Read Awing Lukasə 4 Bible Online

Lukasə 4 - Awing bible

Lukasə 4

¹Yeso a fɛ́lə á ntsǒnkǐ Jodanə Ajwǐəsê a lwɛ́nkə yə́, ńdɔgə̂ yí ńgɛnə̂ á kɔŋ məŋkwâʼlə̌,

²A chî ə́wɨ́ nə́ əlěmbî məghə́m nəkwa Dɛbəələ a kwaʼlə̂ yə́. Nə́ əlě pɨd pə̂, a kě ajûtsə́ jî pô, əlě pə wɨ́ ə́ měe nji ə́ záŋə yə́.

³Dɛbəələ a sóŋə á mbô yí ńgə́, “Təmbɔʼ gho pə́ mɔ́ Əsê, ghɛd məngɔʼ mɨ mə́ sɛlə̂ apéenə məkálə́.”

⁴Yeso a kwěe yí ńgə́, “Aŋwaʼlə Əsê á sóŋ ńgə́ ŋwunə a kě á mbî chî ńté lə́ tsɔʼə apá pô.”

⁵Tsɔʼə əghâ yi wɨ́, Dɛbəələ a tíʼ ńdɔgə̂ yí ńkɔ́ʼ ńgɛnə̂ á ndu nkwəənə ńnəələ̂ yí nə́ məfɔ mə́ ndu mbî tsɔʼə mətsəmə.

⁶Ńtíʼ ə́sóŋ nə́ yí ńgə́, “Maŋ yǐ fɛ̂ mətɨ mɨ mətsəm nə́ gho pópə afoʼ zəənə́. Pə́ nə ḿbɛ́dtə ə́fɛ̂ pə́ələ́ á mbô maŋə, mbɔʼ maŋ kə́ ə́fɛ̂ á mbô ŋwu ntsəm páʼ maŋ kɔŋ nə́.

⁷Maŋ yǐ fɛ̂ pɨ́d ətsəmə á mbô gho, mbɔʼ gho ghóʼkə mə.”

⁸Yeso a kwěe yí ńgə́, “Aŋwaʼlə Əsê á sóŋ ńgə́, ‘Ghóʼkə tsɔʼə Mmaʼmbî páʼə a pə nə́ Əsê əzo, ńkə̈ faʼə̂ tsɔʼə á mbô yə́.’ ”

⁹Dɛbəələ a lɔgə̂ yí ńgɛnə̂ á Jɛlusalɛmə, ńkɔ́ʼkə yə́ á ndu nəloŋ nə́ Tə́kɔʼndɛ̂sê, ə́sóŋ nə́ yí ńgə́, “Mbɔʼ gho pə́ mɔ́ Əsê,” lǒo atǐə á aliʼə́ nə́ ńgwǔəə á əsê?

¹⁰Ńté ńgə́ aŋwaʼlə Əsê á sóŋ ńgə́, “A yǐ tú pətseŋpə́ndɛ̂ pí pó pyáabə gho,

¹¹Ńkə́ ə́sóŋ ńgə́ pó yǐ ŋáŋkə gho á atǐ nə́ mbô mɔ́b ńjî ńgə́ kɔ gho tô akoolə azô nə́ ngɔʼə.”

¹²Yeso a kwěe yí ńgə́, “Aŋwaʼlə Əsê á kə́ ə́sóŋ ńgə́, ‘Kɔ gho kwaʼlə̂ Mmaʼmbî páʼ a pə́ nə́ Əsê əzo.’ ”

¹³Əghâ ándó Dɛbəələ a kə məgtə̂ nə́ á mə́ kwaʼlə̂ nə́ Yeso nə́ ndu ntsəm lə́, ḿmɛdtə̂ yí ńtə́ ḿbyáb ndɛd yi ndaʼə.

¹⁴Yeso a pəənə̂ á Galili nə́ mətɨ mə́ Ajwǐəsê. Atséebə á nə ńnyi ńté yə́ á mə́mə aláʼə atsəmə.

¹⁵A zéʼkə á mə́m məndɛ̂ mə́ Əsê mə́ pəjusə, ŋwu ntsəmə a ghóʼkə yə́.

¹⁶Yeso a pəənə̂ á Nazalɛlə páʼə a kə kwéŋ nə́ ə́wə́, Alěláʼə́sê á koʼ a ghɛnə̂ á ndɛ̂sê Pəjusə ándó a ghə́ pěʼ nə́ ńgɛnə̂, ńdǒo á əsê á mə́ fóŋ nə́ aŋwaʼlə Əsê.

¹⁷Pə́ fɛ̂ aŋwaʼlə ntûsê Izaya á mbô yə́, a ŋáʼə aliʼ pə́ ŋwaʼlə̂ nə́ ə́wɨ́ ńgə́,

¹⁸“Ajwiə Mmaʼmbîə a chîə á mbɨ maŋə ńté ńgə́ a tsɔʼə mə ńgə́ maŋ yǐ ńnáŋkə nkɨ yi əshîʼnə á mbô pəpóŋə, ə́fóg ngaŋə́tsáŋ ḿbɨ ńgɛd pəfəg pə́ jɨ́ əliʼə́, ńkə́ ńgɛd pə́ mɛdtə̂ pɨ pə̈ wágə ághóobə́

¹⁹ńkə́ ə́fiʼtə̂ ńgə́ ndɛd ə́ koʼ páʼ Mmaʼmbîə a yǐ nə́ kwá pɨ píə.”

²⁰A sóŋ ə́lɨ́d lə́ ńtíʼ ḿbáatə aŋwaʼlə yə wɨ́, ə́fɛ̂ á mbô ŋwunə a faʼ nə́ á ndɛ̂sê yi wə́, ńtíʼ ńnáanə yə́ á əsê. Əmə́g mətsəmə á mə́m Ndɛ̂sê Pəjusə mə́ nə ńtə́əmə á mbɨ yə́.

²¹A tíʼ ńchúʼə á mə́ sóŋ nə́ á mbô pó ńgə́, “Ndzaŋ nə́ zóʼ nə́ lə́, anuə atsəm pə́ nə ŋ́ŋwaʼlə̂ nə́ á mə́mə aliʼə́ aŋwaʼlə jɨ á lɔgə̂ aliʼ ə́sɛ̂nə̌.”

²²Á nə ńkɨʼnə̂ ŋwu ntsəm nə́ ətsáb pə əshîʼnə ə́ fɛ́d nə́ á ntso yə́, ŋwu ntsəmə a tíʼə ńtsáb əshîʼnə ńté yə́, ḿbítə ńgə́, “Lɛ̌ kě mɔ́ Jɔsɛf pô?”

²³Yeso a sóŋə á mbô pó ńgə́, “Maŋ jî ńgə́ pɨ yǐ tséebə atséebə́nə́múʼ zəənə́ á mbô maŋ ńgə́, ‘Ntsóʼ pɨ tsóʼ əzo mbəəmə. Faʼə̂ á mə́mə aláʼ pɨ ndzaŋ pəg kə zóʼ nə́ ńgə́ gho faʼə̂ á mə́m Kapanawum lə̂.’ ”

²⁴Yeso a peg ńgə́, mäŋ fiʼtə̂ áwɨ́ lɛ̌ nə́ ndə̌ŋdəŋ ńgə́ ntûsê yitsə̌ a kě ə́wɨ́ chî páʼ pə́ pí nə́ yə́ á mə́mə aláʼ pó pô.

²⁵Jwə́ʼtə nə́, mäŋ fiʼtə̂ áwɨ́ nə́ ndə̌ŋdəŋ ńgə́ pəkog pə́ pəngyě pə́ kə nə́ənə á mə́mə aláʼə Islɛl nə́ ndɛd Elayija, əghâ ándó mbəŋ nə ńkě nə́ lô pô nə́ ngoʼ zə̂ zɛ́n teelə́ nə́ akəm lə́, nji kə chaanə̂ á mə́mə aláʼə atsəmə.

²⁶Lə́ pə́ pə̂ ńkě Elayija á mbô ŋwu əghɔb yitsə̌ tú pô, tə ńdéʼtə nkog məngyě yitsə̌ páʼ a kə chî nə́ Zelefat, á əlá aláʼ Sidɔnə.

²⁷Ngǎŋnkaʼ ə́ nə ńnə́ənə Islɛl nə́ ndɛd páʼ Elisha a nə ḿbə́ nə́ ntûsê, lə́ pə́ pə̂ ńkě yitsə̌ tsóʼ pô tə ńdéʼtə Neeman páʼə a nə́ ə́fɛ́d nə́ á Sylya.

²⁸Ŋwu ntsəm páʼə a kə chî nə́ á ndɛ̂sê Pəjus ńdzóʼə anu yəwə́ a nə ńdzáŋ ndě.

²⁹Pó lǒo á əsê ə́soŋə̂ yí ə́fógə á mə́mə aláʼ, ńdɔgə̂ yí ńgɛnə̂ á nkaŋ nkəŋə́ á nkwəənə pə́ nə ḿbɔ́ nə́ aláʼə azɔ́b ə́wə́ á mə́ kabkə̂ nə́ yə́ á mbéenə.

³⁰Lə́ a pə ńdaŋə̂ á məsa pó ńgɛnə̂ yə́.

³¹Yeso a tsó ńgɛnə̂ Kapanawum páʼə á nə́ ḿbə́ nə tə́kɔʼə aláʼ yitsə̌ á mə́m Galili lə̂, Alěláʼə́sê á koʼə̂, a chúʼə á mə́ zéʼkə nə́ pəənə.

³²A nə ńkɨʼnə̂ a ŋwu ntsəm nə́ ndú páʼ a nə ńdzéʼkə nə́ ə́wɨ́, ńté ńgə́ atséebə yə́ kə túg mətəənə.

³³Ŋwu tsə̌ a kə chîə á mə́m ndɛ̂sê Pəjusə páʼə a kə túg nə́ ajwiə pɛ̌sê yi təpɔŋə á mə́m yə́. A nə ńkyéŋ nə́ mɛ́ ngye ńgə́,

³⁴“Wə̌ə! Yeso páʼə a fɛ́d nə́ Nazalɛd, gho loonə̂ lə́ akə̂ á mbô pəgə́? Gho yǐ lɛ á mə́ tsəŋkə̂ nə́ áwə́g? Maŋ jîə ŋwu páʼ gho pə́ nə́ wə́ələ́, gho lə́ ŋwu Əsê yí ŋwaʼ nə́.”

³⁵Yeso a tsáb nə́ mətɨ ńgə́, “Naʼə̂, laŋ ə́fɛ́lə á mbɨ yə́!” Pɛ̌sê wə̂ a tsɔ́ʼə ŋwu wə̂ ńtə́mə á ndəsê á mbi ŋwu ntsəmə, ńtíʼ ə́fɛ́lə á mbɨ yí tsɔʼə tə néŋə alɔʼ yətsɨ́ nə́ yə́.

³⁶Á nə ńkɨʼnə̂ ŋwu ntsəmə, pó tíʼə ə́sóŋə á mə́m pó ńgə́, “Lɛ̌ zə́ənə́ ndzaŋ ndzeʼkə́? A sáʼ nə́ mətɨ ńgə́ ajwiə təpɔŋə á laŋ ə́fɛ́d, á kə ńdzóʼnə yə́.”

³⁷Atséebə á kə nyinə̂ á mə́mə aláʼə atsəm ńté anu páʼ Yeso a kə ghɛd nə́.

³⁸Yeso a fɛ́lə á ndɛ̂sê Pəjusə ńgɛnə̂ á ndɛ̂ Saamunə. Ngəm Saamunə a kə chî nə́ əfə́g yi tyantə̂ nə́. Pó sóŋ nə́ Yeso ńgə́ a kwáalə yə́.

³⁹A ghɛn ńtɨ́ ḿbáatə əkwu əyí, ə́sóŋ ńgə́ əfə́g yi wɨ́ ə́ fɛ́lə á mbɨ yə́, ə́ kə́ fɛ́lə. A kə́ ńtɔ́g ńdǒo á ndəsê ńchwáakə á mə́ tád nə́ ághóobə́.

⁴⁰Ndzaŋ mə́numə á kə tə́ nə́ ḿmɛ́lə lə́, pə́ lɔg pɨ pə̈ ghɔ nə́ ńgyǐ nə́ pə́ələ́ á mbô Yeso, pɨ pə̈ ghɔ nə́ tsɔʼə nə́ ndzaŋə apə́ŋə aghɔ ntsəmə, a noŋkə̂ apô yə á ndu ŋwu ntsəmə a yáŋə.

⁴¹Pɛ̌sê pə́ nə ńkə́ ə́fɛ́dkə á mbɨ pɨ pi nɨ́ nə́, ńtíʼə ńkyéŋə ə́sóŋə ńgə́, “Gho lə́ mɔ́ Əsê.” Yeso a pə́ ńnaʼkə̂ ághɔ́b ńkě pí ńgə́ pó tsáb pô, ńté ńgə́ pó nə ńjî ńgə́ yí lə́ Klisto.

⁴²Á nkyakə̂ apeŋ, Yeso a fɛ́d ńgɛnə̂ aliʼ ŋwunə a kě nə́ ə́wɨ́ chî pô. Pɨ pə́ chúʼə á mə́ chwa nə́ yí tə ńgyǐ ńdzə́ənə aliʼ páʼə a chî nə́ ə́wɨ́ ńkě pɨ ńkɔŋə̂ á mə́ mɛdtə̂ nə́ yə́ á ghɛn pô.

⁴³Yeso a sóŋə á mbô pó ńgə́, “Maŋ yǐ shib náŋkə nkɨ yi əshîʼnə ńté anuə nəfoonə Əsê á mbô pətsə́ əláʼə, ńté ńgə́ lə́ anu pə́ nə ńtú nə́ mə ńgə́ maŋ yǐ faʼə̂.”

⁴⁴A tíʼ ńgɛn nə́ mbiə á mə́ sóŋ nə́ anǔəsê á mə́m məndɛ̂ mə́ Əsê mə́ Pəjusə á mə́m Judya.