə́!”

²³Pó sɛdnə̂ ńtíʼə ḿbítə á mə́m pó ńgə́, a jɨ ndzaŋ anu á yǐ ghɛd əwə?

²⁴Ngaŋə́zoŋə́ndzəm Yeso ə́ chúʼə á mə́ sáʼ nə́ á tətɨ pó á mə́ jî nə́ ŋwunə á mə́m pó páʼ a gháʼ nə́ ńtsɛɛlə̂ ŋwu ntsəmə.

²⁵Yeso a sóŋə á mbô pó ńgə́, “Pəfo pə́ mbî pó sáʼə nəfɔ lə́ nə́ mətəənə. Lə́ mətû mɨ́ pó túg nə́ mətɨ á ndu pɨ lə́, pó lɔ ńgə́ pə́ fóŋə ághɔ́b ńgə́, ‘Pó lə́ pəkwá pə́ pəənə.’

²⁶Lə́ kě ndzaŋ a chî nə á mə́ chî nə á mə́m pɨ pô. Lə́ ŋwu páʼ a gháʼ nə́ ńtsɛɛlə̂ ŋwu ntsəmə á mə́m pəənə́ a chîə á mə́ tsóokə nə mbɨ əjǐə ándó mɔ́ kə́nyaŋ móonə, (ə́ kě anu nə́ anu ńnéŋ pô) Lə́ ŋwu páʼ a sáʼ nə́ pɨ a chîə mə́ chî nə́ ándó ngaŋəfaʼə.

²⁷Lə́ tsɛ əwə ńtsɛɛlə̂ áwə́ənə́, ŋwu páʼ ä náanə nə tsɔʼə náanə pə́ yǐəə ə́fɛ̂ məjî a jîə, kɨ ŋwu páʼ a yǐ nə́ á mə́ fɛ̂ nə́ məjîə? Lə́ kě ŋwu páʼ ä náanə pə́ yǐəə fɛ̂ məjî a jîə pô? Lə́ maŋ pə̂ ńchîə á mə́m pɨ lə́ ándó ŋwunə ä fɛ̂ nə́ məjî nə́ jîə.

²⁸Lə́ pəənə́ ándó pɨ, pɨ kə chî pɛn ndɛd maŋ kə chî nə a mə́m məngə́ʼ mə́ mətsəm páʼ maŋ jɨ́ nə́.

²⁹Tsɔʼə ndzaŋ tǎ mə a fɛ̂ nə́ mətɨ ńgə́ maŋ pə́ əfo lə, lə́ kə́ ḿbə́ ndzaŋ maŋ yǐ nə́ fɛ̂ mətəənə á mbô pɨ ńgə́ nə́ sáʼ pəənə ándó pəfo.

³⁰Nə́ yǒ jî kə́ nô á ndu təpɛlə maŋə á mə́mə anuə nəfoonə mə, ə́ pɨ kə́ náanə nə́ ələŋəmə́fɔ ə́ tə́ sáʼə məfɔ mə́ ntsɔb pɛ̌ á mə́m əla Islɛlə.”

³¹“Saamun, Saamun, mäŋ fiʼtə̂ gho ńgə́ pə́ fɛ̂ əsêndúmə á mbô Satan ńgə́ a chiʼə̂ wə́ənə́ ándó pə̈ chiʼə̂ apá lə̂.

³²Lə̈ maŋ ńchaʼtə́sê atû gho Saamun ńgə́ kɔ mbimə́ əzo ə́ póolə, ńjî ńgə́ əghâ gho pɨ nə́ ńgyǐəə á mbô maŋ, gho kwá pətsə́ pəlim pô, pó kə́ ḿbí nə́ maŋ ńtyantə̂.”

³³Saamun Pita a sóŋ nə́ yi ńgə́ “Mmaʼmbîə, mbɔʼ gho tə́ ńgɛnə̂ pə̂ á atsáŋ kɨ ńtə́ ńkwû kwû nə́, lə́ pə́ pɔ̌.”

³⁴Yeso a kwěe yi ńgə́, “Pita, tíʼ maŋ sóŋə gho ńgə́ aŋkəʼə́ á yǐ jitə̂ tɔ́ŋə ə́sɛ̂n lə́, gho pɛ́dtə ə́sóŋ ngǎ teelə́ ńgə́ gho kě mə jî pô.”

³⁵Yeso tíʼ ḿbítə ngaŋə́zoŋə́ndzəm əjí ətsəm ńgə́, “A kə pə́ nə́ ndɛd maŋ kə tú nə́ áwɨ́ ə́sóŋ ńgə́ kɔ nə́ lɔgə̂ pɔ́sa, kɔ nə́ lɔgə̂ apa pópə ngwub lə, pɨ kə póŋə ajú yətsə́?” Po kwěe ńgə́, “Pó nə ńkě ajú yətsə́ póŋ pô.”

³⁶A sóŋə a mbô pó ńgə́, “Lə́, əghâ nə́, ŋwu páʼə a túg nə́ pɔ́sa, a lɔgə̂, ŋwu páʼə a túg nə́ apeemə nənyinə, a lɔgə̂, lə́ təmbɔʼ ŋwu páʼ a kě nə́ ŋwíŋ ntso túg pô a finə̂ kód əyǐ ńjúnə ájɨ́d ə́wə́.

³⁷Mäŋ sóŋə á mbô pɨ ńgə́, anu zɨ pə́ nə ŋwaʼlə̂ nə́ á mə́m aŋwaʼlə Əsê ńté mə ńgə́, ‘Pə́ nə ńdɔgə̂ yí lə́ ándó táʼ ŋwu yitsə̌ á tətɨ pɨ páʼ pə̈ shamkə̂ nə́ noŋkə,’ á yǐ lɔgə̂ aliʼə́: ńté ńgə́ anuə atsəm páʼ pə́ nə ŋ́ŋwaʼlə̂ nə́ ńté mə á tə́ ńdɔgə̂ aliʼə́.”

³⁸Pó sóŋə á mbô yí ńgə́ “Zə́ənə, Mmaʼmbî, pəg túg məŋwíŋ mə́ ntso mə́ mbɛ̌.” A kwěe ághɔ́b ńgə́ “Zə̂ á koʼə̂!”

³⁹Yeso a fɛ́d ńkɔ́ʼə Nkwəənə Olifə, á pə́ anuə a nə̈ ńdzá nə́ ńgɛlə̂, ńtə́ ńkɔ́ʼə lə́, ngaŋə́zoŋə́ndzəm əjí ə́ ghɛn pó po.

⁴⁰Ndzaŋ a kə kɔ́ʼ nə́ aliʼ yi wɨ́ lə́, ə́sóŋə á mbô pó ńgə́, “Chaʼtə̂ nə́ Əsê ńgə́ kɔ nə́ wǔəə á mə́mə akwaʼlə.”

⁴¹A tsɔ́ʼə chwaŋ á mə́m pó ńkwə́ʼtə á əsê ńtíʼə ńchaʼtə́sê ə́sóŋə ńgə́,

⁴²“Tǎ, kwá ndɔ́ŋ ngə́ʼ zəənə́ á mbô maŋ páʼ təmbɔʼ á pə́ akwaŋə azô, kɔ á pə́ anu mäŋ lɔ nə́, tíʼə á pə́ ndzaŋ gho lɔ nə́”

⁴³Ntseŋndɛ̂sê a lǒo nə́ nəpóolə a ghabkə̂ ə́fɛ́lə á mbi yí ńnéŋ mətɨ míə.

⁴⁴Ndzaŋə á kə chî nə́ á mə́m ngə́ʼ yi ńtyantə̂ nə́ lə́, ńchaʼtə́sê nə́ ntɨ́ əyí ətsəmə, alɛ̌dnə á tíʼə ə́fɛ́lə á mbɨ yí ńchɨ́mkə ńchîə ándó mənta mə́ achǐə. [11]

⁴⁵Ndzaŋ a kə́ məgtə̂ nə́ achaʼtə́sê lə́, ńdǒ á əsê ńgɛn ńjɨ́ ngaŋə́zoŋə́ndzəm əjí pó tə́ ńdê ńté afɨnə.

⁴⁶A pítə ághɔ́b ńgə́, “Nə́ lê lə́ akə̂? Lǒo nə́ á əsê ńchaʼtə́sê ńjî ńgə́ kɔ nə́ wǔəə á mə́mə akwaʼlə.”

⁴⁷Ndzaŋ Yeso a kə tə́ nə́ ḿbɛ́lə ńtséebə lə́, Judasə páʼ a kə pə́ nə́ táʼ ndzoŋdzəm əyǐ yitsə̌, a lɔgə̂ apoŋə pɨ ńgyǐ ńtéekə yə́, pó yǐ lə́, Judasə a ghɛn ḿbáatə Yeso ńtə́ ńdoonə̂ á mə́ chweg nə́ yə́.

⁴⁸Lə́ Yeso a pə́ ə́sóŋ nə́ yí ńgə́ “Judas, gho yǐ finə̂ Mɔ́ Ŋwu lə́ nə́ mə chweg nə́?”

⁴⁹Ndzaŋə ándó ngaŋə́zoŋə́ndzəm əjí ə́ kə jɨ́ nə́ anuə ándó á yǐ nə́ lɔgə̂ aliʼ lə́, ḿbítə yí ńgə́ “Mmaʼmbî, pəg póʼnə pə̌gpo nə́ məŋwíŋ mə́ ntso mə́g?”

⁵⁰Táʼ ndzoŋdzəm əyǐ yitsə̌ a maʼə̂ táʼ ngaŋəfaʼ Mbêsê yi Ngweŋ yitsə̌ nə́ ŋwíŋ ntso əji, ńdə́g nətôglə jí yi nə́ apô yə təənə.

⁵¹Lə́ Yeso a pə́ ə́sóŋə á mbô pó ńgə́, “Ndɛn wə̂ ə́ koʼə̂!” Ńtíʼ ńkwum nətôglə jí yi nə́ wɨ́ ńtsóʼə yə́.

⁵²Yeso a tíʼ ə́sóŋə á mbô pətə́kɔʼ pə́ ngaŋə́pêsê, pópə mətû mə́ pɨ pó kə̈ pyáb nə́ tə́kɔʼndɛ̂sê ḿbɨ ḿbə́ nə́ mətû mə́ aláʼ ńgə́, “Maŋ lə́ ndzə̌ təpɔŋ nə́ tíʼ ə́fɛ́d nə́ əpə̌ʼtə pópə məŋwíŋ mə́ ntso á mə́ wam nə́ mə?

⁵³Pɛn kə̈ chî əlě ətsəmə á mə́m tə́kɔʼndɛ̂sê nə́ kě mə wam pô. Lɛ̌ pɛn ḿbə́ əjɨ ndɛlə́, ndɛd páʼ Satan páʼ a pə́ nə́ əfo ndzəmə́ a fɛ̂ nə́ mətəənə á mbô pəənə́.”

⁵⁴Pó waamə̂ Yeso ńdɔgə̂ yí ńgɛnə̂ a ndɛ̂ Mbêsê yi Ngweŋə́. Pita a tə́ ńdzoŋə̂ ághɔ́b ḿbə́ ńtsɔ́ʼə chwaŋə.

⁵⁵Pə́ kə nyagtə̂ mógə́ á tətəənə atətá ńnáanə ńtə́ ńdzɔ́gə, Pita a kə kə́ ńnáanə ají ə́wə́.

⁵⁶Mɔ̂ məngyě yitsə̌ a kə̈ faʼ nə́ ə́wə́ a zə́ənə yí páʼ a náanə nə́ á nkaŋ mógə́. Ńtə́g əmə́g nə́ yí ńnáŋə yí ə́sóŋ ńgə́, “ŋwu nə́ a nə ńkə́ ńchî pó yə́.”

⁵⁷Lə́ Pita a pə́ ńkǐəə yí ə́sóŋ ńgə́ “Maŋ kě mə yí jî pô ḿbə́ məngyě nə́.”

⁵⁸Tsɔʼə ngǎ pɛ̌ ŋwu tsə̌ kə́ ḿbɨ ńdeŋə̂ yí ə́sóŋ ńgə́, “Gho kə́ ḿbə́ lə́ táʼ ŋwu əghɔb yitsə̌” Pita a pə́ ńkwěe ńgə́, “Maŋ kě lə́ táʼ pô ḿbə́ ŋwu nə́.”

⁵⁹Mɔ́ akəmə ndɛlə á ghə́ laŋə̂, ŋwu tsə̌ a kə́ ḿbɨ ńgyǐ ńněe ə́sóŋə ńgə́, “Maŋ lánə ńkwaŋ ńgə́ ŋwu nə́ a kə chî pó yə́, ńté ńgə́ á kə́ ə́fɛ́d lə́ Galiliə.”

⁶⁰Pita pə ńkwěe a yi ńgə́, “Maŋ kě mə kwéʼnə ńjîə anu ándó gho sóŋ nə́ pô ḿbə́ ŋwu nə́!” Tsɔʼə ndzaŋə a kə́ nə́ ńgə́ sóŋə ə́lɨ́d lə́, aŋkəʼə́ á tɔ́ŋə.

⁶¹Mmaʼmbîə a sɛdnə̂ ńtə́g əmə́g ńnáŋə Pita, Pita a kwúmtə atsáb páʼ Mmaʼmbîə a kə tsáb nə́ nə́ yí ńgə́ “aŋkəʼə́ yǐ jǐ tə́ ə́ tɔ́ŋə ə́sɛ̂n gho sóŋ ngǎ teelə́ ńgə́ gho kě mə jî pô.”

⁶²Pita a fɛ́d ńgɛnə̂ apeŋ ńkyéŋ lɛ tətətə.

⁶³Pɨ páʼ pə́ nə̈ ḿbyáb nə́ Yeso pó chúʼə á mə́ nyegnə̂ nə́ yí ə́ kə́ ə́shúmə yə́.

⁶⁴Pó lɔgə̂ apagə atsəʼ ńkwúd əshî əyí ə́wɨ́ ńtíʼə ə́shúmə yí ḿbítə ńgə́ “sɛ̌ɛ ńgə́ á gho lə́ shúm əwə lə́?”

⁶⁵Pó nə ḿbɨ ńdzoomə̂ yí nə́ məndzɔmnə mimə nɨ́ nə́.

⁶⁶Ndzaŋ mbî ə́ kə fóg nə́ lə́ mətû mə́ pəjus ḿbá pətə́kɔʼ pə́ ngaŋə́pêsê, nə́ ngaŋə́zéʼkə pənoŋkə pə́ Əsê ə́ tsɛntə̂ nə́ chigə tə́kɔʼ aliʼə́ asáʼə́məsáʼə azóobə́, pə́ tíʼ ńgyǐ nə́ Yeso ə́fɛ̂ nə́ pó.

⁶⁷Pó pítə yí ńgə́, “Mbɔʼ gho pə́ yi páʼ Əsê a tsəʼ nə́ lə́, gho fiʼtə̂ áwə́gə́.” A kwěe ághɔ́b ńgə́, “Mbɔʼ maŋ fiʼtə̂ áwɨ́, nə́ kě pí pô;

⁶⁸Kɨ maŋ kə́ ḿbítə áwɨ́ nə́ apítə atsáb, nə́ kě kwěe pô.

⁶⁹Ə́fɛ́d nə́ pə ə́sɛ̂nə̌, Mɔ́ Ŋwunə a yǐ náanə á əlá apô Əsê yə təənə, Əsê páʼ a túg nə́ mətɨ mətsəmə.”

⁷⁰Pó pətsəm pítə yí ńgə́, “Á pə́ ńgə́ gho lə́ Mɔ́ Əsê?” A kwěe ághɔ́b ńgə́, “Nə́ sóŋ lə́ á ndú ńgə́ maŋ lə́ wə́ələ́.”

⁷¹Pó tíʼ ə́sóŋ ńgə́ “pɛn pěʼ ḿbəənə̂ ńnáŋə ŋwu tsə̌ a yǐ ə́sóŋ lə́ ńgə́ akə̂? Pɛn zóʼə zə́ələ́ atsəmə á ntso yə́.”