Read Awing Lukasə 3 Bible Online

Lukasə 3 - Awing bible

Lukasə 3

¹Əfo Tibelusə a nə náanə aləŋ tə ngoʼ ntsɔb tâ ə́ koʼə̂, nə́ ndɛd yi wɨ́ lə́, Pɔŋtus Payilɛlə a pə́ lə́ gɔbnɔ á Judya, Ɛlɔdə a pə́ nətûə á Galiliə, ndim əyǐ Filibə a pə́ ají nətûə á Itolya pó Təlakonitis, Lysanyasə a tíʼ ḿbə́ nətûə nə́ Abilenə,

²Ndɛlə́ ándó Anas pó Kaifasə ə́ kə pə́ nə́ pətə́kɔʼ pə́ pɨ pə́ Əsê lə̂, atséebə Əsê á yǐəə á mbô Jɔn mɔ́ Zakalya á kɔŋ yi njǔbtə.

³A tíʼ ńnyinə̂ á mə́m əlíʼ ətsəm páʼ ə́ chî nə́ ḿbáatə Nkǐ Jodanə, ə́sóŋə anǔəsê á mbô pó ńgə́, “Mɛdtə̂ nə́ mənu mə́ təpɔŋ pɨ ghɛd nə́ ńkwá nkǐə, ńjî ńgə́ Əsê a ləgnə̂ pətəpɔŋ pə́ənə́.”

⁴Ndzaŋ pə́ kə ŋwaʼlə̂ nə́ á mə́mə aŋwaʼlə Ntûsê Izaya ńgə́, “Ngye ŋwu tsə̌ ə́ tə́ fóŋnə á kɔŋ yi njǔbtə, ə́sóŋə ńgə́, Tsoŋkə̂ nə́ ndúmə á mbô Mmaʼmbîə, ghɛd nə́ əlaŋə́ ə́ tɨ́ ndə̌ŋdəŋə́ á mbô yə́!

⁵Pə́ yǐ shib lwɛ́nkə məghaʼtə mə́ nkwəənə mətsəmə, ə́ kə́ kəm məŋnkwəənə mətsəm ə́ kwɛlə̂ á ndəsê. Əlaŋə́ ətsəm ə́ ŋɔ́dtə nə́ ə́ tɨ́ ndə̌ŋdəŋə́, əlaŋə́ páʼ əpɛ́d ə́ chî nə́ ə́wɨ́, pə́ lwɛ́nkə pɨ́d ə́ pɔŋə̂.

⁶Ŋwu məsɔŋ ntsəmə a yǒ jɨ́ ndzaŋ páʼ Əsê a chwádkə nə́ pəənə.”

⁷Jɔnə a sóŋə á mbô ənɔ ŋwu məsɔŋ ə́ kə yǐ nə́ á mə́ kwá nə́ nkǐə á mbô yí ńgə́, “Ngwud mənó mə́ təpɔŋ, əwə a kwantə̂ nə́ áwɨ́ ńgə́ təmbɔʼ nə́ kə ngə́ʼ páʼ Əsê a tə́ nə́ ńgyǐəə nə́ zə́ələ́ á mbɨ pəənə́.

⁸Zə́m nə́ mənteemə́ á mə́ nɨd nə́ ńgə́ nə́ kwúblə á mə́m təpɔŋ əwəənə́. Kɔ nə́ kə́ ńtə́ ə́sóŋə ńgə́ Ablaam lə́ tǎ əwəgə́. Mäŋ ə́sóŋə á mbô pɨ ńgə́ mbɔʼ Əsê a lɔg məngɔʼ mɨ ə́sɛd pɔ́ pə́ Ablaam ə́wə́.

⁹Ndza ə́ pɛ́dtə ńchîə á nətɛ́n nə́ atǐə, ńtə́ ḿbyáabə ńgə́ atǐə atsəm páʼə á kě nə́ mənta mimə əshîʼnə zə́m pô, pə́ yǐ kə́ʼə ázɨ́d ə́ toonə̂ á mógə́.”

¹⁰Ənɔ pɨ wə̂ ə́ pítə ńgə́ “Mbɔʼ pəg ghɛd ə́lɛ́ əghâ nə́?”

¹¹Jɔnə a kwěe ághɔ́b ńgə́ “Ŋwu páʼə a túg nə́ ətsəʼ pɛ̌ a fɛ̂ táʼ nə́ ŋwu páʼ a kě nə́ yətsə́ túg pô. Ŋwu páʼə a kə́ nə́ ńtúg məjîə a fɛ̂ ŋwu páʼ a kě nə́ túg pô.”

¹²Ngaŋə́kwáalə́ nchubə aláʼ pó kə́ ńgyǐəə á mə́ kwá nə́ nkǐə, ḿbítə ńgə́, “Ndzéʼkə, mbɔʼ pəg ghɛd ə́lɛ́?”

¹³A sóŋə á mbô pó ńgə́, “Kɔ nə́ kwá nchubə aláʼ ńdaŋ ndɛn nə́ pěʼ nə́ ńchîə á mə́ kwá nə́.”

¹⁴Ngaŋə́maʼə́ntso yitsə̌ ə́ kə́ ḿbítə azɔ́b ńgə́, “Mbɔʼ pəg ghɛd ə́lɛ́?” A kwěe ághɔ́b ńgə́ “Kɔ nə́ kwá nkáb pɨ nə́ mətəənə, kɔ nə́ kə́ ńnéŋ əsóomə á atû ŋwunə, ajú pə̈ tû nə́ áwɨ́ ə́wə́ á koʼnə̂ á mbô pəənə́.”

¹⁵Ŋwu ntsəmə a kə náanə lə́, ḿbyádnə ḿbyáabə ńgə́ ngǎ pɛ̌ yi páʼ Əsê a Tsəʼ nə́ lə́ a yǐəə. Pó pə́ ńdánə ńtíʼə ńkwaŋə̂ ńgə́, “Mbɔʼ Jɔnə a pə́ pə́ yi páʼ Əsê a Tsəʼ nə́ lə́.”

¹⁶Jɔnə a kwěe ághɔ́b ńgə́, “Mäŋ fɛ̂ lə́ ndaʼ nkǐ nə́ pəənə́, lə́ ŋwu tsə̌ a pə́ ńtə́ ńgyǐəə páʼ a tsɛ nə́ mə, maŋ pěʼ ńkě koʼə̂ pə́ ŋwu páʼ təmbɔʼ maŋ kyag məŋkɛd mə́ ngwub mí pô. A yǐ fɛ̂ nkǐə Ajwǐəsê á mbô pəənə́ ə́ kə́ ə́fɛ̂ yi mógə́.

¹⁷A túg əpú pí páʼə a yǐ nə́ lɔg ə́ póʼ ndzǒ ə́wə́, ə́tsɛntə̂ ndzǒ zə́ ə́ ghɛn néŋə á mə́m nkye məjî əjǐə, lə́ pə́ ə́ tɔ əkwub əpíə á mə́m móg páʼ ə́ láʼ nə́ kě pə́gnə pô.”

¹⁸Jɔnə a kə́ ńtə́gtə pɨ pəwɨ́ nə́ məndú mimə nɨ́ nə́ ə́fɛ̂ nkɨ yi əshîʼnə á mbô pó.

¹⁹Jɔnə a kə kwantə̂ Ɛlɔd páʼə a nə ḿbə́ nə́ nətû, ńté ńgə́ a kə kwáalə Ɛlɔdyas páʼə a pə́ nə́ ngwě ndim əyǐ ḿbɨ ńkə́ ńté mənu mə́ təpɔŋ mimə nɨ́ nə́ páʼə a kə̈ ghɛd nə́.

²⁰Ɛlɔdə a kə waamə̂ Jɔn ńnéŋə atsáŋə, ḿbegə̂ təpɔŋ ghɛnə́ á ndu pətəpɔŋ píə.

²¹Ndzaŋ ŋwu ntsəmə a kə kwá nə́ nkǐ lə́, Yeso a kə́ ńkwá əyíə. Əghâ ándó a kə tə́ nə́ ńchaʼtə́sê, nəpó nə́ ŋáʼnə,

²²ajwǐəsê a tsóolə á mbɨ yə́, ńchî lə́ ándó alúʼə, ngye yitsə̌ ə́ fɛ́lə á nəpó ńgə́, “Gho lə́ móonə mə páʼ maŋ kɔŋ nə́, mbəəmə mə ə̈ pɔŋə̂ ńté gho.”

²³Yeso a kə chúʼə á mə́ faʼ nə́ afaʼə ají páʼə a kə pə́ nə́ ándó ngoʼ məghə́m mɛ́n teelə́. Pə́ kə lɔg ńgə́ Yeso a nə́ ḿbə́ lə́ mɔ́ Jɔsɛfə. Jɔsɛfə a pə́ mɔ́ Eliə.

²⁴Eliə a pə́ mɔ́ Matalə, Matalə a pə́ mɔ́ Lebi. Lebi a pə́ mɔ́ Melkiə. Melkiə a pə́ mɔ́ Janai. Janai a pə́ mɔ́ Jɔsɛfə,

²⁵Jɔsɛfə a pə́ mɔ́ Matatyasə, Matatyasə a pə́ mɔ́ Amosə, Amosə a pə́ mɔ́ Naumə, Naumə a pə́ mɔ́ Esli, Esli a pə́ mɔ́ Nagai.

²⁶Nagai a pə́ mɔ́ Maat, Maat a pə́ mɔ́ Matatyasə, Matatyasə a pə́ mɔ́ Semein, Semein a pə́ mɔ́ Josek, Josek a pə́ mɔ́ Juda,

²⁷Juda a pə́ mɔ́ Joananə, Joananə a pə́ mɔ́ Lesa, Lesa a pə́ mɔ́ Zelubbabelə, Zelubbabelə a pə́ mɔ́ Shealtielə, Shealtielə a pə́ mɔ́ Neli,

²⁸Neliə a pə́ mɔ́ Melki, Melkiə a pə́ mɔ́ Adi, Adi a pə́ mɔ́ Kosamə, Kosamə a pə́ mɔ́ Emadamə, Emadamə a pə́ mɔ́ El,

²⁹Elə a pə́ mɔ́ Joshwa, Joshwa a pə́ mɔ́ Eliezel, Eliezel a pə́ mɔ́ Jolim, Jolimə a pə́ mɔ́ Mattat, Mattatə a pə́ mɔ́ Lebi,

³⁰Lebiə a pə́ mɔ́ Simeon, Simeonə a pə́ mɔ́ Juda, Juda a pə́ mɔ́ Josebə, Josebə a pə́ mɔ́ Jonamə, Jonamə a pə́ mɔ́ Elyakimə,

³¹Elyakimə a pə́ mɔ́ Melea, Melea a pə́ mɔ́ Menna, Menna a pə́ mɔ́ Matata, Matata a pə́ mɔ́ Natanə, Natanə a pə́ mɔ́ Debilə,

³²Debilə a pə́ mɔ́ Jese, Jese a pə́ mɔ́ Obelə, Obelə a pə́ mɔ́ Boaz, Boazə a pə́ mɔ́ Sala, Sala a pə́ mɔ́ Nashonə,

³³Nashonə a pə́ mɔ́ Aminadabə, Aminadabə a pə́ mɔ́ Adminə, Adminə a pə́ mɔ́ Alni, Alniə a pə́ mɔ́ Ezlonə, Ezlonə a pə́ mɔ́ Pelez, Pelezə a pə́ mɔ́ Juda,

³⁴Juda a pə́ mɔ́ Jekɔbə, Jekɔbə a pə́ mɔ́ Azig, Azigə a pə́ mɔ́ Ablaamə, Ablaamə a pə́ mɔ́ Tela, Tela a pə́ mɔ́ Naol,

³⁵Naolə a pə́ mɔ́ Selug, Selugə a pə́ mɔ́ Leu, Leu a pə́ mɔ́ Peleg, Pelegə a pə́ mɔ́ Ebel, Ebelə a pə́ mɔ́ Shela,

³⁶Shela a pə́ mɔ́ Kainanə, Kainanə a pə́ mɔ́ Alfazad, Alfazadə a pə́ mɔ́ Shemə, Shemə a pə́ mɔ́ Nwâ, Nwâ a pə́ mɔ́ Lamek,

³⁷Lamekə a pə́ mɔ́ Metusela, Metusela a pə́ mɔ́ Enok, Enokə a pə́ mɔ́ Jaled, Jaledə a pə́ mɔ́ Maalalel, Maalalelə a pə́ mɔ́ Kenan,

³⁸Kenanə a pə́ mɔ́ Enosh, Enoshə a pə́ mɔ́ Set, Setə a pə́ mɔ́ Adamə, Adamə a pə́ mɔ́ Əsê.