Read Awing Lukasə 23 Bible Online

Lukasə 23 - Awing bible

Lukasə 23

¹Ənɔ pɨ wɨ́ ətsəm tíʼ ńdǒo á əsê ńdɔgə̂ yí ńgɛnə̂ á mbi Payilɛlə,

²Ńchúʼə a mə́ tə́m nə́ əsóomə atû yí ə́sóŋə ńgə́, “Pəg zə́ənə ŋwu nə lɛ̌ a tə́ ḿmaʼə̂ ajwaʼlə a mə́m pɨ pɛn, ə́sóŋə nə́ pó ńgə́ kɔ pó pɨ ńtû nchubə aláʼə á mbô Kasa, ḿbəənə̂ ə́fóŋ mbɨ əjǐ nə́ yi páʼ Əsê á tsəʼ nə́ ándó əfo.”

³Payilɛlə a pítə Yeso ńgə́ “Gho lə əfo Pəjus?” A kwěe ńgə́ “Gho sóŋ ə́lə́ələ́.”

⁴Payilɛlə a sɛdnə̂ ə́sóŋə á mbô Pətə́kɔʼ pə́ ngaŋə́pêsê ḿbéenə ŋwu ntsəm ńgə́ “Maŋ kě anu ŋwu nə́ á fankə̂ nə́ jɨ́ pô.”

⁵Pó ghɛn nə́ mbiə á mə́ něe nə́ ńgə́ “A tsəŋ məntɨ́ mə́ ŋwu ntsəm á mə́m Judya nə́ ndzeʼkə́ əjǐə. A kə chúʼ lə á Galiliə a pɛn ńtíʼ ńgyǐ ə́fɛ̂ əghâ nə́.”

⁶Payilɛlə a kə zóʼə atsáb jɨ lə́ ḿbítə ńgə́ “ŋwu ghɛn lə́ ŋwu Galiliə?”

⁷Ndzaŋə a kə zóʼ nə́ ńgə́ a lǒo lə́ á əláʼ əfo Ɛlɔd lə́, ńtúmə yə́ á mbô yə́. Ɛlɔd a kə chîə Jɛlusalɛm nə́ ndɛd yi wə́.

⁸Ndzaŋ Ɛlɔd a kə jɨ́ nə́ Yeso lə́, ńkɔŋtə̂ lɛ̌ tətətə ńté ńgə́ ndi sag páʼ a kə̈ lɔ nə́ á mə́ jɨ́ nə́ yə́. A kə zóʼ mənu mimə nɨ́ nə́ ńté yə́, ńtíʼə ńdoonə̂ mə jɨ́ nə yə́ a ghɛd əkɨʼnəmə́nuə.

⁹Ɛlɔd a kə pítə yí nə́ ətsáb pi nɨ́ nə́, a pə́ ńkě táʼ kwěe pô.

¹⁰Pətə́kɔʼ pə́ ngaŋə́pêsê pópə ngaŋə́zéʼkə pənoŋkə pó fɛ́d ńtɛ́nə ńtə́əmə á mbi ńtíʼə ə́fyáalə ńtə́m əsóomə atû yə́.

¹¹Ɛlɔd pópə ngaŋə́maʼə́ntso əjí ə́ wágə yí ńtíʼə ńnyegnə̂ yə́, ńgwê chigə atsəʼ yitsə̌ á mbɨ yí ḿbɨ ńtúmə yə́ á mbô Payilɛlə.

¹²Ɛlɔd pó Payilɛd nə ḿbə́ lə́ ngaŋkə́peenə́, ə́fɛ́lə alě wə̂ pó tíʼ pəshunə́.

¹³Payilɛlə a tsɛntə̂ Pətə́kɔʼ pə́ ngaŋə́pêsê nə́ mətû mə́ aláʼ mətsəm ḿbá pɨ pi wə́,

¹⁴ə́sóŋə á mbô pó ńgə́ “Pɨ kə yǐ nə́ ŋwu nə́ á mbô maŋ ə́sóŋ ńgə́ a tə́ ḿmaʼə̂ ajwaʼlə á mə́mə aláʼə. Maŋ pɛn ńnáŋə yə́ á mbi pɨ lə́ ńkě zə́ənə anuə á fankə̂ nə́ á mə́m ndɛn mənu páʼ nə́ néŋ nə́ atû yí lə́ pô.

¹⁵Tsɔʼə Ɛlɔd a kě afankə́nuə ají kə́ ńjɨ́ pô, lə́ ghɛd ə́lə́ələ́ a pɨ ńtúmə yə́ á mbô pɛnə̂. Nə́ jî ńgə́ ŋwu nə́ a kě anu yətsə́ ghɛd mbɔʼ pə́ jwítə yí pô.

¹⁶Lə́ maŋ yǐ ə́shúmə yí ə́ pə́ mɛdtə̂ yə a ghɛnə̂.”

¹⁷[12]

¹⁸Pó pə́ ńkyéŋ nə́ táʼ ngye ə́sóŋ ńgə́ “Pə́ jwítə ŋwu nə́, ḿmɛdtə̂ Balabasə á mbô pəgə́.”

¹⁹(Pə́ kə néŋə Balabasə atsáŋ ńté ńgə́ a kə maʼə̂ ajwaʼlə á mə́mə aláʼə, ḿbɨ ńjwítə ŋwunə.)

²⁰Payilɛlə a tséebə á mbô pó ngǎ yitsə̌ ńté ńgə́ a kə tə́ ńdoonə̂ á mə́ mɛdtə̂ nə́ Yeso.

²¹Pó pə́ ńkə́ ńjwáglə tsɔʼə jwáglə nə́ ńgə́, “Kwumtə̂ yə́, kwumtə̂ yə́!”

²²Tə á pə́ ngǎ teelə́, Payilɛlə a pɛ́lə ḿbítə ághɔ́b ńgə́, “Ńkwumtə̂ yí ńté akə̂? Ŋwu nə́ a ghɛd lə́ ə́lɛ́? Maŋ kě zə́ənə anu yətsə́ páʼə a ghɛd nə́ təmbɔʼ pə́ jwítə yí pô. Ńdaŋ ə́lɨ́d, maŋ yǐ ghɛd pə́ ə́shúmə yí ḿmɛdtə̂ yə́.”

²³Lə́ pó pə́ ńkə́ ńněe tsɔʼə něe nə́ nə́ pətə́kɔʼ pə́ ngye ńgə́ pə́ kwumtə̂ yə́, tə a pímə azóobə́.

²⁴Payilɛlə a kwéʼnə ḿbí ńdzoŋ ndzəm əzoobə́.

²⁵A mɛdtə̂ ŋwu páʼ pó kə sóŋ nə́ ńgə́ a mɛdtə̂ lə̂, á kə pə́ ḿbə́ lə́ ŋwu páʼ pə́ kə néŋ nə́ a yə́ atsáŋ ńté ńgə́ a kə maʼə̂ ajwaʼlə ḿbɨ ńjwítə ŋwu lə̂. Ḿbí ńdzoŋ ndzəm əzɔb ə́fɛ̂ Yeso á mbô pô.

²⁶Ndzaŋ pó kə lɔg nə́ Yeso ńtə́ ńgɛnə̂ lə́, ńdzə́ənə Saamun páʼ a fɛ́d nə́ á Silya lə̂, a tə́ ńkwə̂ afoonə. Pó waamə̂ yí ə́fyáalə yí ńgə́ a twáamə atǐə apagləpaglə zə̂ ńchîə á ndzəm Yeso nə́ zə́ələ́. Saamunə a kə lǒo lə́ á mə́mə aláʼ ńtíʼə ḿbəənə̂ yə́.

²⁷Ənɔ ŋwuməsɔŋ ə́ kə chîə á ndzəm yə́, ḿbá pəngyě páʼ pó nə̈ ńkyéŋ nə́ ə́fɨnə̂ ńté yə́.

²⁸Yeso sɛdnə̂ ə́sóŋə á mbô pó ńgə́ “Pəngyě pə́ Jɛlusalɛm, kɔ nə́ kyéŋ ńté pə́ mə, kyéŋ nə́ ńté məmbɨ mə́ənə́ ńkə́ ńkyéŋ ńté pɔ́ pə́ənə́.

²⁹Ńté ńgə́ ndɛd ə́ tə́ ńgyǐəə páʼ pə́ yǒ nə́ ə́sóŋ ńgə́, mbɔŋə́ yə nkyě məngyě, pó məngyě páʼ a kě nə́ kə̈ pîə pô, nə́ mbɨ́ páʼ mə́ kě nə́ mɔ́ kə̈ nɔ́ŋkə pô.

³⁰Pó yǒ tíʼə ə́sóŋə nə́ məŋnkwəənə ńgə́, wǔəə á ndu pəgə́, ə́ kə̈ ə́sóŋə nə́ məmbá ńgə́ kə́bkə áwə́gə́.

³¹Ńté ńgə́ mbɔʼ pɨ pó faʼ ndɛn mənu ghɛn nə́ atǐə yə féŋtə nə́, á yǐ ńtíʼ ḿbə́ pə́ ə́lɛ́ nə́ atǐ yə júm nə́?”

³²Pə́ nə ńdɔg mbyâŋnə yitsə́ zɛ́n pɛ̌ páʼ pó nə ḿbə́ nə́ ngaŋə́fanə ńgɛnə̂ á mə́ jwítə nə́ ághɔ́b pópə Yeso.

³³Pó nə ńgyǐ tə ńkoʼə̂ aliʼ yitsə̌ páʼ pə́ fóŋ nə́ ńgə́ Aghaglə́tûə, ńkwumtə̂ yí ə́wɨ́, ḿbá ngaŋə́fanə zə́ zɛ́n pɛ̌, táʼə á əlá apô yə tɨ, táʼə á əlá apô yí yə kwaabə.

³⁴Yeso a sóŋ ńgə́, “Tǎ, ləgnə̂ fankə əghoobə́, ńté ńgə́ pó kě jîə anu pö ghɛd nə́ pô.” Pó tíʼ ńtə́m pilə́ á mə́ ghabtə̂ nə́ ətsəʼ əpíə.

³⁵Pɨ pə́ nə ńtɨ́ ńtə́ ńnáŋə yə́, mətû mɔ́b mə̈ tûə ńnyegnə̂ yí ə́sóŋə ńgə́ “A kə̈ kwáalə pəənə, tíʼə a kwá mbɨ əjǐ páʼ təmbɔʼ a jî ńgə́ yí lə́ yi páʼ Əsê tsəʼ nə́ ńkə́ ńtúmə.”

³⁶Ngaŋə́maʼə́ntso pó fɛ́d ńgyǐ ńtíʼə ńnyegnə̂ yə́, ə́fɛ̂ məloʼ mimə tsə́g nə́ nə́ yə́,

³⁷ńtíʼə ə́sóŋə ńgə́, “Mbɔʼ gho pə́ əfo Pəjus gho chwádkə mbɨ əzo.”

³⁸Pə́ kə ŋwaʼlə̂ aŋwaʼlə ḿbanə̂ atû yí páʼ á sóŋ nə́ ńgə́ “Lɛ̌ Əfo Pəjusə.”

³⁹Táʼ ngaŋəfanə wə̂ yitsə̌ pə́ nə ńkwumtə̂ nə́ ághɔ́b po lə́ a tíʼə ńnyegnə̂ yí ə́sóŋə ńgə́, “Gho kě lə́ yi páʼ Əsê a tsəʼ nə́ lə́ pó, chwádkə mbɨ əzo ńkə́ ńchwádkə áwə́gə́.”

⁴⁰Lə́ yitsə̌ ngaŋəfanə wə̂ a sáʼə yí ə́sóŋ ńgə́, “Mbɔʼ gho kě Əsê pɔ́g páʼ pə́ tsɔ́ʼtə nə́ əsáʼ əwɛn po ndə̌ŋdəŋ?

⁴¹Á koʼnə̂ ńgə́ pɔ̌ zɨ́ ngə́ʼ ńté ńgə́ pɔ̈ kwûə lə́ nə́ ngɛdmə́nu əghɔ̂, lə́ ŋwu nə́ a pə́ ńkě anuə təpɔŋ yətsə́ ghɛd pô.”

⁴²Ḿbɨ ə́sóŋ ńgə́, “Yeso, kwúmtə mə á əghâ ándó páʼ gho kwú nə́ á mə́mə anuə nəfoonə azô.”

⁴³Yeso a kwěe yí ńgə́ “Mäŋ fiʼtə̂ a gho nə́ ndə̌ŋdəŋ ńgə́ ə́sɛ̂n pɔ̌ yǐ chîə á paladayisə.”

⁴⁴A kə pə́ á ntɨ̌numnə, mə́numə pə́gnə, ndzəmə́ ə́ wǔəə apeŋ tə ńkoʼ nə́ pəmə́nu pə́ teelə́,

⁴⁵atsəʼə́ a kə chî nə́ á mə́m tə́kɔʼndɛ̂sê á ghabnə̂ əpag pɛ̌.

⁴⁶Yeso fóŋnə nə́ tə́kɔʼ ngye ńgə́, “Tǎ, maŋ fɛ̂ ajwiə mə á mə́mə atéelə apô azô.” A kə sóŋ ə́lɨ́d lə́, ńtíʼ ńkwûə yə́.

⁴⁷Nətû nə́ ngaŋə́maʼə́ntso nə́ kə zə́ənə anu páʼ á laŋ nə́ ńtíʼə ńgóʼkə Əsê ə́sóŋə ńgə́, “Lə́ ndə̌ŋdəŋə́, ŋwu nə́ a nə ḿbə́ lə́ ŋwu yi əshîʼnə!”

⁴⁸Ŋwu ntsəm páʼ a kə chî nə́ aliʼ yi wɨ́ ńdzə́ənə anu páʼ á laŋ nə́, a kə póʼə apaʼ ńkwə̂ yə́.

⁴⁹Lə́ ŋwu ntsəm páʼ a kə jî nə́ yí, ḿbá pəngyě páʼ pó kə zoŋ nə́ yí ə́fɛ́lə Galili, pó kə tə́əmə á ndi yi sɛ ńtíʼə ńnáŋ ndɛn mənu ghɛnə́.

⁵⁰Ŋwu tsə̌ a nə ńchî ə́wɨ́ pə̈ fóŋə nə́ Jɔsɛfə, a nə ə́fɛ́d lə́ aláʼə Alimatya á mboʼ Judya. A nə ḿbə́ lə́ ŋwu yi əshîʼnə ńkə́ ńtɨ́ ndə̌ŋdəŋə́.

⁵¹A nə ḿbǎtə ḿbə́ pə́ táʼ ngaŋə́sáʼə́məsáʼ lə́, ḿbə́ ńkě kɔŋ əsêndú páʼ pɨ pɨ pə́ nə̈ əsáʼ nə̈ məsáʼ ə́wɨ́ pô, A nə ńkě kə́ ḿbímə anu pó nə̈ faʼ nə́ pô. A nə ńtə́ ḿbyáabə anuə nəfoonə Əsê.

⁵²A kə ghɛnə̂ á mbô Payilɛd ḿbítə akwûə Yeso,

⁵³ńtíʼ ńtsóokə zə́ələ́ á əsê ńdə́mə yí nə́ fúfúə apagə atsəʼ yə əshîʼnə ńnéŋə á mə́mə aghəʼ páʼ a nə ńtóŋ nə́ á mə́m ngwúb páʼ pə́ kě nə́ ŋwu tsə̌ ə́wɨ́ kə̈ néŋə pô.

⁵⁴Alě yəwə́ á nə ḿbə́ ńkə́ ḿbə́ alě achwíʼtə əpúmə, ńté ńgə́ alěláʼə́sê [13] á nə ńtə́ ḿbáatə.

⁵⁵Pəngyě pə́ páʼ pópə Yeso ə́ kə lǒo nə́ Galili lə́, pó zoŋə̂ Jɔsɛf ńgɛn ńdzə́ənə aghəʼ zə̂ ńkə́ ńjɨ́ ndzaŋə ándó akwûə yə́ noŋnə̂ nə́ ə́wə́.

⁵⁶Ńtíʼ ńkwə̂ ńtsoŋkə̂ məghɔ́d mə́ azɔ́ʼə akwub mimə azagə́ yə əshîʼnə pópə əpú náʼə á mə́ zɔ́ʼ nə́ akwûə Yeso ə́wə́, Alěláʼə́sê a nə ḿbɛn ńkoʼ lə́ pó jwitə̂ ndzaŋ páʼ noŋkə á kə nɨd nə́.